30
Davidalu Ama-likakunu Tjuṯa Iluntaṟa Wiyantja
1-3 Kaya Davidanya tjana tjiṉṯu kutjara anangi rawa munu tjiṉṯu maṉkuritja ngurangka ma-wirkanu tawunu panya Tjikalakala, munuya wirkaṟa nyangu tjanampa waḻi uwankara tiliṟa nyaṟuntja munuya puṯu nyangangi kuri tjuṯaku munu katja uṉṯalpa tjuṯaku kuḻu. Panya tjana Akitjala tjungu ankunyangka Ama-likakunu wati warmaḻa tjuṯa tawunu panya palula tjarpangu maḻangka munuya kungkawaṟa, minyma, tjitji tjuṯa kuḻu katingu munuya tjanampa ngura tiliṟa nyaṟuṟa wantikatingu.
4 Kaya Davidalu tjana pitjala nyakula puḻkaṟa ulangu munuya ulara ulara uḻiringkula uparingu.
5 Warmaḻa nyarantuya Davidaku kuri kutjara katingu, Aki-nuwamanya pulanya Apikailnga.
6 Munuya ulara wiyaringkula Davidaku panya tjaultji tjuṯa palumpa mirpaṉaringu katja uṉṯalpa tjuṯanguṟu, munuya ngukaṟa puntuṟa wangkangi atuṟa iluntankunytjikitjangku. Ka Davidanya kuliṟa wangkanyangka puḻkaṟa tjituṟu-tjituṟuringu. Palu paluṟu kulinu Godalu palunya unngu rapannyangka munu palumpa tjaultji tjuṯangka raparingkula wangkangu.
7-8 Munu wati tjukurtjarangka Apiyatjala wangkangu, “Puṯuṉa kulini. Wanyu mantara panya miḻmiḻpa ngalya-kati munu tjarpa, kali Godala tjapilku nganaṉala utintjaku.” Ka mulapaṯu mantara panya ngalya-katira tjarpangu, ka pula Godala tjapinu, “Waṉalkula wati nyara warmaḻa tjuṯa?”
Ka Godalu wangkangu Davidala, “Uwa, palya, waṉalaya, panya nyura tjananya waṉaṟa witilku alatjiṯu munuya nyuranku walytja panya tjuṯa maḻakungku wanka mantjilku.”
9-10 Kaya Davidanya tjana wati nampa 600 ma-pakaṉu munuya ankula karu ini Pitjurta wirkanu, palu tjara kutjupaya nyara palula pakuringkula nyinakatingu wati 200, kaya Davidanya tjana kutju karungka ma-itipirira anu wati 400 kutju.
11-12 Munuya ma-wirkaṟa uṟilta ma-pitjangi munuya wati kutju Itjipanya nguraṟa nyangu. Wati nyanga paluṟu tjiṉṯu maṉkurpa mai wiya, mina wiya nyinangi. Kaya wati palunya nyakula Davidalakutu katingu, munuya mina, mai iḻi, raitjinpa, kiṟipitji piḻṯi kuḻu ungu, ka wati panya paluṟu ngalkula paḻtjaringkula palyaringu.
13 Ka Davidalu palula tjapinu, “Ngura yaaltjinguṟun? Ngananyanku mayatja?”
Ka wati paluṟu Davidala wangkangu, “Ngayuluṉa wati Itjipanya nguraṟa, ka ngayuku mayatja wati Malakaikunu. Mungaṯuṉi paluṟu pikatjara wantikatingu tjiṉṯu maṉkurpa.
14 Panya paluṟu nganaṉa warmaḻarira anu tawunu uḻpaṟira ngaṟanytja tjuṯakutu Kiritjikunu tjuṯaku panya ngurakutu munula tjarpara pungkula uwankara tjanampa tjulyaṟa katingu. Munula piṟuku Judah-nya nguraṟa tjuṯaku mantakutu ngapartji anu munula Calebakunu tjuṯaku ngura tjuṯangka tjarpara palu puṟunypaṯu katingu. Munula palulanguṟu tawunu ini Tjikalakanya tiliṟa nyaṟuṉu.”
15 Ka Davidalu wangkangu wati panya palula, “Yaaltjingkaya wati panya warmaḻa tjuṯa kumpiṟa nyinanyi? Katiṉi palula tjanalakutu. Panya paluṟu tjanaya kuraṉu tawunu Tjikalakanya.”
Ka wati Itjipanya nguraṟangku wangkangu, “Uwa ngayulu nyuntunya katiku wati palula tjanalakutu, palu ngayunyaṉi kalkula Godala miṟangka iluntankunytja wiyakitjangku munuṉi wati nyara tjananya ungkunytja wiyangku wantima.”
Ka Davidalu mulapaṯu kalkuṉu pungkunytja wiyangku wantinytjikitjangku.
16 Ka wati paluṟu Davidanya Malakaikunu warmaḻa tjuṯaku ngurakutu katingu. Ka pula ngalya-ilaringkula nyakukatingi tjana mai puḻka para-nyinara arintaṟa ngalkunnyangka. Panya paluṟu tjana kutjupa kutjupa uwankara tjanampa nguranguṟu tjulyaṟa katinytjatjanungku pukuḻarira mai ngalkuningi munuya waina kuḻu tjikiningi. Palu paluṟu pula paṯunguṟu kumpiṟa ngaṟala nyangangi munu pula nyakula maḻaku anu ngurakutu.
17 Ka mungawinki ngalya-tjiṉṯuringkunyangka Davidanya warmaḻa tjuṯatjara anu ngura nyara palulakutu, wati panya Itjipanya nguraṟangku nintintjitjangka. Munuya wirkara Malakaikunu tjuṯa pungangi kaḻaḻa waṟa. Pungkulaya mungartjiringu munuya tjuṯa mulapa iluntanangi. Palu wati yangupala Malakaikunu tjuṯaya kamulangka nguḻu tatiṟa wirtjapakaṉu, nampa nyangatja 400.
18-19 Ka pika pungkula wiyaringkunyangka Davidanya tjana maḻangka tjarpangu Ama-likakunu tjuṯaku ngurangka, munuya nyangu wanka nyinanyangka tjanampa kuripiti munu katja uṉṯalpa tjuṯa kuḻu, munu kutjupa kutjupa uwankara Malakaikunu tjuṯangku kutitjuṟa katinytja tjanampa tawunu panya Tjika-lakalanguṟu. Munuya uwankara mantjiṟa maḻakungku katingu, kuka tjuṯa kuḻu.
20 Panya tjana tjiipi puluka tjuṯa walytjatjara tjulyaṟa katingu Malakaikunu tjuṯangku. Ka Davidaku tjaultji tjuṯangku kuka uwankara utuluṟa katingi ngurakutu wangkara, “Tjiipi puluka nyanganpa uwankara Davidakuringu.”
21 Munuya ngurakutu maḻaku ankula nguṟurpa wirkanu karu Pitjurta, panya nyara palulaya wati tjara nampa 200 paṯaṟa nyinangi pakuringkula. Munuya Davidanya tjananya pitjanyangka nyakula ngaparikatingu munuya uwankara puḻkaṟa pukuḻaringu.
22 Palu wati kutjupatjara Malakaikunu tjuṯangka pikaringkunytjatjanu kura nyinangi, munuya Davidala alatji wangkangu, “Wati nyanganpa panyaya nganaṉala tjungu pikakitja ankunytja wiyaṯu. Palu palya tjana kuri munu tjitji tjuṯa kutju mantjiṟa anama, kala nganaṉa tjiipi, puluka, ulytja, kutjupa kutjupa tjuṯa Malakaikunu tjuṯangku tjulyaṟa katinytja tjaraṟa mantjilku.”
23 Ka Davidalu tjanala wangkangu wati panya kurakura tjuṯangka, “Walytja tjuṯa! Mayatja Godalulanya nyanganpa ungu uwankara, kala manyuringkunytja wiyangku tjarala. Mayatjalu nganaṉanya wiṟungku ngalkinu kala Malakaikunu tjuṯa pungkula wiyaṉu, panya nyara tjana nganampa ngura Tjikalakanya kuraṟa pungu.
24 Ka nyura manyuringkunyangka kutjupa tjuṯa pukuḻarinytja wiya. Kulilaya! Nganaṉa anu pika pungkunytjikitja, kaya tjara kutjupangku nyinara ngura ulytja kutjupa kutjupa tjuṯa aṯunymanangi. Kala uti uwankarangkuṯu tjaraṟa mantjinma.”
25 Uwa, tjukurpa nyanga palunya Davidalu wangkangu aṉangu Israelkunu uwankarangku kulintjaku, ka kuwari nyanga ngaṟangi alatjiṯu.
26 Kaya Davidanya tjana uwankara tjunguringkula ankula ngurangka wirkanu tawunu panya Tjikalakala munu palulanguṟu kuliningi Malakaikunu tjuṯaku kuka tjuṯa ngura tjuṯakutu iyantjikitjangku tjaṟukutungku manta Judah-lakutu. Munu paluṟu palumpa maḻpa tjuṯangka wangkangu tawunuku panya mayatja kuranyitja tjuṯangka, “Nganaṉa Godaku mirpaṉtju tjuṯa pungkula waintaringu Malakaikunu tjuṯa, munula tjanampa tjiipi puluka tjuṯa katingu, kaṉa kuwari kuka palunya tjananya ma-iyaṉi nyurampa nyuranku kanyintjaku.”
27-31 Munu Davidalu wati tjuṯangka wangkangu tjiipi puluka panya tjuṯa katira aṉangu tjuṯa ungkunytjaku, tawunu nyanga palula tjanalakutu:
Pitjiltakutu
Ramatja-nikipilakutu
Tjatirtakutu
Arawalakutu
Tjipamatjalakutu
Itjimawalakutu
Rakaltakutu
Uumalakutu
Puwatjantakutu
Atjakalakutu
Ipuṟantakutu
Munu piṟuku kutjupatjara iyaṉu aṉangu nyanganku Tjiṟamilkunu tjuṯaku munu Kiinkunu tjuṯaku. Uwa, paluṟu kuka tjuṯa iyaṉu ngura panya palula tjanala para-nyinanytjatjanungku.