23
Puulalu mayutju tjuṯangka wangkaku
1 Mayutju palunya tjanala Puulalu ngarala tjananya nyakula watjaṉu, “Walytja tjuṯa, kulilaṉiya! Ngayulu Katutjaku kutu tjukarurru nyinapayi, kuwarriṉa kutu palumpa tjukarurru nyinanyi.”
2 Wangka palunya kulira tuḻkuku mayutju tiṉangku yini Yananayatjalu Puulaku pikarringkula kuliṉingi yalatji, “Nyuntu wiya yalatji ngunytjinytjunkunytjaku.” Puulala yila ngarapayinya mayutju paluru watjaṉu, marangku Puulanya yuṉpa pungkunytjaku.
3 Yuṉpa pungkunytjala Puulalu mayutju palunya watjaṉu, “Nyuntu ngunytjinytju. Nyuntun watjalwiyangku wantimara ngayunya pungkunytjaku. Katutjalunta ngula ngaparrtji pungkuku. Muutjaku luwu ngaranyi nyuntu kuutawutju ngurrarangku ngayuku wangka kulira watjantjaku, nyuntu wiya kutjupa watjantjaku ngayunya pungkunytjaku. Nyuntu yalatji watjara Muutjaku luwu kilytjuntanu.”
4 Puulala yila ngarapayi tjuṯangku watjaṉu, “Wiya nyuntu tuḻkuku mayutju tiṉangka ngaparrtji watjantjaku, wanti!, palunya Katutjalu watjaṉu paluru mayutjulampa nyinanytjaku.”
5 Puulalu watjaṉu, “Ngayulu palunya watjalwiyangku wantimara. Mayutju kutjupakutjura ngayulu kuliṉu. Ngurrpangkuṉa palunya ngaparrtji watjaṉu. Yuwa, Katutjaku wangka yalatji ngaranyi, ‘Yaṉangungku mayutju tiṉanya watjalwiyangku, wantinytjaku.’ ”
6 Puulalu tjananya nyakula kuliṉangi, “Mayutju tjaampalaya Paratji tjuṯa nyinanyi, tjana kuliṉi ngula yaṉangu tjuṯa mirringuru pakara kana nyinaku. Mayutju kutjupa tjuṯangkuya kuliṉi yaṉangu tjuṯa mirringuru wiya pakalku.” Yalatji kulira Puulalulpi tjananya watjaṉu, “Walytja tjuṯa, kulilaṉiya! Ngayuku paapa Paratji nyinangu, ngayuluṯarra Paratji nyinanyi. Ngayulu kuliṉi Katutjalu yilta yaṉangu tjuṯa mirringuru pakaltjingalku. Yalatji ngayulu kulintjala ngaangkaṉiya ngalya katirra ngaratjunu.”
7-8 Wangka palunya Puulalu wangkarra wantingu. Palunyatjanu mayutju Paratji tjuṯa, mayutju kutjupa tjuṯaṯarra wangkarraya waṉingu yalatji, “Yaṉangu tjuṯa ilta mirringuru kanarriku.” Kutjupa tjuṯangku watjaṉu, “Wiya. Yaṉangu tjuṯa wiya mirringuru kanarriku, kutuya ngarrimalpa.” Paratji tjuṯangku watjaṉu, “Ilkari ngurrara tjuṯa ilta nyinanyi, mamu tjuṯaṯarra.” Kutjupa tjuṯangku watjaṉu, “Wiya. Nganaṉa wiya ilkari ngurrara tjuṯa, mamu tjuṯaṯarra nyakupayi, wiya. Tjana wiya ilta nyinanyi.”
9 Yalatji tjana pikapikarringkula wangkarra waṉingu. Paratji tjaampalangku Muutjaku wangka nintilpayi. Paluru tjana pakara watjaṉu yalatji, “Nganaṉatju kuliṉi wati palatja Puulanya palya nyinanyi, kuya palyantjawiya. Tjinguru ilkari ngurrara palula yilta wangkangu.”
10 Paluru tjana kutu pikarringkula wangkangu. Puulanya pungkutjipingka tjuulytji tjuṯaku mayutjungku tjuulytji tjuṯa watjaṉu, Puulanyaya yankula witira ngalya katinytjaku, tjuulytji tjuṯaku waaḻakutu.
11 Mungangka Puulalu nyangu mayutju Yiitjulu ngarala wangkanyingka, “Nguḻuwiya nyina! Tjarutjalumanya ngurrara tjuṯangka nyuntu wangka ngayunyatjarra tjakultjunangi. Kala, nyuntu tjanala tawunu Ruumala ngayuku wangka tjakultjunkuku.”
Puulanya mirri pungkukitjaya wangkaku
12-13 Aaḻi pakaraya Tjuwu puutiyipala tjungurringkula wangkangu Puulanya mirri pungkukitja. Yalatjiya watjaṉu, “Katutjala kurungka nganaṉa tjukarurru watjaṉi. Kuwarri nganaṉa Puulanya mirri pungkuku. Yalatji kutju nganaṉa kuliṉi, wiya nganaṉa mangarriku kuliṉi. Kala, Puulanya mirri pungkula kutju nganaṉa mangarri ngalku, kapi tjikilku.”
14 Puutiyipala paluru tjana tuḻkuku mayutju tiṉa tjuṯakutu, mayutju tjiḻpi tjuṯakutuṯarra tjana yankula tjakultjunu yalatji, “Nganaṉatju Katutjala kurungka kuwarri yalatji watjaṉu. Kuwarri nganaṉa Puulanya mirri pungkuku. Yalatji kutju nganaṉa kuliṉi, wiya nganaṉa mangarriku kuliṉi. Kala, Puulanya mirri pungkula kutju nganaṉa mangarri ngalku, kapi tjikilku.
15 Palulanguru nyurrangarri yalatji palyantjaku. Nyurrangarri mayutju tjuṯa tjananya yaḻṯi!, tjungurrinytjakuya. Tjuulytji tjuṯaku mayutju tiṉangkaya watjala! Puulanya ngalya katinytjaku miitingikutu, kaantjaḻa tjuṯangkunyurra piyuku kulira watjantjaku. Tjuulytji maṉkurrpangku Puulanya ngalya katinytjala nganaṉatju ngururrpa palunya mirri pungkuku.”
16 Puulaku yukarilu tjakulpa panyapa kulira tjuulytji tjuṯaku waaḻangka tjarrparra Puulanya tjakultjunu.
17 Wangka panyapa kulira Puulalu tjuulytji kutju yaḻṯingu. Ngalya yananyingka tjuulytji palunya Puulalu tjapiṉu, “Tjinguru nyuntu yukari ngayuku mayutju tiṉakutu katiku?, yara wangkanytjaku?”
18 Tjuulytji paluru Puulaku yukari mayutju tiṉakutu katirra ngaratjunkula watjaṉu, “Puulaluṉi tjapiṉu, yangupala ngaatjanya nyuntulakutu katinytjaku, yaranta wangkanytjaku.”
19 Mayutju tiṉa paluru Puulaku yukari yunngu katingu ruuma kutjupakutu, kutjupangku kulilpayingka. Yalatji tjapiṉu, “Nyaampanu watjalkitjangku, kuliṉi?”
20 Yangupala paluru watjaṉu, “Tjuwuku mayutju tjuṯangku tjungurrirraya kuliṉi nyuntunya tjana tjapilkitjangku. Nyuntunya tjana tjapilku Puulanya katinytjaku, aaḻi miitingikutu. Tjana nyuntunya ngunytjinytjunku yalatji, ‘Nganaṉa yunytjurringanyi Puulanya purinytju tjapira kulintjaku. Puulanya nyuntu miitingikutu wantirriyala!’
21 Nyuntu yuwa watjantjawiyangku tjananya wanti!, kutjupa tjuṯangku Puulanya ngururrpa mirri pungkutjipingka, nyuntupa tjuulytji maṉkurrpangku palunya katinytjala. Paluru tjana watjaṉu Katutjala kurungka yalatji, ‘Kuwarri nganaṉa Puulanya mirri pungkuku. Yalatji kutju nganaṉa kuliṉi, wiya nganaṉa mangarriku kuliṉi. Kala, Puulanya mirri pungkula kutju nganaṉa mangarri ngalku, kapi tjikilku.’ ”
22 Tjuulytji tjuṯaku mayutju tiṉangku yangupalaku wangka kulira wantirriyalkitjangku watjaṉu yalatji, “Nyuntu wiya yaṉangu kutjupangka tjakultjunkunytjaku, ngayunya nyuntu tjakultjunutjangka.”
Puulanya wantirriyalku mayutju Pilikitjilakutu
23 Tjuulytji tjuṯaku mayutju tiṉa paluru tjuulytji kutjarra kutjupa yaḻṯirra watjaṉu, “Nyupali tjuulytji tjuṯa tjananya yantaṯa kutjarra yaḻṯirra tjungunma! Kuwarri mungangka nyurrangarri Puulanya tawunu Tjiitjarriyalakutu katinytjaku. Naanytjangka kaḻparra yankupayi tjapantiyipala yaḻṯirra tjungunma! Kuḻaṯatjarra yantaṯa kutjarraṯarra yaḻṯirra tjungunma! Panyapa tjuṯa tjananya nyupali tjungura munga ngururrkutu yurrunpa Puulanya naanytjangka kaḻpatjunkula katinytjaku.
24 Puulakuṯarra naanytja maṉkurrpa witira kati!, naanytja purrkarrinytjala paluru kutjupangkalpi kaḻparra kutu yankunytjaku. Puulanya purinypangku kati mayutju Pilikitjilakutu!, Tjuwu tjuṯangku pungkupayingka.”
25 Mayutju paluru piipa wakaṉu wangka yalatjitjarra,
26 “Ngayuluṉa Kulutiyatja Layitjalu piipa ngaatjanya wakara wantirriyaṉi, nyuntulakutu mayutju tiṉakutu, Pilikitjilakutu. Palya nyuntu nyinanyi, yilta?
27 “Wati Puulanyaya Tjuwu tjuṯangku witiṉu mirri pungkukitjangku. Ngayulu kuliṉu tjakulpa Puulanya mayutju tiṉaku Yukatjatjaku waarrkana nyinanyingka. Yalatji kulira ngayulu tjuulytji tjuṯa yaḻṯirra katirra palunya witiṉu, tjana mirri pungkupayingkaya. Ngayulu yalatji palunya yaṉṯayaṉṯaṉingi.
28 “Puṯuṉa kuliṉingi, ‘Puulalu yaalytjinutjangka Tjuwu tjuṯaya pikarringu?’ Yalatji puṯu kulira ngayulu Puulanya katirra ngaratjunu, Tjuwuku mayutju kaantjaḻa tjuṯangka.
29 Tjuwu tjuṯangkuya palunya kuru watjaṉu Puulanya, luwutjirratjangku. Tjana watjaṉingi yalatji, ‘Puulalu kuya palyalpayi, palunya tjiilangka kanyintjaku, kanyira yiluntankunytjaku.’ Ngayulu kuliṉi, paluru wiya kuya palyalpayi, nganampa luwu wiya kilytjuntanu. Palunya wiya yiluntankunytjaku, wiya palunya tjiilangka kanyintjaku.
30 “Palulanguru wati kutjupangkuṉi tjakultjunu, Tjuwu tjaampalangku watjaṉu palunya mirri pungkukitjangku. Yalatji kulira ngayulu tjananya tjuulytji tjuṯangka watjaṉu nyuntulakutu palunya parrpaṯu katinytjaku. Tjuwu Puulaku pika wangkapayi tjuṯa ngayulu tjananya watjaṉu yalatji, ‘Mayutju tiṉa Pilikitjinya tawunu Tjiitjarriyala kuutawutjungka nyinanytjala nyurrangarri Puulanya yankula kuru watjantjaku.’ ” Yalatji Tjuulytji tjuṯaku mayutjungku Kulutiyatjalu wangka panyapa piipangka wakaṉu.
31 Mayutju palumpa wangka kulira tjuulytji tjuṯangku Puulanya katingu mungangka tawunu Yantipatiritjalakutu.
32 Paluru tjana tawunu palula ngarrirra tjiṉṯurringu. Tjuulytji tjina yankupayi tjuṯa rayitpayiki yanu Tjarutjalumalakutu, kanya tjuulytji naanytjatjarra tjuṯangku Puulanya kutu katingu tawunu Tjiitjarriyalakutu.
33 Tawunu palula tjarrparra piipa panyapa tjana yungu mayutju Pilikitjiku. Puulanyalpiya tjuulytji kutjupa tjuṯangku katirra mayutju palula ngaratjunkula wantirra yanu.
34 Mayutju paluru piipa panyapa riitarringkula Puulanya tjapiṉu, “Nyuntu manta ngananya ngurrara?” “Ngayulu manta Tjilitjiyanya ngurrara.” Mayutju paluru Puulanya piyuku watjaṉu,
35 “Ngayulu Tjilitjiyanya ngurrara tjuṯaku mayutju nyinanyi. Palya ngayulu nyuntupa wangka kuutawutjungka kulira watjalku, nyuntupa pikarripayi tjuṯaya ngalya yankula kuutawutjungka ngaranytjala.” Mayutju Pilikitjilu tjananya watjaṉu, tjuulytji tjuṯangkuya Puulanya yaṉṯayaṉṯantjaku, Yirutaku waaḻangka. Waaḻa palunya kuutawutju nguwanpa ngarangu. Waaḻa palula mayutju Yirutalu puritjinaku wangka kulira watjalpayi. Tjana wiya Puulanya tjiilangka kanyilpayi puritjina kutjupa tjuṯawana, waaḻa palula tjana kanyilpayi.