Katutjalu wangka kutjupa kutjupa tjananya palyalku
11
Yurruntitja 11:1-26
Katutjaku ramarrirra, walytjalungkuya puḻkawaṉinytjakitjangku kulilku
Yurruntitja 11:1-9
1-9 Nuuwaku tjamu tjuṯa kapaḻi tjuṯa, tjuṯarringuya, wangka kutjutjarraya nyinangu. Kakarraya nyinayinkula ngurra yini Papilunakuturringu. Manta palunyangkaya rawa nyinangu. Waaḻa palyalkitjangkuya alatjingku watjaṉu, “Pakaralaka waarrkarri! Puḻi nguwanpa tjuṯala palyala pilkitjanu!, tjiṉṯungka ngarrirra piḻṯirringkunyangka puḻi nguwanarrinytjala.” Yalatjiya palyara puḻi nguwanpa tjuṯa kanyiṉingi, waaḻa palyalkitjangku. Kiṯi panyapa nganytjalpayiya mantjira kanyiṉingi. Watjaṉuya waaḻa tjuṯa palyalkitjangku. “Waaḻa kutju waṯawaralingkulaka palyala, yilkarikutu! Yaṉangu kutjupa tjuṯalulanyaya nyakula mirra waṉinytjaku. Yalatjilaka palyala!, ngurra kutjungkala tjungu nyinakitjangku. Ngurra tjiwarriwarriwana tjaalpan tjaalpa nyinanytjawiya.” Yalatjiya palyaṉu.
Palunyangka Katutjalulpi nyangu, waaḻa palunya palyantjala, waaḻa tjuṯa kutjupaṯarra. Nyakula Katutjalu kuliṉu, “Pala tjuṯaya nyinanyi walytjararranpa, wangka kutjutjarra, ngurra kutjungka. Tjana wiya alatji nyinanytjaku. Ngurra kutjupa kutjupakutuṉa tjananya wantirriyalku, ngurra kutjungkaya nyinarrayanku puḻkawaṉipayingkamarra. Wangka tjaalpan tjaalpaṉa tjananya palyalku, ngurra kutjupa tjuṯangka nyinanytjaku.” Yalatji Katutjalu tjananya wangka kutjupa kutjupa palyaṉu. Yiyaṉulpi tjananya ngurra kutjupa tjuṯakutu.
Nuuwaku walytja ngaṉṯitja tjuṯa, yini alatji
Yurruntitja 11:10-26
10-26 Nuuwaku katja Tjiimalu Yapatjatanya mantjiṉu. Yapatjatalu mantjiṉu katja, Tjiilanya. Tjiilalu katja Yiipanya mantjiṉu. Yiipalu katja Pilikanya mantjiṉu. Pilikalu katja Ruuwanya mantjiṉu. Ruuwalu katja Tjarukanya mantjiṉu. Tjarukalu katja Niyuwunya mantjiṉu. Niyuwulu katja Tiiranya mantjiṉu. Tiiralu katja Yipumanya mantjiṉu. Ngula Katutjalu watjaṉu Yipumanya yini kutjupa alatji, “Yipuramanya.”
Katutjalu Yipumanya ngurra kutjupakutu yiyalku
Yurruntitja 11:27—12:9
Yipumaku walytja tjuṯa
Yurruntitja 11:27-32
27-32 Tiiralu katja maṉkurrpa mantjiṉu, yini Yipumanya, Niyuwunya, Yarananya. Yaranalu katja Laatanya mantjiṉu. Yipumalu miiṯa Tjarayinya yaḻṯingu. Pipirriwiyapula rawa nyinangu. Tjiḻpi Tiiralu tjananya palumpa walytja tjuṯa yaḻṯingu, manta Kayinanalakutu yankukitjangku. Alatjiya yanu, Tiiranya, Yipumanya, Laatanya, Tjarayinya. Tawunu yini Yaaranya wantikatirra yankulaya ngururrpa nyinangu, tawunu yini Yaranangka. Palulaya rawa nyinangu, Yipuramanyangarri. Nyinarraya minytjirringu, paapa tjanampa wiyarringu.