5
1 Fettii fettii kahinunts hyalaqa asunts giddappa doorintti, Xoozara yeltsize baza as gisho imon nagara zharsho zharshodes shuumunttane.
2 E fa ommite labbitsi maaqqide gisho eroosuntsisin balinttiduntsis yiqsinttodes dandda7ane.
3 E fa nagara gishon as ubba nagara gisho zharsho zharshodes beezanna yinnisi.
4 Ooden hyanna bonchchito faas ekkodes dandda7oos, yezin Aarona kahinunts hyalaqa maaqqades xeeginttidanni fana Xoozara xeeginttodes beezane.
5 Yinnii fana, Kiristtoosa kahinunts hyalaqa maaqqize bonchchito faas ekkikaaya. Yezin Xoozii eza,
«Neenii ta Na7a.
Hyayno ta nees Ade maaqqida»
yagayda.
6 Mahi melle bessa,
«Malkkexaadiqe kahine shuuma maaqqidanni gaara,
neenii medhinas kahine maaqqada»
yagayda.
7 Yesuusa asi maaqqii hyanna alamite yeze wode fana hyayqoppa ashshodes dandda7ize Xoozza gaama yeeforan afutstsara woossida. E, Xooz bonchchii kiitinttide gisho Xoozii E woosito si7ida.
8 Yesuusa Xoozze Na7a maaqqikon ekkide madhite kiitintte tamaarida.
9 Yinnen, Yesuusa fa oochito folidannippa suuba faas kiitinttize ubba medhina atotitsi demmade fana oge maaqqida.
10 Yinnan Xoozii Malkkexaadiqe shuuma fana kahinunts hyalaqa mahi eza shuumida.
Ammanora labbaame fana ingginttide naagize
11 Hyanna nu ohitilla afa gujjii ohodebaz gaama bazi yene, yezin yin qoftta eeratsi maaqqide gisho yinttis ohi geltsodes waayitsane.
12 Yin hyannii wode asttamaare maaqqades beezane, yezin Xoozze qaala tiino timirtte yinttana mahi tamaarssize melle asi koshshane. Yin mintsii katstsa maades dandda7oose gisho maatsi koshshane.
13 Maatsi shichinttize ooden zhooga na7a maaqqide gisho lo77on iita shaakkii eroos.
14 Yezin mintsii katstsa koshshize lo77on iita shaakkize era yeze wozinaama asis.