9
Tjuulalu Yiitjuku wangka kulira palumpa walytjarriku
1-2 Ngurra Tjarutjalumalawana wati paluru Tjuulanya Yiitjuku walytja tjuṯaku kutu pikarripayi. Paluru yaṉangu tjuṯa tjananya watjalpayi, “Ngayulu yunytjurringanyi Yiitjuku walytja tjuṯa tjananya mirri pungkunytjaku.” Paluru kuliṉingilpi tawunu Tamatjakatjalakutu ankula Yiitjuku walytja tjuṯa witira Tjarutjalumalakutu katirra tjiilangka tjarrpatjunkunytjaku. Tuḻkuku mayutju tiṉakutu yankula paluru tjapiṉu, piipaku, wangka yalatjitjarra, “Ngayulu tuḻkuku mayutju tiṉangku Tjuulanya watjaṉu, tawunu Tamatjakatjalakutu yankula Yiitjuku walytja tjuṯa witintjaku. Paluru tjananya wati tjuṯa, minyma tjuṯaṯarra witira ngalya katinytjaku Tjarutjalumalakutu.” Piipa wangka yalatjitjarra Tjuulalu kuliṉu Tjuwuku tjaatji tjuṯangka tjanala nintintjaku tawunu Tamatjakatjala.
3 Tjuulalulpi piipa mantjira tawunu Tamatjakatjalakutu yanangi, palumpa waarrkana tjuṯaṯarra. Tawunu palulakutuya yilarringutjangka tili tiṉangku irrnyaṉu. Tili paluru Tjuulanya irrnyara kanyiṉingi paarrtji puntungku.
4 Paluru mantangka punkara kuliṉu ilkaringuru wangkanytjala, “Tjuula. Tjuula. Nyaangurutjun pikarringkupayi, ngayuku walytja tjuṯakuṯarra.”
5 Tjuulalu watjaṉu, “Nyuntunya ngananyakampa mayutju wangkanyi?” Ilkaringurura wangkangu, “Ngayulu Yiitjunya, nyuntutjun pikarripayi.”
6 Piyukura wangkangu Tjuulala, “Pakara tawunu nyarra palulakutu yankula maa wirrkarra! Palulanguru kutjupangkunta nintilku yaalytjiyaalytji palyantjaku.”
7 Palumpa waarrkana tjuṯangkuya ruutunguru ngarala, kuliṉu wangkanytjala. Kuliraya puntura nguḻurringu, yaṉangu nyakunytjawiyaya, wangka kutju kulira. Nguḻurrirraya wangkawiya ngarala waṉingi.
8 Tjuulalu pakara puṯu nyangangi kuru patirringutjangku. Palumpa waarrkanangkulpi mara witira katingu tawunu Tamatjakatjalakutu.
9 Tjiṉṯu maṉkurrpa paluru nyakuwiya nyinangi mangarri ngalkunytjawiya, kapi tjikintjawiyaṯarra.
10 Tawunu Tamatjakatjala Yiitjuku walytja Ananayatjanya nyinangi. Mayutju Yiitjulu palunya watjaṉu, tjukurrpa nyanganyingka, “Ananayatja.” Ananayatjalu watjaṉu, “Mayutju, ngaatjaṉa nyinanyi.”
11 Mayutju Yiitjulu yalatji piyuku watjaṉu, “Pakara yarra yiwarrakutu! Yiwarra palunya yalatjiya yini watjalpayi, ‘Tjukarurrunya.’ Yiwarra palulakutu nyuntu ankula Tjuutatjaku ngurrakutu yarra! Ngurra palula nyuntu wirrkara tjapila!, wati Tjuulaku, Taatjatjanya ngurraraku! Paluru Katutjala kuwarri wangkanyi.”
12 Piyuku mayutju Yiitjulu Yananayatjanya watjaṉu, tjukurrpa nyanganyingka, “Tjuulalu nyuntunya nyangu tjukurrpa nyakula. Yalatji Tjuulalu nyangu, nyuntu palulakutu yankula mara tjunkula kuru alytjuranytjala.”
13 Yananayatjalu Yiitjunya watjaṉu, “Mayutju, ngayuluṉara nguḻurringanyi Tjuulalamarra. Yiitjuku walytja tjuṯangkuṉi tjakultjunangi, paluru tjananya nyuntupa walytja tjuṯa, ngurra Tjarutjalumala witira tjiilangka tjarrpatjunutjangka.
14 Kuwarri Tjuula paluru tawunu ngaakutulpi ngalya yanu nyuntupa walytja tjuṯalanyatju witilkitja, tuḻkuku mayutju tiṉangku watjara iyaṉutjangka.”
15 Yananayatjalu tjukurrpa nyanganyingka Yiitjulu piyuku yalatji watjaṉu, “Nguḻurringkuwiyara yarra!, wati Tjuulalakutu kuwarri wangkanytjaku. Ngayuluṉa wati palunya ngurrtjaṉu, ngayuku waarrka paluru palyarinkunytjaku. Paluru wangka ngayunyatjarra Tjuwuwiya tjuṯangka, mayutju tiṉa tjuṯangkaṯarra, Yitjurilaku ngaṉṯitja tjuṯangkaṯarra tjakultjunkuku.
16 Tjuulalu ngayuku waarrka palyantjala kutjupa tjuṯangku palunya panypurangkula pungku. Yalatji Tjuulanya pungkunytjala ngayulu Yiitjuluṉa nintilku.”
17 Palulanguru Yananayatjalu yankula waaḻa palula tjarrparra Tjuulanya nyangu. Nyakula paluru mara tjunkula watjaṉu, “Tjuula, ngali Yiitjuku walytja kutjarralpi. Mayutju Yiitjuluṉi iyaṉu. Nyuntu palunya nyangu ruutungka yutitjarringutjangka. Paluruṉi iyaṉu nyuntu kuru alytjuralpi nyinanytjaku, Katutjaku kurrunpanta tjarrpanytjala.”
18 Paluru kuru tjulkuratjarra nyinangu nyakunytjawiya. Palunyatjanu paluru kuru tjulkuratjarra wiyalpi nyinangi, palyalpi nyakula nyinangi. Tjuulanya pakara ngaranytjala palunya Yananayatjalu papatatjimilaṉu.
19 Mangarri ngalkura tjipatjiparringu. Tjuulanya tjungurringkula tjanala Tamatjakatjanya ngurrara Yiitjuku walytja tjuṯangka nyinangi tjiṉṯu maṉkurrpa nguwanpa.
Tamatjakatjala tjananya Tjuulalu nintilku
20 Tjuulalu Tjuwuku tjaatji tjuṯakutu yankula tjananya nintilpayi yalatji, “Yiitjunya yilta Katutjaku katja nyinanyi.”
21 Palumpa wangka kuliraya puṯu kuliṉingi. Tjana wangkarra waṉingiya, “Wati paluru Yiitjuku walytja tjuṯa Tjarutjalumala witira pungkupayi. Yalatjikitja paluru tawunu ngaakutulpi ngalya yanu, witira tjananya tuḻkuku mayutju tiṉakutu katirra ngaratjunkunytjaku. Yaalytjiyaalytji paluru Yiitjuku walytja nguwanpa wangkanyi?”
22 Tjuulalu nguḻuwiyangkulpi tjananya wangka Yiitjunyatjarra nintiṉingi Katutjaku wangka riitarringkula. Tjuwu tjuṯangku wangka palunya kulira kuliṉingi, “Katutjalu yirriṯi watjaṉu Kurayitjanya wantirriyalkitjangku. Wangka palulawana tjinguru Yiitjunya paluru yilta wantirriyaṉu.” Tjuulalu yalatji tjukarurru nintintjala, paluru tjana puṯu kuliṉu piyuku wangkakitjangku.
23 Palulanguru Tjuwu kutjupa tjuṯa tjungurringkula wangkangu Tjuulanya mirri pungkukitja.
24 Wati kutjupangku tjakulpa kulira Tjuulanya tjakultjunu, tjana pungkukitjangku watjaṉutjangka. Tawunu Tamatjakatjala parriki tiṉa rayitrawunu ngarangi, puḻitjanu palyaṉutja. Kiiṯa tiṉa tjuṯaya ngarangi parriki palula. Yalatji Tjuulanya paluru tjakultjunu, “Tjana paṯaṉi kiiṯa tjuṯangka nyuntu ngurra kutjupakutu yananyingka nyakula mirri pungkukitjangku. Tjana watjaṉu rawa paṯalkitjangku tjiṉṯungka mungangkaṯarra.”
25 Tjuulaku walytja tjuṯangkuya mungangka kaṉilpa nguwanpa, tiṉangka tjarrpatjunkula walatjunu. Waaḻa alytjurawana, katunguru witjurrulypa walatjunu mantakutu, ruupatjarrangku, kiiṯa tjuṯangkaya pungkupayi tjuṯa paṯaṉingka.
Tjuulanya Tjarutjalumalakutu yankuku
26 Tjuulanya Tjarutjalumalakutu yankula Yiitjuku walytja tjuṯangka tjanala tjungurrikitjangku kuliṉu. Yiitjuku walytja maṉkurrpa tjapiṉu tjanala, kutjupa tjuṯangkaṯarra tjungurrikitjangku. Paluru tjana Tjuulalamarra nguḻurringu, “Wiya paluru Yiitjuku walytja yilta nyinanyi. Paluru ngunytjinytju. Paluru nganaṉanya pungkula tjiilangka tjarrpatjunkupayi.”
27 Tjuulalu tjanala tjungurrikitjangku puṯu kuliṉingka, Panapatjalu palunya katingu, Yiitjuku waarrkana tjuṯakutu. Panapatjalu tjananya tjakultjunu yalatji, “Tjuulalu ruutungka mayutju Yiitjunya nyangutjangka, paluru Tjuulanya yilta wangkangu. Palulanguru Tjuulalu tjananya Tamatjakatjanya ngurrara tjuṯangka nintiṉingi, nguḻuwiyangku wangka Yiitjunyatjarra.” Panapatjaku wangka tjana kulira Tjuulaku yunyparringu.
28-29 Palulanguru Yiitjuku walytja tjuṯangkalpi Tjuulanya tjungu parra yankupayi ngurra Tjarutjalumalawana. Tjuulalu tjananya wangka Yiitjunyatjarra nintirinangi, nguḻuwiyangku. Tjuwu kutjupa tjuṯangka Kiriki wangkatjarra tjuṯangka paluru wangka Yiitjunyatjarra nintilpayi. Tjaampalaya Tjuulaku pikarripayi. Tjana kuliṉingi Tjuulanya mirri pungkukitjangku.
30 Yiitjuku walytja tjuṯangkuya tjakulpa kuliṉu, tjana Tjuulanya mirri pungkukitja ngaranytjala. Yalatji kulira tjana wati palunya katingu tawunu Tjiitjarriyalakutu, pikaraya wangkanytjala pungkukitja mirri. Tawunu palulanguru tjana watjara piyuku Taatjatjalakutulpi iyaṉu.
31 Palulanguru Yiitjuku walytja tjuṯaya ngurra tjuṯawana palya nyinangi, manta Tjuutiyalawana, manta Kaliliyilawana, manta Tjamiriyalawanaṯarra. Yiitjuku tuunlayiki tjuṯangku tjananya wiya panypurangkula pungkupayi, wiya tjananya tjiilakutu katirra tjarrpatjunkupayi. Paluru tjana kutu Katutjanya waḻkura nyinapayi. Katutjaku kurrunpangku tjananya Yiitjuku walytja tjuṯa yaṉṯayaṉṯara rapaṉu, tjana tjukarurru nyinanytjaku. Yaṉangu kutjupa tjuṯa tjanala tjungurringkula Yiitjuku wangka kulira palumpa walytjarringu. Yiitjuku walytja tjuṯalingkulpiya nyinangu.
Piitanya tawunu Litalakutu yankuku
32 Ngurra tjuṯawana Piitanya yulytjapayi, Yiitjuku walytja tjuṯa nyakula nintilkitja tjungurrinytjala. Tawunu tjuṯawana yankula tawunu Litala tjarrpangu, Yiitjuku walytja tjuṯa nyakukitja.
33 Paluru wati miiṉṯa Yanitjanya nyangu, parralayitji yinytjamingka ngarrinyingka. Paluru kutu parralayitji nyinangu yiiya yayitpala.
34 Piitalu palunya watjaṉu, “Yanitja, Yiitju Kurayitjalunta kuliṉi. Palurunta kuwarri palyaṉi. Pakara pulangkiti panpanpungkula katinku!” Ilta paluru pakara ngarangu.
35 Paluru parralayitjitjanu parra yananyingka tawunu palunya ngurrara tjuṯangku, tawunu Tjarunanya ngurrara tjuṯangkuṯarra nyakula yunyparringu. Yunyparringkulaya Yiitjunya Katutjaku katja kulira palumpa walytjarringu.
Piitalu minyma yini Tuukatjanya kanalku
36 Palulanguru tawunu Tjuupala wulkumanu Yiitjuku walytja nyinangi, yini Tapitjanya. Yini palunya Kiriki wangkatjarrangku watjalpayi yalatji “Tuukatjanya.” Wulkumanu paluru maralpa tjuṯaku, mantarra wakara yungkupayi. Palunya tjananya paluru kutu yaṉṯayaṉṯalpayi. Yaṉangu kutjupa tjuṯaṯarra paluru yungkupayi.
37 Palulanguru wulkumanu paluru miiṉṯa punturringkula wiyarringulpi. Palumpa walytja tjuṯangku kapingka paltjira waaḻa katu, yunngu ngarritjunu. Yalatjiya palunya ngurrara tjuṯangku waaḻa katu yunngu mirri ngarritjunkupayi ngulalpiya ngaṯingka katirra tjarrpatjunkupayi.
38 Tawunu Litanya, tawunu Tjuupala yila ngarangi. Yiitjuku walytja Tjuupanya ngurrara tjuṯangku tjakulpa kuliṉu Piitanya tawunu Litala nyinanyingka. Paluru tjana wati kutjarra tawunu Litalakutu iyaṉu, Piitanya nyakula wangkanytjaku, “Tjiḻpi, ngalya yarralampatju parrpaṯu!”
39 Wangka palunya kulira Piitanya pakara palula kutjarrawana tjungurringkulaya yanu waaḻa palulakutu. Waaḻa palula paluru kutjarra Piitanya tjarrpatjunu. Waaḻangkaya katukutu kaḻpangu, mirrikutu. Yulkumina waḻukuta tjuṯaya yularra ngarangi. Piitanyaya nintiṉu mantarra Tuukatjalu tjanampa wakara palyara yungutja tjuṯa.
40 Piitalu tjananya watjaṉu, yaatjayiṯiya yankula ngaranytjaku. Paluru tjana yuriltaya yankula ngaranyingka, Piitalu pupakatirra Katutjanya tjapiṉu. Mirrikutulpi paluru wangkangu, “Tapitja pakala!” Kuru alytjurarringkula Piitanya nyakula pakaṉu nyinangilpi.
41 Mara witira Piitalu palunya ngaratjunu. Ngaratjunkula tjananya yaḻṯingu, Yiitjuku walytja tjuṯa, waḻukuta tjuṯaṯarra. Nintiṉu tjananya kanalpi ngaranyingka wiyarringutja palunya.
42 Wulkumanu kanarringutjangkaya tawunu palulawana tjakultjurinangi. Tawunu Tjuupanya ngurrara tjuṯangku tjakulpa palunya kuliṉu. Kulira Yiitjukuṉu wangkaṯarra kulira palumpa walytjarringu.
43 Piitanya tawunu Tjuupala kutu nyinangi Tjaamanaku ngurrangka. Tjaamana paluru waarrka laatja palyalpayi nyinangi.