3
Puulalu watjalku, “Tjuwuwiya tjuṯawana ngayulu tjakultjurinkupayi”
1 Ngayulu kuwarri tjiilangka nyinanyi. Yiitju Kurayitjaku waarrka ngayulu nyurrangarrila Tjuwuwiya tjuṯangka palyantjala, ngayunyaṉiya tjana witira tjiilangka tjarrpatjunu.
2 Nyurrangarri Yipitjanya ngurrara tjuṯa ninti nyinanyi Katutjalu ngayunya yaḻṯururringkula watjaṉu, palumpa waarrka nyurrangarrilawana palyantjaku.
3-4 Wangka Yiitju Kurayitjanyatjarraku yaṉangu kutjupa tjuṯa ngurrpa nyinapayi. Katutjalu ngayunyalpi wangka palunya nintiṉu. Wangka panyapa Katutjalu nintiṉutja ngayulu piipa ngaangka wakaṉi. Piipa ngaatja riitarringkula nyurrangarri kulilku yalatji, “Yiitju Kurayitjakuṉu wangkaku Puulanya ninti nyinanyi.”
5 Yirriṯi yaṉangu yuwankarra ngurrpa nyinapayi wangka Kurayitjanyatjarraku. Wiya Katutjalu tjananya yirriṯitja tjuṯa nintiṉu. Yiitjunya mantangka nyinanytjala ngaṉṯilpilanyatju Katutjaku kurrunpangku nintiṉu Yiitjuku waarrkana tjuṯangka, Katutjaku wangka watjalpayi tjuṯangkaṯarra.
6 Wangka Kurayitjanyatjarra yalatji ngaranyi. Katutjalu yirriṯi watjaṉu, Yiitju Kurayitjanya mantangka yaṉangu tjuṯaku mayutju nyinatjunkukitjangku. Irriṯi Yiitjunya ngalyankunytjala nganaṉatju Tjuwu tjuṯangku kulilpayi. Tjuwuwiya tjuṯangkuṯarra palumpa wangka kulira walytjarringkupayi. Yiitju Kurayitjaku walytjarringkula nganaṉa tjungu Katutjaku walytja tjuṯa nyinanyi, Tjuwu tjuṯa, Tjuwuwiya tjuṯaṯarra.
7 Katutjaluṉi yaḻṯururringkula watjaṉu ngayulu palumpa waarrkana nyinanytjaku. Paluruṉi rapaṉu palumpa wangkaṉa ngurra tjuṯawana tjakultjunkunytjaku.
8 Katutjaku walytja kutjupa tjuṯa ngayula munkarra nyinanyi Yiitjuku walytja tjana rawa tjukarurru nyinapayi. Ngayulu rawa wiya palumpa walytja nyinapayi, wiyawana ngayulu palumpa walytja tjuṯa tjiilangka tjarrpatjunkupayi. Katutjalu ngayunya yaḻṯururringkula watjaṉu Tjuwuwiya tjuṯawana wangka Yiitjunyatjarra tjakultjunkunytjaku yalatji. Yiitju Kurayitjanyalampa mayutju palyalingku nyinanyi. Paluru kuyalampa ilta waṉipayi, nganaṉanya paluru yuwankarra yaṉṯayaṉṯaṉi.
9 Katutja paluru ngayunya watjaṉu yaṉangu tjuṯangka ngayulu nintintjaku, palumpaṉu wangka Yiitjunyatjarra. Katutjanya yilta mayutju tiṉa nyinanyi, yuwankarra palyalpayi. Katutja paluru wiya yurrunpa tjanala yaṉangu tjuṯangka wangka palunya yutiṉu. Paluru wangka palunya yarrkatjunkula wantingu,
10 nganaṉa palumpa walytja tjuṯangku kuwarri kutju wangka palunya yutitjalpi kulintjaku. Katutjalu kuliṉu kutjupa tjuṯangkuṯarra wangka palunya yutitjalpi kulintjaku. Nganaluya kulintjaku?, nyaḻpitjarra tjuṯangkuṯarra. Paluru tjana yalatji kuliṉingi, “Katutjanya palya nyinanyi, paluru munkarra kulilpayi. Paluru nintingku Yiitju Kurayitjanya mantakutu wantirriyaṉu yaṉangu tjuṯaku tjanampa kuya waṉinytjaku. Paluru tjananya yaḻṯururringkula ngulytjuṉu.” Yalatji nyaḻpitjarra tjuṯangku, nyakula kulintjaku Katutjanya yunytjurringu.
11 Katutjalu wangka palulawana kulira yilta Yiitju Kurayitjanya mantakutu wantirriyaṉu. Wantirriyaṉutja paluru nganampa mayutjulpi nyinanyi. Yiitju paluru Katutjaku wangka kulira waralyngarala mirrirringu kuyalampa waṉinytjaku. Yalatji nganampa kuya waṉinytjaku Katutjalu yurrunpa kuliṉu.
12 Yiitju Kurayitjaku wangka nganaṉa kulira walytjarringkula Katutjaku kalypalpi nyinanyi. Nganaṉa nguḻuwiyangku palunya tjapintjaku.
13 Yalatji kuliranyurra yunypa nyinanytjaku. Tjiilangkaṉa nyinanyingka wiyanyurra ngayuku watjilpa nyinanytjaku. Yipitjanya ngurrara tjuṯa, yalatjiya kulila! Ngayulu nyurrangarrila Yiitjukuṉu wangka tjakultjunkunytjala nyurrangarri kuwarri palumpa walytja tjuṯa nyinanyi. Yalatji kulira ngayulu watjilpawiya nyinanyi, yunypa.
Yiitju Kurayitjanya nganampa yunytju nyinanyi
14-16 Katutjanya mayutju palyalingku nyinanyi yilta. Paluru ngangkari tiṉatjarrangku ilkari ngurrara tjuṯa manta ngurrara tjuṯaṯarra kana kanyiṉi. Ngayulu paapa Katutjanya tjapilpayi palumpa kurrunpangku nyurrangarrinya rapantjaku, tjukarurrunyurra Yiitjuku nyinanytjaku.
17-18 Paapa Katutjanya ngayulu yalatji tjapilpayi, nyurrangarri Yiitju Kurayitjaku walytja kutu nyinanytjala Yiitjuku kurrunpa nyurrangarrila tjarrparra nyinanytjaku. Palumpa kurrunpatjarranyurra tjukarurru kutu palumpa nyinanytjaku. Nyurrangarri, Katutjaku walytja kutjupa tjuṯangkuṯarra yalatji kulintjaku, “Yiitjunya ilta nganampa puntura yunytjurringu, palulanguru watiyangka waralyngarala mirrirringu nganampa kuya waṉinytjaku. Wiya palurulanya kuyatjarra wantingu warukutu waṉinytjaku, wiya. Puntura yunytju nganampa nyinarra paluru mirrirringu.”
19 Yuwa, paluru ilta nganampa puntura kutu yunytju nyinanyi. Ngayulu yunytjurringanyi nyurrangarri kutu nintirringkunytjaku Yiitjuku, nganampa puntura yunytju nyinapayiku. Yilta paluru yaṉangu tjuṯaku puntura yunytju nyinapayi. Palunya nguwanpa nganaṉa yaṉangu tjuṯaku puntura yunytju nyinanytjaku.
20-21 Nganaṉa, Yiitjuku walytja kutjupa tjuṯangkuṯarra Katutjanya kutu puḻkawaṉinytjaku, Yiitjulu nganampa kuya waṉingutjangka. Katutjalu ilta ngangkari puntutjarrangku ngananya kutu yaṉṯayaṉṯalpayi. Paluru nganaṉanya kulira mangarri kuka, walytja tjuṯaṯarra yungkupayi, nganaṉa tjapintjawiyangka. Nganaṉa yalatji kulira kutu palunya waḻkuntjaku. Alatji palya.