Es 10. Gabiddel.
Da Opfah Funn Christus Is Aymol Fa Alli-Ebbah
1 Es Ksetz is yusht en shadda funn di goodi sacha es am kumma sinn, un nett di goodi sacha selvaht. Fasell, kann's Ksetz nett deich di sayma opfahra es gopfaht vadda yoah bei yoah, selli folkumma macha es opfahra.
2 Vann's kend, hedda di opfahra nett kshtobt? Fa dee vo Gott gedeend henn veahra aymol rein vadda un hedda no nimmi shuldich kfeeld fa iahra sinda.
3 Avvah deich di opfahra voahra si alli yoah an di sinda gegmohnd.
4 Dess is veil's nett meeklich is es bloot funn bulla un gays sinda vekk nemma kann.
5 Sell is favass es Christus, vo eah in di veld kumma is, ksawt hott,
“Opfah un kshenkah hosht du nett vella,
avvah en leib hosht du grisht fa mich.
6 Brand-opfahra un sind-opfahra
kfalla diah nett.
7 No habb ich ksawt,
‘Gukk moll, ich binn kumma fa dei villa du, oh Gott.
Im buch shtayt's kshrivva funn miah.’ ”
8 Seahsht hott eah ksawt, “Opfahra un kshenkah, brand-opfahra un sind-opfahra hosht du nett vella un si sinn diah aw nett kfellich.” Dee sinn awl gopfaht noch em Ksetz.
9 No hott eah ksawt, “Gukk moll, ich binn kumma fa dei villa du, Oh Gott.” Eah hott's eahshta vekk gnumma so es eah's zvedda eisetza kann.
10 In demm villa sinn miah ay moll un fa'immah heilich gmacht deich's opfah fumm leib funn Jesus Christus.
11 Un alli preeshtah shtayt dawk fa dawk un richt sei deensht aus; ivvah un ivvah opfaht eah di sayma opfahra un selli kenna selayva kenn sinda vekk nemma.
12 Deah, avvah, noch demm es eah ay opfah gmacht katt hott fa sinda fa immah, hott sich anna kokt uf di rechts seit funn Gott.
13 Datt is eah am voahra biss sei feinda unnich sei fees gedu vadda fa en foos-shtool.
14 Fa mitt ay opfah hott eah selli ayvichlich folkumma gmacht es heilich sinn.
15 Da Heilich Geisht zeikt aw zu uns. Seahsht sawkt eah,
16 “Dess is es bund es ich mach mitt eena
noch selli dawwa, sawkt da Hah.
Ich zayl mei Ksetz in iahra hatza du,
un shreib's uf iahra meind.”
17 No sawkt eah,
“An iahra sinda un ungerechtichkeit
denk ich nee nimmi.”
18 Nau vo dee sacha moll fagevva sinn, dann is kenn opfah may fa sinda.
19 Fasell, leevi breedah, siddah es miah fadrauwa henn fa nei gay in da heilichsht blatz deich's bloot funn Jesus,
20 siddah es dess en neiyah un en levendichah vayk is es eah uf gmacht hott fa uns deich's curtain—sell is, deich sei flaysh—
21 un siddah es miah en hohchen-preeshtah henn ivvah's haus funn Gott,
22 dann losset uns nayksht gay zu eem mitt eahlichi hatza un en follah glawva, veil unsah hatza kshpritzt un blohk-frei gmacht sinn, un unsah leivah gvesha sinn mitt rein vassah.
23 Losset uns fesht hayva zu di bekendnis funn unsah hofning unni zveifla, fa deah vo fashprocha hott is shtandhaftich.
24 Vella uns bekimmahra fa nannah, un nannah ufshtadda zu leevi un goodi verka.
25 Vella nett ufheahra uns zammah fasamla vi samm am du sinn, avvah vella nannah famohna—un dess yusht noch may, vi diah saynet es sellah dawk am kumma is.
26 Vann miah frei-villich sindicha noch demm es miah di eisicht funn di voahheit ohgnumma henn, dann is kenn annah opfah may fa sinda;
27 avvah miah missa uns feicha veyyich en shreklich gericht un feiyah es selli fazeahra zayld es sich geyyich Gott shtella.
28 Ennich ebbah es es Ksetz fumm Mosi nunnah gedrayt hott, is kshtauva unni bamhatzichkeit bei zvay adda drei zeiya.
29 Vi feel may shtrohf denket diah hott sellah fadeend es da Sohn Gottes unnich sei fees gedu hott, un hott's bloot fumm bund fa'acht es een heilich macht, un hott da Geisht funn gnawt fafolkt?
30 Fa miah kenna deah vo sawkt, “Es auseeves heaht zu miah, ich zayl zrikk betzawla.” Un viddah, “Da Hah zayld sei leit richta.”
31 Es is en shreklich ding fa in di hend fumm levendicha Gott falla.
32 Denket zrikk an selli eahshta dawwa, noch demm es diah's licht grikt katt hend, vi diah en grohs leides deich gmacht hend.
33 Uf di aynd hand voahret diah selvaht fafolkt fannich alli-ebbah mitt feel dreebsawl, un uf di annah hand hend diah selli bei-kshtanna es aw so deich macha henn missa.
34 Diah hend mitt-leides katt mitt miah es eikshtekt voah, un vo eiyah sacha kshtohla is vadda, hend diah's geahn ohgnumma. Diah hend dess gedu veil diah gvist hend es diah ebbes bessahs hend im Himmel es nett fagayt.
35 So shmeiset eiyah moot un fadrauwes nett vekk. Dee sacha betzawla en grohsah lohn.
36 Diah hend noht fa geduld havva, so es vann diah Gott sei villa moll gedu hend, dann greeyet diah vass fashprocha voah.
37 Fa in noch en katzi zeit,
“Deah vo am kumma is, zayld kumma,
un eah zayld nett shpoht sei.
38 Da gerecht zayld layva beim glawva.
Veah avvah zrikk zeekt,
in demm hott mei sayl kenn kfalla.”
39 Miah, avvah, sinn nett funn selli es zrikk zeeya un fadamd vadda, avvah funn selli es glawva un saylich gmacht sinn.