3
Yesuusa Museppa kattara
1 Yinnii gisho, Xoozii xeegide geeshi ishuntso, nu ammanora Laatstso ga7i xeegize hawaaren kahinunts hyalaqa Yesuusa bo7ote.
2 Muse Xoozze Keetstsa ubba ammaninttidanni fana Yesuusan fana dooride Xoozzes ammaninttidaya.
3 Keetstsi keexizay keetsitifa aadhii bonchchinttizanni fana Yesuusa Museppa aadhize bonchcho ekkodes beezane.
4 Feta feta keetsiza keexide asi yene, yezin ubbanno giigizide Xoozii.
5 Muse Xoozze Keetstsa ubbanne ammaninttide aro maaqqii, Xoozii tiinoppa gawudebazis markka maaqqida.
6 Yezin Kiristtoosa Xoozze Keetsite na7a fana ammaninttidaya. Nuunii ekkoda ga7i naagize ufaysito mintsii naagiko Xoozze keetstsi maaqqane.
Xoozze asis yeze shemppo
7 Yinnii gisho, Geeshi Ayyaana gaazanni fana,
«Hyayno yin Xoozii gaazanno si7ize wode
8 akko baayze sa7a fattanize qamma,
yin aduntsi gene hyanttidanni fana,
yin wozintto mintsippete.
9 Yin aduntsi tana fattanida;
oyttam bere ta oochito bi7ida.
10 Yinnii gisho, ta yentsi yeletuntsana kacci,
‹Un ubba wode fa wozintte balane;
ta ogito erikaaya› yagayda.
11 Yinnii gisho, taanii zhilora caaqqii,
‹Ta shemppo besito mulon geloos› yagayda»
yagaane.
12 Ta ishuntso, yinttappa ooden, de7o Xoozzeppa yinttana shaakkize iitan ammanoose wozina yezaame gaar naaginttote.
13 Yinttappa ooden nagara balitsin, fa wozintto mintsaame gaar «Hyayno» ga7intti xeeginttodera qammite qammite fete fetera zorinttote.
14 Nu tiino ammantto nuunii wurssutsi yellodes mintsii naagiko, Kiristtoosara wolla shaakkinttizuntsana.
15 Geeshi Maxaafite,
«Hyayno Xoozii gaazanno yin si7ize wode
ye wode un cubbora hyanidanni fana,
yin wozintto mintsippete»
yagayda.
16 Xoozii gaazebaz si7i cubbudhiduntsi oode? Muse Gibxxeppa kaalitsi kesside ubbuntsana.
17 Xoozii oyttam bere oona kaccido? Nagara oochchiduntsanan un ahita akko baayze sa7a wodhdhii attide asuntsana baane?
18 Mahi Xoozii, «Ta shemppo besito geloos» yaga7i caaqqidanna, ees kiitinttanxide asuntsana baane?
19 Yikke, un yinna shemppo besito gelanxidanna ammanikaayze gisho maaqqidanno nu be7ine.