Es 8. Gabiddel.
Heichet Ab Zu Veisheit
1 Dutt nett di veisheit naus roofa?
Dutt nett di eisicht iahra shtimm sich heahra lossa?
2 Ovva uf di hivla am vayk nohch,
un an di greitz-vayya dutt see shtay.
3 Nayvich di doahra es nei in di shtatt gayn,
am eigang funn di doahra, rooft see naus:
4 “Zu eich, oh mennah, roof ich naus,
un greish naus zu alli-ebbah.
5 Diah es nett bessah visset, fanget oh denka,
un diah dummi leit, fanget oh fashtay.
6 Heichet, fa ich habb nohtvendichi sacha zu sawwa;
mei leftz shvetza vass recht is.
7 Mei maul sawkt di voahheit,
un mei leftz hassa vass gottlohs is.
8 Awl di vadda funn meim maul sinn gerecht,
'sis nix falshes adda abfiahrich in eena.
9 Si sinn goodi vadda zu alli-ebbah es fashtayt,
un sinn gans recht zu selli mitt eisicht.
10 Nemmet mei lanning in blatz funn silvah,
un goodi eisicht leevah es fei gold.
11 Fa di veisheit is bessah es keshtlichi pearls,
un nix es ebbah havva vill is gleicha zu iahra.
12 Ich, di veisheit, habb eisicht,
un ich habb goodah roht zu gevva.
13 Di furcht fumm Hah maynd du hasht evil;
ich hass shtolsheit un hohchmoot,
en evil layves-lawf un falshi kshvetzah.
14 Ich habb goodah roht un veisheit;
ich habb eisicht un graft.
15 Deich mich doon kaynicha iahra reich ausfiahra,
un roolahs doon goodi gebodda macha.
16 Deich mich doon di evvahshta roola,
un aw awl di richtah uf di eaht.
17 Ich leeb selli es mich leeva,
un selli es mich sucha zayla mich finna.
18 Reichheit un eah sinn bei miah,
reichheit es nett shtobt un gerechtichkeit.
19 Mei frucht is bessah es gold, even es fei gold,
un vass ich gebb is bessah es es besht silvah.
20 Ich lawf uf em vayk funn gerechtichkeit,
un uf di pawt funn vass recht is.
21 Ich gebb reichheit zu selli es mich leeb henn,
un fill iahra shtoah-haus mitt keshtlichi sacha.
22 Da Hah hott mich kshaffa am ohfang funn sei eahvet,
eb awl sei verka lang zrikk, voah ich do.
23 Ich voah eiksetzt funn ayvichkeit,
even am ohfang, eb di eaht voah.
24 Ich voah geboahra eb da say,
vo's alsnoch kenn shpringa mitt vassah katt hott.
25 Eb di berga in iahra blatz ksetzt voahra,
un eb di hivla, voah ich geboahra,
26 eb Gott di eaht un di feldah gmacht hott,
adda even da eahsht shtawb funn di veld.
27 Ich voah datt, vo eah di himla in iahra blatz ksetzt hott,
un vo eah da himmel ivvah da deef say kshtrekt hott,
28 vo eah di volka nuff in di hay ksetzt hott,
un vo eah di shpringa fumm say uf gmacht hott.
29 Ich voah datt vo eah gebodda gevva hott zumm say,
so es di vassahra nett veidah gayn es eah ksawt hott.
Ich voah datt vo eah di foundations funn di eaht ausglaykt hott.
30 Ich voah nayvich eem vi en shaff-meishtah,
un habb een dawk fa dawk froh gmacht.
Ich voah immah am mich froiya fannich eem.
31 Ich habb mich kfroit in sei veld
un di mensha-kinnah voahra mei blesiah.
32 Nau dann, mei kinnah, heichet mich ab,
ksaykend sinn selli es mei vayya halda.
33 Heichet dee famohning un greeyet veisheit,
doond's nett fa'achta.
34 Ksaykend is da mann es mich abheicht,
es alli dawk vatsht an mei deahra,
un es voaht an di poshta funn mei doahra.
35 Veah mich find, find layva,
un vatt kfellich zumm Hah.
36 Avvah veah mich nett find, dutt sich selvaht vay,
selli es mich hassa, lohva da doht.”