Es 3. Gabiddel.
Jesus Shtayt Haychah Es Da Mosi
1 Fasell, heilichi breedah, diah vo en dayl hend im himlisha beroof, denket an Christus Jesus, da Aposhtel un hohchen-preeshtah es miah bekenna.
2 Eah voah shtandhaftich zu demm vo een eiksetzt hott, grawt vi da Mosi shtandhaftich voah zu Gott in seim gans haus.
3 Avvah eah voah gezayld fa feel may hallichkeit havva es da Mosi, grawt vi ebbah es en haus baut may eah hott es es haus.
4 Fa alli haus is gebaut bei ebbah, avvah deah vo alli sacha baut is Gott.
5 Da Mosi voah shtandhaftich in Gott sei gans haus es en gnecht, un dess hott gezeikt zu di sacha es shpaydah ksawt vadda sella.
6 Avvah Christus, es en Sohn, voah shtandhaftich ivvah sei haus. Dess haus sinn miah, vann miah fesht hayva zu di fadrauwa un frayt funn unsah hofning biss an's end.
En Roo Fa Gott Sei Leit
7 So, grawt vi da Heilich Geisht sawkt,
“Heit, vann diah sei shtimm heahret,
8 machet eiyah hatza nett hatt
vi si henn vo si mich ausbroviaht henn
am dawk vo si fasucht voahra in di vildahnis.
9 Datt henn eiyah foah-feddah mich fasucht un ausbroviaht,
un henn mei verka ksenna fa fatzich yoah.
10 Fasell voahrich zannich mitt di leit funn selli zeit,
un habb ksawt,
‘Si gayn immah letz mitt iahra hatza,
un henn mei vayya nett fashtanna.’
11 So in meim zann habb ich kshvoahra,
‘Si sella nee nett in mei roo nei kumma.’ ”
12 Gevvet acht, breedah, es kens funn eich en evil un en unglawvich hatz hott es eich vekk drayt fumm levendicha Gott.
13 Avvah famohnet nannah alli dawk, so lang es es noch heit hayst, so es diah nett shteibahrich vaddet deich di fafiahrichkeit funn sinda.
14 Fa miah henn en dayl mitt Christus vann miah biss an's end, fesht ohhayva zu di fadrausht es miah katt henn am ohfang.
15 So vi's ksawt is,
“Heit, vann diah sei shtimm heahret,
machet eiyah hatza nett hatt,
vi si henn vo si mich ausbroviaht henn.”
16 Veah voahra selli es keaht henn un henn een ausbroviaht? Voahra's nett awl selli es aus Egypta kfiaht voahra beim Mosi?
17 Un mitt vemm voah eah zannich fa fatzich yoah? Voah's nett mitt selli es ksindicht henn, un iahra dohdi leivah leiya in di vildahnis?
18 Un zu vemm hott eah kshvoahra es si nett in sei roo nei kumma sella, vann's nett voah zu selli es nett geglawbt henn?
19 So sayna miah es si nett nei gay henn kenna veil si nett geglawbt henn.