8
Jesús jehe tti abogado de ngain tti trato naroaxin
1 Tti cosa icha importante que janha na tendac̈hjan na, mé janhi: tti dána que icha importante para ixin ján na, jehe joxon jian, co sajoiguehe ngain lado jian de tti retaha Dios nttiha ngajni.
2 Co nttiha ngajni jehe jinchehe ẍa de dána ngain tti mero ningoe Dios nttiha; co Dios, tti chonda cain joachaxin, mé tti joinchechjian nihngo mé, co jeha chojni tti joinchechjian.
3 Co cain icha dána que icha importante vinchiehe na para que jehe dána mé saquehe cosa co nttaohe coxigo ngain altar para ixin Dios. Co mexinxin rrogonda que Jesucristo cai vanjo cosa para ixin Dios.
4 Si jehe Jesucristo ẍa rroguehe nttihi ngataha nontte, jehe ni rrogueha de dána ixin jai ẍa te dána que daquehe cosa para ixin Dios inchin ttetonha ley que vayé Moisés.
5 Pero tti nchehe cain dána nttihi ngataha nontte, jeho inchin ná copia o inchin sanho de cain cosa que jí ngajni. Ján na noa na que ixin mé jeho inchin ná copia de lo que tti jí ngajni ixin icha saho que Moisés joinchechjian ningoe Dios, jehe Dios ndac̈ho ngain Moisés: “Ttjiho cuidado co nchechjian nihngo ngataha nontte ẍajeho inchin janha cjoagoha are ngagaha jna.”
6 Pero Jesucristo, tti dána icha importante para ixin ján na, co jehe mé chonda icha jian ẍa de dána que cain dána nttihi ngataha nontte ixin Jesucristo jehe tti abogado de ngain ná trato icha jian que trato saho. Co promesé Dios para nganji na ngain trato naroaxin jihi, mé anto icha jian promesa que promesa vehe ngain trato saho.
7 Ixin si tti saho trato nchao rrojinchejian chojni ngattoxon con Dios, irrogondaha rroconchjian tti trato yoxin.
8 Pero Dios vicon que chojní jehe vintteha na jian, mexinxin Dios ndac̈ho janhi de ixin jehe na ngain tti jitaxin Palabré:
Dios ndac̈ho: Tsí nchanho
que janha sinttachjian iná trato naroaxin ngain chojni de Israel, co ngain chojni de Judá.
9 Ijeha inchin trato que janha jointtachjian ngain nigoelitoe na ẍanc̈hjen,
are janha tsá rá na para joantsjexin na de ngain nonttehe Egipto,
pero jehe na joincheha na inchin ndac̈ho trato mé,
co mexinxin janha ijointtaha na caso, jañá c̈ho Dios.
10 Tti trato que janha sinttachjian ngain chojni Israel ngain nchanho que tsí, janhi rroc̈ho trato mé, c̈ho Dios:
Janha tsín tti janha ttetonha ngain joarrixaoen na, co tti janha ttetonha ndasittohe ngain ansén na.
Cottimeja janha sarihi Dios de jehe na,
co jehe na sintte na chojnina janha.
11 Co irrochondaha que iná chojni sinchecoenhe iná chojni;
irrochondaha que ná chojni sinchecoenhe compañeroe, o ni xanchó para que rrochonxin na de ixin janha, tti Dios de jehe na,
ixin cainxin na rrochonxin na de ixin janha,
desde xannchinnchinchjan hasta ni icha ojonchjan.
12 Co janha sinttatjañá na cain tti jianha que nchehe na,
co iẍonhi tiempo janha rroẍaxanho de cain cosa jianha que jehe na joinchehe na.
13 Are Dios nichja de ixin iná trato naroaxin, rroc̈ho ixin jehe ondac̈ho que tti saho trato ondaconttaxí. Co cosa que ondaconttaxí iseha donda, co otoin ndasitján.