16
Puulanya Tjayilitjanya ngurra tjuṯawana yankuku
1 Puulanya Tjayilitjanya tawunu Taapilakutu yankula tawunu Litjarralakutulpi yanu. Tawunu palula Timitjiyinya, Yiitjuku walytja nyinangu. Timitjiyiku maama Tjuwu nyinangu, Yiitjuku walytja. Palumpa paapa Kiriki wangkatjarra nyinangu, Tjuwuwiya.
2 Yiitjuku walytja tjuṯaya nyinangi tawunu Litjarrala. Yiitjuku walytja kutjupa tjuṯaya tawunu Yakuniyamala nyinangi. Paluru tjana Timitjiyiku yunypa nyinangi. Tjana yalatji watjalpayi, “Timitjiyinya Yiitjuku tjukarurru nyinanyi.”
3 Puulalu kuliṉu, “Timitjiyinya nganaṉa tjungu yankunytjaku Yiitjuku wangka tjakultjurinkunytjaku. Paluru wati nyinanytjawiyangka Tjuwu kutjupa tjuṯangku kulira tjingurulampa pikarriku. Yalatjingkamarra ngayulu ngurra ngaangka tjanala Tjuwu tjuṯangka tjapilku paluru watirrinytjaku. Tjana kuliṉi Timitjiyiku paapa Tjuwuwiya nyinanyi. Timitjiyinyaṯarra tjana kuliṉi Tjuwuwiya paluru nyinanyi, wati nyinanytjawiya.” Palulanguru Timitjiyinya ngurra walytjangka watirringu.
4 Palulanguru Tawunu tjuṯawana tjana yankula Yiitjuku walytja tjuṯangka tjanala luwu panyapa tjuṯa nintirinangi. Paluru tjana ngurra tjuṯawana tjanala watjaṉu luwu panyapa maṉkurrpawana tjana tjukarurru nyinanytjaku. Luwu panyapa maṉkurrpa Yiitjuku waarrkana tjuṯangku, mayutju tjuṯangkuṯarra Tjarutjalumala wakara tjunu.
5 Palulanguruya Yiitjuku walytja tjuṯa ngurra palunya tjuṯawana, Yiitjuku rapa nyinangi. Yaṉangu kutjupa tjuṯangku Yiitjuku wangka kulira walytjarringu. Paluru tjana tjuṯalingkulpiya nyinangu.
Puulalu tjukurrpa nyakuku
6 Puulalungarri manta Puritjiyalawana yankula, manta Kilitjiyalawanangku Yiitjukuṉu wangka tjana tjakultjurinangi. Manta Yayitjalawanaṯarra tjana tjakultjurinkukitjangku kuliṉu. Katutjaku kurrunpangku tjananya nintiṉu, manta palulawana wiya tjana tjakultjurinkunytjaku.
7 Manta Matjiyalakutu tjana yankula kuliṉu manta Pitjiniyalakutu yankukitjangku. Yiitjuku kurrunpangku tjananya marrkuṉu wiya manta palula tjarrpanytjaku.
8 Palulanguru tjana ngurra palulamarra kutu manta Matjiyalawana yankula tawunu Taruwatjalalpi tjarrpangu.
9 Mungangka Puulalu tjukurrpa nyangu, wati paluru ngaranytjala, panya manta Matjatuniyanya ngurrara. Wati paluru Puulalakutu yalatji wangkangu, “Nganampa ngurrakutu ngalya yarra!, manta Matjatuniyalakutu, nganaṉanya nintintjaku.”
10 Puulalu panyapa tjukurrpa nyangutjangku tjakultjunanyingka, tjungungku nganaṉa kuliṉingi manta Matjatuniyalakutu yankukitjangku. Ngayulu Luukanyaṯarra riirrirringu, yalatji kulira, “Katutjalu iltalanya watjaṉu manta Matjatuniyalawana Yiitjuku wangka tjakultjurinkunytjaku.”
Tawunu Pilipayilakutupula yanku
11 Puutangkalatju kaḻpakatirra yanu manta Tjamutjaritjalakutu. Palulanguru tjiṉṯu kutjupangkalatju piyuku puutangka kaḻparra yanu tawunu Niyapulatjalakutu.
12 Palulangurulatju tawunu Pilipayilakutu tjina yanu. Yurrunpa tawunu palunya tjuulytji tjuṯangku palyaṉingi, Ruumanya ngurrara tjuṯangku. Pilipayinya tawunu puntu ngarangu, tawunu kutjupa tjuṯa wiima nguwanpa ngarangu. Tawunu palulalatju rawa nyinangi, tjiṉṯu maṉkurrpa.
13 Tawunu palula ila karru ngarringi. Tjarritiyilatju karru palulakutu yankula nyangu Tjuwu tjuṯaya tjungurringkunytjala. Paluru tjana rawa karru palula tjungurringkupayi, Katutjala wangkanytjaku. Nganaṉa minyma tjuṯangka tjungurringkula nyinarra wangkangi.
14 Minyma paluru tjanala minyma yini Litiyanya nyinangu, Tjayataranya ngurrara, Katutjaku walytja. Paluru mantarra palya waarrkana tjuṯangka mantjira tjalamilalpayi. Minyma paluru Puulaku wangka kulira Yiitjuku walytjarringu, Katutjaluṯarra palunya nintintjala.
15 Paluru tjana Puulalungarri Litiyanya palumpa ngulytju tjuṯaṯarra kapingka papatatjimilaṉu. Litiyalu Puulanyangarri tjananya tjapiṉu, “Nyurrangarri ngayuku ngurrakutu ngalyarra!, nyinanytjaku.” Tjana kulira wiya wangkangu. Litiyalu tjananya piyuku watjaṉu, “Kuwarri ngayulu yilta Yiitjuku walytjarringu. Palulanguru nyurrangarri ngayuku waaḻakutu ngalyarra!, nyinanytjaku.” Yalatji paluru nganaṉanya tjuṯangara watjantjala, yanulpilatju palumpa ngurrangka nyinangi.
Tjiilangkapula nyinaku
16 Litiyaku ngurrangkalatju nyinarra karru palulakutulatju yanangi, Katutjanya tjapintjaku. Ngururrpalatju yankunytjala, kungka yukarra paluru mamutjarra ngalyankula tjungurringu. Yaṉangu tjuṯangku kungka palunya nyakula kulilpayi, “Yukarra paluru ninti nyinanyi, ngula yaalytjiyaalytji ngaranytjaku. Mamungku nintintjala paluru tjukarurru watjalpayi.” Yaṉangungku tjapintjala kungka paluru mani tiṉaku tjapilpayi. Yukarra paluru mani mantjira yalatji watjalpayi, “Ngulanu nyinaku yalatji.” Yukarra paluru mani palunya mantjira palumpa mayutju maṉkurrpaku yungkupayi. Yalatji yukarra paluru wati mayutju maṉkurrpaku waarrkarringkupayi. Palulanguru mayutju paluru tjana mani tiṉatjarra nyinangi.
17 Yukarra paluru nganaṉanya Puulanyangarri wanara yalatji rapangku watjalpayi, “Ngaa tjuṯaya mayutju Katutjaku waarrkana tjuṯa ngaranyi. Ngaa tjuṯangku nyurrangarrinya tjakultjunkupayi kana kutunyurra nyinanytjaku Katutjaku ngurrangka.”
18 Yalatji tjananya rawangku wanara watjarinkupayi, tjiṉṯu maṉkurrpa. Palulanguru Puulalu kuliṉu, “Mamungku kungka ngaatja kuyantjala paluru nganaṉanya ramaṉi.” Paluru ngaṉṯikutu taaṉarringkula mamu palunya payiṉu alatji, “Yiitju Kurayitjakuṉu ngangkari tiṉatjarrangkuṉanta watjaṉi. Yukarra ngaangkamarra wantirra yarra!” Ilta mamu paluru yukarra palunya wantirra yanu.
19-21 Yukarra paluru palyalpi nyinanyingka palumpa mayutju tjuṯangku puṯu kuliṉangi, “Yukarra palatja mamuwiyalpi nyinanyingka, nganaṉa puṯu kuliṉi palula mani kutjupa mantjilkitjangku.” Palulanguru tjana Puulaku Tjayilitjaku ngurrkurringkula pulanya witira tawunuku mayutju tjuṯakutu raapangku katingu, kuutawutjungkaya wangkanytjaku. Mayutju palula tjanala tjana watjaṉu, “Ngaa kutjarrapula Tjuwu nyinanyi. Paluru kutjarra yaṉangu ngaa ngurrara tjuṯa nganaṉanya tjingapungkupayi, nganaṉa mayutju Ruumanya ngurraraku luwu wantinytjaku. Nganaṉa mayutju Ruumanya ngurraraku luwuwana nyinapayi, wiya nganaṉa wangka ngaa kutjarrakuṉu kulintjaku.”
22 Yaṉangu tjuṯaṯarra kuutawutjungka nyinangu. Paluru tjana Puulaku Tjayilitjaku mulyarrarringkula wangkarra pikarringangi. Kuutawutju ngurrara tjuṯangku mantarra pulampa wintarrpungkula waṉingu. Kuutawutju ngurrara tjuṯangku kutjupa tjuṯa tjananya watjaṉu, wiipatjarrangku pulanya pungkunytjaku.
23 Tjana kutu pulanya pungkula katirra tjiilangkalpi tjarrpatjunu. Tjiilaku mayutjunya tjana watjaṉu purinypangku pulanya kanyintjaku.
24 Mayutju tjuṯangku panyapa watjaṉutjangka tjiilaku mayutjungku pulanya katirra tjiila palula ngururrpa tjarrpatjunu, pakara yankupayingka. Tjarrpatjunkula pulanya tjina watiyangka tjunkula karrpira laakamilaṉu kiyitjarrangku.
25 Munga ngururrkutu Puulanya Tjayilitjanya Katutjalakutu wangkarra warrarapula nyinangi. Tjiilangka nyinanytja tjuṯangku kuliṉingi, paluru kutjarrangku warrantjala,
26 manta waaḻaṯarra pirrtjingu. Tjiila palula tuuwa pati tjuṯa yuwankarra alytjurarringu. Puritjina tjuṯangka tjiina yuwankarra arralytjarringkula ngarringi.
27 Tjiilaku mayutjungku kanarringkula tuuwa tjuṯa alytjura ngaranytjala nyakula nguḻurringu. Paluru kuliṉu, “Puritjina tjuṯaya tjalkaḻungu.” Palulanguru paluru tjuuḻa waṯawara yurrkuṉu, walytjangku wakaranku iluntankukitjangku.
28 Paluru walytjangku wakalkitja ngaranyingka Puulalu nyakula raapangku marrkuṉu, “Wakalwiyanku wanti!, yuwankarralatju ngaangka nyinanyi.”
29 Tjiilaku mayutju paluru waarrkana kutjupangka tjangi mantjira Puulakutu Tjayilitjalakutu tjalkaḻungkula pupakatingu. Pupakatirra nguḻurringkula tititingarangi.
30 Mayutju paluru pulanya katingu yaatjayiṯi. Tjapiṉu pulanya, “Katutjaluṉi kana kutu nyinatjunkunytjaku, yaalytjirrikuṉa?”
31 Paluru kutjarra palunya watjaṉu, “Mayutju Yiitjunya Katutjakuṉu nyuntu kulila!, nyuntupa ngulytju tjuṯangkuṯarra. Yalatjinyurra kulintjala, Katutjalu nyurrangarrinya kana kutu nyinatjunku, palumpa ngurrangka.”
32 Palulanguru paluru kutjarra Yiitjuku wangka tjananya tjakultjunu, tjiilaku mayutjungka, palumpa ngulytju tjuṯangkaṯarra.
33 Munga palula tjiilaku mayutju paluru katingu pulanya kapikutu pika pulampa wiipatjarrangku pungutja paltjira kiliinamilantjaku. Palulanguru Puulalu kapi palula tjananya papatatjimilaṉu.
34 Tjiilaku mayutju paluru, palumpa ngulytju tjuṯaṯarra Katutjaku walytjarringkula puntura yunyparringu. Palulanguru mayutju paluru Puulanya Tjayilitjanya pulanya katingu palumpa waaḻakutu. Tjiilaku mayutju paluru pulanya paḻtjaṉu.
35 Tjiṉṯurringkula pakara kuutawutju ngurrara paluru tjana yurrkunytji tjuṯa iyaṉu tjiilakutu, tjiilaku mayutju watjantjaku. Paluru tjana mayutju palunya watjaṉu, “Puulanya Tjayilitjanyaṯarra pakaltjingara wantirriyala!”
36 Tjiilaku mayutjungku Puulanya tjakultjunu yalatji, “Kuutawutju ngurrara tjuṯangkuṉiya watjaṉutjangka palya nyupali pakara yankunytjaku. Katutjalu nyupalinya katiyankunytjaku.”
37 Yurrkunytji palula tjanala Puulalu watjaṉu, “Kuutawutju ngurrara paluru tjana ngalyankula ngalila wangkanytjaku. Paluru tjana ngalyankula ngalinya wangkarra pakaltjingara wantirriyantjaku. Paluru tjana watjaṉu ngalinya mungutja kutjarra wiipatjarrangku pungkunytjaku. Yaṉangu tjuṯangka kurungka ngalinya tjana wiipatjarrangku pungkula ngalya katirra tjiilangka tjarrpatjunu. Ngalimpa mayutju tiṉa Yukatjatjanya Ruumala nyinanyi, palumpa luwu wiyalitju kilytjuntanu. Ngalitju palumpa waarrkana nyinanyi. Paluru watjaṉu palumpa waarrkanangku palumpa luwu kilytjuntananyingka kuutawutju tiṉangka palunya ngaratjunkunytjaku. Ngalinya wiipatjarrangku pungkunytjawiyangku tjana kuutawutju tiṉangka ngaratjunamara, wangkarra tjiilakutu wantirriyalkitjangku. Wiya kuutawutju tiṉangkalitju ngarangi. Mayutju kuutawutju ngurrara paluru tjana mayutju tiṉa Yukatjatjaku luwu kilytjuntanu. Paluru tjana ngalyankula ngalinya wangkarra pakaltjingara wantirriyantjaku.”
38 Yurrkunytji paluru tjana Puulaku wangka kulira yankula wangka palunya tjakultjunu tjananya, kuutawutju ngurrara tjuṯangka, “Paluru kutjarra mayutju tiṉa Yukatjatjaku waarrkana kutjarra nyinanyi.” Kuutawutju ngurrara paluru tjana kuliṉu, “Nganaṉa palunya kutjarra kuutawutju tiṉangka ngaratjunkula wangkamara wiipatjarrangku pungkunytjawiya. Paluru kutjarra wiya tjiilangka nyinamara. Yukatjatjaku luwu yalatji ngaranyi.” Tjana Kuutawutju ngurrara tjuṯangku yalatji kulira nguḻurringu.
39 Palulanguru paluru tjana tjiilakutu yankula Puulanya Tjayilitjanya watjaṉu, “Yukatjatjaku waarrkana kutjarra nyupali nyinanyi. Tjana nyupalinya pungkuwiyangku wantimara. Nganaṉa wiyawanangku watjaṉu nyupalinya pungkunytjaku, nganaṉa wantimara.” Yalatji wangkarra pakaltjingara pulanya katingu, wantirriyalkitjangku. Tjana yalatji palunya kutjarra watjaṉu, “Palyapula yarra!, tawunu kutjupakutu.”
40 Tjiila wantirrapula Puulanya Tjayilitjanya yanu Litiyaku ngurrakutu. Ngurra palula Yiitjuku walytja tjuṯa tjungurringkula nyinangu. Paluru kutjarra tjananya nintiṉu Yiitjukuya tjukarurru kutu nyinanytjaku. Tjana kulira yunyparringu. Palulanguru paluru kutjarra yanu tawunu kutjupakutu.