12
Yaṉangu tjuṯalingku Yiitjulaya tjungurrirra ngarala waṉingi. Yutjuyutjuṉangiyanku Yiitjunya pampulkitjangku, ilarringkula. Palulanguru Yiitjulu palumpa kutunguḻu tjuṯangka kutju tjananya watjaṉu kutjupa tjuṯangku yilangkuya ngarala kuliṉingi, “Purinypaya nyinama!, Paratji tjuṯangkamarra. Tjana Katutjaku wangka nintira, waṯawaṯarringkupayi, wiya tjanalpi tjukarurru nyinapayi. Ngula kuutawutjungka yaṉangu tjuṯangku, Paratji tjuṯangkuṯarra Katutjala puṯu ngunytjinytjunku. Katutjalu nintingku kulira watjalku, yaṉangu mantangka tjaalpangku kulira nyinangitja. Yaṉangungku yaṉangu kutjupangka mantangka ngunytjinytjungku watjaṉutja kuutawutju palula yaṉangu yuwankarrangku kulilku, Katutjalu nyangutjangku watjantjala. Yaṉangungku ngulytjungka waaḻangka ngunytjinytjungku watjaṉutja kuutawutju palula yaṉangu yuwankarrangku kulilku, Katutjalu watjalku nyakupayingku kulira, ‘Yuwa, yalatji nyuntu ngulytjungka ngunytjinytjunu.’ ”
Katutjaku kutju yunytjurrirra nyinanytjaku
“Ngulytju tjuṯangkuya kulila! Yaṉangu mirri pungkupayi kutjupangkamarra wiyanyurra nguḻu nyinanytjaku. Paluru tjana nyurrangarrinya mirri pungkula puṯu kulilku, piyuku pungkukitjangku. Katutjaku kutju nganaṉa nguḻunguḻu nyinanytjaku, mayutju tiṉaku. Paluru yaṉangu iluntara kurrunpa wantirriyalpayi warukutu. Yuwa, palumpalara yunytjurringkula tjukarurru nyinanytjaku. 6-7 Katutjanya nganampa yunytju nyinanyingka, Katutjakulara yunytju nyinanytjaku. Yaṉangu tjuṯangkuya kuliṉi tjuḻpu tjuṯa mungutja nyinanyi, kuka wiima. Katutjalu wiya mungutja kuliṉi tjuḻpu yuwankarra tjananya kutjuṯu kutjuṯu yaṉṯayaṉṯaṉi. Nyurrangarrinyaṯarra paluru kulira yaṉṯayaṉṯaṉi, mungutja kulilwiyangku.” Yara kutjupa Yiitjulu tjananya watjaṉu nintilkitjangku, “Katutjanya ninti nyinanyi nganampa katangka mangka tjuṯa ngarala waṉinytja tjuṯaku. Yinyu palunya kaantamilara nampaku Katutjanya ninti nyinanyi. Paluru yilangku nyakulalanya kanyiṉi. Yuwa, Katutjalu nyurrangarrinya kulira yaṉṯayaṉṯaṉi, palulanguru Katutjakunyurra yunytjurringkula nyinanytjaku. Paluru kuliṉi tjuḻpungka wirriḻinyurra nyinanyi, maṯupurralingku.”
Watjala tjananya!, “Ngayulu Yiitjuku walytja nyinanyi”
Yiitjulu tjananya piyuku kiina watjaṉu, “Yaṉangu kutjupa tjuṯanya tjananya nyurrangarri yalatji tjakultjunkunytjaku, ‘Ngayulu Yiitjuku walytja nyinanyi.’ Yalatjinyurra nguḻuwiyangku kutu watjantjala, ngula ngayulu nyurrangarrimpa kuutawutjungka yilkari ngurrara tjuṯangka kurungka watjalku, ‘Yuwa, ngaa tjuṯaya ngayuku walytja tjuṯa nyinanyi.’ Yuwa, yalatji ngayulu yaṉanguku katjangku kuutawutjungka watjalku. Yaṉangu tjuṯaku nguḻurrirra tjinguru kutjupa tjuṯangku yalatji watjalku, ‘Ngayulu ngurrpaṉara, Yiitjuku walytjawiyaṉara.’ Yalatji paluru tjana nguḻurringkula watjantjala ngula kuutawutjungka tjananya ilkari ngurrara tjuṯa ngayulu watjalku yalatji, ‘Ngaa tjuṯakuṉa ngurrpa walytjawiyaṉa tjanampa.’ 10 Tjinguru yaṉangungku ngayunyaṉiya yaṉanguku katja panypurangku. Palunyatjanu palurulpi ngayuku wangka kulira ngayuku walytjalpi nyinakitjangku Katutjanya tjapilku, kuya palumpara waṉinytjaku. Yilta, Katutjalu kuya palumpara waṉiku. Tjinguru yaṉangu kutjupangku yalatji watjalku, ‘Yiitjunya wiya Katutjakuṉu kurrunpatjarra nyinanyi, mamukuṉu kurrunpatjarra nyinanyi.’ Yalatji watjara Katutjaku kurrunpa panypurangkupayi. Ilta ngayulu Katutjaku kurruntjarra nyinanyi. Yaṉangungku ngayunyaṉi watjantjala mamukuṉu kurrunpatjarra nyinanytjala Katutjalu kuya palumpara wiya waṉiku, kutu kuyatjarra nyinarra wiyarriku.
11-12 “Nyurrangarriṯarra Katutjakuṉu kurruntjarra nyinanyi, ngayuku walytja tjuṯa. Ngula nyurrangarrinya tjana ngaratjunkula kuutamilantjala, Katutjaku kurrunpangku nyurranya nintilku, tjukarurru wangkanytjaku. Tjuwuku tjaatjingkaṯarra paluru tjana nyurrangarrinya ngayuku walytja tjuṯa ngaratjunku kuutamilalkitjangku. Tjana nyurrangarrinya kuutamilalkitjangka, tjanalanyurra rapa ngarala wiya nguḻurrinytjaku. Wiyanyurra yurrunpa kulintjaku, ‘Yaalytjiṉa ngayulu watjalku kuutawutjungka?’ Katutjaku kurrunpangku nyurrangarrinya nintilku palya wangkanytjaku.”
Yara yulytja tiṉatjarra
13 Yaṉangu tjuṯawana ngarala wati kutjungku Yiitjula watjaṉu, “Nintilpayi. Ngayuku yukari mirrirringanyingka, kamuru kutjarrangkulitju yulytja mantjinmara. Wiya, ngayuku kaakangku yulytja, mani, waaḻaṯarra mantjiṉu, ngayulu wiya. Kaaka watjala!, paluru ngayunya aapa yulytja, mani yungkunytjaku.” 14 Yiitjulu palunya watjaṉu, “Mayutju kutjupangku nyupalinya watjantjaku, yulytja, mani aapa yungkunytjaku, ngayulu wiya.” 15 Yaṉangu tjuṯangka tjananya Yiitjulu watjaṉu, “Wangka ngaatjanyaya kulila! Yaṉangu kutjupaku mani yulytjaṯarra ngarrinyingka wiya nyurrangarri mantjilkitjangku kulintjaku. Yaṉangungku wiya mani yulytjaṯarra kanyira kutju, yunypa nyinaku.” 16 Yiitjulu tjananya yara ngaatjanya watjaṉu nintilkitjangku, “Wati kutjungku yulytja, mani waaḻaṯarra kanyilku. Kaana tiṉangka palumpa mangarri wiita tiṉa ngarala waṉiku. 17 Paluru puṯu kulilku, ‘Nyaalytjinkuṉa? Waaḻa panyapa tjuṯa mangarrikuṉu, waaḻa wiima ngaranyi. Kuwarri mangarri tiṉalpi ngarala waṉinyi.’ 18 Puṯu kulira watjalkulpinku yalatji, ‘Kala, ngayuluṉa tjananya waarrkana tjuṯa watjalku, waaḻa mangarri tjunkupayi tjuṯa yarrara tiṉa tjuṯalpi palyantjaku. Mangarri tiṉa, yulytja tiṉaṯarraṉa tjananya watjalku muṯura katirra tjarrpatjunkunytjaku. Ngayulu mangarri tiṉalpi kanyilku. 19 Yunyparringkulaṉatju watjalku, “Mangarri tiṉa ngayulu kanyiṉi. Rawaṉa yiiya tjuṯa waarrkawiya nyinaku. Rawa ngarrirra mangarri, yulytja ngula kutjutju wiyarriku, yiiya tjuṯangka. Yilta ngayulu yunypa nyinamalpa.” 20 Katutjalu palula watjalku, “Nyuntu pina rama. Wiyawana nyuntu kuliṉi mangarri, mani, yulytja kutu kanyilkitjangku. Kuwarri mungangkan mirrirriku, wiyan yunypa nyinamalpa. Nyuntu mangarri tiṉa, mani, yulytja kanyilwiyangku wantimara.” 21 Yiitjulu tjananya piyuku watjaṉu, “Yara palunya nguwanpa yaṉangu yulytja, maniku walytja nyinarra wiyarriku, wiya paluru Katutjaku kulira tjukarurru nyinanyi, wiya.”
Katutjanya kutjuya kulila!, wiya mangarri, maniku kutju ngalytjarrinytjaku
22 Palumpa kutunguḻu tjuṯangka tjananya Yiitjulu yalatji watjaṉu, “Wangka panyapa kulira ngayulu nyurrangarrinya yalatji watjaṉi. Wiya nyurrangarri mangarriku mantarraku kutju ngalytjarrinytjaku, Katutjalu nyurrangarrinya yaṉṯayaṉṯaṉi. 23 Katutjalu nganaṉanya kana nyinatjunkula paluru mangarri mantarra yungamalpa. Palunya kutjula kulira waḻkuntjaku. 24 Kaaṉka tjuṯaya kulila! Kaaṉka tjuṯangkuya kaanangka wiya mangarri pakaltjingaṉi. Wiyaya muṯura waaḻangka tjarrpatjunanyi, ngula ngalkukitjangku. Katutjalu tjananya kaaṉka tjuṯa paḻtjaṉi, wiya tjanampa waṯawaṯarringanyi. Nyurrangarri kaaṉka tjuṯangka wirriḻi, yaṉangu tjuṯa, maṯupurra. Katutjalu nyurrangarrinya yaṉṯayaṉṯalku, kaaṉka mungutja tjuṯa nguwanpaṯarra.
25-26 “Tjiḻpi kutu nyinarra mirrirrikitjangku puṯu kulilku, ‘Yaalytjiyaalytjiṉa kana kutu nyinaku?’ Katutjakuṉu tayimingka paluru mirrirriku. Nganaṉa yalatji kulintjaku. Katutjalu nganaṉanya yaṉṯayaṉṯara kanyiṉi, palumpa tayimingka kutjula wiyarriku. 27 Puluuma tjuṯaya kulila! Walytjaya pakara ngarala waṉipayi, wiyaya puluuma tjuṯa mantarrangka tjarrpapayi. Palyaya ngarapayi mantarra yiritjarra nguwanpa. Mayutju tiṉa palunya Tjalamunanya mantarra kiliina palyatjarra irriṯi nyinangi, kanya puluuma tjuṯa palyalingku ngarapayi. 28 Nyurrangarri wiya kuliṉi Katutjanya paluru yilta yaṉṯayaṉṯalpayi nyinanyi. Katutjalu puluuma yaṉṯayaṉṯalpayingku nyurrangarrinyaṯarra yaṉṯayaṉṯalku. Puluuma tjanpiṯarra kuwarri ngarala, tjiṉṯu kutjupangka piḻṯirringkula wiyarringkupayi. Puluuma, tjanpi yaṉṯayaṉṯalpayingku nyurrangarrinyaṯarra maṯupurra yaṉṯayaṉṯalku. Palulanguru nyurrangarri yaṉṯayaṉṯalpayi palunya kulintjaku. Yilta Katutjalu nyurranya yaṉṯayaṉṯanmalpa.
29 “Palulanguru wiya nyurrangarri mangarri ngalkukitjangku, kapi tjikilkitjangku yurrukulintjaku. Katutjalu nyurrangarrinya yungkuku. 30 Katutjaku ngurrpa tjuṯangku mangarri ngalkukitjangku kutu kuliṉi. Paapa Katutjanya nyurrangarrimpa ninti nyinanyi, nyurrangarri mangarri ngalkura kapi tjikilpayiku, mantarrangkaṯarranyurra tjarrpapayi. Yalatjiku paapa Katutjanya ninti nyinanyi. 31 Katutjalu nyurrangarrinya ngulytjuṉu palumpa walytja tjuṯanyurra nyinanyi. Nyurrangarri palumpa walytja nyinanytjala paluru nyurrampa yungamalpa mangarri, yulytjaṯarra.”
Katutjanya kutjunyurra kulira tjukarurru nyinanytjaku
32 “Ngayuku tjiipi wiima tjuṯa nguwanpanyurra nyinanyi. Ngayuluṉa nyurrangarrinya yaṉṯayaṉṯalpayi. Kulilaya! Wiyanyurra mangarri, mantarraku kutju kulintjaku. Katutjalu nyurrangarrinya kuliṉi. Paluru nyurrangarrinya ngulytjura kanyilku palumpa ngurrangka. 33 Yalatjinyurra nyinanytjaku. Nyurrangarrimpa waaḻa yulytjaṯarra tjalamilara mani mantjira yuwa tjananya!, maralpa tjuṯaku. Maralpa tjuṯaku tjanampa nyurrangarri yunganyingka, Katutjanya nyurrampa puntura yunyparringkula ngula kanyilku palumpa ngurrangka kana kutu nyinanytjaku. 34 Katutjaku ngurrangka nyinakitjanyurra yunytjurringkula yalatjinyurra kulinmalpa. Tjingurunyurra mani manta ngurraraku, yunytjurringkula maniku kutjunyurra yurrukulinmalpa. Yalatji kulira wiyanyurra Katutjaku ngurrangka nyinaku.”
Waarrkana laampa tilitjarra
35-36 Yiitjulu tjananya yara piyuku watjaṉu, “Yalatji nguwanpaya nyinama! Waarrkana tjuṯa laampa tilitjarra kana paṯalpayi nguwanpa. Mayutjungku tjananya waarrkana tjuṯangka watjalku yalatji, ‘Miiṯararrapula nyinakitjangka tjungulatju kuwarri yunyparriku. Paṯaratjuya waaḻa yaṉṯayaṉṯanma! Paṯaratjuya laampa tilitjarrangku purinytju nyangama!, mungangkaṉa ngalya yananyingka, waaḻa alytjurankukitjangku.’ 37-38 Tjinguru munga ngururrkutu, tjinguru tilayitikutu, mayutju paluru waaḻa palulakutu piyuku yanku. Waarrkana paluru tjana kana paṯara nyinarra yunypaya nyinaku, mayutju ngalya yananyingka. Paluru ngalya yankula kana tjananya nyakula yunyparrirra watjalku, ‘Kuwarri ngayulu kuka, mangarri kutjara katirra tiipulangka nyurrangarrinya yungku ngalkuntjaku.’ ”
39 Yiitjulu tjananya piyuku watjaṉu, “Yara ngaatjanyaṯarraya kulila! Waaḻa ngurrara yankuwiya nyinarra paṯalpayi mulyaṯangku mantjilpayi payira wantirriyalkitjangku. Paluru yurrunpa tjakulpa yalatji kulilku, ‘Kuwarri mungangkakunyu mulyaṯanytju ngalyanku nyuntupa waaḻakutu, yulytja mantjilkitja.’ Yilta paluru yalatji kulira yankuwiya nyinarra paṯantjaku. 40 Yara palunya kutjarra nguwanpa nyurrangarri ngayuku walytja tjuṯa kana nguwanpa paṯara nyinanytjaku, yaṉanguku katjaṉa piyuku ngalyananyingka. Ngurrpanyurra nyinanyi ngayulu ngalyankunytjaku. Ngayukunyurra tjukarurru kutu nyinanytjaku, wiyawananyurra nyinanytjala ngayulu nyurrangarrinya ngalya yankula wantitjipingkamarra.”
Waarrkana tjukarurru nyinanytjatjarra
41 Piitalu Yiitjula tjapiṉu, “Puṯuṉa kuliṉi, tjinguru yara palunya yaṉangu tjuṯangku kulintjaku, tjinguru nganaṉatju kutju nyuntupa kutunguḻu tuwalpalangku kulintjaku?” 42 Yiitjulu yara kutjupawana watjaṉu, “Yara kutjupaya kulila! Ngayulu nyurrangarrinya nintilku waarrkana tjukarurru nyinapayinyatjarra. Waarrkana tjukarurru nyinapayi waaḻaku mayutjungku ngurrtjara ngaratjunku waarrkana kutjupa tjuṯaku mayutjulpi nyinanytjaku. Paluru tjananya waarrkana tjuṯa yaṉṯayaṉṯara yungamalpa kuka anta mangarriṯarra. Aaḻi paluru tjanampa piiṉpatja yungamalpa, mungarrtji tjanampa paluru tjaapa yungamalpa, wantinytjawiyangku. 43 Waaḻaku mayutju tiṉa paluru ngalya yankula mayutju palunya yunypangku nyaku, ‘Ngaatja yilta ngayuku waarrkana palya, paluru tjukarurru waarrkana tjuṯa yaṉṯayaṉṯaṉi.’ 44 Waarrkana tjuṯa tjukarurru yaṉṯayaṉṯaṉutjangka, waaḻaku mayutju tiṉa paluru watjalku palunya, ‘Waarrkana tjuṯaku kutju mayutju nyinanytjawiya, nyinatjunkuṉanta mayutju tiṉa yuwankarraku, waaḻaku, pulukaku ngurrakuṯarra.’ 45 Yara palunya nguwanpa tawunu kutjupangka waaḻaku mayutju kutjupa nyinaku. Paluru waarrkana kutjupa ngurrtjara ngaratjunku, waarrkana tjuṯa tjananya yaṉṯayaṉṯantjaku. Palulanguru waaḻaku mayutju tiṉa paluru watjalku, ‘Ngayulu ngunytji yananyi ngurra kutjupakutu. Ngurra palulaṉa nyinarra ngalya yankuku rayitpayiki. Nyuntu tjananya waarrkana tjuṯa tjukarurru yaṉṯayaṉṯala!’ Yilta mayutju tiṉa paluru ngurra kutjupakutu yankuku. Tjinguru waarrkana tjuṯaku mayutjungku waaḻaku mayutju ngalya yankunytjaku, puṯu paṯara paluru walytjangku kulilku, ‘Ngayuku mayutju yirriṯi ngalya yanamara. Tjinguru wiya ngalya yananyi, tjinguru kutu kutju yanu.’ Palulanguru waarrkana tjuṯaku mayutju paluru yunytjuwiyarringkula tjananya pungamalpa. Paluru mangarri tiṉa ngalkura wayina tjikira turaangkarringkula tjananya pungamalpa. 46 Paluru yuṯuyuṯu nyinanytjala, waaḻaku mayutju tiṉa paluru ngalyanku. Ngalyankula mayutju kuya palunya nyakula payira iyalku, Katutjaku ngurrpa tjuṯangka nyinanytjaku.
47 “Yara palunya nguwanpa, mayutjungku watjantjala, waarrkanangku kulira tjukarurru palyantjawiyangka, waarrkana palunya mayutjungku puntura yitjipungku. 48 Mayutjungku ramarringkula wiyawana watjantjala waarrkanangku kulira wiya tjukarurru palyara paluru mayutjungka watjalku, ‘Ngayuluṉanta puṯu kulira wiyawanangku palyaṉu.’ Waarrkana palunya mayutjungku aḻṯururringkula pika wiima yitjipungku. “Tjinguru Katutjalu yaṉangu kutjupa nintilku palumpa walytja nyinanytjaku. Yalatji nintira Katutjalu kulilku, ‘Ngayuku walytja ngaatjanya tjukarurru nyinaku, wiya paluru ngayuku wangka riitarringkula tjakultjunku, paluru riitarrinytjaku ngurrpa.’ Tjinguru Katutjalu yaṉangu kutjupa nintilku palumpa walytja nyinanytjaku. Paluru yaṉangu palunya piyuku nintilku riitarrinytjaku. Yalatji nintira Katutjalu kulilku, ‘Ngayuku walytja ngaatjanya tjukarurru nyinaku, paluru ngayuku wangka riitarringkula tjakultjunku, paluru riitarripayi nyinanyi.’ Yalatji Katutjalu kuliṉi nyurrangarri palumpa waarrka palyantjaku. Tjinguru Katutjalunta nintilku waaḻa palyantjaku. Palulanguru nyuntu waaḻa palyantjaku, aapwayi palyara wantinytjawiyangku. Tjinguru Katutjalunta nintilku tjiḻpi yulkumina tjuṯa yaṉṯayaṉṯantjaku. Palulanguru nyuntu tjukarurru tjiḻpi yulkumina tjuṯa yaṉṯayaṉṯantjaku, purrkarringkula wantinytjawiyangku.”
49-50 Yiitjulu tjananya piyuku watjaṉu, “Yaṉangu tjuṯa nintilkitjaṉa nyurrangarrinya mantakutu ngalya yanu, kuya wantirra Katutjakunyurra yunyparrirra nyinanytjaku. Tjaampalangkunyurra kulira ngayuku walytja tjuṯa nyinaku, tjaampalangkunyurra kulira ngayunya wantiku. Yuwa, tjaampalanyurra ngayuku walytja tjuṯa nyinanytjala kutjupa tjuṯa nyurrangarrimpa yunytjuwiya nyinaku. Ngayulu yunytjurringanyi tjuṯalingkunyurra ngayuku walytja nyinanytjaku. Wanyu, ngula kutju ngayuku walytja tjuṯalingku nyinaku, ngayulu mikin puntutjarrarrinytjala ngaṉṯi. Tjuṯangkuṉiya yilta yitjipungku. Watjilpaṉa ngayulu nyinarra waralyngaraku.
51 “Tjingurunyurra yalatji wiyawanangku kuliṉi, ‘Yiitjunya mantakutu ngalya yanu yaṉangu tjuṯa nintilkitja, kalyparrirraya walytja tjuṯa palya nyinanytjaku.’ Wiya yalatji. Ngayuluṉa kuliṉi. Tjaampalangkuya ngayuku wangka kulira ngayuku walytjarriku, kanya tjaampalangkuya kulira ngayunya wantiku. Tjana ngayuku walytja panyapa tjuṯaku yunytjuwiya nyinaku. 52 Pamuli kutju payipala nyinaku yalatji. Tjirripalaya ngayuku walytja nyinaku, kanya kutjarra ngayuku walytjawiya nyinaku. Panyapa tjuṯaku tjanampa paluru kutjarra yunytjuwiya nyinaku. 53 Yalatjiya yunytjuwiya nyinaku. Paapa ngayuku walytja nyinanytjala palumpa katjara yunytjuwiyara nyinaku. Ngurra kutjupangka katja ngayuku walytja nyinanytjala, palumpa paapa yunytjuwiya nyinaku. Ngurra kutjupangka maama ngayuku walytja nyinanytjala palumpa yuṉṯalpara yunytjuwiya nyinaku. Ngurra kutjupangka yuṉṯalpa ngayuku walytja nyinanytjala, palumpa maama yunytjuwiyara nyinaku. Ngunyarrirra yunytjuwiya pulanku nyinaku, kutju ngayuku walytja nyinanytjala.”
Yutuwarikunyurra ninti
54-55 Yaṉangu tjuṯangka Yiitjulu piyuku watjaṉu, “Waḻpa kakarraranguru rungkaṉingka nganaṉa kuliṉi, ‘Kuwarri warrikutu rungkaṉi.’ Palulanguru yilta warrirringkupayi. Tjurrkarra wilurarranguru wangkanyingka kuliṉinyurra, ‘Waḻpa yataṉarringanyingka kuwarri tjiṉṯu tiṉarriku.’ Palulanguru yilta tjiṉṯu tiṉarripayi. 56 Waḻpa, tjurrkarra nyurrangarri tjukarurru kulira, kulinmaranyurra ngayulu Katutjakuṉu ngangkaritjarrangku palyantjala, ngayulaṉa Katutjakuṉu katja. Ngayuluṉa kuwarri yatjikilu ngangkaritjarrangku palyantja tjuṯangaranyurra nyakula wantipayi. Yalatjinyurra kulinmara, ‘Yiitjunya ngangkari tiṉatjarra yilta Katutjakuṉu, Kurayitjanya.’ ”
57-58 “Ngayuku wangka kuliranyurra Katutjaku tjukarurru nyinanytjaku, wiyanyurra wiyawana kutu nyinanytjaku. Yara ngaatjanyaya kulila! Tjinguru wati kutjupangka nyuntu kuya palyalku. Palurunta pikarrirra kuutawutjukutu katikitjangku watjantjala, nyuntu wangkarra kalyparrinytjaku, kuutawutjukutunta katitjipi, mayutju kuutawutju ngurrarangkunta watjara tjiilangka tjarrpatjunkutjipingka. 59 Tjinguru mayutju palurunta payina puntu yunganyingka puṯu nyuntu kulilku payina payimilalkitjangku.”
Yara palunya nintira Yiitjulu tjananya yalatji watjaṉu. Ngayuku wangka kulira nyuntu yaṉangu tjuṯaku kalypa nyinanytjaku. Kalypa tjanampa nyinanytjawiyangka Katutjalunta ngula kuutawutjungka wangkarra warukutulpi wantirriyalpayingkamarra.