9
1 Yiitjulu tjananya panyapa tjuṯangka piyuku watjaṉu, “Wangka ngaatjanyaya kulila! Katutjalu yaṉangu tjuṯa ngulytjura yaṉṯayaṉṯantjala, tjaampalangkunyurra kana nyinarra walytja palunya tjuṯa nyakula kutju mirrirriku.”
Yiitjunya yaṉangu kutjupa nguwanparriku
2 Palulanguru tjiṉṯu tjikitjipala nyinarra Yiitjulu tjananya Piitanya Tjayimitjanya Tjaananya yaḻṯirra katingu puḻikutu. Puḻingkaya katu kaḻparra ngarangi. Paluru tjana nyangu Yiitjunya, yaṉangu kutjupa nguwanpa ngaranytjala.
3 Palumpara mantarra tjulkurarringkula layitirringangi. Yaṉangungku wiya paltjira yalatji mantarra tjulkurankupayi.
4 Yiitjulapula Muutjanya, Yilaatjanya yutitjarringu, yirriṯi nyinangutja kutjarra. Paluru kutjarrapula Yiitjula wangkangi.
5 Piitalu palunya kutjarra nyakula Yiitjunya watjaṉu, “Mayutju. Nyuntu palya nganaṉanya ngaakutu ngalya katingu. Nyuntu yunytjurringanyingka puri maṉkurrpalatju palyalku nyurrangarrimpa, kutju nyuntupanta, kutjupara Muutjaku, kutjupara Yilaatjaku.”
6 Piitalu wangka panyapa ngarruṯatjarrangku parrpaṯu wangkangu. Muutjanya, Yilaatjanya yaṉangu winkipula yutirringutja nyakula paluru tjana nguḻurringu.
7 Palulanguru yutuwaringku tjananya tjutuṉu. Katutjanya yutuwaringuru wangkangu, “Ngaatjanya katja ngayuku nyinanyi. Rawalunyurra palumpa wangka kulintjaku.”
8 Palulanguruya pakara nyangu Yiitjunya kutju ngaranytjala.
9 Puḻingkaya tjarukatinyingka Yiitjulu tjananya marrkuṉu yalatji, “Puḻingka katu nyurrangarri nyangutjangku wiya yaṉangu kutjupa tjuṯangka tjakultjunkunytjaku.” Piyuku tjananya watjaṉu yalatji, “Ngula palyanyurra tjakultjunkunytjaku, kuwarrinyurra puḻingka nyangutjangku, ngayuluṉa yaṉanguku katja mirringuru pakara kutju yananyingka, ngaṉṯinyurra palya tjakultjunkunytjaku.”
10 Paluru tjana tjakultjunkunytjawiya nyinangu. Tjana tjungurringkula wangkarra puṯu kuliṉingi, “Yaalytjiyaalytji ngaangku watjaṉi?, ‘Mirringuruṉa pakara yanku.’ ” Puṯu kuliraya wantingu.
11 Palulanguru Yiitjunyaya wangka kutjupawanangku tjapiṉu, “Nyaakuya Muutjaku wangka nintilpayi tjuṯangku watjalpayi yalatji?, ‘Yirriṯi nyinangutja Yilaatjanya yurrunpa ngalya yanku, Kurayitjanya ngaṉṯi ngalya yanku.’ ”
12-13 Yiitjulu tjananya watjaṉu, “Yilaatjanya yilta yurrunpa ngalyanu, yaṉangu tjuṯa nintira tjukarurru nyinatjunkunytjaku. Yilaatja paluru yini Tjaananya yilta ngalya yanu. Ngalya yankula tjakultjunkunytjala, yaṉangu tjuṯangkuya palumpa wangka kulira wantipayi. Yalatji Katutjaku wangka yirriṯi tjunutja yiltarringu, ‘Yilaatjakuṉu wangkaya kulira wantiku.’ Katutjaku wangka kutjupa yalatji ngaranyi, ‘Kurayitjanyaya kulira wantiku.’ Yilta Tjaana palunya nguwanpaṉiya yaṉanguku katja kulira wantiku. Palulanguruṉiya kulintjawiyangku pungku.”
Uḻa mamutjarra palyalku
14 Yiitjunya, palumpa kutunguḻu maṉkurrpaṯarra puḻi palula tjarukatirra yankula nyangu yaṉangu tjuṯa, palumpa kutunguḻu kutjupa tjuṯaṯarra, waṉmanguru. Yiitjuku kutunguḻu kutjupa tjuṯangku wangkarra pungangiyanku, Muutjaku wangka nintilpayi tjuṯangkuṯarra.
15 Palulanguru Yiitjunya palumpa kutunguḻu maṉkurrpa maa ilarrinytjala, yaṉangu tjuṯangku Yiitjunya nyakula tjalkaḻungu waḻkulkitja. “Nyuntupalatjunta paṯaṉingi, uḻa palatjanu palyantjaku.”
16 Palumpa kutunguḻu tjuṯangka tjananya Yiitjulu tjapiṉu yalatji, “Nyaangurunyurra wangkarra pungangi?”
17 Wati kutjupa katu ngalya wangkangu, “Nintilpayi. Ngalya katinguṉanta katja ngayuku, nyuntu palyantjaku. Paluru mamutjarra nyinanyi, wangkanytjawiya.
18 Mamungku kuyantjala punkara parralayitjirrirra nyunypa yintirra ngarripayi. Nyuntupa kutunguḻu tjuṯangkaṉa tjananya ngayulu puṯu tjapiṉu payira wantirriyantjaku. Puṯuya payira wantirriyaṉu.”
19 Yiitjulu tjananya yaṉangu tjuṯangka watjaṉu, “Nyurrangarri ngayuku wangka kulira wantipayi. Rawaṉa nyurranya nintiṉangi. Kuliranyurra ninti nyinamara. Yaalytjingaranyurra pina alytjurarringkula kulilku? Uḻa palatja yaḻṯirra ngalya kati, ngayulakutu!”
20 Uḻa palunya Yiitjulakutuya katingu. Yiitjunya nyakula mamu paluru uḻangka yunnguwana nyinarra kuyaṉu. Palulanguru punkara parralayitjirringu. Mantakutu punkara ruularringkula nyunypa yintirra ngarringi.
21 Uḻa palumpa paapanya Yiitjulu tjapiṉu, “Kuwarri kutju paluru mamutjanu parralayitjirringu?, tjinguru yirriṯi parralayitjirripayi?” Paluru watjaṉu, “Palatja pipirri wiimatjanu rawa parralayitjirripayi.
22 Mamu paluru warungka kapingkaṯarra rawa punkatjingara tjarrpatjunkupayi, iluntankukitjangku.” Wati paluru Yiitjula piyuku tjapiṉu, “Tjingurunu nyuntu ngangkari tiṉatjarra? Tjingurunu kulira yaḻṯururringkula palyalku?”
23 Yiitjulu wati palumpa wangka kulira watjaṉu yalatji, “Nyuntu ngayunya yalatji watjaṉu, ‘Tjingurunu nyuntu ngangkari tiṉatjarra?’ Wiya nyuntu yalatji watjantjaku. Wiya nyuntu ngayunya ngangkariwiya kulintjaku. Nyuntu ngayunya Katutjakuṉu ngangkari tiṉatjarra kulintjaku. Tjinguru nyuntu panyapa kulintjala, ngayulu nyuntupa katjangka mamu payira iyalku.”
24 Palulanguru wati paluru yulakitjangku watjaṉu, “Kala, ngayululpi kuliṉi nyuntu ngangkari tiṉatjarra nyinanyi. Kutu ngayunya nintila!, tjukarurruṉa kulintjaku.”
25 Yiitjulu nyangu yaṉangu tjuṯa ngalya yankula tjungurrinytjala. Nyakula paluru mamu palunya payira wantirriyaṉu. Payira wantirriyalkitjangku mamungka yalatji watjaṉu, “Nyuntu kuyaṉutja uḻa ngaatjanya paluru wiya wangkanyi, wiya kuliṉi. Uḻa ngaatja wantirra yarra!, piyuku wiya tjarrpanytjaku, kutu yarra!”
26 Uḻa palunya kuyantjala tititingarala mirrangu. Yalatji mamungku palunya wantikatingu. Mirri nguwanpa ngarringi. Nyakulaya yaṉangu tjuṯangku watjaṉu, “Mirri paluru ngarrinyi.”
27 Yiitjulu palunya mara witira katura ngaratjunu.
28 Palulanguru Yiitjunyangarriya yankula waaḻangka tjarrparra nyinangu. Palumpa kutunguḻu tjuṯangkuya tjapiṉu, “Nyaangurulatju mamu palunya puṯu payira wantirriyaṉu?”
29 Yiitjulu tjananya watjaṉu, “Mamu palunya nguwanpa Katutjala tjapira kutju, payira wantirriyantjaku.”
30-31 Palulanguru Yiitjunya, palumpa kutunguḻu tjuṯaṯarra yanu yuru Kaliliyilawana tjayiṯiwana. Palulanguru Yiitjulu kuliṉangi, “Ngayuku kutunguḻu tjuṯangka kutjuṉa nintilkitjangku kuliṉi. Nganaṉa tawunu tjuṯangka tjayiṯiwana yanku, yaṉangu tjuṯangkamarra.” Yiitjulu tjananya yalatji nintiṉingi, “Wati kutjungkuṉi yaṉanguku katja tjakultjunku tjananya, kutjupa tjuṯangkuṉiya witira iluntankunytjaku. Ilta tjana ngayunya iluntanku. Munga kutjarraṉa mirri ngarriku, Katutjaluṉi pakaltjingalku.” Yalatji tjananya Yiitjulu nintiṉingi, wangka panyapa.
32 Palumpa kutunguḻu tjuṯangkuyanku puṯu kulira yalatji wangkangu, “Ngaatjanya mayutju tiṉalampa, wiya paluru mirrirriku.” Wiyaya Yiitjunya tjapiṉu ninti nyinakitjangku, kuṉṯarringkulaya wantingu.
Pipirri kuṉṯanytju nguwanpa nyinanytjaku
33 Tawunu Kapaniyamalalpiya yankula tjarrpangu. Waaḻakutuya yankula tjarrparra yunngu nyinangu. Palulanguru Yiitjulu tjananya tjapiṉu, “Nyaangurunyurra ruutuwana wangkayinangi?”
34 Kuṉṯarringkulaya ngarangi, wangkawiya. Tjana yurrunpa ruutuwana yankula yalatji wangkayinangi, “Ngananya mayutju tiṉalampa nyinaku?, Yiitjulawana ngaṉṯi.”
35 Palulanguru tjananya Yiitjulu nyinarra palumpa kutunguḻu tuwalpala yaḻṯirra nintiṉu yalatji, “Mayutju tiṉa nyurrampa nyinakitja waarrkana nguwanpa nyinanytjaku, nyurrangarrimpa waarrkarrinytjaku.”
36 Yiitjulu pipirri yila ngaranytjala ampura katirra ngururrpa tjanala ngaratjunu. Pipirri palunya yampura kanyira paluru tjananya watjaṉu,
37 “Pipirri ngaa nguwanpa ngayulu tjananya yunyparringkula yaṉṯayaṉṯaṉi. Tjingurunyurra pipirri tjuṯaku yunyparringkula, ngayukuṯarranyurra yunyparriku. Tjingurunyurra ngayuku yunyparringkula ngayuku paapakuṯarranyurra yunyparriku. Paluruṉi mantakutu iyaṉu.” Yalatji wangka panyapa Yiitjulu tjananya nintiṉu.
38 Tjaanalu Yiitjula watjaṉu, “Nintilpayi. Wati kutjupalatju nyangu mamu payintjala. Paluru watjalpayi yalatji, ‘Ngayuku walytja Yiitju Kurayitjanya ngangkari tiṉatjarra nyinanytjala, ngayulu mamu ngaatjanya payira iyaṉi, yaṉangu ngaatjanya wantirra yankunytjaku.’ Wati palunya mamu payilpayinyalatju marrkuṉu, payira wantirriyalwiyangku wantinytjaku, tjungula parra yankunytjawiyangka.”
39 Yiitjulu Tjaananya watjaṉu, “Wiyanyurra wati palunya marrkunmara. Palya paluru ngayunya yini watjara mamu payira iyantjaku. Yalatji mamu payira wiya paluru ngayunya panypurangku.
40 Yaṉangu kutjupalampa yunypa nyinanytjala, walytja nguwanpalampa nyinanyi.”
41 Yiitjulu tjananya piyuku watjaṉu, “Wangka ngaatjanyaya kulila! Tjinguru yaṉangu kutjupangkunta yunyparringkula kapi yungku, nyuntu ngayuku walytja nyinanytjala, Katutjalu yaṉangu palunya ngula ngaparrtjingku yaṉṯayaṉṯalku.”
Kuya palyantjawiya nyinanytjaku
42 Yiitjulu tjananya piyuku watjaṉu, “Tjinguru wati kutjupangku ngayuku walytjanya kuya palyantjaku tjingapungku. Yalatji paluru tjingapungkupayingku kuya palyalku. Ngula Katutjalu palunya warukutu waṉiku. Tjingapungkupayi palunya tjinguru yaṉangu kutjupangku witira tjiina puḻi tiṉatjarra nguṉṯiwana tayimapira iluntanku, yuru tiṉangka waṉirra. Yalatji palya tayimapira iluntankunytjaku. Ngula tjingapungkupayi palunya Katutjalu warukutu waṉiku. Tjinguru kutjupa tjuṯangku ngayuku walytja kutjupa tjuṯa tjingapungku kuya palyantjaku. Katutjalu tjingapungkupayi palunya tjananyaṯarra warukutu waṉiku.”
43-44 Yiitjulu tjananya piyuku watjaṉu, “Nyuntu tjinguru mara kutjungku kuya palyaṉutjangku kulira mara palunya kuntara waṉi!, kuya rawangku palyara Katutjaku wangka wantipayingkamarra. Palya nyuntu mara kutjutjarra Katutjaku ngurrangka kana kutu nyinaku. Mara kutjarratjarrangku nyuntu kuya rawangku palyara ilurra ngurra kuyakutu anku. Ngurra palula waru tiṉa kutu kampamalpa.
45-46 Wangka palunya nguwanpa nyuntu tjinguru tjina kutjungku kuya palyaṉutjangku kulira tjina palunya kuntara waṉi!, kuya rawangku palyara Katutjaku wangka wantipayingkamarra. Palya nyuntu tjina kutjutjarra Katutjaku ngurrangka kana kutu nyinaku. Tjina kutjarratjarrangku nyuntu kuya rawangku palyara ilurra ngurra kuyakutu ankuku.
47 Wangka palunya nguwanpa, nyuntu tjinguru kuru kutjungku kuya palyaṉutjangku kulira palunya yurrkura waṉi!, kuya rawangku palyara Katutjaku wangka wantipayingkamarra. Palya nyuntu kuru kutjutjarra Katutjaku ngurrangka kana kutu nyinaku. Kuru kutjarratjarrangku nyuntu kuya rawangku palyara ilurra ngurra kuyakutu ankuku.
48 Ngurra palula waru panyapa kutu kampamalpa, wiyarrinytjawiya. Waru ngurrara katilyka tjuṯangku tjananya kutu ngalkulmalpa, ilunytjawiya.”
49 Katutjalulanya yaṉangu yuwankarra yarrkalku tjukarurrulpila nyinanytjaku.
50 Yiitjulu tjananya yara kutjupa watjaṉu, “Paṉṯunguru kuka palyarripayi. Paṉṯu palunya palya. Paṉṯu kapingka rawa ngarrirra kuyarringkupayi. Paṉṯu irriṯitjanu wiya kuka palyarripayi. Paṉṯu palya nguwanpa nyurrangarri yaṉangu kutjupa tjuṯaku palya nyinanytjaku, wiya pikapikarringkula tjanampa nyinanytjaku, wanti!”