15
Kutjupa tjuṯaku kulira palyantjaku
1-2 Tjinguru kutjupa tjuṯanyurra Yiitjuku tjukarurru nyinakitjangku puṯu kulira nyinapayi. Kutjupa tjuṯanyurra tjinguru Yiitjuku walytjarringkula rawangku palumpa waarrka palyalpayi tjukarurru kutu. Nyurrangarri panyapa tjuṯa tjananya purinypangku wangkarra tjukarurruntjaku. Palumpa tjanampa nyurrangarri kulintjaku, tjana kulira tjukarurru kutu nyinanytjaku. Wiya nyurrangarri walytjangku kulira palyantjaku.
3 Yiitju Kurayitjalu wiya walytjangku kulira nyinapayi, Katutjaku wangkawana paluru kulira tjukarurru nyinangi. Katutjaku wangka irriṯi tjunutja ngarrinyi yalatji,
“Katutja. Nyuntupa tjana yunytjuwiya nyinarra ngayunyalpi tjana panypurangkupayi.” Yalatji palumpa yunytjuwiya tjuṯangku Yiitju Kurayitjanya panypurangkupayi, Katutjaku wangkawana paluru kulira tjukarurru nyinanyingka.
4 Katutjaku wangka yirriṯi wakara tjunutja yuwankarra ngarrinyi, nganaṉa kulira nintirrinytjaku. Wangka palunya nganaṉa nintingku kulira yunypa nyinaku. Kutjupa tjuṯangku nganaṉanya panypurangkula pungkunytjala nganaṉa wangka palunya kulira yunypalpi nyinaku. Wangka palunya kulira nganaṉa yalatji kulilku, “Yilta nganaṉa Katutjaku ngurrangka kana kutu nyinaku.”
5 Katutjalu nganaṉanya pukuḻmankupayi, kutjupa tjuṯangku panypurangkula pungkunytjala. Ngayulu yunytjurringanyi paluru nyurrangarrinya nintintjaku, kalypangku palumpa waarrka tjungungku palyantjaku, yunypangku. Yiitju Kurayitjanya tjukarurru nyinangutja nguwanpa nyurrangarri tjukarurru kutu nyinanytjaku.
6 Yalatjinyurra kalypa nyinarra tjungungkunyurra Katutjanya puḻkawaṉinytjaku. Paluru ilta mayutju Yiitju Kurayitjaku paapa nyinanyi.
Wangka Yiitjunyatjarra ngaranyi Tjuwu tjuṯaku, Tjuwuwiya tjuṯakuṯarra
7 Yiitjuku walytja kutjupa tjuṯakunyurra yunytju nyinanytjaku, Kurayitjanya nyurrangarrimpa yunytju nyinapayi nguwanpa. Yalatjinyurra nyinanytjala kutjupa tjuṯangku nyurrangarrinya nyakula Katutjanyalpiya waḻkulku.
8 Wangka ngaatjanyaya kulila! Katutjalu Yipuramanyangarri irriṯi watjara Yiitju Kurayitjanya ilta mantakutu wantirriyaṉu, wiya paluru panyapa tjanala watjara wantingu, paluru ilta palunya wantirriyaṉu. Paluru ngalyankula Katutjaku waarrka palyaṉingi, Tjuwu tjuṯa tjananya yaṉṯayaṉṯalkitjangku. Paluru mantakutu ngalyanu.
9 Tjuwuwiya tjuṯaṯarra palumpa walytjarringkula Katutjanyalpi tjana waḻkuntjaku yalatji, “Katutjanya yilta nganampa aḻṯurunytju nyinanyi.” Katutjaku wangka Tapitalu irriṯi wakaṉutja Kurayitjalu Katutjala watjaṉu yalatji,
“Palulanguru nganaṉatju nyuntunya waḻkulku, Tjuwuwiya tjuṯangkuṯarra. Nganaṉatju nyuntunya warrara waḻkulku.”
10 Katutjaku wangka kutjupa yalatji ngarrinyi. Yaṉangu kutjupangku Tjuwuwiya tjuṯangka yalatji watjaṉu,
“Yunyparriwaya! Nyurrangarriṯarra Katutjaku walytja tjuṯalpi nyinanyi.”
11 Katutjaku wangka kutjupa yalatji ngarrinyi, “Tjuwuwiya tjuṯangkunyurra mayutju Katutjanya puḻkawaṉinytjaku. Yaṉangu yuwankarrangkula palunya puḻkawaṉinytjaku.”
12 Wangka ngaatjanyaṯarraya kulila! Wati Yaatjayalu yirriṯi watjaṉu yalatji,
“Mayutju Tapitaku ngaṉṯitja mayutju tiṉa nyinaku. Paluru manta tjuṯa ngurraraku mayutju nyinaku. Paluru tjana kulilku, ‘Mayutju palaku wangka nganaṉa kulira yilta Katutjaku ngurrangka kana nyinaku.’ ”
13 Ngayulu yunytjurringanyi Katutjalu nyurrangarrinya rapara kanyintjaku ngulanyurra palumpa ngurrangka nyinanytjaku. Yalatji nyurrangarrinya kanyintjala nyurrangarri Yiitjuku walytja nyinarra yunypalpi nyinaku. Katutjaku kurrunpangku nyurrangarrinya rapalku yukiri nguwanpa kutu pakantjaku yalatji kulira, “Nganaṉa yilta Katutjaku ngurrangka kana kutu nyinaku.”
Puulalu watjalku, “Katutjaluṉi watjaṉu palumpa waarrka palyantjaku”
14-15 Walytja tjuṯa, wangka ngaatjanya kulila! Ngayulu kuliṉi nyurrangarri tjukarurru Yiitjuku nyinanyi. Nintingkunyurra Yiitjuku walytja kutjupa tjuṯa nintilpayi Katutjaku wangkawana. Piipa ngaangka ngayulu nyurrangarrinya nguḻuwiyangku nintira marrkuṉingi, pina alytjurankukitjangku. Yalatji ngayulu nyurrangarrinya marrkuṉingi, Katutjaluṉi palumpa waarrka palyantjaku watjaṉutja.
16 Paluruṉi watjaṉu Yiitju Kurayitjaku waarrkana nyinanytjaku. Paluruṉi watjaṉu Tjuwuwiya tjuṯawana tjakultjurinkunytjaku. Yirriṯi tuḻkuku mayutjungku kuka tjawirrilyi kutjantjala, Katutjalu kukatjanu paṉṯira yunyparringkupayi. Yara palunya nguwanpa Katutjanya yunyparringkupayi Tjuwuwiya tjuṯangku wangka Yiitjunyatjarra kulira walytjarrinytjala. Ngayulu tjanalawana wangka palunya tjakultjurinkupayi. Katutjaku kurrunpangku tjananya ngulytjulpayi tjana kulira Katutjaku tjukarurru nyinanytjaku.
17 Yiitju Kurayitjaluṉi nintira rapantjala, ngayulu Katutjaku waarrka palyalpayi. Yalatji kulira ngayulu yunypalpi nyinanyi.
18 Yiitju Kurayitjaluṉi kutu rapantjala ngayulu nyurrangarrinya tjakultjunanyi rapangku. Ngayulu miiṉṯa tjuṯa palyara palumpa wangka tjakultjunkunytjala Yiitjulu tjananya Tjuwuwiya tjuṯa nintilpayi palumpa walytjarrinytjaku.
19 Yiitju Kurayitjakuṉu ngangkari tiṉatjarrangku ngayulu kutjupa kutjupa palyantjala paluru tjana nyakula kulira Yiitjuku walytjarringkupayi, Katutjaku kurrunpangku tjananya nintiṉutjangka. Tawunu Tjarutjalumalanguru yankula ngayulu wangka Yiitjunyatjarra tjanala tjakultjurinangi ngurra tjuṯawana. Yalatji tjanala ngayulu tjakultjurinkula manta Yilirrikumalakutu yanu. Yalatji ngayulu Yiitju Kurayitjakuṉu wangka ngurra tjuṯawana tjanala tjakultjurinkupayi.
20 Ngurra kutjupa tjuṯawana Yiitjuku walytja kutjupa tjuṯangku tjananyaya Kurayitjakuṉu wangka yurrunpa tjakultjurinangi. Ngayulu wiya ngurra palunya tjuṯawana piyuku tjakultjurinkupayi. Wantirra ngayulu tjanala ngurra kutjupa tjuṯawana tjakultjurinkupayi, Yiitju Kurayitjaku ngurrpa tjuṯawana. Yalatji ngayulu kulira nintirinkupayi, “Kurayitjaku ngurrpa tjuṯa kutjuṉa tjananya nintilku.”
21 Palunya nguwanpa Katutjaku wangka irriṯi tjunutja yalatji ngarrinyi,
“Kutjupa tjuṯangkulpiya Kurayitjanya kulilku, ngurrpa nyinangutja tjuṯangku. Kuliraya nintirriku, yurrunpa tjana kulilwiya nyinarra.”
Yalatji Katutjaku wangka ngarrinyi.
Puulanya yunytjurriku Ruumanya ngurrara tjuṯawana yankula nyinanytjaku
22-23 Rawangkuṉa ngurra ngaa tjuṯawana tjakultjurinkula puṯu kulilpayi nyurrangarrilakutu, Ruumalakutu yankula nyinakitjangku. Yiitju Kurayitjaku waarrka ngurra ngaa tjuṯawana ngayulu palyarinkula wiyarringulpi. Palumpa walytja tjuṯalingkulpiya nyinanyi.
24 Kala, ngayulu nyurrangarrilakutulpi yananyi. Nyurrangarrilawana nyinarra ngayulu manta Piinalakutu yankuku. Ngayulu nyurrangarrilawana yunypa nyinanytjala tjinguru nyurrangarri ngayunya mangarri maniṯarra yungkula maa wantirriyalku manta Piinalakutu. Yalatjikuṉa yunytjurringanyi.
25-26 Yurrunpawarrilatju Tjarutjalumalakutu yananyi palunya ngurrara tjuṯa mani yungkukitja, maralpa tjuṯaku. Mani palunya manta Matjatuniyanya ngurrara tjuṯangkuya yunypangku tjunu, manta Kiritjinya ngurrara tjuṯangkuṯarra. Paluru tjana mani palunya tjunu Yiitjuku walytja Tjarutjalumanya ngurrara tjuṯaku, katirra tjananya yungkunytjaku.
27 Tjuwuwiya paluru tjana walytjangku kulira yunypangku tjunu tjanampa. Paluru tjana tjanampa tjunkukitjangku yalatji kulinmara, “Nganaṉa tjanampa tjukarurru mani tjunkunytjaku, Tjuwu paluru tjana nganaṉanya irriṯi wangka Yiitjunyatjarra tjakultjunutjangka. Palya nganaṉa tjanampa Tjuwu tjuṯaku tjunkunytjaku.”
28 Mani palunya nganaṉatju katirra tjananya yungku. Palulanguru ngayulu manta Piinalakutu yanku. Yankula ngururrpa ngurra Ruumala ngayulu nyurrangarrilawana nyinaku.
29 Ngayulu maa yankula nyurrangarrila nyinanyingka Yiitju Kurayitjalu nganaṉanya tjungu pukuḻmanku. Paluru nganaṉanya rapalku palumpa waarrka yunypangku palyantjaku.
30-31 Walytja tjuṯa, mayutju Yiitjunya, Katutjaku kurrunpaṯarra nganampa yunytju nyinanyi. Palunya nguwanpa nyurrangarri ngayuku yunytju nyinarra, ngayuku Katutjanya tjapintjaku, paluru ngayunya yaṉṯayaṉṯara katiyinkunytjaku, Yiitjuku yunytjuwiya tjuṯangku, Tjuutiyanya ngurrara tjuṯangku ngayunya pungkupayingkamarra. Yalatji nyurrangarri ngayuku kutu tjapintjaku, Yiitjuku walytja Tjarutjalumanya ngurrara tjuṯa ngayuku yunypa tjana nyinanytjaku, nganaṉatju mani palunya katirra tjananya yungkunytjala. Wangka palulawana ngayulu kutu Katutjanya tjapilpayi. Paluru nyurrangarrinya nintira rapalku yalatji ngayuku kutu nyurrangarri tjapintjaku.
32 Katutjalu tjinguru kuliṉi ngayulu nyurrangarrilakutu yankula nyinanytjaku. Nyurrangarri Katutjanya tjapila!, ngayulu nyurrangarrilakutu maa yankula nganaṉa tjungu yunypa nyinanytjaku. Ngayulu nyurrangarrilawana nyinanytjala nyurrangarri ngayula wangkarra pukuḻmankunytjaku. Yalatji kutju nyurrangarri Katutjanya tjapintjaku.
33 Ngayulu palunya nyurrangarrimpa tjapinmalpa paluru nyurrangarrinya yaṉṯayaṉṯara kutu kanyintjaku, yunypanyurra kutu nyinanytjaku. Yalatjiku ngayulu Puulanya yunytjurringanyi.