27
Puulanya tjana tawunu Ruumalakutu katiku
1 Tawunu Ruumalakutu Puulanya wantirriyalkitjangku mayutju Pitjatjalu kuliṉu. Tawunu paluru manta Yitaliyala ngarangi. Mayutju paluru tjuulytji tjuṯaku mayutjunya, yini Tjuliyatjanya watjaṉu, “Nyuntu puritjina tjuṯa, wati yini Puulanyaṯarra tawunu Ruumalakutu katinytjaku.” Tjuliyatjanya, mayutju tjanampa tjuulytji tjuṯaku nyinangu. Tjuulytji tjuṯa tjana yini yalatji nyinapayi, “Mayutju Yukatjatjaku waarrkana tjuṯanya.”
2 Ngayulu Luukanya, wati Yaritjakatja Tjitjaluniyanya ngurraraṯarra tjungu tjanalawana yankula puutangka kaḻpakatingu, tawunu Yatarumitiyamala. Tjuliyatjalungarri watjaṉu, “Puuta ngaatja manta Yayitjala tjayiṯiwana yankukitja ngaranyi.”
3 Puutangka nganaṉa yankula aaa mungarringkula kutulatju yanangi. Aaḻi puuta ngurrara tjuṯangku puuta ngaratjunu tawunu Tjayitanala yulytjaya waṉinytjaku. Mayutju Tjuliyatjalu Puulaku yaḻṯururringkula watjaṉu, “Nyuntu palya tjarukatirra walytja tjuṯa yankula nyakunytjaku. Paluru tjanala nyuntu mantarra yulytja tjinguru mantjilku walytjangku kanyilkitjangku.” Puulalu tjarukatirra walytja tjuṯa yankula nyangu tawunu Tjayitanala. Nganaṉatjuṯarra tjarukatirra tjananya nyangu.
4 Palulanguru nganaṉa puutangkalpi kaḻpakatirra yanu. Waḻpangku yalinytjarranguru ngalya rungkantjala, nganaṉa manta Tjapurritjalawana yuntawana yanangi.
5 Manta Tjilitjiyala manta Pampiliyalawanaṯarralatju tjayiṯiwana yankula tawunu Marala puutalatju ngaratjunu. Tawunu Maranya manta Latjinyala ngarangi.
6 Puutangka tjarukatirra tjuulytji tjuṯaku mayutjungku ngurrira puuta kutjupa nyangu manta Yitaliyalakutu riirri yankukitja. Puuta palunya tawunu Yalikitjantiriyanya ngurrara. Puuta palula nganaṉanyatju mayutju paluru katirra kaḻpatjunu.
7 Kaḻpakatirralatju purinypa yanangi. Waḻpangku ngalya rungkaṉingka tjiṉṯu maṉkurrpa rawalatju purinypa yanangi. Purinypa yankulalatju tawunu Tjintatjala yilawana yanangi. Palunyatjanu nganaṉa puutatjarra manta Kiritala yuntawana yanangi, waḻpangkamarra, manta Tjalamunalaṯarra tjayiṯiwana.
8 Manta palulalatju tjayiṯiwana purinypa yankula ngurra Piiyapanala ngaratjunu. Ngurra palunya tawunu Latjiyala yila ngarangi.
9 Waḻpangku kutu rungkantjala puuta ngurra palula kutu ngarangu. Nganaṉa kuliṉingi, “Nganaṉa ngaṉṯirringu. Nganaṉa kutu purinypa yankunytjala warringkulpilanyatju warritjunanyi. Tjuwuku tuḻku tiṉangka tjana nyinarra wiyarringu. Nganaṉa yilta ngaṉṯirringu, nganaṉa tjinguru tjarrpamara.” Puuta ngurrara tjuṯangka tjanala Puulalu marrkuṉu yalatji,
10 “Wati tjuṯa, kulilaṉiya! Nganaṉa wiya puutatjarra yankunytjaku kuwarri, ngaangkala rawa paṯarala ngula yankunytjaku. Nganaṉa kuwarri yananyingka, waḻpangkulampa kapi winkingku puuta kilytjuntankutjipingka, kilytjuntankula luututjarra kapingka tjarrpapayingka, nganaṉaṯarra yurungka tjarrparra mirrirritjipingka. Nganaṉa paṯara ngula yankunytjaku, waḻpa yataṉarrinyingka.”
11-12 Puulalu tjananya puṯu marrkuṉu paṯantjaku. Puutaku mayutjungku, mayutju puuta katipayingkuṯarra watjantjala, tjuulytji tjuṯaku mayutju Tjuliyatjalu kuliṉu. Puuta ngurrara tjuṯangku yalatjiya watjaṉu, “Wiyala kutu ngaangka paṯantjaku ngurra ngaatja yuunta wiima. Nganaṉa tawunu Pinikitjilakutu purinypangku puuta katinytjaku manta Kiritala wilurarra. Ngurra palula nganaṉa warringka nyinanytjaku, yuunta palyangka.”
Waḻpangku tjananya rungkanmalpa
13 Waḻpa yulparirrakutu purinypa wangkanytjalaya kuliṉu, “Waḻpa wiima wangkanyingka palyala puuta katirra ngaratjurra!, tawunu Pinikitjila.” Yayina tiṉa tjiinatjarraya yurrunpa mantakutu waṉingu puuta yankutjipingka. Yayina waṉingutja palunya tjana puulamilara katura puutangkalpi mantjira tjunu. Kala, waḻpangkulpi puuta maa yuṉṯura wantirriyaṉu. Nganaṉa puuta katingu manta Kiritala tjayiṯiwanangku.
14-15 Yalatji nganaṉa ankunytjala waḻpa tiṉangku ngalya rungkaṉingi. Tjana waḻpa palunya watjalpayi yini, “Waḻpa yalinytjarranya.” Puṯulatju yalinytjarrakutu yanangi. Yalinytjarranguru puntura ngalya rungkaṉingka, nganaṉatju puuta taaṉamilara ngaṉṯikutu katingu.
16-17 Yulparirrakutulpilatju yanangi manta Kuutala yunta tjayiṯi. Puuta wiima ruupatjarra puuta tiṉangku katiyankupayi. Puuta wiima palunya tjana purinypangku puulamilara mantjira tjunu, puuta tiṉangka. Palulanguru puuta ngurrara tjuṯangku ruupangka puuta tiṉanya tayimapiṉu yalatji. Tjana ruupa tiṉa waṉingu kapikutu. Kapingku puuta tiṉangka yunnguwana ruupa katinytjala, tjana watiyatjarrangku katura tayimapiṉu. Yalatji tjana ruupa tjuṯangka puuta tiṉanya tayimapiṉu, watiyawana kapi tjarrpapayingka. Kapi tjarrpanytjala puuta palunya tjarrpatjipingka. Manta Lipiyala tjayiṯiwana yurungka yunngu, manta tarrtja ngarapayi. Manta tarrtja palulakutu wala yankutjipingka tjana puutaku kaliki yarrara tjunu, purinypa manta tarrtjakutu yankunytjaku.
18 Waḻpa tiṉangku puutalampatju yuṉṯura wanaṉu. Tjiṉṯu kutjupangka puuta ngurrara tjuṯangku yulytja tiṉa tjuṯa tjana puutangka yunngu mantjira waṉingi kapingka, puuta yulytja tiṉatjarra kapingka tjarrpapayingka.
19 Nganaṉatju piyukulpi tjiṉṯu kutjupangka yanangi, tjana puutakuṉu yulytja ruupa tjuṯaṯarra mantjira kapingka waṉingu.
20 Waḻpangku kapi winkingku kutu rungkantjala puṯulatju nyangangi, tjiṉṯuku piṉṯirrikuṯarra. Puṯulatju nyakula kuliṉulpi, “Wiyala kana nyinamalpa kuwarrila kapingka tjarrparra mirrirriku, waḻpa tiṉangkamaṉṯu.”
21 Puuta ngurrara tjuṯa tjana rawa ngalkuwiya waarrkarrinytjala Puulalulpi tjananya watjaṉu, “Wati tjuṯa. Nyurrangarri ngayuku wangka kulinmara, nganaṉa manta Kiritala paṯanmara ngurra panyapangka. Ngurra palula nganaṉa paṯara palya nyinamara, puutaṯarra palya ngaramara luutu tjuṯatjarra.
22 Nyurrangarri nguḻurrinytjawiya. Nganaṉa kanakampa nyinaku, wiyala mirrirriku yurungka tjarrparra. Puuta ngaatjanya waḻpangku kapingkuṯarra kilytjuntankula wiyalku, nganaṉa yilta kanarriku.
23 “Katutjanya ngayuku mayutju nyinanyi yilta, ngayulu palunya waḻkulpayi. Paluruṉi mungangka ilkari ngurrara ngalya wantirriyaṉu ngayula wangkanytjaku.
24 Paluru ngayula yalatji wangkangu, ‘Puula, nguḻuwiya nyinama! Yilta nyuntu mayutju Yukatjatjala kuutawutjungka ngaraku. Kapingka tjarrparra mirrirritjipingka Katutjalunta kanalku, puuta ngurrara yuwankarraṯarra.’
25-26 Wati tjuṯa, ilkari ngurrarangkuṉi panyapa watjantjala nguḻurrinytjawiyaya nyinama! Katutjakuṉa ninti nyinanyi. Paluru watjara yalatji palyalpayi. Waḻpa tiṉangkulampa puuta wantirriyalku manta wiimakutu. Manta paluru yurungka ngururrpa ngaranyi. Manta palula puutalampa yuḻpurrinytjala nganaṉa kanarriku.”
27 Wiika kutjarrangkalatju puutangka yuru yini Mititiriniyalawana yanangi, waḻpa tiṉangku yuṉṯura wantirriyaṉingka. Mungangka puuta ngurrara tjuṯangku watjaṉu, “Tjinguru nganaṉa mantakuturringanyi.”
28 Paluru tjana ruupa puḻitjarra kapingka waṉingu manta tarrtjangku witintjaku. Ruupa maakamilara puulamilara puutangka tjunu. Piyuku yankula tjana ruupa palunya puḻitjarra waṉingu. Manta tarrtjangku witintjala tjana kuliṉu, “Manta katulpi ngarrinyi.”
29 Puuta puḻingku yatulpayingka, yayina manta nganytjalpayi tjiinatjarra puupala tjana waṉingu, puuta witintjaku. Waṉirraya Katutjanya nguwanpa tjuṯaya tjapiṉangi tjananya yaṉṯayaṉṯantjaku yalatji, “Nganaṉanyatju purinypa kanyila!, tjiṉṯurringkula nganaṉa kanarrinytjaku.”
30 Puuta ngurrara tjuṯangku kuliṉu, “Nganaṉa puuta wiima walatjunkula mantakutu palya yankunytjaku.” Puuta wiima panyapa paluru tjana yurukutu walatjura wantingu tjarukatirra kaḻpakitjangku. Tjana yaṉangu kutjupa tjuṯangka ngunytji watjaṉu yalatji, “Manta nganytjalpayi tjiinatjarra kutjupa nganaṉatju puutangka yurruntjayiṯi katirra waṉiku.”
31 Palunya tjuṯa tjananya nyakula Puulalu tjuulytji tjuṯaku mayutjunya, tjuulytji tjuṯanyaṯarra yalatji watjaṉu, “Puutaku waarrkana tjuṯangku ngunytji watjaṉu tjiinatjarra kutjupa katirra waṉinytjaku. Tjana kuliṉingi puuta wiima mantakutu katikitjangku. Tjana puutaku ninti tjuṯa, puuta wiima wiya tjana katinytjaku. Puuta ngaangka tjana waarrkarrinytjaku, nganaṉakunyu yuwankarra kanarringanyingka.”
32 Puuta ngurrara paluru tjana puuta tiṉangka ngarangi puuta wiimangka tjarukatirra kaḻpakitja. Tjuulytji tjuṯangku Puulalu watjaṉutjangka kulira puuta wiimangka ruupa kuṉṯara wantirriyaṉu. Puuta wiima palula yaṉangu wiya kaḻparra nyinangu. Waḻpangkulpi puuta kutju rungkara wantirriyaṉu.
33-34 Tjiṉṯu pakantjala yurrunpa Puulalu tjananya puuta ngurrara tjuṯa marrkuṉu, “Mangarri nyurrangarri ngalkunytjaku. Wiika kutjarrangka nyurrangarri puutangka rawa waarrkarringkula nguḻungku mangarri wantipayi. Mangarri nyurrangarri ngalkuntjaku. Ngalkuranyurra palya kapingka yanku mantakutu. Yilta nganaṉa kanarriku.”
35 Yalatji wangkarra Puulalu mangarri mantjira Katutjanya waḻkuṉu, “Katutja, nyuntu palya nganaṉanya mangarri ngaatjanya yungu.” Mangarri kilytjuntankula paluru ngalkuṉu, tjana nyakula ngalkukitjangku kulintjaku.
36 Kala, paluru tjana Puulaku wangka kulira yunyparringkula ngalkuṉangi.
37 Tjuṯalatju puutangka nyinangu, yaṉangu tuu yantaṯan tjapantiyi tjikitji.
38 Mangarri yuwankarrangkuya ngalkura mangarri tiṉa kutjupaya yurungka waṉingu, puuta luututjarra yurungka tjarrpatjipingkamarra.
Puuta mantangka kilytjuntanku kapingku
39 Tjiṉṯungkaya puuta ngurrara tjuṯangku manta kutjupa ngaranytjala puṯu nuuwimilaṉu. Wangkarra waṉinguya yalatji, “Ngurra kutjupakunyu ngaatja.” Mantangkaya nyangu patipati ngaranytjala. Nyakulaya kuliṉu, “Patipati nyarrakutula puuta katiku, purinytju mantangka ngaratjunkukitjangku.”
40 Yurrunpa tjana yayina mantangka nganytjalpayi tjiinatjarra tjuṯa tjana waṉingu puuta witintjaku. Mantangka nganytjalpayikuṉu tjiina tjuṯa tjana kuṉṯara kapingka waṉingu. Puutangka ngaṉṯi tjayiṯi watiya wiimapaṯu ngarangu, puuta taaṉarripayi. Yurrunpaya watiya palunya ruupangka tayimapiṉu kapingku pirrtjitjingara kilytjuntankutjipingka. Ruupa palunyaya yarraṉu taaṉarrikitjangku, pirrtjitjingantjakuṯarra. Kalikilpiya waralytjunu, waḻpangku rungkara patipati palulakutu wantirriyantjaku.
41 Kala, puuta yankula manta tarrtjangkalpi ngururrpa nganytjaṉu. Puuta yurrunpa tjayiṯi mantangku witintjala, ngaṉṯi tjayiṯiṯarra kapingku kilytjuntankula wiyaṉu.
42 Tjuulytji tjuṯaku luwu yalatji ngarangu. Tjuulytji tjuṯangku puritjina tjuṯa kutu kanyintjaku. Tjinguru puritjina tjalkaḻungkunytjala, tjuulytji tjuṯaku mayutju tjuṯangku tjananya mirri pungkupayi. Palulanguru tjuulytji tjuṯaya yarrkayarrka wangkangu, “Nganaṉa puritjina tjuṯa wakara yiluntankunytjaku, tjinguru tjana yurungka tjurrpirra yankula tjalkaḻungkunytjala nganaṉanya mayutju tjuṯangku wakara yiluntankutjipingka.”
43 Wangka tjanampa kulira mayutju Tjuliyatjalu tjananya marrkuṉu Puulanyaṯarra pungkutjipingka, “Wakalwiyangku tjananya wanti!” Mayutju Tjuliyatjalu tjananya puritjina tjuṯa watjaṉu, “Yaṉangu kapiku ninti, tjurrpirra yankupayi tjuṯa, yurrunpa nyurrangarri yankunytjaku, mantakutu.
44 Kutjupa tjuṯanyurra kapiku ngurrpa ngaṉṯi mantakutu yankunytjaku. Puutakuṉu pukutjutjarra mantjira yankunytjaku.” Palulanguruya yaṉangu yuwankarra kapiwana yankula mantakuturringu. Yuwankarraya kanarringu.