Es 10. Gabiddel.
Em Noah Sei Nohch-Kummashaft
1 Dess is nau veyyich di freindshaft fumm Noah sei boova, da Shem, da Ham un da Japheth. Si henn kinnah katt noch di sindfloot.
2 Di kinnah fumm Japheth voahra da Gomer,
da Magog, da Madai, da Javan,
da Thubal, da Mesech un da Thiras.
3 Un dess sinn di kinnah fumm Gomer:
Askenas, Riphath un Thogarma.
4 Un dess sinn di kinnah fumm Javan:
Elisa, Tharsis, Kittim un Dodanim.
5 Funn dee sinn di leit am say nohch un in di islands ausnannah ganga in iahra lendah, bei iahra shprohcha, families un kshlechtah.
6 Di kinnah fumm Ham voahra da Kush,
da Mizraim, da Put un da Kanaan.
7 Un dess sinn di kinnah fumm Kush:
Seba, Hevila, Sabtha, Ragma un Sabteka.
Un dess sinn di kinnah fumm Ragma:
Saba un Dedan.
8 Un da Kush voah em Nimrod sei daett. Da Nimrod voah en mechtichah mann uf di eaht.
9 Eah voah en mechtichah hundah fannich em Hah. Fa sell, sawwa di leit, “En mechtichah hundah fannich em Hah, so vi da Nimrod.”
10 Di eahshta shtett in seim kaynich-reich voahra Babel, Erech, Akkad un Chalne im land Sinear.
11 Funn demm land is eah naus ganga in's land Assur, un hott di shtett Nineveh, Rehoboth un Kalah gebaut.
12 Eah hott aw Resen gebaut zvishich Nineveh un Kalah. Resen is en grohsi shtatt.
13 Un da Mizraim voah da faddah funn dee leit:
di Ludiddah, di Anamiddah,
di Lehabiddah, di Naphthuhiddah,
14 di Pathrusiddah un di Kasluhiddah (vo di Philishtah bei kumma) un di Kaphthoriddah.
15 Un da Kanaan voah da faddah fumm Sidon,
sei eahsht-geboahranah,
un fumm Heth.
16 Da Kanaan voah aw da faddah funn dee leit:
di Jebusiddah, di Amoriddah, di Girgasiddah,
17 di Heffiddah, di Arkiddah, di Siniddah,
18 di Arvadiddah, di Zemariddah un di Hamathiddah.
Shpaydah sinn di kshlechtah funn di Kanaaniddah funn-nannah ganga.
19 Un di lendah funn di Kanaaniddah voahra funn Sidon, vi du funn Gerar zu Gaza kumsht, un gaysht no geyyich Sodom un Gomorra un Adama un Zeboim biss an Lasa.
20 Dess sinn di kinnah fumm Ham vi si fadayld voahra in iahra kshlechtah, shprohcha, lendah un leit.
21 Kinnah voahra aw geboahra zumm Shem, da elsht broodah fumm Japheth. Da Shem voah da foah-faddah funn awl di nohch-kummashaft fumm Eber.
22 Di kinnah fumm Shem voahra da Elam,
da Assur, da Arphachsad,
da Lud un da Aram.
23 Di kinnah fumm Aram voahra da Uz,
da Hul, da Gether un da Mas.
24 Da Arphachsad voah da faddah fumm Salah,
un da Salah voah da faddah fumm Eber.
25 Zvay boova voahra geboahra zumm Eber.
Da nohma fumm enda voah Peleg,
veil di eaht fadayld voah in sei layves-zeit.
Em Eber sei anra boo hott Joktan kaysa.
26 Da Joktan voah da faddah fumm Almodad,
em Saleph, em Hazarmaveth, em Jarah,
27 em Hadoram, em Usal, em Dikla,
28 em Obal, em Abimael, em Saba,
29 em Ophir, em Hevila un em Jobab. Awl dee voahra di kinnah fumm Joktan.
30 Da blatz es si gvoond henn voah funn Mesa on biss ma an Sephar kumd in di hivla funn di east.
31 Dess sinn di kinnah fumm Shem fadayld bei iahra kshlechtah, shprohcha, lendah un leit.
32 Sell is di nohch-kummashaft funn di kinnah fumm Noah, fadayld bei iahra kshlechtah un leit. Funn dee sinn di leit ausnannah ganga ivvah di eaht noch di sindfloot.