25
Yukarra tiinpala nyinanytjatjarra
1 Yiitjulu tjananya piyuku watjaṉu, “Katutjalu yaṉangu tjuṯa ngulytjura kanyilku. Palumpa walytja tjuṯa tjukarurru kutu nyinanytjaku ngayulu mantakutu piyuku ngalyankunytjala tjungurringkula nyinakitja ngayulawana. Yalatji nguwanpa yara ngaatjanya ngaranyi. Watingku kungka yaḻṯikitja nyinaku. Palumpa kutjarraku walytja tjuṯaya tjungurriku waaḻa tiṉangka tjarrparra tjungungku ngalkura yunyparrikitja. Palumpa kutjarraku walytja yukarra tiinpalaya waaḻa tiṉakutu yankula paṯalku, laampa kutju iitjitjarra. Paluru tjana paṯalku waaḻangka yaatjayiṯi, tjungungkuya ngalkura yunypa nyinanytjaku, wati paluru miiṯa yaḻṯikitja ngalya yananyingka.
2-4 Yukarra payipalangku palya kulilku, laampangka karritjina yintira, karritjina kutjupa paatulangkaya yintira kanyilku laampaku. Laampa kutju iitjitjarraya anta paatulatjarraṯarra tjana yankula waaḻangka yaatjayiṯi paṯalku. Yukarra payipala kutjupangkuya wiyawanangku kulilku. Laampangka kutjuya yintira, laampa kutju iitjitjarra waaḻa palulakutu yankula paṯalku wati palumpa.
5 Wati paluru miiṯa yaḻṯikitja tjiṉṯukutu tjarrpanytjawiyangka, kungka tiinpala paluru tjana puṯu paṯara yankurriku, laampatjarra tjuṯa.
6 Munga ngururrkutu wati paluru yila ngalya yankunytjala waarrkanangku tjananya kanara watjalku yalatji, ‘Pakalakaya tjungurringkunytjaku! Wati paluru yila ngalya yananyi.’
7 Tjana yukarra palya kulilpayi tjuṯangku pakara karritjina paatulangka alytjurankula yintira wiyalku laampa payipalangka. Tililkuya yankula tjungurrikitjangku.
8 Kanya yukarra kutjupa payipalangku puṯu yinkaku yalatji, ‘Karritjina nganaṉanyatju yuwa!, laampa payipalalampatju tili wiimarringanyingka. Yuwalampatju!, ngururrpalampatju wiyarritjipingka!’
9 Yukarra palya kulilpayi tjuṯangku tjananya watjalku, ‘Wiya. Tjingurulatju karritjina nyurrangarrimpa yintintjala laampa ngururrpalampatju mungarripayingka, karritjina aapatjarra. Nyurrangarrimpa laampaṯarra karritjina aapatjarra ngururrpa wiyarritjipingka, yankulaya karritjina kutjupa payimilala!’
10 Karritjinaya yankula payimilantjala ngaṉṯi wati paluru ngalyanku miiṯa yaḻṯikitja. Yukarra palya kulilpayi tjuṯaya tjungurringkula waaḻa tiṉangka tjarrpaku, tjungungkuya ngalkura yunyparrikitja. Tjarrpanytjalaya waaḻaku mayutjungku parrpaṯu tuuwa patilku.
11 Palulanguru ngaṉṯiya yukarra payipala panyapa tjuṯangkuya karritjina payimilara laampangka yintira ngalya yanku. Waaḻangka yaatjayiṯi ngaralaya tjapilku, ‘Mayutju, alytjurarralampatju!’
12 Wati paluru miiṯa yaḻṯikitjangku tjananya watjalku, ‘Wiya. Walytjawiyaṉa nyurrampa nyinanyi, ngurrpaṉa nyurrampa.’ ”
Yukarra payipala paluru tjana wiya purinypangku kulira tjukarurru palyalpayi. Tjana laampaku tjukarurru kulira yurrunpa karritjina paatulatjarra payimilara tjukarurru paṯanmara. Yiitjulu yara panyapa watjaṉu palumpa walytja tjuṯangku yalatji kulintjaku, “Nganaṉa tjukarurru kutu nyinanytjaku paluru ngalyankunytjala nganaṉa tjungurringkula palulawana nyinakitja.”
13 Yiitjulu tjananya piyuku watjaṉu, “Ngula ngayulu piyuku mantakutu ngalyankuku. Tjiṉṯu palumpanyurra ngurrpa nyinaku. Tjukarurru kutunyurra ngayuku nyinanytjaku, ngayulu nyurrangarrinya ngalya yankula katinytjawiyangku wantipayingka.”
Waarrkana tjuṯangku mani palyantjaku mayutjungku watjalku
14 Yiitjulu tjananya piyuku watjaṉu, “Katutjalu yaṉangu tjuṯa ngulytjura kanyilku. Paluru tjananya palumpa walytja tjuṯa tjapilku, ‘Waarrka ngayuku nyaa nguwanpa nyurrangarri palyalpayi?’ Yalatji nguwanpa yara ngaatjanya ngaranyi. Wati mayutjungku ngurra waṉmakutu yankukitjangku palumpa waarrkana maṉkurrpa yaḻṯiku tjungurrinytjaku. Watjalku tjananya palumpa waaḻa, yulytja mantaṯarra yaṉṯayaṉṯantjaku.
15 Waarrkana kutjungku yurrunpa mayutjuku mani puntura palyalpayi. Mayutju paluru yungku waarrkana palunya mani tiṉalingku, payipi tjawutjun tala. Waarrkana kutjupangku yurrunpa mayutjuku mani aapa palyalpayi. Mayutju paluru yungku waarrkana palunya mani tiṉa, tuu tjawutjun tala. Waarrkana kutjupangku yurrunpa mayutjuku mani wiima palyalpayi. Mayutju paluru waarrkana palunya mani waan tjawutjun tala yungku. Yalatji tjananya mayutju paluru mani yungkula ngurra kutjupakutu yanku.
16 Waarrkana paluru payipi tjawutjun tala mantjira yankula, yulytja payimilara tjalamilara mani tiṉa kutjupa palyalku, payipi tjawutjun tala kutjupa. Payipi tjawutjun talatjanu tjungura paluru tiin tjawutjun talalpi kanyilku palumpa mayutjuku.
17 Waarrkana paluru tuu tjawutjun tala mantjira yankula, yulytja payimilara tjalamilara mani tuu tjawutjun tala kutjupa palyalku. Tuu tjawutjun talatjanu tjungura paluru puu tjawutjun talalpi kanyilku palumpa mayutjuku.
18 Waarrkana paluru waan tjawutjun tala mantjira katirra yarrkatjunku, mani kutjupa palyantjawiyangku.
19 “Ngula mayutju paluru yarurriku. Yarurringkula paluru tjananya yaḻṯiku, waarrkana panyapa tjuṯa tjungurringkunytjaku. Tjana tjungurrinytjala paluru tjananya tjapilku, ‘Mani kutjupa, nampa nyaa nguwanpa nyurrangarri palyaṉu?’
20 Waarrkana paluru yankula mayutjungka ngarala watjalku, ‘Mayutju. Payipi tjawutjun tala nyuntu ngayunya yungu. Mani palula ngayulu wirriḻi palyaṉu, tiin tjawutjun talalpi ngarrinyi.’ Paluru mayutju palunya mani tiin tjawutjun tala yungku.
21 Mayutju paluru waarrkana palunya waḻkulku, ‘Nyuntu waarrkana palya. Nyuntu waarrkarringkula tjukarurru palyaṉu. Palulanguru ngayuluṉanta mayutju ngaratjunku. Ngali mayutju kutjarra tjungu nyinaku.’
22 Waarrkana kutjupangku yankula mayutjungka ngarala watjalku, ‘Mayutju. Tuu tjawutjun tala nyuntu ngayunya yungu. Mani palula ngayulu wirriḻi palyaṉu. Puu tjawutjun talalpi ngarrinyi.’ Paluru mayutju palunya mani puu tjawutjun tala yungku.
23 Mayutju paluru waarrkana palunya waḻkulku, ‘Nyuntu waarrkana palya. Nyuntu waarrkarringkula tjukarurru palyaṉu. Palulanguru ngayuluṉanta mayutju ngaratjunku. Ngali mayutju kutjarra tjungu nyinaku.’
24-25 Waarrkana kutjupangku yankula mayutjungka ngarala watjalku, ‘Mayutju. Ngaatjanya nyuntupa mani, waan tjawutjun tala. Palya kanyilkitjangku ngayulu tjaaṯangka tayimapira yarrkatjunkula wantingu. Nyuntupa nguḻurringkulaṉa purinypangku kanyiṉingi mani ngaatjanya, wiyarripayingka. Mani ngaatjarrangku ngayulu wiyawanangku palyantjala nyuntupa mani wiyarringamara. Tjinguru mani ngaatjanya wiyarringutjangka nyuntuṉi watjanmara waan tjawutjun tala kutjupa mantjiraṉanta yungkunytjaku. Nintingkuṉa kuliṉi, nyuntu mayutju yunytjuwiya nyinanyi. Ma!, nyuntupa maniṉanta yunganyi.’
26-27 Mayutju paluru waarrkana palunya payilku, ‘Nyuntu waarrkana kuya! Panyapaṉin tjukarurrungku watjaṉu nintingku. Ngayuku nguḻurringkula nyuntu purinypangku kanyiṉingi mani panyapa, wiyarritjipingka. Nyuntu mani panyapatjarrangku wiyawanangku palyantjala mani paluru wiyarringamara. Tjinguru mani palunya wiyarringutjangka ngayuluṉanta watjanmara waan tjawutjun tala kutjupa mantjiraṉin yungkunytjaku. Nintingkunu kuliṉi, ngayulu mayutju yunytjuwiya nyinanyi. Nyuntu ngayuku waan tjawutjun tala paayingkingka tjunamara, tjukarurrungku. Paayingkingka rawa ngarringutjangka, paayingki ngurrarangku mani wiima kutjupa tjungunmara. Palulanguru ngayulu ngalya yankulaṉanta mantjinmara, waan tjawutjun tala palunya anta mani wiima kutjupa, paayingki ngurrarangku tjunguṉutja.’
28 Mayutju paluru tjananya watjalku waarrkana kutjupa tjuṯangka, ‘Waan tjawutjun tala palunya waarrkana kuyakuyangka mantjira maa katirrara yuwa!, waarrkana panyapa, tiin tjawutjun tala kanyiṉutjaku.’ ”
29 Yiitjulu tjananya piyuku watjaṉu, “Wangka ngaatjanyaya kulila! Yaṉangungku Katutjaku tjukarurru palyaṉutjangka Katutjalura puntura tjukarurru palyalku. Yaṉangu kutjupangku Katutjaku tjukarurru palyantjawiyangka, Katutjalura wiya tjukarurru palyalku. Yaṉangu paluru puṯu kulilku, Katutjakura tjukarurru palyalkitjangku.
30 Waarrkana kuya palunya katirranyurra warungka waṉinytjaku. Mikin puntutjarra paluru kampaku.”
Yiitjulu tjananya yara palunya nintiṉu yalatjiya kulintjaku. Paluru mayutju tiṉa mantakutu piyuku ngalya yanku. Ngalya yankula paluru tjapilku palumpa walytja tjuṯa tjananya yaalytjiyaalytjiya palumpa waarrka palyalpayi. Tjukarurru palyalpayi tjuṯaku paluru yunyparriku. Palumpa waarrka wiya palyalpayi tjuṯaku wiya paluru yunyparriku.
“Yaṉangu yuwankarra ngayulawana ngaraku”
31 Yiitjulu tjananya piyuku watjaṉu, “Ngayulu yaṉanguku katja mantakutu piyuku ngalyankula, mayutju tiṉa nyinaku. Ngalyankula ngayulu nyurrangarrinya yaṉangu yuwankarra kuutawutjungka ngaratjunkula watjalku. Tjungulatju ngalya yanku ilkari ngurrara tjuṯaṯarra.
32-33 Ilkari ngurrara tjuṯangku yaṉangu yuwankarra manta tjuṯawana mantjira katirra ngayula ngaratjunku. Ngayuluṉa tjananya ngayuku walytja tjuṯa kulira watjalku ngalya yankula tjungu ngaranytjaku ngayula yila. Ngayuku tjiipi nguwanpaya ngaraku. Kutjupa tjuṯa ngayuku walytjawiya, ngayulu tjananya kulira watjalku yankula tjayiṯingka ngaranytjaku, nanikuta tjuṯa nguwanpa tjana tjungu ngaraku, ngayuku tjiipiwiya.
34 Ngayuku tjiipi nguwanpa tjuṯangka ngayulu tjanala yalatji watjalku, ‘Ngayuku paapa nyurrangarrimpa yunyparringanyi. Paluru irriṯi manta ilkariṯarra palyara kuliṉu nyurrangarrinya palumpa walytja tjuṯa yaṉṯayaṉṯalkitjangku. Ngalya yarraya!, palumpa ngurrangkalpi nyinanytjaku.
35 Irriṯi nyurrangarri mantangka nyinarra mangarri ngayunya yungu, paḻtjatjirratja ngayulu nyinanytjala. Kapitjirratja paarritji ngayulu nyinanytjala, nyurrangarri ngayunya yititjunu. Ngayulu kutjupa ngurrara nyurrangarrilakutu yananyingka, aḻṯururringkula nyurrangarri ngayunya paḻtjara ngarritjunu.
36 Mantarrawiya ngayulu nyinanytjala aḻṯururringkula nyurrangarri ngayunya mantarrangka tjarrpatjunu. Miiṉṯa ngayulu ngarrinyingka, ngalya yankula nyurrangarri ngayunya maḻpangku kanyilpayi. Tjiilangka ngayulu nyinanyingka, ngalya yankula nyurrangarri ngayunya maḻpangku kanyilpayi.’
37 Ngayuku tjukarurru nyinapayi tjuṯangku puṯu kuliraṉi tjapilku, ‘Mayutju. Yaalytjingaralatju nyuntunya nyakula paḻtjatjirratja paḻtjaṉu? Ngurra yaalytjingkalatju nyuntunya nyakula kapitjirratja yititjunu? Puṯulatju kuliṉi. Nyuntu yurrunpa wiyarringu. Nganaṉatju wiyalatju kurungku nyakupayi nyuntunya.’
38 Piyukuṉiya tjapilku, ‘Yaalytjingaralatju nyuntunya yaṉangu kutjupa ngurrara nyakula ngurra ngayukuṉungka ngarritjunu? Ngurra yaalytjingkalatju nyuntunya mantarrawiya nyakula mantarrangka tjarrpatjunu? Puṯulatju kuliṉi.
39 Ngurra yaalytjingkalatju nyuntunya miiṉṯa maḻpangku kanyiṉu? Yaalytjingaralatju nyuntunya nyakula tjiilangka maḻpangku kanyiṉu? Puṯulatju kuliṉi. Nyuntu yurrunpa wiyarringu. Nganaṉatju wiyalatju kurungku nyakupayi nyuntunya.’
40 “Ngayulu tjananya watjalku, ‘Wangka ngaatjanyaya kulila! Ngayuku walytja mangarritjirratja nyinanyingka nyuntu paḻtjaṉu. Yalatji nyuntu palunya paḻtjantjala ngayulu yunyparringu yilkaringuru nyakulaṉa. Palunya ngayuku walytja nyuntu paḻtjaṉu. Tjinguru ngayulu ngurra palula paḻtjatjirratja nyinanytjala nyuntu ngayunyaṯarra aḻṯururringkula paḻtjanmara, punturanyurra ngayuku yunytju nyinapayi, ngayuku wangkakuṯarra.’
41 “Palulanguru ngayulu nanikuta nguwanpa tjuṯangka watjalku, ‘Maa yarraya warukutu! Katutjalu irriṯi watjaṉu nyurrangarri kuya tjuṯa warungka kampanytjaku. Yirriṯi paluru watjaṉu mamuku mayutju, palumpa waarrkana tjuṯaṯarra waru palula kutu kampanytjaku.
42 Irriṯi nyurrangarri mantangka nyinarra mangarri ngayunya wiya yungu, paḻtjatjirratja ngayulu nyinanytjala. Kapitjirratja paarritji ngayulu nyinanytjala, nyurrangarri ngayunya wiya yititjunu.
43 Ngurra kutjupa ngurrara ngayulu nyurrangarrilakutu yananyingka, wiyanyurra ngayuku aḻṯururringkula ngayunya paḻtjara ngarritjunu. Mantarrawiya ngayulu nyinanytjala wiya nyurrangarri ngayuku aḻṯururringkula ngayunya mantarrangka tjarrpatjunu. Miiṉṯa ngayulu ngarrinyingka, wiyanyurra ngalya yankula ngayunya maḻpangku kanyilpayi. Tjiilangka ngayulu nyinanyingka, wiya nyurrangarri ngalya yankula ngayunya maḻpangku kanyilpayi.’
44 “Ngayuku wiyawana nyinapayi tjuṯangku puṯu kuliraṉi tjapilku, ‘Mayutju. Yaalytjingaralatju nyuntunya paḻtjatjirratja nyangu? Ngurra yaalytjingkalatju nyuntunya nyangu kapitjirratja? Puṯulatju kuliṉi. Nyuntu yurrunpa wiyarringu. Nganaṉatju wiyalatju kurungku nyakupayi nyuntunya.’ Piyukuṉiya tjapilku, ‘Yaalytjingaralatju nyuntunya kutjupa ngurrara nyangu? Ngurra yaalytjingkalatju nyuntunya mantarrawiya nyangu? Puṯulatju kuliṉi. Ngurra yaalytjingkalatju nyuntunya miiṉṯa nyangu? Yaalytjingaralatju nyuntunya tjiilangka nyangu? Nganaṉa nyuntunya nyakula yaṉṯayaṉṯanmara. Puṯulatju kuliṉi. Nyuntu yurrunpa wiyarringu. Nganaṉatju wiyalatju kurungku nyakupayi nyuntunya.’
45 Ngayulu tjananya watjalku, ‘Wangka ngaatjanyaya kulila! Ngayuku walytja mangarritjirratja nyinanyingka nyuntu nyakula wantingu, paḻtjantjawiyangku. Yalatji nyuntu palunya wiya paḻtjantjala ngayulu yunypawiya nyinangu ilkaringuru nyakulaṉa. Nyuntu ngayuku walytja wantingu paḻtjantjawiyangku. Tjinguru ngayulu ngurra palula paḻtjatjirratja nyinanytjala nyuntu ngayunyaṯarra aḻṯururrinytjawiyangku wantimara, paḻtjantjawiyangku, punturanyurra ngayuku yunytjuwiya nyinapayi, ngayuku wangkakuṯarra.’ ”
46 Yiitjulu tjananya piyuku watjaṉu, “Yuwa, palunya tjuṯa tjananya Katutjalu warungka waṉiku. Waru palulaya rawa kampamalpa, kanya ngayuku walytja tjiipi nguwanpa tjuṯaya Katutjaku ngurrangka kana kutu nyinamalpa.”