2
“Yiitju Kurayitjanya palya nyinangi Katutjaku mayutjurrinytjawiya”
1 Yiitju Kurayitjalu nyurrangarrinya yaṉṯayaṉṯantjala nyurrangarri yunypa nyinanyi. Katutjaku kurrunpangku nyurranya nintintjala nyurrangarri Yiitjuku walytja tjuṯa palya nyinanyi. Yaṉangu kutjupa tjuṯanyurra kulira ilta yaṉṯayaṉṯalpayi.
2 Yalatjinyurra palya nyinanytjala ngayulu nyurrangarrimpa yunypa nyinanyi. Ngayulu nyurrangarrimpa puntura yunyparriku nyurrangarri yalatji nyinanytjala. Yiitjuku walytja kutjupa tjuṯaku nyurrangarri yunytjurringkula kalypa nyinanytjaku, palya. Wangka kutjuwananyurra kulira palyantjaku tjaatjingka, wiya tjaampalanyurra wangka kutjupawana kulira pikarrinytjaku, wangka kutjuwananyurra kulira tjukarurru palyantjaku.
3 Yulytja walytjangku kanyilkitja wiyanyurra yaṉangu kutjupangka ngunytji yinkanytjaku, “Yuwaṉi ngunytji ngayuluṉanta ngalya katirra yunganyi kiin.” Yalatji watjara nyurrangarri tjukarurru katirra yungkunytjaku, litjitjangku kanyintjawiya. Yaṉangu kutjupa tjuṯaku wiyanyurra mayutju nyinakitjangku kulintjaku, waarrkana nguwanpa tjanampanyurra palya nyinanytjaku.
4 Yuwa, waarrkana nguwanpa nyinarra yaṉangu kutjupa tjuṯanyurra yaṉṯayaṉṯantjaku,
5 Yiitju Kurayitjalu yaṉangu tjuṯa yaṉṯayaṉṯalpayi nguwanpa waarrkana nguwanpa nyinarra.
6-7 Yiitju Kurayitjanya, Katutjanyaṯarra mayutju tiṉa kutjarra ilkaringka nyinangi. Yiitjulungku kuliṉingi yalatji, “Ngayulu wiya ngayuku paapalawana kutu mayutju tiṉa nyinamalpa ngurra ilkaringka, ngayulu mantakutu yankula yaṉangurringkula waarrkana nguwanpa yaṉangu tjuṯawana nyinamalpa.”
8 Yuwa, Yiitju Kurayitjanya waarrkana nguwanpa nyinapayi. Paluru Katutjaku wangka kulira watiyangka waralyngarala mirrirringu.
9 Yalatji Yiitjulu Katutjaku wangka kulintjala Katutjalu palunya kanara katirra palumpa ngurrangka mayutju tiṉa nyinatjunu. Paluru yilta mayutju tiṉa nyinanyi, mayutju kutjupa tjuṯangka wirriḻi.
10 Paluru mayutju tiṉa nyinanyi yuwankarrangku waḻkuntjaku, yaṉangu manta tjuṯawana nyinapayi tjuṯangku, ilkari ngurrara tjuṯangkuṯarra. Yirriṯi mirrirringutja tjuṯangkuṯarra kanarringkulalpiya palunya waḻkulku.
11 Yuwa, yaṉangu yuwankarrangku yunypangku Yiitju Kurayitjanya waḻkulku yalatji, “Nyuntu yuwankarraku nganampaṯarra mayutju tiṉa yilta nyinanyi.” Yalatjiya Yiitju Kurayitjanya waḻkura paapa Katutjanyaṯarraya waḻkulku.
Tjukarurru kutunyurra nyinanytjaku
12 Pilipayinya ngurrara walytja tjuṯa, kulilaṉiya! Ngayulu nyurrangarrila yirriṯi tjungu nyinanyingka, ngayuku wangkanyurra kulilpayi. Yalatji kuwarri nyurrangarri ngayuku wangka kulintjaku, ngayulu ngurra waṉma nyinanyingka. Rawangkunyurra purinypangku kulintjaku Yiitju Kurayitjaku tjukarurru kutu nyinakitjangku. Yalatji tjukarurru nyinarranyurra palyalpi nyinaku palumpa ngurrangka, kana kutu.
13 Katutjalu nyurrangarrinya ngulytjura rapalpayi palumpa wangkaku tjukarurru kutunyurra nyinanytjaku.
14 Yalatji Yiitjuku tjukarurru nyinakitjangku yaṉangu kutjupa tjuṯa yaṉṯayaṉṯantjaku, pikarringkula panypurangkunytjawiyangku.
15-16 Yalatji tjananya yaṉṯayaṉṯara nyinanytjala nyurrangarri Katutjaku walytja yilta nyinaku, palumpa yuṉṯalpa tjuṯa, katja tjuṯaṯarra. Yaṉangu kuya palyalpayi tjuṯawananyurra nyinanyi. Palunya tjanalawananyurra nyinarra tjukarurru Yiitjuku nyinanytjaku, tjana yalatji nyurrangarrinya watjaltjipingka, “Nyurrangarri Yiitjuku walytja tjuṯa wiya tjukarurru nyinanyi Yiitjuku. Nyurrangarri kuya palyalpayi.” Yuwa, palyanyurra Yiitjuku wangkawana nyinanytjaku, kuya palyalpayi tjuṯangku kulira wangka palunya kulintjaku. Yalatjinyurra tjukarurru kutu nyinanytjala ngayulu ngula nyurrangarrimpa yunypa nyinaku Yiitju Kurayitjanya mantakutu piyuku ngalyananyingka. Ngayulu yalatji kulilku, “Pilipayinya ngurrara tjuṯa Yiitjuku tjukarurru kutu nyinapayi. Ngayulu tjanala Yiitjukuṉu wangka nintintjala yiltaya kulira palumpa walytja kutu nyinanyi. Wiyaṉa tjananya puṯu nintilpayi.”
17-18 Ngayulu nyurrangarrinya, kutjupa tjuṯaṯarra Yiitjukuṉu wangka nintintjala, nyurrangarri Yiitjuku waarrka palyalpayi Katutjaku tjukarurru nyinakitjangku. Yalatji ngayulu nyurrangarrinya, kutjupa tjuṯaṯarra nintintjala tjinguru kutjupa tjuṯangku ngayunya mirri pungku. Yalatji kulira ngayulu yunypa nyinanyi. Nyurrangarriṯarra yunypa nyinanytjaku ngayunya tjana mirri punganyingka yalatji kulira, “Nganaṉanya nintilpayi paluru wiyarringutjangka nganaṉa kutu yunypa nyinarra Yiitjuku waarrka palyantjaku.”
Ngayulu Timitjiyinya Yipaparatatutjanyaṯarra nyurrangarrilakutu wantirriyalku
19 Yiitju Kurayitjanya mayutju ngayuku nyinanyi. Paluru ngayunya nintintjala ngayulu Timitjiyinya nyurrangarrilakutu wantirriyalku. Ngayulu yunytjurringanyi Timitjiyinya nyurrangarrilakutu yankula nyakula kulintjaku. Nyurrangarrinya nyakula kulira tjakulpa ngalya katirraṉi tjakultjunkunytjaku ngayunya. Tjakulpa palya kulilkitja ngayulu yunytjurringanyi.
20 Timitjiyilu kutju nyurrangarrimpa rawa tjapilpayi, Pilipayinya ngurrara tjuṯaku.
21 Kutjupa tjuṯangku walytjangkuyanku kulira nyinapayi, Yiitju Kurayitjaku waarrka tjukarurru palyalkitja kulintjawiya.
22 Nyurrangarri Timitjiyiku ninti nyinanyi, tjukarurru kutu nyinangutjangka. Yiitjuku waarrka tjungungku ngalitju palyara wangka Yiitjunyatjarra tjakultjurinkupayi, katjararrangku nguwanpa. Yiitjuku walytjarringkula paluru ngayuku katja nguwanpa nyinanyi.
23 Timitjiyi palunya nyurrangarrilakutu wantirriyalkitjangku ngayulu kuliṉi, kuutawutjuku mayutjungkuṉi watjantjala ngaṉṯi.
24 Timitjiyinya nyurrangarrilakutu maa yananyingka, ngaṉṯi ngayulu nyurrangarrilakutu maa yankukitjangku kuliṉi, mayutju Yiitjuluṉi yalatji nintintjala.
25 Wati Yipaparatatutjanya ngayulu nyurrangarrilakutu wantirriyalkitjangku kuliṉi, wati paluru nganampa walytja. Tjungungku ngalitju Katutjaku waarrka palyarinkupayi. Yilta paluru Kurayitjaku waarrkana nyinanyi, ngayunya nguwanpa. Nyurrangarri irriṯi wati palunya ngayulakutu ngalya wantirriyaṉu, yaṉṯayaṉṯantjakuṉi.
26-27 Kuwarri ngayulu palunya nyurrangarrilakutu wantirriyalku. Yurrunpa wati paluru miiṉṯa puntu mirri nguwanpa ngarringi. Palulanguru Katutjalu yaḻṯururringkula palunya kanaṉu, ngayulu wiḻa kuya nyinatjipingka. Yipaparatatutja paluru watjilpa kutu nyurrampa nyinanyi yalatji kulira, “Pilipayinya ngurrara tjuṯa ngayuku kutu watjilpa nyinanyi, ngayunya miiṉṯa puntukutjura kulira.”
28 Yuwa, kuwarri ngayulu wati palunya watjalku nyurrangarrilakutu rayitpayiki yankunytjaku. Palunya nyakulanyurra yilta yunyparriku. Paluru miiṉṯa puntu ngarrinyingka ngayulu puntura watjilarripayi. Kala, paluru nyurrangarrilakutu yankula nyinanyingka ngayulu palyalpi nyinaku.
29-30 Yipaparatatutja paluru Yiitju Kurayitjaku waarrka tjukarurru palyara nguwanpa mirrirringu. Palurulitju Katutjaku waarrka tjungungku palyaṉangi. Nyurrangarri waṉma nyinanyingka wati paluru ngalya yankula tjungungkulitju Katutjaku waarrka palyaṉingi. Paluru nyurrangarrilakutu yankula nyinanyingka palunyanyurra puntura waḻkuntjaku, Yiitjuku waarrka paluru palyaṉutjangka. Yiitjuku waarrka palyalpayi kutjupa tjuṯaṯarra nyurrangarri nyakula puntura waḻkuntjaku.