6
Yiitjuku walytja kutjupa wiya tjamantjamilantjaku
1 Yiitjuku walytja kutjupangkunta kuya palyantjala wiya palunya tjamantjamilantjaku. Wiya yurrkunytjingku witira palunya kuutawutjukutu katinytjaku. Kuutawutju ngurrara tjuṯangku wiya Katutjaku wangka kulira watjalpayi. Yiitjuku walytja tjuṯangka nyupali tjungurringkula nyinarra wangkanytjaku. Paluru tjana nyupalimpa wangka kulira watjantjaku, wiya kuutawutjuku mayutjungku kulira nyupalinya watjantjaku.
2-3 Wangka yalatji nyurrangarri kulintjaku. Ngula yaṉangu tjuṯa, ilkari ngurrara tjuṯaṯarra kuutawutjungka ngaranytjala Katutjaku walytja tjuṯangku Yiitjuluṯarra tjungungkuya yaṉangu tjuṯa, ilkari ngurrara tjuṯaṯarra watjalku. Yiitjuku walytja kutjarrangkupulanku pikarrinytjala wangka panyapa nyurrangarri kulira Katutjaku walytja tjuṯangku palya tjungurringkula palumpa kutjarra wangka kulira watjanmara.
4 Yiitjuku walytja paluru kutjarra pikarringutjangka wiya palunya kutjarranyurra katimara kuutawutjukutu, wantimara pulanya tjakultjunkunytjawiyangku. Paluru kutjarra yalatji kulinmara, “Ngali wiya kuutawutjuku mayutjungka wangkanytjaku. Paluru wiya Katutjaku wangkawana kulira watjalpayi. Ngali Yiitjuku walytja tjuṯaku mayutju tjuṯangka tjungurringkula wangkanytjaku. Tjana Katutjaku wangkawana kulira tjukarurru watjalku.”
5 Yuwa, nyurrangarri Katutjaku walytja tjuṯangku palumpa kutjarraku wangka kulira nintingku watjanmara. Paluru kutjarra pikarrinytjala nyurrangarri wiyawanangku kulira palunya kutjarra kuutawutjukutu katingu. Nyurrangarri tjiḻpi ninti tjuṯa nyinarra tjungurringamara. Tjungurringkula wangka palunya kutjarraku kulira nintingku watjanmara. Kuutawutjuku mayutju Katutjaku ngurrpangku wiya palunya kutjarra watjantjaku.
6 Kuutawutjuku mayutju tjuṯangku wiya Katutjaku wangkawana kulilpayi. Yiitjuku walytja kutjupangkunta kuya palyantjala wiya nyuntu palunya tjamantjamilantjaku kuutawutjukutu tjana katitjipingka.
7 Yalatji nyurrangarri Yiitjuku walytja kutjupa tjamantjamilantjala ngayulu kuliṉi nyurrangarri wiya Yiitjuku wangkawana tjukarurru nyinanyi. Kutjupangkunta kuya palyantjala wiya nyuntupa walytja tjuṯangku yankula tjamantjamilantjaku. Kutjupangkunta mulyaṯangku mantjintjala nyuntu palumpa palya nyinanytjaku yulytja wanara mantjintjawiya.
8 Yalatji palya nyinanytjawiya tjaampalangku nyurrangarri Yiitjuku walytja kutjupangka kuya palyalpayi. Tjaampalangku nyurrangarri Yiitjuku walytja kutjupangka mulyaṯangku mantjilpayi.
9 Wiyanyurra yalatji kuya palyantjaku. Kuya palyalpayi tjuṯaya wiya Katutjaku walytja tjuṯawana nyinaku. Katutjalu tjananya yaṉṯayaṉṯalwiyangku wantiku. Wangka ngaatjanyaya kulila! Yaṉangu tjuṯangku yalatji kuya palyalpayi. Tjaampalaya miiṯa kutjupa miiṯa kutjupangka ngarripayi. Kutjupa tjuṯa tjana Katutjanya nguwanpa waḻkulpayi. Kutjupa tjuṯa wiya miiṯa walytjaku tjukarurru nyinapayi, wiya. Wati kutjupa tjuṯa ngarripayi wati kutjupa tjuṯawana, miiṯangka nguwanpa. Yalatji paluru tjana kuya palyara wiya Katutjaku walytja tjuṯangka tjungu nyinaku.
10 Yaṉangu kutjupa tjuṯangku mulyaṯangku mantjilpayi. Kutjupa tjuṯangku mani yulytja tiṉaṯarra mantjilpayi walytjangku kanyilkitjangku. Kutjupa tjuṯangku yaṉangu kutjupa tjuṯa panypurangkupayi. Kutjupa tjuṯangku waama tjikira turaangkarringkupayi. Yalatji paluru tjana kuya palyalpayi, wiya tjana Katutjaku walytja tjuṯawana nyinaku.
11 Yirriṯi Kurinytjiyanya ngurrara tjuṯangkunyurra palunya tjuṯa nguwanpa kuya palyara nyinapayi. Palulanguru Katutjaku kurrunpangku nyurrangarrinya tjukarurruntjala Yiitjuku walytjarringu. Paluru nyurrangarrimpa kuya waṉinytjala Katutjaku walytja tjuṯalpi nyurrangarri tjukarurru nyinanyi.
Katutjaku nganaṉa tjukarurru nyinanytjaku, miiṯa kutjupa miiṯangka ngarrinytjawiya
12 Yiitjuku walytja tjaampalangkunyurra yalatji watjalpayi, “Walytjangkula kulira palyantjaku, wiya nganaṉanya kutjupangku marrkuntjaku.” Yalatji kulira yaṉangungku kuya palyantjala Katutjanyara wiya yunypa nyinaku. Ngayulu kuliṉi yalatji. Walytjangkuṉa kulira tjukarurru palyantjaku. Tjinguru ngayulu walytjangku kulira kuya palyara, ngayulu kuya kutu palyaltjipingka.
13 Yiitjuku walytja kutjupa tjuṯangkunyurra yalatji watjalpayi, “Mangarriku kukakuṯarra nganaṉa yunytjurringkula palya ngalkuntjaku. Yalatji nguwanpa kungka kutjupakuṉu miiṯawana nganaṉa yunytjurringkula palya palulawana ngarrinytjaku.” Alatji nyurrangarri ngunytjingku kuliṉi. Nganaṉa wiya miiṯa kutjupawana yunytjurringkula ngarrinytjaku, nganaṉa miiṯa walytjangka kutju ngarrinytjaku. Nganaṉa Katutjaku yunytjurringkula tjukarurru nyinanytjaku palumpa. Paluru nganaṉanya yaṉangu tjuṯa yaṉṯayaṉṯaṉi.
14 Ngula nganaṉa mirri ngarrinytjala Katutjalu nganaṉanya kanara yaṉangu nyuwanalpi nyinatjunku ngangkari puntutjarrangku. Yalatji nganaṉanya mirringuru kanalku, mayutju Yiitjunya ngangkari puntutjarrangku kanara nyinatjunutja nguwanpa.
15-16 Wangka ngaatjanyaya kulila! Kungka miiṯamiiṯatjarra tjuṯa, tjiingkila tjuṯaṯarra yankula wati kutjupa kutjupangka ngarriyinkupayi. Wati Yiitjuku walytja tjuṯa nyinarra wiya nyurrangarri kungka palula tjanalawana ngarrinytjaku, wantiya!, kungka palula tjanalawana ngarrirra walytjarripayingkamarra. Wiya Yiitjuku walytja kungka palaku walytjawalytjarrinytjaku. Katutjaku wangka yirriṯi tjunutja yalatji ngarrinyi, “Tjinguru wati kungkangka ngarrirra paluru palumpa walytjarriku.” Yalatji kulira wiyanyurra kungka walytjawiyangka ngarrinytjaku, wantiya!
17 Tjinguru wati mayutju Yiitjuku walytjarringkula paluru Yiitjunyaṯarra walytjarringanyi.
18 Yaṉangu tjuṯangkula kuya palyara nyinanyi. Yalatji nganaṉa kuya palyara yaṉangu kutjupa tjuṯaku kalypawiyalpi nyinaku, miiṯa walytjakuṯarra. Tjinguru nyuntu yankula miiṯa kutjupangka ngarrirra nyuntu puntura kuya palyalku. Yalatji kuya palyara nyuntu miiṯa palumpa walytjarriku, wiya nyuntu Yiitjuku walytja nyinaku, wiyalpi. Wiyanyurra miiṯa kutjupangka ngarrinytjaku, miiṯa walytjangka kutjunyurra ngarrinytjaku.
19 Wangka ngaatjanyaya kulila! Katutjalu nyurrangarrinya palumpa kurrunpa tjarrpatjunkunytjala paluru nyurrangarrinya nintiṉi tjukarurru nyinanytjaku, wiyanyurra walytjangku kulira palyantjaku mayutju nguwanpangku, wiya. Katutjanya nganampa mayutju tiṉa nyinanyi. Nganaṉa palumpa wangka kutju kulira kaangkurrinytjaku.
20 Mayutju Yiitjunya nyurrangarrimpa watiyangka mirrirringu Katutjaku walytja tjuṯanyurra nyinanytjaku. Yalatji kuliranyurra palumpa tjukarurru nyinanytjala yaṉangu tjuṯangku Katutjanya waḻkulku.