13
Jeremaya Wear Nika
1 God tell mi, “Go buy and wear one short nika wey dem make with linen and make yu nor wosh am.”
2 So, I kon go buy and wear am just as Oga God tok.
3 Den God tell mi again sey,
4 “Di short nika wey yu buy and wear so, pul and take am go Perat. Dig and hide am for one hole wey dey di rock near Eufrates River.”
5 So I kon go hide am for Perat just as Oga God tok.
6 Afta, God kon sey, “Go back go kollect di short nika for where yu beri and hide am put.”
7 So I go di place kon dig di nika kom out, but I notis sey di nika don skata and tear well-well.
8 Den God tell mi,
9 “Na so I go take distroy Judah and Jerusalem pipol pride.
10 Dis wiked pipol nor gri obey mi. Dem dey follow dia sturbon and wiked heart kon dey woship and serve oda gods. So dem go bi like dis nika wey nor get value again.
11 Just as nika fine and dey tight pesin for waist, na so I wont make Israel and Jerusalem pipol whole mi tight. So dat dem go bi my pipol wey go dey praiz and honor my name; but dem nor gri obey mi.”
12 Di Oga wey bi Israel God kon tell mi, “Jeremaya, if yu tell Israel pipol make dem pour wine full dia wine pot, dem go ansa yu, ‘Yes! Wi know sey wine suppose full awa pot.’
13 Den, yu go tell dem, ‘All di pipol wey dey dis land, God go give dem wine drink until di wine don katch dem: both di kings wey kom from David family, di priests, profets and all Jerusalem pipol.’
14 E go skata dem like pot wey fall press each oda kon break. Na so too shidren go bi to dia papa and mama. I nor go pity or sorry for dem. I must distroy dem and nor-tin go fit stop mi.”
God Warnin
15 Den I tell Israel pipol,
“God don tok!
So make una dey honbol and listin to am!
16 Make una respet di Oga una God,
before E go bring darkness
wey go make una kick stone fall on-top mountins!
Make una respet am,
before E go turn una lite to darkness.
17 But as una nor gri listin,
I dey kry for sekret,
bikos of una pride;
I go kry well-well till I nor fit kry again,
bikos dem don karry God pipol go as slave.”
18 God tell mi,
“Make yu go tell di king and en mama sey,
make dem komot for di throne,
bikos dia fine crown don fall
komot for dia head.
19 Enemies don surround Judah town wey dey sout
and nobody go fit enter or go outside.
Dem go karry evribody for Judah go as slave.”
20 Jerusalem pipol, make una si,
una enemies dey pass nort dey kom!
Where di pipol wey dey kare for una,
di pipol wey make una dey proud?
21 Wetin una go tok wen di pipol wey una bin tink
sey bi una friends katch,
distroy and kon dey rule una?
E go pain una
like woman wey won born?
22 And wen una ask, “Wetin make all dis tins
dey happen to us?
Why dem tear awa klot komot from awa body
kon trit us like ashawo?
Na bikos of sin?”
Yes! Na bikos una don sin.
23 Black man fit shange en skin kolour,
abi leopard fit komot di mark wey dey en body?
If dem nor fit,
den e go hard for wiked pesin to do good,
bikos na only to do bad tins, e sabi.
24 So dat na why God go skata una
like dirty wey strong breeze blow trowey.
25 E sey dis na wetin go happen to una,
bikos una forget am kon trust lie-lie gods.
26 Na only God go tear una klot
komot for una body kon disgrace una.
27 Jerusalem pipol!
I don si as una dey do ashawo waka
and as una dey run follow difren juju
for fields and for evry hill.
Naw, make una si di wahala
wey dey wait una.
So, una go ever dey klean
to woship mi again?