Es 21. Gabiddel.
1 Em kaynich sei hatz is in di hand fumm Hah;
vi vassah am lawfa, so fiaht eah eem sei hatz anna vo eah vill.
2 Alli mann sei vayk is recht in sei aykni awwa,
avvah da Hah gukt uf's hatz.
3 Fa du vass recht un feah is,
is may leeblich zumm Hah es opfahra.
4 Hohch-oahrichi awwa un en shtols hatz—
di lichtah funn di gottlohsa—sinn sinda.
5 Vass di fleisicha im sinn henn fa du, macht si may es genunk havva,
avvah ebbah es sacha zu kshvind dutt, kumd in di noht.
6 Reich vadda bei leeya sawwa zayld nett lang laesta,
un is en fall es zumm doht fiaht.
7 Es rawves funn di gottlohsa zayld si vekk shlayfa,
veil si's nett doon fa recht du.
8 Da vayk funn di shuldicha is grumm,
avvah di unshuldicha doon vass recht is.
9 'Sis bessah fa in en ekk voona drovva uf em dach,
es vi im haus voona mitt en zannichi fraw.
10 Di sayl fumm gottlohsa is ufgnumma mitt evil,
un eah hott kenn bamhatzichkeit fa sei nochbah.
11 Vann en shpoddah kshtrohft vatt, dann lanna even di dumma veisheit;
vann ebbah mitt veisheit gland vatt, dann grikt eah eisicht.
12 Sellah Gerecht nemd acht vass am ohgay is im haus funn di gottlohsa,
un eah bringd di gottlohsa nunnah zu nix.
13 Veah sei oahra zu shtobt zumm roofes funn di oahma,
zayld selvaht aw naus roofa un nett keaht sei.
14 En kshenk es hinna rumm gevva is, drayt da zann;
un en betzawling fashtekkeld kalda, drayt even grohsah zann.
15 Di gerechta sinn froh vann ebbes feah ausgedrawwa is,
avvah's bring furcht zu di evil-shaffah.
16 Ennich ebbah es vekk lawft funn goodah fashtand,
zayld uf enda in di fasamling funn di dohda.
17 Sellah es blesiah gleicht zayld oahm vadda;
sellah es vei un ayl gleicht zayld nett reich vadda.
18 Di gottlohsa missa en betzawling sei fa di gerechta,
un di unshtandhafticha fa di ufrichticha.
19 'Sis bessah fa draus in di vildahnis voona,
es es is fa mitt en faglawkti un en zannichi fraw voona.
20 Keshtlich sach un ayl is in di haymeda funn selli mitt veisheit,
avvah dummi leit essa's alles uf.
21 Selli es gerechtichkeit un bamhatzichkeit nohch gayn,
zayla layva, gerechtichkeit un eah finna.
22 En mann mitt veisheit kann ivvah di shtatt-mavvah funn di mechticha gradla,
un kann iahra shteikah blatz nunnah reisa es si sich falossa druff.
23 Veah sei maul un zung vatsht,
hald sich aus druvvel.
24 “Shpoddah” is da nohma fumm shtolsa un grohs-feelicha mann;
eah lawft in frechi shtolsheit.
25 En faulah mensh sei falanga macht een doht,
veil eah's nett dutt fa shaffa.
26 Da gans dawk lang dayt eah gleicha may havva,
avvah da gerecht gebt un haybt nix zrikk.
27 Da opfah fumm gottlohsa is grausam,
un vi feel may vann eah's bringd mitt evili gedanka.
28 En falshah zeiyah zayld umkumma,
avvah veah goot abheicht, sei zeiknis bleibt ayvichlich.
29 Da gottlohs mann lost oh mitt seim kobb in di hay,
avvah da ufrichtich mann denkt an vass eah dutt.
30 'Sis kenn veisheit, kenn eisicht un kenn roht,
es ufshtay kann geyyich da Hah.
31 Da gaul is grisht fa fechta im greek,
avvah sayf bleiva heaht zumm Hah.