Tjukurpa Jonah-nyatjara
Jonah
Nyangatja Ngaṉmanytju Nyakula Wangkanytjaku
Nyangatja Godaku tjukurpa munu tjukurpa nyanga paluṟu utini Godanya aṉangu uwankaraku mukuringkunytja munu tjananya mukulyangku aṯunymaṟa kanyintja aṉangu Jew wiya tjuṯa kuḻu. Panya Godalu aṉangu Jew tjuṯanguṟu wati Jonah-nya ngurkantanu ngura kutjupakutu ankunytjaku ini Ninipalakutu. Munu paluṟu palunya iyaṉu ankula ngura nyara palula aṉangu panya Jew wiya tjuṯa wangkara nguḻutjunkunytjaku tjana kuranguṟu piiwiyaringkula kura wantinytjaku.
Palu ngaṉmanytju Jonah-lu Godala kulilwiyangku wantingi munu paluṟu anu ngura kutjupakutu. Palu maḻangka tjiṉṯu maṉkurpa antipinaku tjuningka unngu ngarinytjatjanu paluṟu nintiringu munu Godalu palula wangkanyangka paluṟu wangaṉarangku kulinu Ninipalakutu ankunytjikitjangku. Kaya aṉangu Ninipanya nguraṟa tjuṯangku mulapaṯu kuliṟa mulamularingu paluṟu tjukurpa Godalu wangkanytjitja tjanala tjakultjunkunyangka munuya kuṉṯaringkula kura uwankara wantingu alatjiṯu.
Ka ngula mulapa Jesulu ngapartji aṉangu Israelkunu tjuṯangka tjukurpa wangkangi munu panya Ninipanya nguraṟa tjuṯa tjanala tjakultjunangi. Alatji paluṟu wangkangi tjanala, “Tjiṉṯu Maḻatjangka aṉangu panya Ninipanya nguraṟa tjuṯangku nyuranya puntuṟa wangkaku ngayuku tjukurpa kuliṟa wantinytjitjanguṟu. Panya paluṟu tjana Jonah-lu Godaku tjukurpa wangkanyangka wangaṉarangku kulinu munuya piiwiyaringkula kura tjuṯa wantingu. Palu kuwari nyanga kutjupa Jonah-la waintaṟa puḻka mulapa nyurala tjungu ngaṟanyi nyura nyakula wangaṉarangku kulintjaku. Palu nyura ngayunya ngurkantankunytja wiya alatjiṯu.” (Nyawa Luke-aku 11:32.)
Tjukurpa nyanganpa ngarinyi:
1:1-2 Godalu Jonah-nya aḻṯinytja
1:3-16 Jonah-nya Godala tungunpungkunytja
1:17—2:10 Jonah-nya antipina puḻkangka tjuni unngu nyinanytja
3:1-4 Jonah-nya wangaṉararingkula Ninipalakutu ankunytja
3:5-10 Ninipanya nguraṟa tjuṯangku piiwiyaringkula Godanya kulintja
4:1-11 Jonah-nya mirpaṉarinytja munu Godanya ngaḻṯuringkunytja
1
Jonah-nya Godala Tungunpungkunytja
1 Iriti mulapa wati ini Jonah-nya nyinangi, Amitaku katja. Munu paluṟu kulinu Godalu wangkanyangka nyanga alatji,
2 “Jonah, pakaṟa ara ngura tawunu ini Ninipalakutu. Ngura nyara palula panya aṉangu mungilyi mulapa nyinanyi. Kaṉa kuwari tjananya nyanganyi kura puḻka nyinanyi. Ka nyuntu tjanala ankula wirkaṟa alatji wangka, ‘Nyuranya Godalu nyakula kuranmananyi munu nyuranya tjinguṟu iluntankuku.’ ”
3 Ka wati panya Jonah-lu Godalu wangkanyangka kuliṟa wantira kampa kutjuparira anu ngura ini Tjapalakutu, Ninipalakutu ankunytja wiya. Palu ngura nyanga Tjapanya uṟu puḻkangka itingka, ka pauta tjuṯa mulapa pitjala ngaṟala ankupai. Ka wati panya Jonah-lu wirkaṟa nyangu pauta uṟungka ankunytjikitja ngaṟanyangka ngura ini Paintakutu, munu paluṟu tikiti payamilaṉu tatiṟa ankunytjikitjangku. Munu tatinu wati pauta katipai tjuṯangka tjunguringkula Paintakutu ankunytjikitja, panya paluṟu kuliningi Godalanguṟu kumpiṟa ankunytjikitjangku.
4-5 Munuya ma-pakaṟa uṟungka rawa ankula ankula, ka Jonah-nya pakuringu munu pauta unngu ukalingkula ngarikatingu. Ka Godalu waḻpa puḻka iyaṉu, ka winmu-winmulyaraṟa pauta panya puḻkaṟa uritjinganingi, ka nguwanpa kaṯakatingi. Kaya wati pauta katipai tjuṯa puḻkaṟa nguḻuringkula kawaṟu-kawaṟuringu, munuya tjanampa god tjuṯangka tjapiningi tjananya aṯunymaṟa waḻpa pilunmankunytjaku. Munuya pautanguṟu luuta tjuṯa uṟungka waṉingi pauta tjarpanytjaku-tawara, tjana kuḻu ilunytjaku-tawara.
6 Ka wati pautaku mayatjangku Jonah-nya para-nguriningi, “Yaaltjingka paluṟu nyinanyi?” Munu paluṟu nguriṟa nyangu, “Nyangatjampal kunkunaringu.” Munu wangkangu, “Jonah ngalya-pakala! Nyaakun kunkunpa ngarinyi? God nyuntumpangkalampa tjapila alpamilantjaku waḻpa nyangatja wiyantjaku. Paluṟulampa tjinguṟu ngaḻṯuringkuku, munulanya wankaṟu kanyilku.”
7 Kaya pauta katipai tjuṯangku kapuṯu-kapuṯurira nyinara wangkara kuliningi, “Nyaanguṟulanya nyangatja puḻkaṟa uritjingaṉi. Wati kutjupa-manti kurampa nganaṉala tjunguringkula pitjangu, ka nyanga waḻpa puḻka pitjangu.”
Munuya wangkangu, “Puṉu lalpirpa tjukutjuku tjuṯangkala wanyu ini uwankara walkatjura ngurkantankunytjikitjangku arkaṟa.” Munuya walkatjunkula puṉu initjara tjuṯa pitingka tjunguṟa tjunu. Ka wati kutjungku kuṟu patiringkula piti palulanguṟu puṉu kutju mantjinu munu kuṟu aḻaringkula nyangu ini Jonah-nya, munu tjanala nintiṟa wangkangu, “Munta, wati nyangangkumpalanyal tatiṟa ankula unnyuṉu.”
8-11 Munuya Jonah-nya aḻṯira tjapinu, “Nyuntu wanyu ngura yaaltjiwanutja? Tjaa nyaa wangkapain?”
Ka Jonah-lu tjanala wangkangu, “Ngayuluṉa wati Israelnga nguraṟa wangka panya Iipuṟu. Munuṉa ngayulu Mayatja God Ilkaṟitjanya waḻkulpai, panya uṟu manta uwankara tjunkunytjanya.”
Kaya palunya piṟuku tjapinu, “Nyuntu wanyu nyaaṉu? Nyuntulanguṟu-manti waḻpa nyangampa puḻkaringu munu pauta nyangampa uṉṯuṟa kaṯantananyi.”
Ka tjanala Jonah-lu ngapartji wangkangu, “Wiya, Godaluṉi Ninipalakutu wituningi, kaṉa nyangatja Godala tungunpungkula nyuralawanu tatiṟa pitjangu.”
Kaya paluṟu tjana Jonah-lu wangkanyangka kuliṟa puḻkaṟa nguḻuringu. Munuya wangkangu, “Nyaakun nyuntumpa mayatjangka tungunpungkula anu? Utin wangaṉarangku kuliṟa anama. Palu nyuntunyala kuwari nyaalku waḻpa atanarinytjaku?” Alatjiya palunya tjapiningi panya waḻpa puḻka mulararinyangka.
12 Ka Jonah-lu wangkangu, “Nyurampa kuranguṟu wiya nyangatja, ngayulanguṟu. Kaṉiya uṟungka waṉi, ka waḻpa uṟu mapalku atanariku.”
13-14 Palu tjana Jonah-nya waṉiwiyangku wantingu, munuya tjaṯu-tjaṯungku pauta panya puṉu waṟa tjuṯangka arkaṟa ilaningi mantangka wirkankunytjikitjangku. Palu puṯuya ilaningi panya waḻpa puḻka mulararinyangka. Ka uṟu panya puḻkaṟa alatjiṯu pirnyalaraṟa pautangka tjarpangi. Kaya palulanguṟu Mayatja Godala puḻkaṟa tjapiningi wangkara, “Mayatja, ngaḻṯuriwalampa! Nyanga kuwarin waḻpa puḻka iyaṉu wati nyanga Jonah-languṟu pauta uritjingaṟa uṟungka tjarpatjunkunytjaku. Ka nganaṉa wati nyanga palunya uṟungka waṉinyangkampa wanyu waḻpa atanmanama nganaṉa wankaringkunytjaku.”
15 Munuya tjapiṟa wiyaringkula Jonah-nya mantjiṟa uṟungka waṉingu, ka waḻpa uṟu mapalku atanaringu.
16 Kaya atanarinyangka nyakula tjana Mayatja Godaku puḻkaṟa nguḻuringu. Munuya kuka pungkula tiliwakaṟa Godanya waḻkuntjikitjangku ungangi. Munu tjana kalkuṉu alatji wangkara, “Nyanganguṟula nyuntunya kutju kulilku Mayatja Godanya.”
17 Palu Jonah-nya uṟungka tjarpara ilunytja wiya panya Godalu antipina puḻka iyaṉu, ka antipinangku Jonah-nya kuuḻtjanu munu tjiṉṯu maṉkurpa wanka kanyiningi tjuni unngu.