Tjutumanya anta Kumuranya ngurrara tjuṯa warungku wiyalku
19
Yurruntitja 19:1-29
Marrkulku pulanya Laatalu
Yurruntitja 19:1-3
1-3 Wati paluru kutjarra nyaḻpitjarrarringkula anu tawunu Tjutumalakutu. Paluru kutjarra piyuku yaṉangu nguwanarringkula mungarrtji mungarrtjipula tjarrpangu. Laatalu pulanya ngalyananyingka nyangu. Paluru tjanala yankula tjungurringkula yanu palumpa ngurrakutu. Laatalu pulanya watjaṉu, “Ngayuku ngurrakutupula ngalya yarra, ngarrikitja! Tjiṉṯungkapulan palya ngarrirra yanku.” Laatanyapula watjaṉu, “Wiya. Palyalitju ngarriku ngaangka yurilta.” Ngurrangka tjarrpatjunkukitjangku pulanya watjaṉu. Palunyangkapula palumpa ngurrangka tjarrpangu.
Wati tjuṯa kuya palyakitja nyinamalpa
Yurruntitja 19:4-11
4-11 Paluru kutjarra tjaapa ngalkuṉu ngarrikitja. Palunyatjanu wati tjuṯalpiya ngalya yanu waaḻakutu. Laatalu puṯu kuliṉu, wati tjuṯaluya parra yangatjunutjangka, palumpa ngurrangka. Laatanyaya watjaṉu, “Wati palunya kutjarra pulanya pakaltjingala!, ngaangkalatju nyinanytjaku.” Wati palunya kutjarra kungka nguwanpa kanyilkitjaluya kuliṉu. Laatalu kulira tuuwa yalytjurankula tjananya watjaṉu, “Walytja tjuṯa. Kulilaya! Wati palunya kutjarrangka wiyanyurra kuya palyantjaku. Ngayuku yuṉṯalpa kutjarra kutjuṉa nyurrampa ngalya katiku, watiku ngurrpa kutjarra. Palunya kutjarrangka kutjunyurra kuya palyantjaku.”
Kuliraya mirrpaṉarringu waaḻangka tjarrpakitjaya. Palunya kutjarralupula Laatanya puulamilara yunngukutu, tuuwa patiṉu. Palunyatjanu paluru kutjarralupula kuru tjananya patiṉu, yatjikilu. Palunyangka kuru patirringkulaya puṯu kuliṉu. Tuuwakuya puṯu pampura wantingu.
Nyaḻpitjarra kutjarrangkupula Laatanyangarri katiku, warungkamarra
Yurruntitja 19:12-21
12-21 Nyaḻpitjarra kutjarrangkupula Laatanya alatji watjaṉu, “Watjalkulitju tawunu ngaatjanya kamparra wiyantjaku. Yalatjingkamarra nyuntupa walytja tjuṯa tjananya waṉma kati! Mayutju Katutjalulinyatju wantirriyaṉu ngurra ngaatjanya nyakunytjaku. Kuwarri paluru kuliṉi ngurra ngaangka yaṉangu tjuṯa, kuwarri nyinanytja tjuṯanya wiyalkitjangku.” Laatalu pulanya mungangka puṯu watjaṉu waputju kutjarra pakara yankunytjaku. Laataku wangkapula kulira wantingu. Tjiṉṯukutu nyaḻpitjarra paluru kutjarralu tjananya puṯu watjaṉu, parrpaṯu yankunytjaku, Laatanyangarri. Palunyatjanu Laatanyangarri mara witira katingu, palumpa miiṯa yuṉṯalpa kutjarraṯarra. Tawunungka waṉma ngarala nyaḻpitjarra kutjulu tjananya watjaṉu, “Kana nyinakitjaya tjukarurru tjalkaḻuwa, puḻi nyarrakutu!, nguṉṯilangarala nyakunytjawiya.”
Tjutumanya anta Kumuranya kamparra wiyalku
Yurruntitja 19:23-29
23-29 Tjalkaḻungkulaya Laataku miiṯalu waru kampanytjala taaṉarringkula nyangu. Nyakula puḻi nguwanarringu. Tjiṉṯurringkula Laatanyangarri ankula tawunu wiimangka tjarrpangu, yini Tjuuwangka. Palunyangka tawunu kutjarrangka katunguru waṉingu waru, Katutjalu, Tjutumangka anta Kumurangka. Ngurra pala kutjarra ngurrara, yaṉangu uwankarra kamparra wiyaṉu.
Wangka palunya, Yipuramanya kulira Laatanyangarri kanaṉu, warungkamarra, Katutjalu. Tjiṉṯu palula Yipuramanya puḻi katu kaḻparra waru puyu puntu nyangu.