Es 18. Gabiddel.
1 En mann es sich laynich hald is yusht bekimmaht veyyich sich selvaht,
un gayt geyyich alles es goot un recht is.
2 En unksheidah mensh hott kenn blesiah fa ebbes fashtay,
avvah yusht fa anri sawwa vass eah denkt.
3 Vann ungettlichkeit kumd, so dutt fa'achtung;
mitt di shand kumd da shohm.
4 Di vadda funn en mann sei maul sinn vi deef vassah;
un di vadda funn veisheit vi vassah es lawft funn en deefi shpring.
5 Es is nett recht fa en shuldichah mann gay lossa,
un da unshuldich mann halda funn sei recht greeya.
6 Em unksheida sei leftz bringa shtreit,
un sei maul is am frohwa fa shlayk.
7 Em unksheida sei maul bringd een zu nix,
sei leftz sinn en fall zu sich selvaht.
8 Di vadda fumm kshvetza-drawwah sinn vi sees ess-sach,
si vadda glatt eikshlukt nunnah in da bauch.
9 Aynah es nett hatt shaft in sei eahvet,
is en broodah zu sellah es zammah reist.
10 Da nohma fumm Hah is vi en shteikah tavvah,
en gerechtah mann kann datt anna shpringa un is sayf.
11 Es geld fumm reicha is sei shteiki shtatt,
eah maynd's is en hohchi vand es een aus di kfoah hald.
12 Eb en mann fald, is sei hatz shtols,
avvah eb di eah, kumd daymeedichkeit.
13 Ebbah es andvat gebt eb eah abheicht,
is unksheit un shandlich.
14 En mann sei geisht helft eem deich di grankheit,
avvah vann da moot faloahra is, veah kann's drawwa?
15 Di shmeaht meind grikt noch may lanning,
un's oah mitt veisheit sucht eisicht.
16 Em mann sei kshenk macht di deah uf fa een,
un bringd een fannich hohch-geahdi mennah.
17 Da eahsht es uf shtayt fa shvetza seemd recht sei,
biss da annah ohfangd een sacha frohwa.
18 Da lohs zeeya bringd en end zu shtreit,
un seddeld di sacha zvishich di mechticha.
19 En broodah es grikt is, is haddah fa nayksht kumma ditzu es en shtatt mitt vanda;
shtreit is vi di rikkel es es doah funn en kaynich-gebei zu hayva.
20 Di frucht funn en mann sei maul macht een satt,
un vass sei leftz sawwa macha een zufridda.
21 Da doht un's layva sinn in di gvald funn di zung,
un selli es gleicha shvetza, missa di frucht funn iahra kshvetz essa.
22 Sellah es en fraw find, find en goot ding;
un eah is em Hah kfellich.
23 Di oahma missa ohhalda un bedla,
avvah di reicha shvetza veesht zrikk.
24 Samm funn em sei freind bleiva nett bei em,
avvah en rechtah freind bleibt naychah bei em es en broodah.