Es 8. Gabiddel.
Jesus Is Unsah Hohchen-Preeshtah
1 Nau dess is vass miah raus bringa vella deich di sacha es miah ksawt henn: Miah henn so en hohchen-preeshtah, deah vo sich anna kokt hott an di rechts hand fumm kaynich-shtool fumm Heilichshta im Himmel.
2 Un eah is en deenah im heilicha-blatz, im voahhafticha tempel-tent, deah es ufketzt voah bei Gott, un nett bei mensha.
3 Fa alli hohchen-preeshtah is eiksetzt fa kshenkah gevva un opfahra macha, un so voah's nohtvendich es deah aw ebbes hott zu opfahra.
4 Vann eah uf di eaht veah, dann veah eah nett en Preeshtah, veil shund preeshtah do sinn es kshenkah opfahra so vi's ausglaykt is im Ksetz.
5 Si sinn deenah funn en foah-bild un en shadda funn himlishi sacha. Fa vo da Mosi da tempel-tent ufkokt hott, hott Gott een famohnd un hott ksawt, “Sayn ditzu es du alles machsht noch em mushtah es diah gvissa voah uf em berg.”
6 Avvah nau hott Jesus en bessahrah deensht grikt, aynah es grawt so feel bessah is es da nei bund is ivvah da ald. Da nei bund is deah vo eah da middel-mann is zvishich Gott un mensha, un en bund vo gegrund is uf bessahri fashprechinga.
7 Fa vann nix letz gvest veah mitt em eahshta bund, dann veah's nett nohtvendich gvest fa noch en bund sucha.
8 Avvah eah hott faylah kfunna mitt eena un hott ksawt,
“Saynet moll, di dawwa zayla kumma, sawkt da Hah,
vann ich en nei bund macha zayl
mitt em haus funn Israel
un mitt em haus fumm Juda.
9 Dess zayld nett sei vi's bund
es ich gmacht habb mitt iahra foah-feddah
uf em dawk vo ich si gnumma habb bei di hand
fa si aus em land funn Egypta fiahra.
Fa si henn nett ohkalda in meim bund,
so habb ich si fa'acht, sawkt da Hah.
10 Dess is es bund es ich macha zayl mitt em haus funn Israel
noch selli dawwa, sawkt da Hah:
Ich zayl mei Ksetz in iahra meind du
un's uf iahra hatza shreiva.
Ich zayl iahra Gott sei
un si zayla mei leit sei.
11 Un's soll nett alli-ebbah sei nochbah
adda sei broodah lanna un sawwa,
‘Kenn da Hah,’
veil si mich awl kenna zayla,
fumm glenshta biss an's grayshta.
12 Ich vill bamhatzich sei zu iahra ungerechtichkeit,
un iahra sinda un faylah vill ich nimmi meinda.”
13 Veil eah ksawt hott, “en nei bund,” hott eah's eahsht bund ald gmacht. Un vass ald un am fafaula is zayld glei fagay.