3
Inma nyangatja Davidalu walkatjunkunytja panya paluṟu palumpa katja Absalomalanguṟu nguḻu wirtjapakantjatjanungku.
1 Mayatja, aṉangu panya tjuṯa mulapa ngayuku kuraringanyi,
munuṉiya kuwari winkingku pikangku wataparaṉi.
2 Tjana kunyu anaṟa wangkapai ngayunyatjara alatji,
“Godalu palunya wankaṟunkunytja wiya alatjiṯu.”
3 Palu Mayatja, nyuntun ngayunya kuṯitji puṟunytju anga-kanyilpai.
Munuṉin ngayunya witulyankupai tjananya pungkula waintarinytjaku,
munuṉin rapa ngaṟanytjaku palyalpai.
4 Panya ngayulu nyuntula ulara tjapilpai wankaṟunkunytjaku,
ka nyuntu mulapaṯu ngayunya puḻi miḻmiḻṯanguṟu alpamilalpai ngura pala Tjayantanguṟu.
5 Mayatja, nyuntu panyan ngayunya aṯunymaṟa kanyilpai,
kaṉa mungangka wiṟuṟa kunkunaripai
munuṉa mungawinki wankaringkula pukuḻpa pakalpai.
6 Ngayuku mirpaṉtju mungilyingkuṉiya para-angatjuṟa waṉaṟa pikangku wataparaṉi.
Palu ngayulu tjanampa nguḻuringkunytja wiya rapa alatjiṯu ngaṟanyi.
7 Mayatja God, pitjalaṉitju wankaṟunama!
Munu ngayuku nyanga mirpaṉtju tjuṯa kaṯiṯi pungkula minya-minyanma.
8 Mayatja, nyuntu panya nyuntumpa walytja tjuṯa wankaṟu kanyilpai.
Wanyu tjananya mukulyangku pukuḻmanama.