5
ዱርዛን ጻጽንትደ ማጻፍዛ
1 ይንፓ ሱባ፥ አራትዘላ አፋ በትዳይ ምዛቅ ኩሸራ ጋንጨራን ካታራ ጻፍንትደ ላፑን ማታመራ ጎርዱንትደ ጻጽንትደ ማጻፈ ብእዳ።
2 ፈቲ ምንꬅ ኪታንችዘ ፋ ቃልቶ ꬎቅ ዪዚ፥ «ማህታምዛ ብሎደስን ማጻፍዛ ቡጎደስ ዳንዳእዘ ኦደ?» ያጋእ አዋጆደራ ብእዳ።
3 የዝን ሳሎ ማቅን ሳአ ዎይ ሳአፓ ኦሞራ ማቅን የ ጻጽንትደ ማጻፍዛ ብሎደስን ጋንጭቶ በአደስ ዳንዳእዘ ኦደን በንትካያ።
4 ጻꬅ ማጻፍዛ ብሎደስን ኤ ጋንጭቶ በአደስ ቤዝዘ አስ በንትካይዘ ግሾ ታ ጋማ ዬክዳ።
5 ዬዝን፥ ጭሙንꬃፓ ፈታይ ታጎ፥ «ዬክፐ! ይኬ፥ ይሁዳ ባጋ ማቅደ ጋሞ፥ ዳዉተ ኮች፥ ላፑን ማህታምቶ ብሎደስን ማጻፍዛ ቡጎደስ ዳንዳአነ» ጋይዳ።
6 ይንፓ ሱባ፥ ሹክንትደ ዱርዛይ አራትዘላ፥ ኦይዲ ሸምፖራ የዘ መቱንꬅስን ጭሙንꬅስ ግዳ፥ ኤቅዳያ ብእዳ። ኤስ ላፑን ጉሙርን ላፑን አፉንꬅ የነ። የንስ አላመ ኡባስ ኪትንትደ ጾዘ ላፑን አያኑꬃና።
7 የ ዱርዛይ Ꮉንግ፥ አራትዘላ አፋ በትዳይ ምዛቅ ኩሸፓ ጻጽንትደ ማጻፍዛ ኤክዳ።
8 ኤ የ ጻጽንትደ ማጻፍዛ ኤክደ ዎደ ኦይዲ ሸምፖራ የዘ መቱንꬅስን ላምእታም ኦይዲ ጭሙንꬅ ዱርዘ ቲኖ ጎልእዳ። ኡን ፈተ ፈተ ዲꬅን ጌሹንꬅ ዎሳ ማቅደ እጻነ ኩምደ ዎርቃ ሻተ አይክዳ።
9 ኡን፥
«ጻጽንትደ ማጻፍዛ ኤኮደስ፥
ማህታምዛ ብሎደስ ኔስ ቤዛነ።
አኮስ ጋይኮ፥ ኔኒ ሹክንትዳ፤
ኮች ኡባፓ፥ ዱማ ዱማ ዶናፓ፥
ኮቹንꬃፓ ካእቱሞ ኡባፓ
ነ ሱꬅተ ጾዝስ ዎዝዳ።
10 ኡን ኑ ጾዘ አደስ ኦቾደ ፋና
ኡንታና ካህኑንꬅ ካእቱሞ ማህዳ።
ኡንትን ሳአ ኡባ ካእቶዳ»
ያጋእ ክለ ማዝሙረ የጽዳ።
11 ታ ብእደ ዎደ ሙኩል ቶሄ ሙኩልን ታጶ ሙኩል ቶሄ ታጶ ሙኩል ማቃደ ኪታንቹንꬅ ኦꬅ ስእዳ። ኡንትን አራትዘስ፥ ኦይዲ ሸምፖራ የዘ መቱንꬅን፥ ጭሙንꬅ ካንቶ ዉትዳ።
12 የንꬅ ኪታንቹንꬅ ꬎቅ ጋይደ ቃላራ፥
«ሹክንትደ ዱርዛይ ዎልቃ፥ ዱርቱሞ፥
ጭንጫትꬅን ምንꬅትሞ፥
ቦንቾ፥ ሳባን ጋላታ ኤኮደስ ቤዛነ»
ጋይዳ።
13 ይንፓ ሱባ፥ ሳአን፥ ሳሎ፥ ሳአፓ ኦሞራ አባ ግዳ የዘ መትꬅ ኡባ፥
«አራትዘላ አፋ በትዳይስን ዱርዘስ፥
ጋላታ፥ ቦንቾ፥ ሳባን ዎልቃ
መꬊ መꬍናስ ማቀ»
ጋእ የጾደራ ስእዳ።
14 ኦይዲ ሸምፖራ የዘ መቱንꬅ፥ «አምንኤ» ያጋይዳ፤ ማህ ጭሙንꬅ ስኖራ ዙጊ ጎይንዳ።