Es 3. Gabiddel.
Johannes Da Dawfah Risht Da Vayk
1 Im fuftzayda yoah es da Kaisah Tiberius kaynich voah, un da Pontius Pilawtus govvenah funn Judayya voah, un da Herodes ivvah-saynah voah fumm land Galilaya, un sei broodah da Philippus ivvah-saynah voah ivvah di lendah Ituraea un Trachonitis, un da Lysanias ivvah-saynah voah ivvah's land, Abilene,
2 un an di zeit vo da Hannas un da Kaiphas hohchen-preeshtah voahra, is es Vatt Gottes zumm Johannes kumma in di vildahnis; eah voah em Zacharias sei boo.
3 Un eah is ivvahrawlich rumm ganga in di landshaft am Jordan Revvah nohch un hott gebreddicht. Eah hott en dawf gebreddicht vo gegrund voah uf boos du fa sinda fagevva havva.
4 Vi's kshrivva is im buch funn di vadda fumm brofayt Jesaia,
“Di shtimm funn en breddichah in di vildahnis sawkt,
‘Rishtet da vayk fa da Hah,
machet sei pawt grawt.
5 Alli deich soll kfild sei,
un awl di hivla un berga sella ayva gmacht sei,
un di grumma bletz sella grawt gmacht sei,
un di unayvani bletz sella glatt gmacht sei.
6 Un alli-ebbah soll em Hah sei saylichkeit sayna.’ ”
7 Da Johannes hott ksawt zu di drubba leit es raus kumma sinn fa gedawft vadda bei eem, “Diah nesht funn shlanga, veah hott eich gvand fa difunn shpringa funn em zann vass am kumma is?
8 Bringet frucht es veist es diah boos doond, un sawwet nett, ‘Da Abraham is unsah faddah,’ fa ich sawk eich, Gott kann kinnah zumm Abraham macha aus dee shtay.
9 Even nau leit di ax grisht unnich di baym. Alli bohm es nett goodi frucht gebt vatt ab kakt un in's feiyah kshmissa.”
10 Un di leit henn een kfrohkt, “Vass sella miah dann du?”
11 Eah hott eena ksawt, “Deah vo zvay vemmes hott, loss een aynah gevva zu demm vo kennah hott; un deah vo ess-sach hott loss een aw so du.”
12 Di tax-einemmah sinn aw kumma fa gedawft vadda, un henn ksawt zu eem, “Meishtah, vass sella miah du?”
13 Eah hott eena ksawt, “Nemmet nett may tax es vass eich alawbt is.”
14 Di greeks-gnechta henn een aw kfrohkt, “Un vass sella miah du?” No hott eah ksawt zu eena, “Doond nimmand ebbes deich gvald, fashuldichet nimmand mitt di unvoahret un seind zufridda mitt eiyahm lohn.”
15 Vi di leit am vunnahra voahra un am frohwa voahra in iahra hatza eb da Johannes fleicht Christus veah,
16 hott da Johannes eena andvat gevva un hott ksawt, “Ich dawf eich mitt vassah; avvah deah vo am kumma is, is mechtichah es ich binn, un ich binn's nett veaht fa mich nunnah bikka un sei shoo uf macha. Eah zayld eich dawfa mitt em Heilicha Geisht un mitt feiyah.
17 Sei dresha-shaufel is in sei hand fa da dresha-floah butza. Eah geddaht da vaytza zammah un dutt en in sei kashta, avvah's shprau zayld eah fabrenna mitt feiyah es nett ausgmacht sei kann.”
18 Mitt feel anri famohninga hott eah di saylichkeit gebreddicht zu di leit.
19 Avvah da kaynich, Herodes, deah vo da Johannes gezankt katt hott fa di Herodias heiyahra, un aw fa awl di anra evili sacha es eah gedu hott,
20 hott nau noch zu awl demm, da Johannes eikshtekt in di jail. Di Herodias voah em Herodes sei broodah sei fraw.
Jesus Vatt Gedawft
21 Nau, noch demm es awl di leit gedawft voahra, un Jesus aw gedawft gvest voah, un eah am bayda voah, hott da Himmel sich uf gmacht,
22 un da Heilich Geisht is runnah kumma uf een imma leiblichah vayk vi en daub, un en shtimm aus em Himmel hott ksawt, “Du bisht mei geleebdah Sohn; in diah binn ich goot zufridda.”
Di Freindshaft Funn Jesus
23 Jesus voah baut dreisich yoah ald vo eah sei eahvet ohkfanga hott unnich di leit. Eah voah em Joseph sei boo, (so henn di leit gmaynd),
un da Joseph voah em Eli sei boo,
24 un eah voah em Matthat sei boo,
un eah voah em Levi sei boo, un eah voah em Melchi sei boo,
un eah voah em Janna sei boo, un eah voah em Joseph sei boo,
25 un eah voah em Mattathias sei boo, un eah voah em Amos sei boo,
un eah voah em Nahum sei boo, un eah voah em Esli sei boo,
un eah voah em Naggai sei boo,
26 un eah voah em Maath sei boo,
un eah voah em Mattathias sei boo, un eah voah em Semei sei boo,
un eah voah em Josech sei boo, un eah voah em Judas sei boo,
27 un eah voah em Johanan sei boo, un eah voah em Resia sei boo,
un eah voah em Serubabel sei boo, un eah voah em Sealthiel sei boo,
un eah voah em Neri sei boo,
28 un eah voah em Melchi sei boo,
un eah voah em Addi sei boo, un eah voah em Kosam sei boo,
un eah voah em Elmadam sei boo un eah voah em Her sei boo,
29 un eah voah em Joshua sei boo, un eah voah em Elieser sei boo,
un eah voah em Jorem sei boo, un eah voah em Matthat sei boo,
un eah voah em Levi sei boo,
30 un eah voah em Simeon sei boo,
un eah voah em Juda sei boo, un eah voah em Joseph sei boo,
un eah voah em Jonan sei boo, un eah voah em Eliakim sei boo,
31 un eah voah em Melea sei boo, un eah voah em Menam sei boo,
un eah voah em Mattathan sei boo, un eah voah em Nathan sei boo,
un eah voah em Dawfit sei boo,
32 un eah voah em Jesse sei boo,
un eah voah em Obed sei boo, un eah voah em Boas sei boo,
un eah voah em Salma sei boo, un eah voah em Nahesson sei boo,
33 un eah voah em Amminadab sei boo, un eah voah em Ram sei boo,
un eah voah em Hezron sei boo, un eah voah em Perez sei boo,
un eah voah em Juda sei boo,
34 un eah voah em Jakob sei boo,
un eah voah em Isaac sei boo, un eah voah em Abraham sei boo,
un eah voah em Terah sei boo, un eah voah em Nahor sei boo,
35 un eah voah em Serug sei boo, un eah voah em Regu sei boo,
un eah voah em Peleg sei boo, un eah voah em Eber sei boo,
un eah voah em Salah sei boo,
36 un eah voah em Kenan sei boo,
un eah voah em Araphaxad sei boo, un eah voah em Shem sei boo,
un eah voah em Noah sei boo, un eah voah em Lamech sei boo,
37 un eah voah em Methuselah sei boo, un eah voah em Henoch sei boo,
un eah voah em Jared sei boo, un eah voah em Mahalaleel sei boo,
un eah voah em Kenan sei boo,
38 un eah voah em Enos sei boo,
un eah voah em Seth sei boo, un eah voah em Adam sei boo,
un eah voah funn Gott.