13
Cóq Inha Cammáng Ticuoi Sút
1 Cóq cứp náq inha peh parnai máh ticuoi sút inha tớq pang ndô. Lư Yang Arbang-pilŏ́ng táp chóh ticuoi ngki dyôn cơt sút. Khán Yang Arbang-pilŏ́ng lớiq rêh, ticuoi ngki lớiq têq cơt sút.
2 Iki, khán ticuoi mmo lớiq ính peh parnai ticuoi sút, la arớq án lớiq ính peh parnai Yang Arbang-pilŏ́ng. Ticuoi ngki, lư tumúh a-ưi callong dieiq arức.
3 Yang Arbang-pilŏ́ng lớiq chóh ticuoi sút dyôn táq tôt ticuoi táq arnáq ŏ. Ma án chóh ticuoi sút dŏq parap ticuoi táq arnáq thét. Khán inha lớiq ính ticuoi sút paclieq inha, cóq inha táq arnáq ŏ. Iki máh ticuoi sút ính ngin inha la ticuoi ŏ.
4 Co ticuoi sút ngki táq arnáq dyôn Yang Arbang-pilŏ́ng, arnáq nha-án cơt tarnáp dyôn inha. Ma khán inha táq arnáq saq, inha cóq adáh ticuoi ndon sút inha, co nha-án têq táq inha. Yang Arbang-pilŏ́ng dyôn nha-án bôn chức têq paclieq ticuoi táq arnáq saq.
5 Iki cóq inha peh máh ticuoi sút, ma inha êq peh nha-án co inha adáh ngai paclieq, ma cóq inha peh co inha chom callong ndô la ŏ.
6 Muchứng ngki tưi, cóq inha dyôn práq thêq nga ticuoi sút; nha-án ráp práq ndô la co nha-án táq arnáq Yang Arbang-pilŏ́ng.
7 Iki, inha cóq dyôn cứp náq bôn ráp máh nốh piaiq nha-án cóq ráp. Khán piaiq inha dyôn práq thêq, ngki inha dyôn. Khán piaiq inha dyôn crơng ngai chát, ngki inha dyôn crơng ngki. Khán piaiq inha dyám náp, ngki inha dyám náp. Khán piaiq inha ayô, ngki inha ayô.
Callong Pưt Clưi Nhéq Te Cannŏ́h La Amoih Yớu
8 Cua inha culieh nhéq máh nốh inha tu, inha nnáng tu mui nốh. Nốh ngki la cóq inha munáq amoih munáq. Ticuoi mmo amoih yớu, ticuoi ngki táq veng phep rit Yang Arbang-pilŏ́ng khoiq dyôn na Môi-se.
9 Yang Arbang-pilŏ́ng khoiq patáp idô:
“Êq láh parlưi.
Êq cachet ticuoi.
Êq titôiq.
Êq ham crơng.”
Máh callong patáp ndô, alứng máh callong cannŏ́h hơ ndon Yang Arbang-pilŏ́ng khoiq patáp, lư cơt mui callong sớng. Khán he peh callong patáp ndô, he lư peh cứp callong patáp cannŏ́h hơ. Callong patáp pưt clưi nhéq te cannŏ́h la idô: Cóq inha amoih yớu arớq inha amoih cháq inha bôm.
10 Ticuoi mmo lư amoih yớu, ticuoi ngki lớiq nai táq saq ada yớu. Iki, khán he amoih yớu, he lư peh cứp callong Yang Arbang-pilŏ́ng patáp.
11 Cóq he catóng táq arnáq ngki, co he chom tumán ính tớq ingái Yê-su dyôn he ngốh te cuteq ndô. Co ingái ngki tumán hơn te ingái he tamme tin. Iki, cóq he át téng-béng níc ngcong ingái ngki.
12 Êq táq nnáng arnáq tớq pang ndô. Arnáq ngki la arớq ngai táq tớq idáu. Ma hoi-ndô tumán ính tớq ingái Yê-su tớq lieh nga cúc cuteq ndô. Ndô la arớq tumán ang iláih. Iki, cóq he táh nhéq máh arnáq ngai báq táq tớq ntúq ngiau. He táq máh arnáq Yang Arbang-pilŏ́ng dyôn he táq sớng. Arnáq ngki la arớq he ial tớc crơng pla ndon ngai báq tớc tớq ntúq ang.
13 Cứp arnáq he táq, la cóq he táq ŏ arớq ticuoi táq tớq ntúq ang. Táq iki, he lớiq adáh ticuoi cannŏ́h hôm máh arnáq he táq. Inha êq ngoiq cha bui dŏq táq lớiq ŏ. Êq ham ngoiq crơng bol. Khán tới campái cayieq êq bíq munơi. Êq táq arnáq tanghang. Êq tarluaih. Alứng êq i-ôiq camíq.
14 Ma cóq inha seq Yê-su Crit Ưlla inha kiaq me mít cannính inha. Alứng inha êq parngíh nnáng ính veng ngê saq arớq mít inha ính.