10
1 Uwa, Jesuku walytja tjuṯa! Ngayulu puḻkaṟa mukuringanyi kurunpa winki ngayuku walytja tjuṯaku panya Jew tjuṯaku, tjana Jesuku mulamularingkula wankaringkunytjaku. Panya tjanampaṉa tiṯutjarangku tjapilpai Godala.
2 Kaṉa nyangatja palunya tjananyatjara wangkanyi, panya tjana puḻkaṟa arkaṉi Godaku iwara tjukaṟurungku waṉantjikitjangku, Godanya tjanampa pukuḻarinytjaku. Palu paluṟu tjana nintiringkunytja wiyaṯu Godaku iwaraku.
3-4 Panya Godalu kutjungku aṉangu tjuṯa tjukaṟurunmankupai. Palu palunyaya kuliṟa wantingi munuya walytjangku arkaṟa palyaningi Moseku tjukurwanungku tjana walytja Godala miṟangka tjukaṟuru ngaṟanytjikitjangku. Palu tjana ngunti kuliningi Moseku tjukurwanungku Godala miṟangka tjukaṟuru ngaṟanytjikitjangku. Panya kulintja nyanga palunya Christalu pitjala wiyaṉu, munu panyalampa iwara kuwaritja aḻaṉu Godalu palumpa mulamularingkupai uwankara tjukaṟurunmankunytjaku.
5 Kulila Mosenya, panya paluṟu iriti walkatjunangi Godaku tjukurwanu palula miṟangka tjukaṟuru ngaṟanytjaku nyanga alatji,
“Aṉangungku tjukurpa nyangatja wangaṉarangku kuliṟa palyaṟampa Godala tjunguringkula wanka tiṯutjara nyinaku.”
6 Palu tjukurpa kutjupa nyiringka ngarinyi panya aṉangu Godaku mulamularingkula kutju palula tjunguringkula tjukaṟuru ngaṟaku. Kala mulamularingkupai tjuṯangku alatji wangkawiyangku wantipai, “Ngananya wanyu ilkaṟikutu tatilku munu Christanya aḻṯira ngalya-katiku mantakutu nganaṉanya iwara tjukaṟuru nintintjaku?” Wiya alatjiṯu.
7 Munula palu puṟunypaṯu alatji wangkawiyangku wantipai, “Ngananya wanyu manta unngu tjarpaku munu Christanya miriku ngurangka ngarinyangka wankaṟa pakaltjingalku nganaṉanya iwara tjukaṟuru nintintjaku?” Wiya alatjiṯu.
8 Panya nganaṉa mulamularingkupai tjuṯangku alatji kulilpai,
“Wiya, Godaku tjukurpa nganaṉala unngu ngaṟanyi alatjiṯu, ka nganaṉa tjaḻinypangku wangkanytjaku ngaṟanyi alatjiṯu.”
Kaṉa tjukurpa panya palunyaṯu rawangku nyurala wangkanyi kuliṟa mulamularingkunytjaku.
9 Alatjiṉa wangkanyi, “Tjinguṟu nyuntu tjaa aḻaringkula utingku Jesunya mayatjanmankuku munun kurunpa winki Jesunya ilunytja Godalu pakaltjingantjitjaku mulamularingkuku, ka nyara palulanguṟu Godalu nyuntunya wankaṟunkuku palula tjungu nyinanytjaku.”
10 Panya nganaṉa kurunpa winki mulamularingkunyangka Godalu nganaṉanya tjukaṟurunmankupai. Munu nganaṉa Jesunya wangkara utingku mayatjanmankunyangka Godalu nganaṉanya wankaṟunkupai palula tjungu tiṯutjara ngaṟanytjaku.
11 Panya iriti nyiringka walkatjunkunytja ngarinyi nyanga alatji,
“Aṉangu Mayatja Godaku mulamularingkulampa tjituṟu-tjituṟurinytja wiya,
panya Godalu mulapa palunya wankaṟunkuku.”
12 Palu tjukurpa nyangatja uwankaraku Jew tjuṯaku munu Jew wiya tjuṯaku kuḻu. Panya Godanya mayatja uwankarakuṯu nyinanyi, ka aṉangu kutjupa uwankarangku palula tjapinnyangkampa paluṟu wiṟuṟa kalkuntjatjanungku munytjangku ungkula pukuḻmankupai.
13 Panya nyiringka iriti walkatjunkunytja ngarinyi nyanga alatji,
“Aṉangungku Mayatja Godala alpamilantjaku tjapinnyangkampa palunya wankaṟunkuku alatjiṯu.”
14 Palu yaaltji-yaaltjingkuya tjapilku tjana palumpa puṯu mulamularingkula? Munuya yaaltji-yaaltji mulamularingkuku tjukurpa Jesunyatjara kulintja wiyatja? Munuya yaaltji-yaaltjingku kulilku tjukurpa panya palunya kutjupa tjuṯangku tjakultjunkunytja wiyanguṟu?
15 Kaya yaaltji-yaaltjingku tjukurpa palunya wangkaku Godalu tjananya wituntja wiyanguṟu? Panya nyiringka iriti walkatjunkunytja ngarinyi nyanga alatji,
“Panya nyakulaya puḻkaṟa pukuḻaripai tjukurpa palyatjara wirkankunyangka.”
16 Palu Jew kutjupa tjarangkuya Tjukurpa Palya kuliṟa mulamularingkunytja wiyangku wantingi. Panya iriti aṉangu tjuṯangku wantinyangka Aitjayalu wangkangu Godala nyanga alatji, “Mayatja, ngananya tjana wanyu mulamularingu tjukurpa nganaṉa tjakultjunkunyangka kuliṟa?”
17 Uwa, aṉangu tjuṯa Jesuku mulamularingkuku Tjukurpa Palya palunyatjara wangkanyangka kuliṟa kutju.
18 Palu wanyuṉa nyurala tjapilku, “Mulapaya panyatja Jew tjuṯangku tjukurpa nyangatja kulintja wiya?” Wiya panya tjana kulinu alatjiṯu. Panya nyiringka iriti walkatjunkunytja ngarinyi nyanga alatji,
“Manta winkitjangkuya tjukurpa palya kulinu
panya tjakultjunangiya ngura uwankarangka.”
19 Piṟukuṉa wanyu nyurala tjapilku? Mulapaya panyatja Israelkunu tjuṯangku tjukurpa nyangatja puṯu kuliningi? Wiya, panya tjana uti alatjiṯu kulinu, panya Moselu iriti tjanala wangkangu Godalu wangkanytja nyanga alatji,
“Nyura panya kulilpai ngura kutjupitja tjuṯa-manti ngurpampa nyinanyi. Palu nyura kuwari tjananya nyakula nyaṟaringkuku panya palunya tjananyaṉa ngayulu ngurkantaṟa aḻṯiku ngayuku walytja tjuṯa nyinanytjaku. Uwa, nyura panya palunya tjananya ngurpa-palku kulini. Palu nyura kuwari tjanampa nyakula mirpaṉariku nyuranya kutju kanyintja-tjiratja.”
20 Ka ngula palu puṟunypaṯu Aitjayalu Israelkunu tjuṯangka tjukaṟurungku wangkangu nyanga alatji,
“Godalu panya aṉangu Jew wiya tjuṯa alatji wangkangu,
‘Aṉangu nyara paluṟu tjana panya ngayunya ngurintja wiya watarku nyinangi,
kaṉa ngayulu tjanala wirkanu.
Uwa nyara paluṟu tjanaya ngayunya tjapintja wiya watarku nyinangi,
kaṉa ngayulu tjanala utiringu.’ ”
21 Ka panya Israelkunu tjuṯangku ngaṉmanytju kulinu tjukurpa palunya munuya kulintjatjanungku nintingku kuliningi. Palu tjana mulamularingkuwiyangku kuliṟa wantingi. Kala tjukurpa nyangaku ninti panya Godalu ngaṉmanytju Israelkunu tjuṯangka wangkangu alatji,
“Tiṯutjaraṉa ngayuku aṉangu tjuṯaku puṯu maṟakatingi ngayulakutu pitjanytjaku.
Palu tjana rawangku tungunpungkula wantingi,
munuya ngayuku wangka tjana wangaṉarangku kulintja wiyangku wantingi.”