4
Yalatji nganaṉa tjukarurru nyinanytjaku
Walytja tjuṯangkuya wangka ngaatjanya kulila! Nganaṉatju nyurrangarrinya yirriṯi nintiṉu Yiitjuku tjukarurru nyinanytjaku. Palunyatjanu kutunyurra yalatji tjukarurru nyinapayi. Kuwarrilatju nyurrangarrinya watjaṉi, yalatji kutu tjukarurru Yiitjuku nyinanytjaku purrkarringkula palumpa waarrka wantinytjawiya. Yalatjinyurra tjukarurru kutu nyinanytjala Katutjanya nyurrangarrimpa yunypa nyinaku. Yirriṯi nganaṉatju nyurrangarrinya nintilpayi, Yiitjuku walytja tjukarurrunyurra nyinanytjaku. Wangka palunya tjingurunyurra kuliṉi, yilta? Yalatjilatju nyurrangarrinya Katutjaku wangka nintilpayi 3-5 Katutjalu watjaṉu, wiya nyurrangarri miiṯa kutjupa kutjupangka ngarrinytjaku, miiṯa walytjangka kutju nyurrangarri tjukarurru nyinanytjaku. Wati tjuṯangkunyurra miiṯa walytja tjukarurru kanyintjaku, wiyara wayilarringkula pikarringkunytjaku. Katutjaku ngurrpa tjuṯangkuya miiṯa wayilarringkula pungkupayi. Yiitjuku walytja tjuṯa nyurrangarri nyinanyi. Wiyanyurra miiṯa kutjupakuṉungka ngarrinytjaku. Irriṯilatju nyurrangarrinya watjaṉu wiya yalatji nyinanytjaku. Nganaṉa nyurrangarrinya pinangkatjunanyi, ngula Katutjalu nyurrangarrinya panypurangkula warukutu waṉitjipingkamarra. Yalatjilatju nyurrangarrinya irriṯi pinangkatjunu. Katutjalu nganaṉanya nyinatjunu palumpa walytja tjukarurru nyinanytjaku, wiyala kuya palyara nyinanytjaku. Wangka palunya Katutjaku wangka, wiya nganampa kutju. Tjinguru nyurrangarri Yiitjuku walytja tjuṯangku wangka palunya kulira wantiku. Yalatjinyurra Katutjaku kurrunpaṯarra kulira wantiku. Katutjalu palumpa kurrunpa nganaṉanya tjarrpatjunkupayi, nganaṉa palunya kulira tjukarurru nyinanytjaku.
Yiltanyurra Yiitjuku walytja kutjupa tjuṯaku yunytjurrirra nyinanyi. Wiyalatju piyuku wakara nintilku, yunytju tjanampa nyinanytjaku, nintinyurra nyinanyi. Katutjalu nyurrangarrinya nintiṉu yunytju tjanampa nyinanytjaku. Yuwa, palunyanyurra kulira yunytju tjanampa nyinanyi. 10 Manta Matjatuniyanya ngurrara tjuṯakuṯarra nyurrangarri yunytju nyinanyi. Kutu tjanampa nyurrangarri yunytju nyinanytjaku. 11-12 Wangka yalatjiṯarra nyurrangarri kulintjaku. Yaṉangu tjuṯaku nyurrangarri palya kutu nyinanytjaku, yaṉangu kutjupaku pikarrinytjawiya. Wiyanyurra waarrkawiya nyinanytjaku, waarrkarringkulanyurra nyinanytjaku, maniku, kuka mangarrikuṯarra. Wiyanyurra kutjupa tjuṯangka yinkarra kutu mantjira nyinanytjaku. Yalatjinyurra waarrkarringkula nyinanytjaku nganaṉa nyurrangarrinya irriṯi nintilpayi. Yalatjinyurra waarrkarringkula nyinanytjala, Yiitjuku ngurrpa tjuṯa nyurrangarrimpa yunypa nyinaku.
Puulalu tjananya nintilku, “Mayutju Kurayitjanya ilkaringuru wararrakatiku”
13 Walytja tjuṯangkuya wangka ngaatjanya kulila! Tjukarurrunyurra kulintjaku Yiitjuku walytja mirri tjuṯa ngula pakantjala, wiyanyurra puṯu kulintjaku. Wiya nyurrangarri yalatji wiyawana kulintjaku, “Ngayuku walytja, Yiitjuku walytja wiyarringu. Tjinguru paluru ngula kanarriku, tjinguru wiya.” Katutjaku ngurrpa tjuṯaya puṯu kuliṉi, mirri tjuṯaku. 14 Yiitjuku walytja tjuṯangkula kuliṉi, Yiitjunya ilurra paluru ngarrirra kanarringu. Katutjaku ngurrangka paluru kuwarri nyinanyi. Ngula Katutjalu palumpa walytja tjuṯaku kurrunpa tjuṯa, Yiitjunyaṯarra mantakutu ngalya iyalku. Paluru tjana Yiitjuku walytja tjuṯa kurrunpa tjuṯa paṉangka irriṯi tjukarurru nyinapayi. 15 Wangka ngaatjanya nganaṉa nyurrangarrinya nintiṉi, Yiitjulu nganampa mayutjungku tjananya irriṯi watjaṉu. Ngula, Yiitjuku walytja mirri tjuṯa paṉanguru kanarringkula pakalku. Kanarringkulaya Yiitjulakutu yankula tjungurriku, paluru ilkaringuru mantangka ila ngalya tjarukatinytjala. Nganaṉa Yiitjuku walytja paṉangka kana nyinanytja tjuṯa paṉangka nyinaku. Palunya tjuṯangka ngaṉṯi nganaṉa yanku Yiitjula tjungurrikitja.
16 Katutjanya raapa mirraku. Palumpa ilkari ngurrara mayutju tiṉaṯarra raapa mirraku. Mayutju tiṉa paluru mirrarra turampata mirratjingantjala, Yiitjunya mayutju nganampa tjarukatirra ngururrpa ilkaringka ngaraku. Palunyatjanu Yiitjuku walytja mirri tjuṯa mantanguru pakara kanarringkula pakalku. 17 Palulanguru nganaṉa Yiitjuku walytja mantangka kana nyinanytja tjuṯa, yankula yutuwariwana Yiitjula tjungurringku, palumpa walytja yurruntitja tjuṯangka ngaṉṯi. Palulanguru nganaṉa mayutju Yiitjulawana kutu nyinamalpa. 18 Tjinguru Yiitjuku walytja tjaampalangku yalatji puṯu kulilku, “Nganampa irriṯi ilunytjatjanu tjinguru ngula kanarriku, tjinguru wiya.” Yalatjiya puṯu kulira watjilpa nyinanytjala, nyurrangarri wangka palunya tjananya tjakultjurra!, kuliraya yunypa nyinanytjaku.