Es 49. Gabiddel.
Da Jakob Saykend Sei Boova
1 No hott da Jakob groofa fa sei boova un hott ksawt, “Samlet eich zammah so es ich eich sawwa kann vass es gebt mitt eich in di dawwa shpaydah naus.
2 Geddahret zammah, diah kinnah fumm Jakob,
un heichet eiyah faddah Israel ab.
3 Ruben, du bisht mei eahsht-geboahranah;
mei graft, un da ohfang funn mei grefta.
Du bisht da evvahsht in di eah un da evvahsht in macht.
4 Avvah du kansht nett zrikk kohva sei,
grawt vi vassah, un du solsht nimmi's evvahsht sei.
Fa du bisht nuff in dei daett sei bett ganga,
du hosht mei bett unrein gmacht.
5 Da Simeon un da Levi sinn breedah;
iahra shvadda sinn greeks-ksha fa shawda du.
6 Loss mei sayl nett falossa sei uf iahra roht,
un loss mich nett en dayl havva mitt iahra fasamling.
Fa in iahra zann henn si mennah doht gmacht,
un hend moot-villich oxa lohm gmacht.
7 Faflucht is iahra zann, fa es is heslich,
un aw iahra baysi verka,
fa si henn kenn bamhatzichkeit.
Ich fadayl si funn-nannah in Jakob,
un shtroi si ausnannah in Israel.
8 Juda, dei breedah zayla diah lohb gevva;
dei hand zayld uf di hels funn dei feinda sei.
Dei daett sei kinnah zayla sich nunnah bikka fannich diah.
9 Juda, mei sohn,
du bisht vi en yungah layb
es doht gmacht hott,
un gayt viddah zrikk.
Vi en layb lost eah sich nunnah un laykt sich anna.
Un vi mitt en layb,
veah dayt drauwa ufshtay geyyich een.
10 Da zeptah soll nett vekk gnumma sei fumm Juda,
un aw nett da kaynich shtokk funn zvishich sei fees,
biss sellah kumd vo's ditzu heaht,
un awl di leit sich zu eem henka zayla.
11 Eah bind sei hutsh an da drauva-shtokk,
un sei aysel hutsh an da besht shtokk.
Eah vesht sei glaydah in vei,
un sei ivvah-rokk im bloot funn drauva.
12 Sei awwa sinn dunkel funn vei,
un sei zay veis funn millich.
13 Da Sebulon zayld am say nohch voona
un di shiffah sinn sayf datt.
Sei land gayt nuff biss an Sidon.
14 Da Isachar is vi en shteikah aysel,
am anna leiya zvishich di shohf-shtell.
15 Eah saynd es di roo goot is un's land blesiahlich is.
Sei shuldah is nunnah glawda fa shtoft drawwa,
un eah vatt en shaff gnecht.
16 Da Dan zayld sei leit richta
vi di anra kshlechtah in Israel.
17 Da Dan zayld sei vi en shlang am vayk nohch,
en giftichi shlang in di pawt,
es em gaul sei feahshta beist,
so es da reidah hinnahsich fald.
18 Oh Hah, ich voaht fa dei saylichkeit.
19 Da Gad vatt ohgepakt bei rawvah,
avvah eah shlakt si in di feahshta,
un zayld si ivvah-kumma.
20 Aus em Asser sei land kumd feel goot ess-sach,
un eah vaxt ess-sach goot genunk fa kaynicha.
21 Da Naphthali is vi en lohs gedraydah hash,
un eah gebt shaynah roht.
22 Da Joseph is vi en fruchtboahrah bohm,
en fruchtboahrah bohm an en shpring;
sei nesht langa ivvah di vand.
23 Di bow-sheesah henn een veeshtahlich ohgepakt,
si henn kshossa noch eem un henn een kast.
24 Avvah sei bow is fesht un shteik geblivva.
Sei eahm voahra shteik gmacht,
deich di hend funn demm Mechticha fumm Jakob;
deich da Heedah, da Felsa funn Israel,
25 deich dei faddah sei Gott es diah helft,
deich da Awlmechticha es dich ksaykend hott
mitt sayya drovva fumm himmel,
mitt sayya es deef drunna leiya,
mitt sayya funn di brusht un's muddahs-leib.
26 Di sayya funn dei faddah sinn
graysah es di sayya funn mei foah-eldra,
un graysah es di goodi sacha funn di ayvicha hivla.
Loss awl dee sayya uf em Joseph sei kobb kumma,
un uf di shtann funn sellah es raus glaysa
voah funn sei breedah.
27 Da Benjamin is vi en hungahrichah volf,
meiyets frest eah vass eah kfanga hott,
un ohvets fadayld eah vass ivvahrich is.”
28 Dess sinn awl di zvelf kshlechtah es fumm Israel shtamma, un dess is vass iahra faddah ksawt hott zu eena vo eah si ksaykend hott. Yaydahs hott da sayya grikt es zu eem keaht hott.
29 No hott eah eena en gebott gevva un hott ksawt zu eena, “Ich zayl glei shtauva un zu mei leit gay. Fagrawvet mich mitt mei foah-feddah im felsa-loch vo em Ephron, da Hethiddah, sei feld is,
30 es felsa-loch im feld funn Machpelah, nayksht an Mamre, im land Kanaan. Sell is da grawb-blatz es da Abraham gekawft hott fumm Ephron da Hethiddah, un aw's feld vo's felsa-loch drinn is.
31 Datt is da Abraham un sei fraw di Sara fagrawva, datt is da Isaac un sei fraw di Rebekka fagrawva, un datt havvich di Lea fagrawva.
32 'S feld un's felsa-loch voahra gekawft funn di kinnah fumm Heth.”
33 Vo da Jakob faddich voah mitt em gebott zu sei boova, hott eah sei fees in's bett gezowwa, hott sei letshtah ohften gnumma un voah zu sei leit gegeddaht.