27
Mayutju Payilatalakutuya Yiitjunya katiku
1 Tjiṉṯu pakantjala tuḻkuku mayutju tiṉa tjuṯa, tjiḻpi mayutju tjuṯaṯarra tjungurringkula, miitingingka wangkangu, Yiitjunya mirrintankukitja.
2 Paluru tjana wangkarra kutjupa tjuṯa tjananya watjaṉu, Yiitjunya witira tayimapira katinytjaku, kamantaku mayutju tiṉakutu, yini Payilatalakutu. Katirraya mayutju palula ngaratjunu.
3 Payilatalu Yiitjunya mirritjunutjangka Tjuutatjalu tjakulpa kulira palumpa aḻṯururringu. Yankula puḻi tjiilpa panyapa tjaaṯiyipala mantjira katingu panyapa tjuṯakutu, tuḻkuku mayutju tiṉa tjuṯakutu, tjiḻpi tjuṯakutuṯarra.
4 Tjuutatja paluru yalatji katirra payikingka kanyira tjananya watjaṉu, “Ngayulu Yiitjunya tjitjantanu. Palunya ngayulu nyurrangarrila tjakultjunkula katirra nintira kuya palyaṉu. Ngayulu palunya tjakultjunkuwiyangku wantimara. Paluru ilta mungutja nyinanyi, kuya palyantjawiya.” Mayutju paluru tjanaya watjaṉu, “Mungutjalatju nyinanyi, Tjuutatja nyuntu walytjangku kulila!”
5 Tjaatji tiṉangka tjananya yalatji wangkarra puḻi tjiilpa palunya tjuṯa Tjuutatjalu tjanala ngurrkungku waṉirra yanu. Yankula ruupa mantjira watiyangka tayimapira yunytjuwananku tayimapira waralyngarala mirrirringu.
6 Tjuutatjalu yalatji puḻi tjiilpa tjuṯa waṉirra yananyingka ngaṉṯi tuḻkuku mayutju tiṉa tjuṯangku yurraraya katingu. Katirraya puṯu kuliṉu tjaatjiku maningka tjunkukitjangku. Wangkarra punguya alatji, “Mani ngaa tjuṯa wiya tjaatjiku maningka tjunkunytjaku, luwulampa yalatji ngaranyingka. ‘Wati kutjupa mirrintankunytjaku mani yungutja wiya tjungu tjunkunytjaku tjaatjiku maningka.’ ”
7 Puṯu kuliraya tjungurringkula yalatji wangkangu, “Mani ngaatjarrangku nganaṉa manta payimilantjaku, kutjupa ngurrara Tjuwuwiya ngaangka ilungutjangka manta palula ngaṯi tjawara tjunkunytjaku. Manta palula watingku yirriṯi pilkitjanu palyalpayi tiitji tjuṯa. Nganaṉa manta palunya payimilalku.”
8 Palulanguruya Tjarutjalumanya ngurrara tjuṯangku watjalpayi, “Mani palunya tjana yungu wati kutju iluntankunytjaku. Mani palunyatjarrangku manta ngaatjanya tjana payimilaṉu.”
9-10 Palunya nguwanpa Katutjaku wangka yiltarringu, wati Tjirimayalu yirriṯi watjaṉutja. Katutjaku wangka watjalpayingku Tjirimayalu yalatji watjaṉu, “Yitjurilaku walytja ngaṉṯitja tjuṯangkuya watjalku puḻi tjiilpa tjaaṯiyipala yungkukitjangku wati palunyaya iluntankunytjaku. Puḻi tjiilpa tjaaṯiyipala palunyaya mantjira manta payimilalku, tiitji tjuṯa pilkitjanu palyalpayingku yurrunpa kanyiṉutja. Wangka yalatji Katutjaluṉi watjaṉu.” Mayutju paluru tjana wangkarra manta payimilaṉu Yiitjunya mirrirringutjangka ngaṉṯi.
11 Yiitjunya kamantaku mayutju tiṉangka ngarangi, Payilatala. Paluru Yiitjunya tjapiṉu, “Nyuntu Tjuwu tjuṯaku mayutju tiṉa nyinanyi?” Yiitjulu watjaṉu, “Nyuntu wangka palunya kulintjaku.”
12 Paluru tjana tuḻkuku mayutju tjuṯangku Yiitjunya panypurangu, “Nyuntu yaṉangu tjuṯa wiyawanangku nintilpayi. Nyuntu nganampa luwu kilytjuntankupayi.” Yalatji nguwanpa tjana tjuṯangara panypurangangi. Yiitjunya kutu ngarangi wangkanytjawiya.
13 Payilatalulpi Yiitjunya piyuku tjapiṉu yalatji, “Pala tjuṯangku nyuntunya tjuṯangara panypurangkunytjala nyaa nyuntu watjalku?”
14 Yiitjunya kutu wangkawiya ngarangi. Palulanguru, Payilatalu puṯu kuliṉu.
Yiitjunyaya mirritjunku
15 Tuḻku yini Patjuwupala Payilatalu tjanampa puritjina kutju tjiilangka pakaltjingara iyalpayi, yaṉangu tjuṯangkuya yunytjurringkula tjapintjala.
16 Tuḻku palunya Patjuwupanya ngaranytjala wati kutju Parapatjanya tjiilangka nyinangu. Parapatjalungarriya yirriṯi kamanta ngurrara tjuṯanya pikangku pungangi.
17 Yaṉangu tjuṯaya tjungurringkula ngaranytjala Payilatalu tjananya tjapiṉu, “Puritjina yini ngananya ngayulu watjalku tjana pakaltjingantjaku? Tjinguru Parapatjanya wantirriyantjaku ngayulu watjalku, tjinguru Yiitjunya wantirriyantjaku ngayulu watjalku? Wati palunya yaṉangu tjuṯangku yini Kurayitjanya watjalpayi, Tjuwu tjuṯaku mayutju tiṉakunyu.”
18 Wangka panyapa tjananya tjapiṉu, Payilatalu, Yiitjunya wantirriyalkitjangku. Paluru yalatji kuliṉingi, “Tjuwuku mayutju tjuṯa Yiitjukuraya yunytjuwiyarringu. Palulanguruya tjana ngalya katirra ngayula ngaratjunu.”
19 Ngurra palula yaṉangu tjuṯangka Payilatanya nyinanytjala palumpa miiṯangku waarrkana wantirriyaṉu, yalatji tjakultjunkunytjaku, “Wati palunya mirritjunkuwiyangku wanti!, paluru mungutja ngaranyi. Munga kuwarriṉa tjukurrpa nyakula nguḻurringu palunyatjarra.”
20 Payilatalu tjananya yaṉangu tjuṯangka Yiitjunya pakaltjingalkitjangku tjapintjala, tuḻkuku mayutju tiṉa tjuṯangku tjananya parra yankulaya watjarinangi, “Parapatjanyaya watjala!, pakaltjingantjaku palunya, kanya Yiitjunya mirrintankunytjakuya watjala!” Yalatji tjananya mayutju tjuṯangku yaṉangu tjuṯanya watjara tjingapungangi. Palulanguru yaṉangu tjuṯangku kuliṉu Parapatjanya pakaltjingantjaku.
21 Payilatalu tjananya piyuku tjapiṉu, “Puritjina paluru kutjarra nyinanyi. Yini ngananya ngayulu watjalku tjana wantirriyantjaku?” Paluru tjana watjaṉu, “Parapatjanyakunyu.”
22 Payilatalu tjananya yaṉangu tjuṯa piyuku tjapiṉu, “Wati kutjupa yaalytjinkuṉa? Wati palunyaya watjalpayi, ‘Tjuwu tjuṯaku mayutju tiṉa, yini Kurayitjanyakunyu paluru nyinanyi.’ ” Mirrarraya watjaṉu, “Watiyangkaya tjana waralytjunkula mirrintarra!”
23 Payilatalu tjananya piyuku tjapiṉu, “Paluru mungutja nyinanyi. Kuya nyaa nguwanpa paluru palyaṉu? Kuya palyalpayi kutju tjana waralytjunkula mirrintankunytjaku.” Kutuya mirrarra watjaṉingi, “Watiyangkaya tjurra!, waralyngarala mirrirrinytjaku.”
24 Payilatalu puṯu wangkarra tjananya wantingu. Kuliṉu yalatji, “Wantikuṉa ngayukulpi tjana pikarritjipingka.” Panyapa kulira tiitji kapitjarra mantjira maranku paltjilpayi, yaṉangu tjuṯangkuya nyakunytjala. Yalatji kuutawutjuku mayutjungku mara paltjilpayi, yaṉangu tjuṯangkuya wiyawanangku mirritjunutjangka. Mara paltjira Payilatalu tjananya watjaṉu, “Ngayuluṉa mungutja. Nyurrangarri watjaṉu palunya tjana mirrintankunytjaku.”
25 Yaṉangu tjuṯangkuya Payilatala watjaṉu, “Palunyalatju mirritjunutjangka palyalanyatju Katutjalu ngula pungkuku, nganampa tjamu tjuṯaṯarra, kapaḻi tjuṯaṯarra.”
26 Palulanguru Payilatalu watjaṉu Parapatjanya pakaltjingantjaku. Paluru tjananya tjuulytji tjuṯa watjaṉu Yiitjunya wiipatjarrangku tjana pungkunytjaku. Palulanguru Payilatalu tjananya tjuulytji tjuṯa watjaṉu Yiitjunyaya katirra watiyangka waralytjunkula mirrintankunytjaku.
Yinkarraya Yiitjunya ngunytji watjanmalpa
27 Tjuulytji paluru tjana Yiitjunya katirra waaḻa tiṉa kutjupangka ngaratjunu. Waaḻa palula Payilataku tjuulytji tjuṯa nyinapayi. Waaḻa palula tjana tjuulytji kutjupa tjuṯa yaḻṯirra tjunguṉu.
28 Tjuulytji yuwankarraya tjungurringu ngurra palula. Yiitjuku kuuta waṯawaraya yarrara waṉingu. Kuuta waṯawara kutjupangkaya tjarrpatjunu, kuuta riitwanangka.
29-30 Walyi nguwanpa tjilkalatjanuya palyara katangkaya Yiitjula tjunu. Watiya tjana mantjira yungu Yiitjunya marangku paluru witira mayutju nguwanpangku kanyintjaku. Ruumanya ngurrara tjuṯangku mayutju tiṉa ngaranytjala, pupakatirraya waḻkulpayi. Palunya nguwanpa yinkarraya pupakatirra yalatji ngunytji watjaṉingi, “Nyuntu Tjuwu tjuṯaku mayutju tiṉakunyu nyinanyi. Kana kutu nyinama!, mayutju tiṉa.” Paluru tjana tjuulytji tjuṯangku yalatji kuliṉingi, “Yiitjunya wiya mayutju tiṉa nyinanyi, paluru mungutja.” Paluru tjana tjuulytji tjuṯangku Yiitjunya nyunypatjunangi. Nyunypatjunkulaya watiya panyapa mantjira kataya pungangi.
31 Kuuta panyapaya yarrara waṉingu, kuuta walytjangkalpiya tjarrpatjunu. Tjarrpatjunkulaya katingu, watiyangka waralytjunkula mirrintankunytjaku.
Yiitjunyaya nyiiḻangka wakara yuṯitjunkula waralytjunku
32 Tawununguruya tjuulytji tjuṯangku Yiitjunya katingu waralytjunkunytjaku. Yiitjulu tjaḻira watiya katiyanangi. Ngururrpa yankulaya tjana nyangu wati yini Tjaamananya, Tjayirininya ngurrara, ngalya yankunytjala. Tjaamananya nyakula tjana yalatji watjaṉu, “Kala, nyuntulpi watiya ngaatjanya tjaḻira katiyarra!, Yiitjuku.”
33 Puḻi yini Kulkutjalakutuya Yiitjunya katingu. Kulkutjanya wangka tjanampa ngarangi. Yalatji nganaṉa watjaṉi, “Kata tarrkanya.”
34 Palulanguruya Yiitjunya waralytjunkukitjangku puṯu yungu wayina mirritjinatjarra. Yiitjulu yarrkara wantingu tjikilwiyangku.
35 Ngurra Kulkutja palula Yiitjuku mantarraya yarrara waṉingu. Yiitjunyaya watiya panyapangka nyiiḻamilara ngaratjunu, waralyngarala, mirrirrinytjaku. Mantarra palumpa kutjungku kanyilkitjangku tjuulytji tjuṯangkulpiya yinytjamitjunkula puḻiyirringangi, puḻi nampatjarrangka.
36 Nyinarraya palunya nyangangi, Yiitjunya kana waralyngaranytjala.
37 Watiya palula pukutju wangkatjarraya tjunu Yiitjula katu. Wangka yalatjitjarra tjana tjunu, “Ngaatjanya Yiitjunya, Tjuwu tjuṯaku mayutju tiṉa.” Kuutawutju ngurrarangku watjaṉutjangka, pukutju palunyaya tjunu.
38 Puritjina kutjarra pulanya tjana watiya kutjarra kutjupangka nyiiḻamilara ngaratjunkula waralytjunu, ngurra palula. Yiitjunya ngururrpa pulampa waralyngarangi.
39-40 Yiitjunya kana waralyngaranytjala ila yaṉangu tjuṯaya iwarrawana yankupayi tawunu Tjarutjalumalakutu. Kutjupa tjuṯangkuya panypurangkula nyakula watjalpayi yalatji, “Nyuntu nganaṉanyatju watjaṉu, Tjuwuku tjaatji tiṉa yuḻpura, paawu puntutjarrangku kutjupalpi palyalkitjangku, tjiṉṯu tjirripalangka. Wangka panyapanu watjaṉutja nyuntu Katutjaku katja paawu tiṉatjarra nyinarra tjarukatirra kanarriwa!” Yalatji panypurangkula tjana watjaṉu, Yiitjunya Katutjaku katja kulintjawiyangku.
41 Palunya nguwanpa, tuḻkuku mayutju tiṉa tjuṯangku, Muutjaku wangka nintilpayi tjuṯangkuṯarra, mayutju tjiḻpi tjuṯangkuṯarra, Yiitjunya panypurangangi. Yalatjiya tjana wangkarra waṉingu,
42 “Kutjupa tjuṯa tjananya paluru kanalpayi ngangkari tiṉatjarrangkukunyu. Paluru ngangkari tiṉatjarra nyinarra, ngalya tjarukatirra kanarrinytjaku. Tjinguru Tjuwu tjuṯakulampa mayutju tiṉa nyinanyi, tjinguru paluru Kurayitjanya yilta. Paluru watiyanguru tjarukatinytjala nganaṉa nyakula yalatji kulilku, ‘Paluru Katutjakuṉu ngangkaritjarra nyinanyi, yilta Kurayitjanya.’
43 Paluru yalatji watjalpayi, ‘Ngayulu Katutjaku katjakunyu nyinanyi.’ Tjinguru Katutjalu palunya kulira kanalku, waralyngarala wiyarritjipingka.”
44 Puritjina paluru kutjarrangkupula watiyangka waralyngarala wangka palunya nguwanpa Yiitjunya panypurangkula watjaṉu.
Yiitjunya mirrirriku
45 Tjiṉṯu kaḻaḻangka manta tjuṯawana mungarringu. Munga ngarala ngarala mungarrtji tjirriyukuluku nguwanpa tjiṉṯurringu.
46 Mungarrtji Yiitjunya waralyngarala mirrarra Katutjanya tjapiṉu, “Yiluyi yiluyi lama tjapakatjani.” Tjaa walytjangku tjapiṉu yalatji, “Katutja, Katutja. Nyaanguru nyuntu ngayunya wantikatingu?”
47 Yaṉangu tjuṯa yila ngaranytja tjuṯangku puṯu kulira yalatji wiyawanangku tjana watjaṉu, “Kulilaya! Yirriṯi nyinapayikura wangkanyi, Yilaatjaku.”
48 Waarrkana kutjungku tjalkaḻungkula watiyangka rayiki tayimapira wayina yirriṯitjangka tjunkula katirra Yiitjula tjaangka yititjunu.
49 Yaṉangu kutjupa tjuṯangku watjaṉu, “Wanyuya nyangama palunya!, tjinguru Yilaatjanya kanarringkula ngalya yankunytjaku palulakutu, mantjira katinytjaku.”
50 Palulanguru Yiitjunya mirrarra mirrirringu.
51 Palulanguru kaliki tiṉa Tjuwuku tjaatji tiṉangka waralyngarapayi alytjuranu katunguru yunngukutu. Manta puḻi waaḻaṯarra pirrtjingu. Puḻi tjuṯa ngarala waṉirra kurayikirringu.
52 Kuḻpi tjuṯa, mirri ngarritjunkula wantipayi, alytjurankula waṉingu. Palulanguru tjananya Katutjaku tjukarurru nyinapayi tjuṯa, yirriṯi nyinarra mirrirringutja tjuṯa tjananya Katutjalu mirringuru pakaltjingaṉu.
53 Yiitjunya mirringuru pakara yananyingka ngaṉṯiya palunya tjananya Katutjalu mirringuru pakaltjingaṉutja tjuṯa Tjarutjalumalakutu yankula yaṉangu palunya ngurrara tjuṯangka yutirringu.
54 Manta puḻiṯarra pirrtjinytjala tjuulytji tjuṯa nguḻurringu, mayutju tjanampaṯarra. Yiitjunyaya mirri waralyngaranytjala nyakulaya wangkarra waṉingu, “Yilta, palatja Katutjaku katja waralyngaranyi.”
55-56 Yiitjunya kana waralyngaranytjala minyma tjuṯangkuya waṉmanguru nyangangi. Minyma paluru tjanala tjunguya nyinangi Miiri Makatalanya ngurrara, Miiri kutjupaṯarra maama pulampa Tjayimitjaku, Tjutjupaku. Tjunguya tjana nyinangi minyma kutjupaṯarra wati Tjipitiyiku miiṯa. Yirriṯi Yiitjunyangarriya manta Kaliliyilawana nyinanyingka minyma paluru tjana Yiitjunyangarri yaṉṯayaṉṯalpayi. Minyma paluru tjana mangarri anta kuka tjanampa kutjara yungkupayi. Palulanguru Yiitjunyangarri manta Kaliliyilanguru ngalya yankunytjala tawunu Tjarutjalumalakutu minyma paluru tjanaṯarra tjungu yanangi.
Mirri ngarritjunku kuḻpingka
57 Yiitjunya waralyngarala mungarrtjirringanyingka wati Tjutjupanya tawunu Yaramatjiyanya ngurrara mayutju Payilatalakutu yanu wangkanytjaku. Tjutjupa paluru yulytja an mani tiṉatjarra nyinangi Yiitjuku walytja.
58 Mayutju Payilatalakutu Tjutjupa paluru yankula tjapiṉu, Yiitjunya mirri katirra kuḻpingka ngarritjunkunytjaku. Palulanguru Payilatalu palumpa waarrkana watjaṉu, “Yankula tjananya watjala!, mirri palunya Tjutjupalu palya katinytjaku.”
59 Yankula Tjutjupalu mirri palunya mantjira pulangkitingka tjutura tayimapiṉu, pulangkiti palunya mirri tjutulpayikuṉungka.
60 Tjutjupalu palumpa waarrkana tjuṯangkuṯarra tjutura tayimapira katirra ngarritjunu Tjutjupaku kuḻpingka, yirriṯi tjana tjawara wantingutja, kuḻpi wiimatjanu. Kuḻpi palula Yiitjunya ngarritjunkula puḻi tiṉa tjana ruulamilara alytjura patiṉu.
61 Tjutjupalungarri ngarritjunkula kuḻpi alytjura patintjala kungka kutjarrangkupula nyangu Miiri Makatalanya ngurrarangku, Miiri kutjupangkuṯarra.
62 Munga ngararra Tjarritiyilpi ngarangu. Tuḻkuku mayutju tiṉa tjuṯa, Paratji tjuṯaṯarra mayutju Payilatalakutu yankula tjungurringu.
63 Payilatanya tjana watjaṉu yalatji, “Mayutju. Mirrirringutja paluru ngunytjinytju nyinapayi. Paluru yirriṯi tjananya watjaṉu yalatji, ‘Munga kutjarra ngayulu mirri ngarrirra kanalpi pakalku.’
64 Tjinguru palumpa walytja tjuṯangkuya yankula kuḻpingka mirri mantjira katirra yarrkatjunku. Yarrkatjunkula yaṉangu tjuṯangka paluru tjana yalatji wiyawanangku ngunytji watjalku, ‘Yiitjunya mirringuru pakara kana nyinanyi.’ Yalatjiya wiyawanangku watjalku palunya mirri yarrkatjunkula. Yalatji palumpa walytja paluru tjana mirri katirra yarrkatjunkutjipingka tjuulytji tjuṯa tjananya watjala!, kuḻpi palula tjana ngarala yaṉṯayaṉṯantjaku purinypangku. Yiitjulu tjananya yirriṯi wiyawanangku watjaṉu, ‘Ngayulu Kurayitjanyakunyu nyinanyi.’ Yaṉangu tjuṯangku yalatji kulira wiyawanangku kulilku. Tjinguru tjana yilta kulilku palumpa walytja tjuṯangku yalatji watjantjala, ‘Yiitjunya mirringuru pakara kana nyinanyi.’ Yaṉangu tjuṯangku wangka palunya nguwanpa yilta kuliltjipingka tjuulytji tjuṯa tjananya watjala!, kuḻpi palula ngarala purinypangku yaṉṯayaṉṯantjaku.”
65 Payilatalu tjananya watjaṉu, “Kala. Tjuulytji tjuṯa tjananyaya kati! Kuḻpi palula tjana ngarala yaṉṯayaṉṯantjaku purinypangku.”
66 Palulanguruya tjuulytji tjuṯa kuḻpi palulakutu tjungu yanu. Yankulaya Tjuwuku mayutju tjuṯangku puturru puḻi tiṉangka kiṯitjunkula wanaṉu nganytjantjaku. Kuḻpi palula tjayiṯingkaṯarra tjana puturru palunya kiṯitjunkula wanaṉu nganytjantjaku. Puturru kilytjuntanutja nyakulaya yaṉangu kutjupangku kulilku yaṉangu tjarrpangutjangka. Yalatji kulilkitjangku tjana kiṯitjunkula wanaṉu kuḻpi palula tjayiṯingka. Paluru tjana yalatji puturru kiṯitjunkula wanara tjuulytji tjuṯa tjananya yaḻṯirra ngaratjunu, kuḻpi palunyaya yaṉṯayaṉṯantjaku purinypangku.