2
1-2 Muutjaku luwutjarra tjuṯangku nyurrangarrinya, tawunu Liyutatjiyanya ngurrara tjuṯaṯarra nintira tjingapunganyingka ngayulu puntura yurrukulilpayi. Yiitjuku walytja kutjupa tjuṯaku ngayuku ngurrpa tjuṯakuṯarra ngayulu puntura kulilpayi. Puntura kulira ngayulu Katutjanya tjanampa tjapilpayi tjana Yiitjuku tjukarurru nyinanytjaku, walytja kutjupa tjuṯakuṯarra yunytju nyinanytjaku. Tjana yalatji yulykarra kutjupa tjuṯangka nyinanyingka Katutjalu tjananya nintilku Yiitju Kurayitjaku ninti puntu nyinanytjaku. Tjana yalatji nintirringkula Yiitju Kurayitjaku walytja tjukarurru kutulpi nyinaku. Katutjalu Yiitju Kurayitjanya yaṉangu tjuṯangkalpi yirriṯi yutitjanu. Yalatji ngayulu nyurrangarrimpa Katutjanya tjapilpayi nyurrangarri Yiitjuku tjukarurru nyinanytjaku, walytja kutjupa tjuṯakuṯarra yunytju nyinanytjaku.
3 Yiitju Kurayitja palumpa yaṉangu tjuṯa walytjarringkula puntura nintirringkula Katutjaku ninti puntulpi yilta nyinaku.
4 Wangka palunya ngayulu kuwarri wakara tjunangi nyurrangarri nintingku kulintjaku, kutjupa tjuṯangku wiyawana nyurrangarrinya nintintjala kuliltjipingka.
5 Yuwa, ngurra waṉma ngayulu nyinanyi. Waṉma nyinarra ngayulu nyurrangarrimpa puntura kulilpayi. Ngayulu nyurrangarrimpa yunypa nyinanyi nyurrangarri Yiitju Kurayitjaku tjukarurru nyinanyingka.
Yiitju Kurayitjanya kutjulampa, maṯupurra
6-7 Yiitju Kurayitjaku walytjarringkula nyurrangarri kuliṉi, “Yiitjunya yilta ngayuku mayutju nyinanyi.” Yalatji kulira nyurrangarri palumpa tjukarurru kutu nyinanytjaku. Ingkaṯa panyapa tjuṯangku nyurrangarrinya wangka Yiitjunyatjarra nintilpayi. Wangka palunya kutjunyurra kutu kulintjaku, wangka kutjupa wiya. Yiitju Kurayitjanya kutju nyurrangarri yunypangku waḻkuntjaku.
8 Wiyawana nintilpayi tjuṯangku nyurrangarrinya nintintjala kuliranyurra wantinytjaku. Tjana Katutjanya nguwanpa tjuṯa waḻkura wangka tjanampaṉuwana ninti nyinanyi, wangka kuyawana. Mamu tjuṯaṯarra tjana waḻkura nyinapayi. Tjanampaṉu wangka kulira tjaampala yunyparringkupayi yalatji, “Yuwa, wangka pala tjuṯa palyalingku. Tjana ninti puntu nyinanyi.” Wiya yalatji. Tjanampaṉu wangka yaṉangukuṉu, Katutjaku ngurrpa tjuṯakuṉu, Yiitju Kurayitjakuṉu wangka wiya.
9-10 Yiitju Kurayitjanya Katutjanya mayutju tiṉa kutjarra nyinanyi, ngangkari kutjutjarra. Yiitju Kurayitjakuṉu wangka kutjunyurra kulintjaku, panyapa tjuṯakuṉu wiya. Palumpa wangka kulira walytjarringkula palyanyurra nyinanyi, wangka kutjupawana wiyanyurra nyinanytjaku. Yiitjunya mayutju tiṉalingku nyinanyi mayutju manta ngurrara tjuṯangka wirriḻi, ilkari ngurrara tjuṯangka wirriḻi.
11 Yiitju Kurayitjalu nyurrangarrimpa kuya waṉingu tjukarurrunyurra nyinanytjaku. Wiyanyurra kutu yunytjurringanyi kuya palyalkitja.
12 Nyurrangarri palumpa walytjarrinytjala ingkaṯa tjuṯangku nyurrangarrinya kapingka tjarrpatjunkula papatatjimilaṉu. Palulanguru wiyanyurra yunytjurringkupayi kuya palyalkitja. Yalatji Katutjalu nyurrangarrinya ngangkari tiṉatjarrangku ngulytjuṉu. Ngangkari palunyatjarrangku paluru Yiitju Kurayitjanya mirringuru kanaṉu.
13 Yaṉangu mirrirringutjangku wiya kuliṉi. Yalatji nguwanpa nyurrangarri yirriṯi wiya Katutjaku wangka kulilpayi, palumpa walytjawiyangku, kuya kutunyurra palyara nyinapayi. Yiitju Kurayitjalu mirrirringkula kuya nyurrangarrimpa waṉinytjala Katutjanyalpi nyurrangarrimpa kalypa nyinanyi. Yalatji Katutjalulampa kuya waṉingu.
14 Irriṯi nganaṉa Muutjaku luwuwana nyinarra kuya kutu palyalpayi. Luwu palunya tjuṯa nganaṉa kilytjuntankupayi. Katutjalu kuliṉu, “Ngaa tjuṯangku kuya palyara nyinanyi, ngayulu kalypawiya tjanampa nyinanyi.” Palulanguru Yiitju Kurayitjalu watiyangka mirrirringkula kuyalampa waṉingu, nganaṉa palumpa walytjarringutjangka.
15 Paluru mirringuru kanarringkula katu ankula Katutjaku ngurrangka nyinanyi mayutju tiṉa yilta. Mamu tjuṯangka, ilkari ngurrara tjuṯangkaṯarra wirriḻi paluru nyinanyi. Ngula paluru tjananya pungku.
16 Palumpa wangkawana kutju nganaṉa nyinanytjaku. Wiyawana nintilpayi tjuṯaku wangka wiyanyurra kulintjaku, palumpa tjanampa wangkawana wiyanyurra nyinanytjaku. Paluru tjana watjalpayi Tjuwu nguwanpanyurra nyinanytjaku yalatji, “Mangarri ngaa tjuṯa kutjunyurra ngalkunytjaku, kutjupa tjuṯa wantinytjaku. Ngaatja wiyanyurra kuwarri ngukuntjaku, kapi kutjunyurra kuwarri ngukuntjaku. Tuḻku tjuṯangkanyurra nyinarra Katutjanya waḻkuntjaku. Maanytja kutjupa maanytjangka tuḻkungkanyurra nyinanytjaku. Tjarritiyi kutjupa Tjarritiyingkanyurra tuḻkungka nyinanytjaku Wiyanyurra yalatji nyinanytjaku, Yiitju Kurayitjakuṉu wangkawana maṯupurrangka nyinanytjaku.
17 Luwu palunya tjuṯa wiyarringu, nganaṉa yurrunpa kulilpayinya. Kuwarrilpi Yiitju Kurayitjalu nganaṉanya palumpa wangka nintiṉingi. Wangka palumpa kutjulpi nganaṉa kulintjaku.
18 Wiyawana nintilpayi tjuṯa ingkaṯa palya nguwanpa nyinanyi yalatji. Tjana watjalpayi, “Nganaṉa kuyakuya tjuṯa nyinanyi. Wiya nganaṉa Katutjanya tjapilpayi paluru mayutju tiṉalingku nyinanyi. Nganaṉa ilkari ngurrara tjapilpayi tjana Katutjanyalampa tjapintjaku. Yuwa, nganaṉa ilkari ngurrara tjuṯa waḻkulpayi.” Tjana yalatji wiyawana kuliṉi. Tjana yalatji kutu watjalpayi, “Nganaṉa tjukurrpa nyakula nyurrangarrila wangka tjukarurru tjakultjunanyi.” Wiya paluru tjana wangka tjukarurru tjakultjunkupayi wangka ngunytjinytju, wiyawana. Tjana Katutjaku ngurrpa tjuṯa nguwanpangku wiyawana kulilpayi. Tjanankuya walytjangku puḻkapungkupayi, ngunytjinytju tjuṯangku.
19 Paluru tjana wiya Yiitju Kurayitjaku wangka kuliṉi, tjana wiya palumpa walytja nyinanyi. Katutjaku walytja tjuṯaku nganampa Yiitjunya mayutju nyinanyi. Paluru nganaṉanya rapalpayi palumpa wangkawana tjukarurru nyinanytjaku. Yalatji nganaṉa tjukarurru nyinanytjala Katutjanya nganampa yunypa nyinaku.
Muutjaku luwuwana wiya nyinanytjaku
20 Yiitju Kurayitjaku wangka nyurrangarri kulira palumpa walytja tjuṯa nyinanyi. Wiyanyurra panyapa tjuṯaku wangka kulintjaku. Tjanampaṉu wangka yaṉangukuṉu, Katutjaku ngurrpa tjuṯakuṉu, Yiitju Kurayitjakuṉu wangka wiya.
21 Paluru tjana nyurrangarrinya nintilpayi yalatji, “Mangarri palatja ngalkuwiyangku wanti! Yulytja palatja pampulwiyangku wanti!”
22-23 Mangarri yaṉangungku ngalkuntjala wiyarringkupayi. Yulytjaṯarra yaṉangungku kanyintjala yungkiyarringkula kuyarringkupayi, kutu ngarrinytjawiya. Yiitju Kurayitjaku wangka kutju kutu ngarapayi, palumpa wangkanyurra kulintjaku. Paluru tjana yalatji watjalpayi, “Mangarri palatja wanti! Yulytja palatja wanti! Yalatjinyurra wantirra nganampa wangkaku tjukarurru nyinanytjaku.” Yaṉangu tjaampalangku wangka tjanampa kulira watjalpayi, “Yuwa, nganaṉa palumpa tjanampa wangka kulintjaku, tjana palya luwutjarra nyinapayi ninti puntu. Tjana Katutjaku yunytju nyinanyi.” Wiya alatji. Wangka palatja yaṉangukuṉu. Yaṉangu wangka palulawana nyinarra kuya palyalkitja yunytjurripayi. Yaṉangungku puṯu kulilpayi kuya palyalwiya nyinakitjangku. Kurayitjakuṉu wangka yaṉangungku kulira wiya yunytjurringanyi kuya palyalkitja.