Es 9. Gabiddel.
Da Hah Zayld Israel Richta
1 Ich habb da Hah ksenna beim awldah shtay, un eah hott ksawt:
“Shlakk di tempel poshta
so es di mavvahra shidla.
Fabrech di poshta so es si uf di leit iahra kebb falla;
selli es ivvahrich sinn mach ich doht mitt em shvatt.
Nimmand kann fatt shpringa,
nimmand kumd vekk.
2 Even vann si nunnah grawva in's grawb,
funn datt zayld mei hand si hohla.
Even vann si nuff in da himmel gayn,
funn datt zayl ich si runnah bringa.
3 Even vann si sich fashtekla uf em Berg Karmel,
datt such ich si un nemm si runnah.
Even vann si sich fashtekla funn miah uf em bodda fumm say,
datt sawk ich di shlang fa si beisa.
4 Even vann si kfanga vadda un vekk gnumma vadda bei iahra feinda,
datt sawk ich em shvatt fa si doht macha.
Ich zayl mei awwa uf si halda
fa evil un nett fa goot.”
5 Gott, da Awlmechtich Hah,
sellah es di eaht ohraykt un si shmelst,
un alli-ebbah es drinn voond dutt heila—
es gans land kumd ruff vi's vassah im Nile,
no vatt's viddah niddah vi da revvah in Egypta—
6 eah is sellah es sei haymet baut im himmel
un di eaht ivvah-dekt mitt em himmel.
Eah rooft's vassah im say,
un leaht's ivvah di gans eaht—
sei nohma is da Hah!
7 “Sind diah Israeliddah nett
grawt vi di leit funn Ethiopia zu miah?”
sawkt da Hah.
“Habb ich nett Israel ruff aus Egypta gebrocht,
avvah aw di Philishtah aus Kaphthor
un di Aramayah aus Kir?
8 Gukket moll, di awwa fumm Awlmechticha Hah
sinn uf em sindlich kaynich-reich.
Ich zayl's folshtendich zu nix bringa
uf di gans eaht—
avvah ich zayl em Jakob sei nohch-kummashaft
nett gans zu nix bringa.”
Dess sawkt da Hah.
9 “Fa ich gebb en gebott,
un's haus funn Israel
ivvahrawlich unnich di heida vatt kshiddeld.
Es vatt kshiddeld vi frucht kshiddeld is in en seenah,
un nett en kann frucht fald uf da bodda.
10 Awl di sindah unnich mei leit
zayla doht gmacht sei mitt em shvatt,
awl selli es sawwa,
‘Dess evil ding zayld nett ivvah uns kumma adda blatz nemma.’ ”
Israel Vatt Viddah Uf Gebaut
11 “In sellem dawk zayl ich em
Dawfit sei haus viddah ufbauwa.
Ich fix di fabrochana bletz in di vand
un vo's nunnah kfalla is.
Ich bau's uf vi's als voah.
12 Dess is so es Israel ivvah-nemma kann
vass ivvahrich is funn Edom,
un aw awl di heida es als mei voahra.”
Dess sawkt da Hah, deah es dess du zayld.
13 “Di dawwa zayla kumma,” sawkt da Hah,
“vann sellah es blookt, uf fangd mitt sellah es eahnd,
un sellah es blanst mitt sellah es di drauva ausdrett.
Seesah vei zayld runnah drobsa funn di berga,
un awl di hivla zayla fruchtboah sei.
14 Ich zayl Israel, mei kfangani leit, zrikk bringa;
si zayla di fadauvana shtett ufbauwa un drinn voona,
si zayla vei-goahra blansa un da vei drinka difunn;
si zayla goahra macha un's frucht essa difunn.
15 Ich zayl Israel in iahra ayya land blansa,
un iahra vatzla vadda nee nimmi raus grobt
fumm land es ich eena gevva habb.”
So sawkt da Hah dei Gott.