6
Are chojni coeto na ngain xijuez que vaguitticaonha Jesucristo
1 Are c̈honja ra rrochonda ra ná cosa que tsjangui ra de ixin iná chojni que ditticaon Jesucristo, nchaoha jí si jaha ra sicjangui ra ngain xijuez que ditticaonha Jesucristo en lugar de rroguicjangui ra ngain ẍajeho chojni que ditticaon Jesucristo para que jehe chojni mé rrondac̈ho quexehe ra ẍo chonda ra razón.
2 ¿Apoco noaha ra que ngain tiempo que tsí chojni que ditticaon Jesús sinchejuzguehe na chojni que ditticaonha Jesucristo? Mexinxin jai, ¿quedonda jeha jaho ra nchechjian ra cain asunto icha tanguiha que jaha ra chonda ra?
3 ¿Apoco noaha ra que ján na nchao sonttojuzguehe na hasta ángel? ¡Co mé chojni que ditticaon Jesucristo ngain tiempo jihi c̈hoha xijonttonhe na ná jie!
4 Co are jaha ra chonda ra problema de ngain tiempo jihi, ¿quedonda dicjangui ra ngain xijuez que ditticaonha Jesucristo?
5 Janha ndac̈hjan yá para que rrochonda ra joasoaxin. ¿Apoco coha ngayaha ra ni ná chojni que nohe jian para que jehe chojni mé tti rrojinttajuzgaha ra cain jaha ra ẍo ditticaon ra Jesucristo?
6 ¿Apoco jiquininxin que ná chojni que ditticaon Cristo sic̈ho jie de ixin iná chojní Jesucristo ngain xijuez que ditticaonha Jesucristo?
7 Mexinxin atto nchaoha jí tteto ra jaho ra. Icha jian si ttixinha ra are nicompañeroa ra feo sinchehe na nganji ra. Co icha jian si jaha ra toñaoha ra are tsaha ra na cosá ra.
8 Pero jaha ra en lugar de rrojinchehe ra jamé, jaha ra nchehe ra feo cai inchin jehe na, co cai hasta ttehe ra cosé ẍajeho chojni que ditticaon Jesús.
9-10 ¿Apoco noaha jaha ra que tti chojni que ncheha jian seha ngain parte tti ttetonha Dios? Dittoaxinha ra sinttayaha ra na ixin ngain parte tti ttetonha Dios c̈hoha sintte tti chojni que puro ncheẍoxinhi tsontaonxin nc̈hí co doanha nc̈ha nc̈hic̈hihi, ni chojni que nchesayehe ídolo, ni chojni que ncheẍoxinhi dinttejoacaho icha nc̈hí que jeha nc̈hic̈hihi, ni xí que chonda ẍajeho iná xí inchin rrocji nc̈hic̈hihi, ni tti chehe que tté cosé iná chojni, ni chojni que anto rinao rrochonda icha co icha cosa de ngataha nontte, ni chojni que puro coan, ni chojni que nichja cosa ndoaha ngain iná chojni, ni tti chojni que nichja ná cosa seguro co jehe ncheha. Tonoha ra jian que cainxin chojni yá c̈hoha sintte ngain parte tti ttetonha Dios.
11 Canxion jaha ra jañá vanchehe ra cai, pero Jesucristo, tti chonda cainxin joachaxin, co Espíritu Santo que Dios rroanha ojointtaroa ra de cain cosa jianha que joinchehe ra, co jointtajoxon ra chojni jian, co mexinxin Dios vayé jaha ra co ndac̈ho que jaha ra joxon chojni jian que ẍonhi jianha chonda ra.
Tti jiquininxinha sinchehe ni ngain cuerpoe ni
12 Jehe ni ndac̈ho ni que nchao sinchehe ni cain tti sinao ni. Co ján ndoa, pero jeha cainxin mé jian para ixin jehe ni. Si ná ni sinchehe ni lo que sinao ni, pero sicao ni cuidado que ni ná cosa mé tsetoanha ngain cuerpoe ni.
13 Ján, ndoa que cain tti jine ni sattji para ngain tsejnoe ni co tsejnoe ni para tti jine ni, pero cayoi cosa mé ndatsjexin are ndasenhe ni. Pero jeha ndoa que cuerpoe ni para ngain iná nc̈hí que jeha nc̈hic̈hihi ni; cuerpoe ni jeho para ixin Jesucristo, tti chonda cain joachaxin, co Jesucristo jí para ixin cuerpoe ni.
14 Co jañá inchin Dios joinchexechon Jesucristo, jamé sinttaxechon na ján na cai conixin joachaxín jehe.
15 ¿Apoco ttinxinha jaha ra que cada cuerpo que jaha ra chonda ra, mé ná parte de cuerpoe Jesucristo? ¿Apoco nchao tsá na ná de tti parte de jehe cuerpoe Jesucristo para sanjo na ngain cuerpoe ná nc̈hí que dachaxin tomi cuerpoe? ¡c̈hoha sonttoho na jamé!
16 ¿Apoco noaha jaha ra que are ná xí dejoacaho xa ná nc̈hí que dachaxin cuerpoe tomi, cayoi na tonchjian na inchin nacoa cuerpo? Ngain tti jitaxin Palabré Dios ndac̈ho: “Cayoixin chojni sintte na inchin nacoa chojni.”
17 Pero are ná chojni ditticaon ngain Jesucristo, chojni mé co Jesucristo dintte na inchin nacoa chojni ixin chonda jehe na ẍajeho Espíritu Santo.
18 Mexinxin janha rrindattjo ra que dinttec̈hincoha ra nc̈hí que jeha nc̈hic̈hiha ra. ẍonhi iná cosa icha jianha para ixin cuerpoe ni, jeho cosa mé ixin are ná chojni nchehe cosa jianha yá, jeho nchehe jianha ngain cuerpoe.
19 Jaha ra noha ra que cuerpoa ra mé ningoe tti Espíritu Santo que Dios chjá ra, co Espíritu Santo jí ngaxinhi cuerpoa ra. Jeha jaha ra tti ttetonha ra ngain cuerpoa ra,
20 ixin Dios anto rentte cjoenga hna para ixin cuerpoa ra. Mexinxin chonda ra que nchesayehe ra Dios de ngain cuerpoa ra co de ngain espiritua ra ixin cayoi cosa mé cosé Dios.