ACT
Muntu kan rǝsh gwa na wokoci rǝshiyi: Tǝlankur kǝno Luka ni rǝshi, kan arni wule kopi kaar kǝ Zo shirǝm kǝ Yesu kan tǝ rǝsh gwa. Luka kari ni bar mbarǝm gon mǝn sun Tiyopilus na shirǝm kǝ Yesu. Jen ba shin wule rǝsh ni tǝlankuri bar kǝ AD 63, jen ngapo wu shin rǝsh ni gip AD 70.
Argon tu gipi gwa: Luka pa'i ni shirǝm gǝs den argon tu Yesu pi den kaar kǝ tlitǝn gǝs gip mǝshi mbarǝm gwa. Tǝ pare ni tǝlankuri den mbap kǝ mir mǝn kartǝn kǝ Yesu na totǝn kǝ Yesu yami. Kan ar ba shirǝm den kandatu mir mǝn kartǝn kǝ Yesu na nami mǝn kopi ɓut gip Urushalima den bi la'itǝn kǝ argon tu Yesu wule ti bi wur gwa. Den gas Pentikos, muri kutl den kaar kǝ totǝn gǝs yamo, Ruhu kǝ Yam sur den wur kan ba laa'i wur na mani pi bari. Bar tu pǝn den gas tawo ar ni mǝn kopi Yesu pi ta womtitǝn bǝle-bǝle, argon tu nǝm gip bǝn kǝ Urushalima ar ba te Samariya na <<gip atl kundǝrǝndlip gwa.>> Sura 1.8.
Gip kǝti kǝ nǝm kǝ tǝlankuriwo, shirǝmi bǝtl ni gam den Bitǝrus nye mǝn kartǝn kǝ Yesu na den domtǝn kǝ mǝn kopi gip bǝn kǝ Urushalima. Argon tu nǝm sura kǝ 9 ar ba ri cinawo arni den ɓomi asǝm bisi myakan kǝ Bulus nye mǝn kartǝn kǝ Yesu gip atl kǝ Roma, na ɓomi asǝm gǝs kǝ sitǝn cina dǝ bom tloyi shirǝm kǝ bar gun kǝ Roma.
Argon tu arba yari gwa: Tǝlankur kǝno ar yari ni kandatu domtǝn kǝ mǝn kopi pare gwa na bar ju ar kop gipi gip nartǝn gǝsi, den ngashi gam kǝ mǝn kopi na kumi dli. Ar pa shirǝm den kandatu mbarǝm na womti den ta bi gam gǝzǝn kǝ dǝ Yesu dǝm gun gip mbatl gǝzǝni na ndǝrtǝn gip mbap kǝ Ruhu kǝ Yam gip ga domtǝn kǝ mǝn kopi na gip dǝmi kǝ kogonge mǝn kopi Yesu.
1
Totǝn kǝ Yesu yami
1 Mǝn nartǝn Tiyopilus, gip tǝlankur gǝn kǝ pari kan a rǝsho, a rǝsh ni den kup bar ju Yesu pare pi na kulci mbarǝm gwa,
2 ar ba ri den pǝt tu kan pǝn tǝka to yamka gwa. Kapǝn tǝ ndarawo, tǝ yari mir mǝn kartǝn gǝs kan tǝ zǝzari bar ju wi pi nan Ruhu kǝ Yam ba ne wur amra wu pi gwa.
3 Den kaar kǝ kumi dli na mǝshtǝn gǝso, tǝ ɗǝl kar mir mǝn kartǝn gǝs ju den tǝp na womti nan ba mom'e tǝ ra na rai gwa. Tǝ ɗǝl kar wur gip muri hauya rop kan tǝ shirǝm nan wur den dǝmi kǝ Yam gun gip mbatl kǝ mbarǝme.
4 Den pǝti gon nan tǝ ɗǝl kar wur tǝ den ci fingal nan wuro, tǝ wul wur'e, <<Ba kǝ za ni Urushalimawu da'a, ama ɓutni dǝ Bǝba la'i in na Ruhu kǝ Yam kan tǝ wule ti bi ine, muntu kǝ kum a shirǝm dene gwa.
5 Yohana pini mbarǝm batisma na male, ama gip muri njem cina ɗewo, baa pi in batisma na Ruhu kǝ Yami.>>
6 Nan wu mo gam kǝ ba lasi nǝmo, arni wu ngen momi kar ti'e, <<Babomi, kǝkǝn ni kǝ ri kǝ pali Isra'ila dǝmi na gun kǝ gam gǝsa?>>
7 Yesu wul wur'e, <<Momi pǝt na wokociwo gegin ni da'a, domici Bǝba ni gip mani pi bar gǝs ne gam gǝs momi muntu.
8 Ama ki zam mani pi bari, Ruhu kǝ Yam ni sur den kǝn wu gwa. Ki dǝm mǝn yari bar ju kǝ shin demǝn gip bǝn Urushalima, na atl kǝ mǝn Yahuda kup na Samariya, an ri gip atl kundǝrǝndlip.>>
9 Nan tǝ pa'i yari muntuwo, kan Yam ba pǝn tika to gip dun yamka den ger gǝzǝni wu den shini ar bari wu'i mani shini gǝs da'a.
10 Wu gip zhiti ndekeke to yamka nan Yesu den totǝno, arni curut mbarǝm rop jen ni jǝn dlor markǝm dawur na ghol tutul dli.
11 Wu wule, <<Mǝn Galili, unun kem kǝ dǝm den wi ger to yamkawu? Yesu tu kan pǝn tǝka kar kǝn ba te ti yamkawo, baa pal den nǝm tǝp tu kǝ shin pǝn tǝka to yamka gwa.>>
Zǝzar Matiyas den am kǝ Yahuda Iskaryoti
12 Kano mir mǝn kartǝni ba za Tlǝndǝr mǝn kin Zaitun wu pal su Urushalimaka, ɓomi asǝm bar kǝ tatli dlom kǝ mil nǝm.
13 Nan wu mbubar gip bǝn kǝ Urushalimawo, arni wu to gǝzǝn gip ɓiti kushi kǝ to yamika las tu kan wu dǝm gwa. Munju ra lasi gwani'e Bitǝrus, Yohana, Yakubu, Andǝrawus, Filibus na Toma, Bartilamawus na Matta. Yakubu nya Halfa, Simon mǝn ghuve den bǝn gǝsi, na Yahuda nya Yakubu.
14 Kup gǝzǝn ci cina na me gam na shirǝm na Yam na mbatl nǝm, na mǝtliyi, na Maryamu mǝn gǝri kǝ Yesu na mir mǝn gǝpi gǝsi.
15 Gip muri jawo, Bitǝrus tlyam dlor gip mir ɓyar mǝn kopi Yesu (womtitǝn gǝzǝn ri hauya mukka)
16 kan tǝ wule, <<Mir ɓyari, ar nǝm dǝ Tǝlankur laa'i den shirǝm tu Ruhu kǝ Yam yari terka bi dǝ gun Dauda den Yahuda, muntu kan pii tǝp munju nǝm Yesu gwa.
17 Tǝ Yahuda ma nǝm gip mi ni, kan ra na am gip mbap gǝmi kǝn gwa.>>
18 (Mbarǝm tu Yahuda wur ni las na wurpi tu tǝ zam den ɗasi tu gǝs gwa, las tu tǝ nda sur atl na dlom gam, tu gǝs ba mbutlka, kan wot gǝs kup ba ɗǝlka kari.
19 Mbarǝm kǝ Urushalima kup kum bar tu, kan wu labi lasi na bi gǝzǝn'e Akeldama, <<Las tu kan shot bǝran gwa ituwi.>>)
20 Bitǝrus ci cina tǝ wule, <<Untuni anra na rǝshi gip tǝlankur Zabura'e, <Naa dǝ bom gǝs sa koni, ba dǝ zam murgon kan ba dǝm gipi gwa da'a.> Eso, <Naa dǝ gon nǝm mbap gǝsi.>
21 <<Untuno, ar nǝm dǝ zǝzar nǝm gip mbarǝm ju nan ra nan mi kup wokoci tu mǝn den ritǝn na Babom gǝmi Yesu,
22 pare den batisma gǝs kan Yohana pi ti, an ri gas tu pǝn tǝka kar mi gwa. Nǝm gip munju zǝzariwo, ti dǝm nan mi gip yari mbarǝm kandatu mǝ shin Yesu tli gip mǝshi mbarǝm gwa.>>
23 Arni wu bi sun kǝ mbarǝm rop: Isubu mǝn sun Barsabas (kan mom ti na Yustus gwa) na Matiyas.
24 Kano wu shirǝm na Yam wu wule, <<Babomi, kini kǝ mom mbatl kǝ mbarǝm kup. Nune mi gonge ni kǝ zǝzari gip rop ju
25 kan baa pǝn las mbap kǝ mir mǝn kartǝn gi kǝn, muntu Yahuda zaka tǝ ndara las gǝs gwa.>>
26 Kan wu zǝzar ti tǝp kǝ ba la'i guri'a, arni ar nda den Matiyas. Arni wu la ti gip wur tǝ dǝm nye mǝn kartǝn nǝm na kutl cet nǝmi.