2
Are Espíritu Santo joí ngain chojni que vaguitticaon Jesús
Co are joí quiai dinhi Pentecostés, cainxin chojni que vaguitticaon Jesús tate na ngain nacoa lugar. Co rato mé coinhi na ná ruido anto soji que joixin de ngajni, inchin are tja c̈hintto soji. Jamé vaẍoin ngoixin ngaxinhi nchia tti texinhi na. Cottimeja vicon na tsje neje ẍohi, co joí naná neje ẍohi mé ngataha cada na. Co Espíritu Santo joixinhi cuerpoe cain na conixin joachaxin. Co jehe na coexinhi na nichja na ojé nguigoa inchin Espíritu Santo joinchenichja na.
Co tiempo mé nttiha vintte tsje chojni judío ngain Jerusalén que joixin de tsje nación ngoixin mundo. Co chojni mé anto vaguitticaon ley Israel co cjoi ngain Jerusalén para joinchesayexin Dios inchin ndac̈ho ley mé. Co are coinhi na ruido ngain nchia mé, anto tsje chojni mé ẍatte nttiha. Co ni inoencoa na quehe rroẍaxaon na ixin naná na coinhi na nguigoehe na tenichja entre cain chojni que vaguitticaon Jesús. Co tavinttetsjecoa chó na co vinttegoan na admirado. Co ndache chó na:
―Pero cain chojni que tenichja janhi; ¿jehe na ajeha de nttihi nonttehe Galilea na na? ¿Quehe jitonhe? Cain ján na tettinhi na tenichja na ojejé nguigoaha na cada na. Nttihi ngayá na te chojni que joixin de Partia, Media, Elam, Mesopotamia, Judea, Capadocia, Ponto, co de ngain nonttehe Asia, 10 de Frigia, Panfilia, Egipto, co cai te chojni que joixin de lugar ngain Africa que jí icha ndaha de ciudad de Cirene. Cai tsje chojni romano te nttihi. Co de cain chojni romano, canxion na goan na chojni judío, co icanxin na goanha na de razé chojni judío pero ditticaon na religioen chojni judío. 11 Cai jí chojni que joixin de Creta, co Arabia. Pero cainxin na ján na tettinxin na tti ndac̈ho jehe na ixin nichja na de ixin tsje cosa jian que Dios nchehe co nichja na cain ojejé nguigoaha na ján na.
12 Co vinttegoan admirado cain chojni mé co noeha na quehe ẍaxaon na co joanchianguihi chó na, co ndac̈ho na:
―¿Quehe rroc̈ho cain jihi?
13 Pero icanxin na cjoanoa na na co ndac̈ho na:
―Ixin diguinttecoan chojni yá, mexinxin jañá tec̈ho.
Tti nichja Pedro ngain chojni
14 Cottimeja Pedro conixin ittejngo representanté Jesús vingattjen co Pedro nichja sén co ndac̈ho:
―Chojni de nonttehe Judea co cainxin chojni que te ngain ciudad de Jerusalén, tonoha ra co ttinhi ra jian tti rrondattjo ra. 15 Xí tehe dicoanha xa inchin jaha ra ẍaxaon ra, ixin jaxon ẍa ndoyo; nandá las nueve. 16 Tti jaha ra vicon ra jaxon, jihi tti ondac̈ho profeta Joel are nichja co ndac̈ho:
17 Dios ndac̈ho: ngain tiempo are ochiaon ndatsjexin mundo,
rrorroanha Espíritu Santo ngain cainxin chojni.
Co chjan sayé joajnana para rrondache xan icha chojni de ixin janha,
co janha sinttaguicon xanxí co xannc̈hí tsje cosa ẍá are toxinxin xan.
Co cain chojni que ojonchjan tsoxinxin tsje cosa de ixin janha.
18 Rrorroanha Espíritu Santo nchanho mé ngain cain ninchehe ẍana.
Co jehe na sayé na joajnana para rrondache na icha chojni de ixin janha.
19 Co de ngajni noi tsjagoa na tsje cosa que vaguiconha chojni are saho.
Co ngataha nontte tsjagoaxin na tsje señal.
Tsjagoa na jni, ẍohi co ttjoi de joxon jihnchin.
20 Are mé nchanho isinchengasanha co ndatsonttie,
co conittjao ndarrocjan va inchin jni.
Cain yá tsonhe saho; cottimeja tsí nchanho are Jesús rrocjan tsí ngataha nontte,
co tsjago ngain cain chojni joachaxin que jehe chonda.
21 Co cainxin chojni que nichja jian de ixin Jesús, tti chonda cain joachaxin, ngain cain chojni mé jehe sanjo iná vida naroa.
22 Cai Pedro ndac̈ho:
―Ttinhi ra ẍo jaha ra chojni Israel, tti rrondac̈hjan: Janha nichja de ixin Jesús tti joixin rajna Nazaret. Dios cjoagoha ra ixin jehe coinchiehe Jesús are chjé jehe jie joachaxin para joinchehe tsje cosa jian co para joinchehe tsje milagro, co para joinchehe tsje señal inchin jaha ra onoha ra. 23 Co anto icha saho Dios ochonxin ixin jaha ra sinchehe ra nchaoha ngain Xenhe. Co ndoa, jaha ra tse ra Jesús co joinchechienhe ra ngá rá chojni jianha. Co jehe na joinchecrucificá na Jesús ixin jaha ra joinao ra. 24 Pero Dios joinchexechon Jesús. Dios vantsje jehe de ngain tti nindadiguenhe ixin Jesús c̈hoha sittohe ngayé nindadiguenhe. 25 Jañá conhe ixin Jesús joinchenichja rey David co ndac̈ho:
Janha cainxin nchanho chonxin ixin Dios jí nganji janha.
Jí ngain lado jian na para que ẍonhi cosa sincheẍaon na.
26 Mexinxin ansenna anto c̈hjoin tonohe, co neje na nichjaxin palabra jian ixin anto chahna.
Mexinxin masqui cuerpona ndasenhe, pero janha ẍonhi rroẍagoan
27 ixin soixin tsinttoeha almana ngain lugué chojni ndadenhe,
ni sanjoha joachaxin para rroxantte cuerpona janha tti nttaha ẍá soixin ixin soixin anto rinao na.
28 Cjoagohna na nttiha que danjo iná vida naroa.
Co anto rrochahna are janha sicon soixin.
29 Co Pedro joinchehe sigue nichjé chojni co ndac̈ho:
―Janha ndattjo ra ndoa ixin David ndogoelitoa na ndavenhe co ẍavá. Co lugar tti jehe ẍavá, mé ẍa jí jai. 30 Pero David cjoi ná profeté Dios co nichja lo que Dios cjoagoe, co venohe ixin Dios ndac̈ho ngain jehe ixin ná de xannttí ẍanc̈hjen rrojiguehe xan rey inchin David co jehe rey mé Cristo. 31 Mexinxin osé tiempo vatto David chonxin quehe siconhe ngain Cristo. Co jehe nichja ixin queẍén rroxechon Cristo. Co ndac̈ho ixin almé rroguittoeha nttiha tti dittohe cain nindadiguenhe ni cuerpoe rroxantteha. 32 Co ján Dios joinchexechon jehe Jesús, co cain janha na vicon na que Jesús ndoa xechon. 33 Co jehe sacoajín para ngajni co jí ngain lado jian de Dios. Co jehe Ndo chjé Ndo Jesús joachaxin para rroanha Espíritu Santo inchin jehe Ndo ndac̈ho Ndo. Co Jesús rroanha Espíritu Santo nttihi, co Espíritu Santo mé tti nchehe cosa jihi que jaha ra dicon ra co ttinhi ra. 34 Ixin jeha David tti sacjoi para ngajni. Ixin David ndac̈ho:
Tti Ttetonha ndac̈ho ngain tti Ttetonna:
“Darihi ngaca lado jian na,
35 hasta que janha sinttagacha jaha de ngain cainxin tti ningaconha.”
36 ’Mexinxin cainxin chojni ngain nación Israel chonda que tsonohe na seguro ixin Jesús, tti jaha ra coenganito ra cruz, Dios ndac̈ho ixin jehe Jesús chonda cain joachaxin para ixin ján na, co jehe mé Cristo.
37 Co are jehe na coinhi na cain tti ndac̈ho Pedro, anto coá na joachjaon co joanchianguihi na Pedro co icha representanté Jesús co ndac̈ho na:
―¿Quehe nchao sinttaha na?
38 Cottimeja Pedro ndac̈ho ngain na:
―Ttentoxinhi ra vidá ra ngattoxon con Dios, co diguitte ra cada ra de ngain nombré Jesucristo para que sitjañaha ra cain tti jianha que joinchehe ra. Co jamé Dios rrorroanha Espíritu Santo nganji ra, 39 ixin Espíritu Santo jí para ixin jaha ra, co para ixin xanha ra, co cai para cainxin chojni que te cjin, rroc̈ho para cain chojni que sinao sayé Dios.
40 Conixin palabra jihi, co icanxin icha palabra, Pedro nichjexin na, co ndac̈ho ngain na:
―Ncheha ra inchin tenchehe cain chojni jianha que sinchetján almé na, co nchehe ra cosa jian para que rrochonda ra iná vida naroaxin.
41 Co cain chojni que vitticaon tti ndac̈ho Pedro, jehe na joiguitte na. Co nchanho mé inchin ní mil chojni coexinhi vitticaon Jesús co joiguitte na. 42 Co cain chojni mé vaguitticaon na jian co vanchehe na inchin vacjago nirepresentanté Jesús. Co vaguitticaon chó ná, co vanchecoanxinhi na Dios co vaẍatte na cain na para vajine na tti niottja que dinhi Santa Cena.
Vidé chojni que vitticaon Cristo tiempo mé
43 Conixin joachaxin que Dios chonda, nirepresentanté Jesús joinchehe na tsje milagro co tsje señal, co cainxin chojni goan na admirado. 44 Co cainxin chojni que vaguitticaon Jesús anto vagoan na unido co vacjenguijna chó na c̈hjoin. 45 Co coexinhi joinchecji na cosé na co vaconchjea na tomi ngain nivagondehe. 46 Nchanho co nchanho vaẍatte na ngain nihngo icha importante. Co ngain nchiandoha na vanecaho chó na. Co cain na anto vaché na co ni ná na conoeha na orgulloso. 47 Jehe na vanchecoanxinhi na Dios. Co cainxin icha chojni ngain rajna vechonda respeto ngain cain na. Co cada nchanho Jesús, tti chonda cain joachaxin, vancheguitticaon icha co icha chojni.