15
Yirriṯi nyinapayi tjuṯangkuya watjaṉutja
Palulanguru Paratji tjuṯa, Muutjaku wangka nintilpayi tjuṯaṯarraya Yiitjula tjungurringu. Aṉangu paluru tjanaya Tjarutjalumanya ngurrara tjuṯa tjungurringu. Yiitjunyalpiya tjapiṉu, “Yirriṯi nyinapayi tjuṯangkuya watjaṉutjangka, nyuntupa kutunguḻu tjuṯangkuya mara paltjira nyinamara, mangarri ngalkukitjangku. Nyaakuya nyuntupa kutunguḻu tjuṯangku paltjilwiyangku ngalkuṉi?” Yiitjulu tjananya payiṉu, “Yirriṯi nyinapayi tjuṯaku wangka kutjunyurra kuliṉi, Katutjaku wangkanyurra wantinyi. Yirriṯi Muutjalu Katutjaku wangka yalatji watjaṉu, ‘Paapa anta maamanyurra yaṉṯayaṉṯara kanyintjaku, wiyanyurra panypurangkunytjaku palunya kutjarra, purinypangkunyurra kanyintjaku.’ Wangka kutjupa palunya nguwanpa ngaranyi, ‘Paapa anta maama panypurangkunytjala, yaṉangu palunyanyurra mirri pungkunytjaku.’ Katutjaku wangka palunya nguwanpanyurra kulira wantinyi. Nyurrangarri wiyawanangku tjananya yaṉangu tjuṯa nintilpayi yalatji, ‘Mani tjinguru yulytjanyurra mantjira, wiyanyurra paapa anta maama yungkunytjaku, wantiya!’ Yalatjinyurra wiyawanangku nintilpayi. Paapa anta maamanyurra ngunytjinytjunkupayi, yulytja mani walytjangku kanyilkitjangku, ‘Yulytja ngaatjanya tjawirrilyi, Katutjaku kutju, maa katirra ngayulu tjaatji ngurraraku yungku.’ Yaṉangu tjuṯa tjananya nyurrangarri palunya nguwanpa nintilpayi, paapa an maamaku tjukarurru yungkunytjawiya nyinanytjaku. Yalatji Katutjaku wangkanyurra wantinyi yirriṯi nyinapayi tjuṯaku wangka kutjunyurra kulira wanaṉi. Yalatji nguwanpanyurra kutu wiyawanangku palyalpayi. Yirriṯi nyinapayi tjuṯangku watjaṉutja kutjunyurra nintilpayi, Katutjaku wangkawana wiya. Ngunytjinytju tjuṯanyurra nyinanyi. Yirriṯi nyinapayingku Yaatjayalu tjukarurru Katutjaku wangka watjaṉu yalatji,
‘Ngulaya yaṉangu tjuṯa ngunytjinytju nyinaku. Ngayunyaṉiya tjaangku kutju waḻkulku, wiyaṉiya yiltangku waḻkulku. Puṯu tjana ngayunya waḻkulku, ngunytjinytju tjuṯangku. Yirriṯi nyinapayi tjuṯaku luwuwana nyinakitjangkuya kulilku, ngayuku wangka wantirralpiya nyinaku. Wiya ngayukuṉu wangkaya yaṉangu tjuṯangka nintilku, yaṉangukuṉu wangka kutjuya nintilku.’ Wangka panyapa Yaatjayalu watjaṉu.”
Tjikira ngalkuṉutjangku wiya Katutjaku wangka kilytjuntanku
Tjuwu tjuṯangkuya mangarri an kuka kutjupa tjuṯa ngalkulpayi. Tjana mangarri an kuka kutjupa tjuṯa ngalkuwiyangku wantipayi, Muutjaku luwu yalatji ngaranyingka. Tjana watjalpayi, “Mangarri an kuka ngaatja ngalkulpayiwiya.” Paratji tjuṯangku kuliṉingi yalatji, “Mangarri an kuka ngaatja nganaṉa wiya ngalkuṉi. Yaṉangungku mangarri an kuka ngaatjanya ngalkulpayiwiya tjuṯa ngalkura, Katutjaku wangka kilytjuntananyi.”
10-11 Yaṉangu tjuṯa tjananya Yiitjulu yaḻṯirra tjungura watjaṉu, “Wangka ngaatjanyaya kulila! Yaṉangungku mangarri an kuka ngalkulpayiwiya tjuṯa ngalkura, wiya Katutjaku wangka kilytjuntananyi. Tjinguru yaṉangungku yaṉangu kutjupaku pikarringkula panypurangkula yalatji Katutjaku wangka kilytjuntananyi.”
12 Yiitjuku kutunguḻu tjuṯangku yankula Yiitjunya tjakultjunu yalatji, “Yara panyapa nyuntu watjaṉingka Paratji tjuṯangku kulira nyuntupa mulyarrarringkula ngarangi.” 13 Yara tjananya Yiitjulu watjaṉu, “Kaana ngurrarangku watiya kuya piḻṯirringutja yurrkura warungka waṉipayi. Yalatji warungka waṉipayi nguwanpa ngayuku paapangku Paratji kuya tjuṯa warukutu waṉiku. 14 Palula tjanalawana wiya nyurrangarri tjungurringkula kulintjaku. Kuru patingku wiya katipayi wati paanga mara witira, ngaṯingkapula punkaltjipingka.”
Yara palunya watjara Yiitjulu yalatji watjaṉu, “Tjaampalangku Katutjaku wangka tjukarurrungku nintilpayi. Tjaampalangku Katutjaku wangka wiyawanangku nintilpayi. Paluru tjana kuru paanga palunya nguwanpa nyinanyi. Paangangku wiya yuti nyanganyi, yalatjiya paluru tjana wiya Katutjaku wangka yuti kulira tjukarurru nyinanyi, tjana kutu kuya palyalpayi. Tjana wiya yaṉangu kutjupa watjantjaku yalatji, ‘Nyuntu kuya palyaṉu, yalatji nyuntu tjukarurru nyinanytjaku, ngayunya nguwanpa.’ Nintilpayingkuṯarra Katutjaku wangka kulira tjukarurru nyinanytjaku.”
15 Piitalu Yiitjunya watjaṉu, “Yara mangarri an kuka ngalkulpayiwiyatjarra nganaṉanya nintila!” 16-17 Yiitjulu tjananya nintiṉu yalatji, “Kutunyurra ngurrpa nyinanyi. Kulilaya! Mangarri an kuka tjaangkula ngalkunytjala wiḻakutu yankula ngarrirra wiyarringanyi. Yalatji mangarri an kuka ngalkulpayiwiya tjuṯa ngalkula wiya yaṉangungku Katutjaku wangka kilytjuntananyi, palya mangarri an kuka palunya ngalkunytjaku.” Yiitjulu wangka palunya watjara yalatji watjaṉu, mangarri kuka yuwankarra palyala ngalkunytjaku. 18-19 Yiitjulu tjananya palumpa kutunguḻu tjuṯangka piyuku watjaṉu yalatji, “Yaṉangungku Katutjaku wangka wantirra wiyawana palyara, palumpa wangka kilytjuntananyi, wiya mangarri ngalkura Katutjaku wangka kilytjuntananyi, wiya. Yurrunpa wiyawanangku kulira yalatji yaṉangungku kuya palyaṉi, yalatji Katutjaku wangka kilytjuntananyi. Yurrunpa wiyawanangku kulira miiṯa walytjawiyangka ngarrirra yalatji kuya palyaṉi. Yurrunpa wiyawanangku kulira yulytja mulyaṯalu mantjira yalatji kuya palyaṉi. Yurrunpa wiyawanangku kulira yaṉangu kutjupa mirri pungkula yalatji kuya palyaṉi. Yurrunpa wiyawanangku kulira yaṉangu kutjupanya panypurangkula yalatji Katutjaku wangka kilytjuntananyi. 20 Wangka palunya tjuṯa nguwanpa wiyawanangkula nganaṉa kulira kuya palyara Katutjaku wangkala kilytjuntananyi, wiya mangarri anta kuka ngalkura.”
Minymangku Yiitjunya kulilku ngangkari puntutjarra
21 Yiitjunya palumpa kutunguḻu tjuṯaṯarraya ngurra palunya wantirra yanu, manta Taayalakutu, manta Tjayitanalakutuṯarra. Ngurra palula tjana nyinangi. 22 Palulanguru minyma palunya ngurrara ngalya yankula Yiitjula tjungurringu. Paluru Tjuwuwiya nyinangu. Paluru Yiitjunya mirrarra watjaṉu, “Tapitaku walytja ngaṉṯitja yaḻṯururriwatju! Ngayuku yuṉṯalpa mamutjarra nyinanyi. Nyuntu palunya palyala!” 23 Yiitjunya wangkawiya ngarangi, yarrka. Palumpa kutunguḻu tjuṯangku yankula Yiitjunya marrkuṉu, “Minyma palatja wantirriyala! Kutulanya palangku wanara mirrarra watjarinanyi. ‘Nyurrangarri ngayuku yuṉṯalpa palyala!’ ” 24 Yiitjulu tjananya watjaṉu, “Yurrunpa Katutjalu watjaṉu ngayulu Yitjurilaku walytja ngaṉṯitja tjuṯa kutju palyara nintintjaku. Paluru tjana mayutjuwiya nyinanyi, tjiipi tjuṯa mayutju wiya nyinapayi nguwanpa. Minyma palatja wiya Yitjurilaku walytja ngaṉṯitja nyinanyi, Tjuwuwiya paluru nyinanyi.” 25 Minyma paluru wangka palunya kulira Yiitjula yilarringkula pupakatirra piyuku tjapiṉu, “Mayutju. Nyuntu ngayuku yuṉṯalpa palyalku?” 26 Yiitjulu yara yalatji watjaṉu, “Wiya kuka pipirrikuṉu mantjira papa tjuṯaku yungkunytjaku, pipirriku tjanampa.”
Yalatji Yiitjulu minyma palula watjaṉu, “Ngayulu Tjuwu walytja tjuṯaku, pipirri nguwanpa tjuṯaku kutju, mamu payira wantirriyalpayi, wiyaṉa nyurrangarrimpa, papa tjuṯaku nguwanpa Tjuwuwiya tjuṯaku, mamu payira wantirriyalpayi.”
27 Minyma paluru watjaṉu, “Yuwa kuliṉiṉanta. Wangka kutjupa ngaatjaṉanta watjaṉi. Papa tjuṯangku ngalkuṉi tiipulangka yunngu, pipirri tjuṯangku ngalkura waṉingutja.”
Yalatji Minyma paluru Yiitjunya watjaṉu, “Ngayuluṉanta papa nguwanpangku ngarala nyanganyi, kukaku nguwanpa, nyuntu ngangkaritjarrangku ngayuku yuṉṯalpa palyantjaku. Ngayuku yuṉṯalpangka mamu payira wantirriyala!, ngangkari tiṉatjarrangku!”
28 Yiitjulu watjaṉu, “Nyuntu papa nguwanpangku ngarala nyangangi, ngayulu nyuntupa yuṉṯalpa palyantjaku. Yalatji ngayuluṉanta nyuntupa wangka kuliṉi. Nyuntu yilta kuliṉi ngayulu ngangkari puntutjarra nyinanyingka.” Yiitjulu yalatji watjantjala yilta palumpa yuṉṯalpa palyarringu. Mamungku palunya wantirra yanu.
Yiitjulu tjananya yaṉangu tjuṯa palyalku
29 Palulanguru Yiitjunya, palumpa kutunguḻu tjuṯaṯarra yanu yuru Kaliliyila tjayiṯiwana. Puḻingkaya tjana kaḻparra nyinangi. 30 Puḻi palula Yiitjunya nyinanytjala yaṉangu tjuṯalingkuya palula ngalyankula tjungurringu. Tjungurringkulaya ngalya katingu miiṉṯa tjuṯa, nyumpu tjuṯa, pampa tjuṯa, wangkawiya tjuṯaṯarra. Ngalya katirra tjananya paluru tjana nyinatjunu, Yiitjulu pampura palyantjaku. Yiitjulu tjananya uwankarra palyaṉu. 31 Paluru tjana palyarringutja tjuṯa nyakula yunyparringu, “Katutjanya nganaṉa waḻkuntjaku. Paluru nganampa mayutju tiṉa nyinanyi Yitjurilaku walytja ngaṉṯitja tjuṯaku. Ngaangku tjananya palumpaṉu ngangkari tiṉatjarrangku palyaṉingi.”
Kutjupa tjuṯa tjananya Yiitjulu paḻtjalku
32 Yiitjulu palumpa kutunguḻu tjuṯa yaḻṯirra watjaṉu yalatji, “Ngayulu tjanampa yaḻṯururringanyi yaṉangu ngaa tjuṯaku, paluru tjana tjiṉṯu maṉkurrpa mangarriwiya nyinangutjangka. Ngayuluṉa wiya tjananya paḻtjatjirratja nyinanytjala ngurrakutu wantirriyalkitjangku kuliṉi, yankulaya ngururrpa paḻtjatjirratja punkalpayingka.”
33 Palumpa kutunguḻu tjuṯangkuya Yiitjula watjaṉu, “Ngaangka mangarri tjuṯa wiya ngaranyi, puriiti tjuṯa tjanampa mantjilkitjangku nganaṉa puṯu kuliṉi. Yaṉangu tjuṯalingkuya ngaatja nyinanyi.” 34 Yiitjulu tjananya tjapiṉu, “Tjinguru mangarri wiima ngarrinyi? Puriiti nyaalytjirrinyurra kanyiṉi?” Watjaṉuya, “Puriiti wiima rawunwana tjapanpalalatju kanyiṉi. Piitji wiima maṉkurrpaṯarra ngarrinyi.”
35 Yaṉangu tjuṯa tjananya Yiitjulu watjaṉu mantangka nyinakatinytjakuya. 36 Mangarri panyapa, piitjiṯarra mantjira paluru Katutjanya irra nyakula tjapiṉu yalatji, “Paapa, nyuntulanyatjunu mangarri ngaatjanya piitjiṯarra yungu.” Paluru kutu mangarri piitjiṯarra kilytjuntankula tjananya palumpa kutunguḻu tjuṯanya yungangi, yaṉangu tjuṯaku tjanampa katirra yungkunytjaku, paḻtjatjirratjaya nyinanytjala. Yalatji tjananya kutu katirra yungangi, kutunguḻu tjuṯangku. 37-38 Yalatji mangarri anta piitji panyapa Yiitjulu tjanampa ngangkaritjarrangku tjuṯalingkuṉu. Yaṉangu yuwankarrangkuya ngalkura paḻtjarringu, wati puu tjawutjunangku, kungka an pipirri tjuṯangkuṯarra. Mangarri tjuṯa ngalkura waṉingutja ngarrirra waṉingi. Palumpa kutunguḻu tjuṯangku mantjira tjunangi kaṉilpa tiṉa tjapanpalangka. Kaṉilpa panyapa tjuṯangka mangarri punturringkula katukaṯitja ngarringi.
39 Palulanguru Yiitjulu yaṉangu tjuṯanya watjaṉu ngurrakutu yankunytjaku. Puutangkaya kaḻparra yanu Yiitjunya, palumpa kutunguḻu tjuṯaya ngurra Makatanalakutu.