21
Manta, ilkariṯarra nyuwana ngaraku
1 Ngayulu Tjaanalu nyangu manta ilkariṯarra wiyarrinytjala, yuru tiṉaṯarra wiyarringu. Kala ngayulu nyangu ilkari nyuwana, manta nyuwanaṯarra.
2 Palunyatjanu ngayulu nyangu tawunu winki ilkaringuru tjarukatingu, tawunu Tjarutjalumanya nguwanpa, nyuwana. Katutjalu tawunu palunya ilkaringuru walatjunu. Kungka marriṯirrikitja mantarra tjulkurangka tjarrparra ngarapayi nguwanpa, tawunu paluru tjulkura ngarangu.
3 Palulanguru Katutjaku tjiiyingka yaṉangu nguwanpa kutjupa wangkangu yalatji, “Kuwarri, Katutjanya palumpa walytja tjuṯawana nyinaku, walytjararranpaya tjungu nyinaku. Paluru tjananya kutu yaṉṯayaṉṯara kanyinmalpa.
4 Palyaya ngurra palula nyinamalpa. Palula yaṉangu tjuṯa wiya mirrirriku. Irriṯiya mantangka watjilpa nyinapayi. Wiya tjana ngurra palula watjilpa nyinaku, wiya.”
5 Palunyatjanu Katutjalu tjiiyi panyapangka nyinarra ngayunya Tjaananya yalatji watjaṉu, “Manta ilkariṯarra ngayulu nyuwana palyaṉutjatjarra nyuntulpi piipangka wakala! Kala, kuwarrilpi ngayulu manta nyuwana, ilkari nyuwanaṯarra palyalku. Kuwarri wangka paluru yiltarriku.”
6 Piyukuṉi watjaṉu yalatji, “Kala, wangka palulawana yiltarringu. Ngayulu ngangkari tiṉatjarrangku yuwankarra kanyinmalpa. Ngayulu yirriṯi mayutju tiṉa rawa nyinapayi. Ngulaṉa mayutju kana kutu nyinamalpa. Manta ngurrara tjuṯangkunyurra wangka ngaatjanya kulintjaku. Mantangka yaṉangungku ngayuku wangka kulira walytjarrinytjala ngayulu palunya ngayuku ngurrangka nyinatjunku. Ngurra palula paluru kana kutu nyinamalpa. Ngurra palula ngayulu tjananya kapi kanalpayinya yungku. Tjikiraya kana kutu nyinamalpa. Kapi palunya tjikira yaṉangu wiya piyuku paarritjirriku, kana kutu nyinamalpa.
7 Yunytjuwiya tjuṯangku nyurrangarrinya panypurangkula pungamalpa. Tjingurunyurra tjukarurru kutu nyinarra yiltanyurra ngayuku walytja tjuṯa ngayuku ngurrangka palya nyinamalpa.
8 “Yunytjuwiya tjuṯangku pungkunytjala tjaampalangkuya nguḻurringkula ngayuku wangka wantiku, tjukarurru nyinanytjawiyangku. Yalatji tjukarurruwiya nyinapayi tjuṯa tjananya ilkari ngurrara tjuṯangku katirra warungka waṉiku. Yirriṯiya mantangka mirrirringkula paluru tjana piyuku mirrirriku. Waru palulanguru puyu tiṉa yiluwana pakanmalpa. Ngananyangarri waru palula kamparra wiyalku?, yalatji wiyawana nyinapayi tjuṯa. Kutjupa tjuṯaya ngayuku yunytjuwiya nyinanyi. Palunya tjananya ilkari ngurrara tjuṯangku warungka waṉiku. Kutjupa tjuṯa kutu kuya palyara nyinapayi. Palunya tjananyaṯarra ilkari ngurrara tjuṯangku warungka waṉiku. Kutjupa tjuṯaya miiṯa kutjupa kutjupangka ngarripayi. Palunya tjananyaṯarra ilkari ngurrara tjuṯangku warungka waṉiku. Kutjupa tjuṯangku yaṉangu kutjupa tjuṯa kutu mirri pungkupayi. Palunya tjananyaṯarra ilkari ngurrara tjuṯangku waṉiku warungka. Kutjupa tjuṯangku yaṉangu tjuṯa yinkara kuyalpayi. Palunya tjananyaṯarra ilkari ngurrara tjuṯangku warungka waṉiku. Kutjupa tjuṯaya kutu ngunytji watjalpayi. Palunya tjananyaṯarra ilkari ngurrara tjuṯangku warungka waṉiku. Kutjupa tjuṯangku kutu Katutjanya nguwanpa kutjupa tjuṯa puḻkawaṉipayi. Palunya tjananyaṯarra ilkari ngurrara tjuṯangku waṉiku warungka. Tjinguru yaṉangu yalatji wiyawana kutu nyinanytjala ilkari ngurrara tjuṯangku palunya warungka waṉiku.”
Tawunu kutjupa winki ngayulu nyangu
9 Yirriṯi ilkari ngurrara paluru tiitji puyitjinatjarra kanyilpayi. Paluruṉi ngalyankula watjaṉu yalatji, “Yarralika! Ngayuluṉanta katirra nintilku kungka tjiipi wiima palumpa pikatjaku. Paluru kutjarra marriṯilpi nyinaku.”
10 Palulanguru ilkari ngurrara paluru, Katutjaku kurrunpangkuṯarra ngayunya katirra puḻingka katu nyinatjunu. Ilkari ngurrara paluruṉi nintiṉu tawunu Tjarutjalumanya winki ilkaringuru tjarukatinytjala. Katutjalu tawunu palunya walatjunu.
11 Tawunu paluru tilitjarra ngarangu, Katutjakuṉu. Tawunu paluru tjayinirringkula ngarangu, kilaatja tjayinirringkunytja nguwanpa.
12 Tawunu palula parriki tiṉa puḻitjanu palyaṉutja parra tjunkula wanantja ngarangu. Parriki palula kiiṯa tuwalpala ngarangu. Kiiṯa palula tjanala ilkari ngurrara tuwalpala ngarapayi, yaṉangu tjuṯa tjarrpapayingkamarra. Kiiṯa kutju yinitjarra ngarapayi yalatji wakaṉutja, “Ruupinanya.” Ruupinanya Yitjurilaku katja yurruntitja nyinapayi. Kiiṯa kutjupa yini kutjupatjarra ngarapayi yalatji wakaṉutja, “Tjuutanya.” Paluru Yitjurilaku katja kutjupa yirriṯi nyinapayi. Yalatji kiiṯa palunya tjuṯangka yini wakaṉutja tjuṯa ngarangu, Yitjurilaku katja yini tuwalpala.
13 Tawunu palula kakarrara tjayiṯi kiiṯa tjirripala ngarangu. Yalinytjarra tjayiṯi kiiṯa tjirripala kutjupa ngarangu. Wilurarra tjayiṯi kiiṯa tjirripala kutjupa ngarangu. Yulparirra tjayiṯi kiiṯa tjirripala kutjupa ngarangu.
14 Parriki palunya palyalkitjangkuya yurrunpa puḻi tiṉa tuwalpala ngarritjunu. Puḻi paluru tjana yini wakaṉutjatjarra ngarringi. Puḻi kutjungka yini yalatji wakaṉutja ngarangu, “Piitanya.” Paluru tjiipi wiimaku waarrkana nyinapayi. Puḻi kutjupangka yini yalatji wakaṉutja ngarangu, “Tjaananya.” Paluru tjiipi wiimaku waarrkana nyinapayi. Yalatji puḻi palunya tjuṯangka yini wakaṉutja tuwalpala ngarringi, tjiipi wiima palumpa waarrkana tjuṯa.
15 Palulanguru ngayulu Tjaanalu nyangu ilkari ngurrara paluru marangku miitjurimilalpayi kanyintjala, kuultatjanu palyaṉutja. Paluru ngarangu tawunu, parrikiṯarra miitjurimilalkitja, kiiṯa tjuṯaṯarra.
16 Tawunu paluru kaatpuuta nguwanpa ngarangu. Ilkari ngurrarangku kakarrara tjayiṯi miitjurimilara nampa watjaṉu yalatji, tuu tjawutjun payip yantaṯa kilumita. Paluru piyuku palunya yalinytjarra tjayiṯi miitjurimilara nampa watjaṉu yalatji, tuu tjawutjun payip yantaṯa kilumita. Paluru piyuku palunya wilurarra tjayiṯi miitjurimilara nampa watjaṉu yalatji, tuu tjawutjun payip yantaṯa kilumita. Paluru piyuku yulparirra tjayiṯi miitjurimilara nampa watjaṉu yalatji, tuu tjawutjun payip yantaṯa kilumita. Palunyatjanu ilkari ngurrara paluru piyuku palunya mantanguru katukutu miitjurimilara nampa watjaṉu yalatji, tuu tjawutjun payip yantaṯa kilumita.
17 Paluru parriki puḻitjanu palyaṉutja palunya miitjurimilara nampa yalatji watjaṉu, tjikitjiyi payipi mita.
18 Parriki paluru kilaatja nguwanpa ngarangu. Tawunu paluru kuultatjanu palyaṉutja ngarangu, kilaatja nguwanpa ngarangu.
19-20 Tawunu palula puḻi tuwalpala yunngu ngarangu, yinitjarra tjuṯa. Puḻi tjaampala kilaatja nguwanpa ngarripayi. Puḻi kutjarra puluuwana ngarripayi. Puḻi tjaampala kuriinwana ngarripayi. Puḻi tjaampala tjatjaka ngarripayi. Puḻi kutjupa kilaatja nguwanpa ngarripayi. Puḻi tjaampala yiluwana ngarripayi. Puḻi kutjupa maru ngarripayi.
21 Kiiṯa tuwalpala paluru tjana, puḻi tiṉa rawunwanatjarra ngarangu, puḻi palya tjulkura tuwalpalatjarra. Tawunu palula ngururrwana yiwarra tjuṯa ngarringi, kuultatjanu palyaṉutja.
22 Tawunu palula wiya tjaatji tiṉa ngarangu. Tjaatjingka wiyaya tjarrparra puḻkawaṉipayi, palunya ngurrara tjuṯangku. Yaṉangu paluru tjana Katutjanya, tjiipi wiima palunyaṯarra kurungku nyakula kutu puḻkawaṉipayi. Yilta Katutjanya ngangkari tiṉatjarra nyinangi ngurra palula.
23 Ngurra palula tjiṉṯu maanytjaṯarra wiya pakalpayi. Katutjanya tjiipi wiima paluruṯarra tili ngarapayi tjanampa.
24-26 Tawunu paluru yalatji tilitjarra ngaranyingka palunya ngurrara tjuṯaya palya tili palulawana nyinaku. Mayutju tiṉa kutjupa ngurrara tjuṯangkuya yulytja palya kuulta nguwanpa tjuṯa tawunu palulakutu katimalpa. Kiiṯa tjuṯa parriki palula kutu alytjura ngaramalpa. Tili kutu ngaranytjala wiya tjana kiiṯa tjuṯa patilku.
27 Kuya tjuṯa wiya tawunu palula tjarrparra nyinaku, wiya. Katutjanya nguwanpa puḻkawaṉipayi tjuṯa wiya tawunu palula tjarrparra nyinaku, wiya. Ngunytjinytju watjalpayi tjuṯa wiya tawunu palula tjarrparra nyinaku, wiya. Miiṯa kutjupa kutjupangka ngarripayi tjuṯa wiya tawunu palula tjarrparra nyinaku. Katutjaku walytja tjuṯa kutju palula tjarrparra kana kutu nyinamalpa, Katutjaku piipangka yini ngarringutja tjuṯa kutju tjarrparra nyinaku ngurra palula. Tjiipi wiima paluru piipa palunya kanyiṉi yinitjarra.