Es 24. Gabiddel.
En Vanning
1 Fagunn gottlohsi mennah nett,
un vinsh nett fa bei eena sei;
2 fa si henn yusht unfashtand im sinn,
un iahra leftz shvetza yusht veyyich druvvel macha.
3 Deich veisheit is en haus gebaut,
un deich goodah fashtand is es shteik gmacht;
4 deich eisicht vadda di shtubba kfild
mitt keshtlichi un shayni sacha.
5 En mann mitt veisheit is oahrich shteik,
un en mann mitt eisicht vatt mechtichah mitt graft.
6 Fa greek macha muss ma goodah roht havva,
un fa ivvah-kumma im greek brauch ma feel roht-gevvah.
7 Veisheit is zu deef fa en unksheidah mann,
eah macht sei maul nett uf in di fasamling am doah.
8 Veah evil im sinn hott,
zayld en druvvel-machah kaysa sei.
9 Ausmacha fa dumhayda dreiva is en sind,
un leit hassa ebbah es shpodda dutt.
10 Vann du uf gebsht an di zeit funn druvvel,
dann bisht du adlich shvach.
11 Setz selli frei es am vekk gnumma vadda sinn zumm doht;
hayb selli zrikk es am zumm shlawdah shtolbahra sinn.
12 Du mechsht sawwa, “Gukk moll, miah henn nix gvist veyyich demm,”
avvah dutt nett sellah es es hatz veekt sell vissa?
Dutt nett sellah es vatsht ivvah dei sayl dess vissa?
Dutt eah nett alli mann zrikk betzawla fa vass eah dutt?
13 Ess hunnich, mei kind, fa hunnich is goot,
hunnich is sees zu dei zung.
14 Grawt so is di veisheit goot fa dei sayl;
vann du see finsht dann zayld's goot gay fa dich,
un dei hofning vatt nett abkshnidda.
15 Lei nett anna am voahra vi en gottlohsah mensh,
fa in en gerechtah mann sei haus gay;
gay nett nei fa een rawva;
16 fa en gerechtah mann fald sivva mohl anna un shtayt viddah uf,
avvah di gottlohsa vadda nunnah gebrocht deich druvvel.
17 Sei nett froh vann dei feind fald,
loss dei hatz sich nett froiya vann eah shtolbaht,
18 adda da Hah mecht's sayna un nett froh sei mitt,
un eah gayt un drayt sei zann vekk funn eem.
19 Bekimmah dich nett veyyich dee vo evil doon,
un sei nett jealous veyyich di gottlohsa,
20 fa da evil mann hott nix zu hoffa difoah,
un's licht fumm gottlohsa vatt aus geblohsa.
21 Du da Hah un da kaynich firchta, mei sohn,
un hald dich nett uf mitt selli es eena nett heicha,
22 fa funn selli zvay kumd bletzlich fadauves,
un veah vayst vass fa druvvel es si bringa kenna.
Anri Veisheit Shreives
23 Dess sinn aw vadda funn selli mitt veisheit:
Es is nett goot fa seits nemma am richta.
24 En richtah es zu di gottlohsa sawkt, “Du bisht unshuldich,”
vatt faflucht bei di leit, un alli-ebbah hast een;
25 avvah mitt richtah es di shuldicha shtrohfa gayt's goot,
un reichi sayya kumma uf si.
26 En eahlich andvat
is vi en kuss uf di leftz.
27 Mach dei eahvet seahsht faddich draus,
un grikk dei feldah grisht;
noch sellem bau dei haus.
28 Du nett zeiya geyyich dei nochbah unni uahsach,
un du nett fafiahra mitt dei leftz.
29 Sawk nett, “Ich zayl du zu eem vi eah gedu hott zu miah;
ich zayl een zrikk betzawla fa vass eah gedu hott.”
30 Ich binn am feld fabei ganga fumm faulensah,
un am vei-goahra fabei funn en dummah mann;
31 un dee feldah voahra ufgvaxa mitt danna,
da grund voah gedekt mitt veetz,
un di shtay vand voah nunnah kfalla.
32 Vo ich dess ksenna habb, habb ich drivvah gedenkt,
un ich habb ebbes gland funn vass ich ksenna habb.
33 Noch en vennich shlohfa, noch en vennich leiya bleiva,
noch en vennich di hend zammah du fa roowa—
34 no kumd di oahmoot uf dich vi en rawvah,
un du hosht nix, grawt es vi vann du grawbt gvest veahsht.