9
Jesús joinchexingamehe ná xí que c̈hoha vaguicon
Are jidatto Jesús ngain ná lugar, jehe vicon ná xí que desde are diconcjihi xa c̈hoha vaguicon xa. Co cain chojni que vacao Jesús joanchiangui na ngain jehe co ndac̈ho na:
―Maestro, ¿quedonda diconcjihi xí yá jañá ixin c̈hoha dicon xa? ¿Puede de ixin tti jianha que joinchehe ndodé xa o janné xa, o ni de ixin tti jianha que jehe xa joinchehe xa?
Jesús ndac̈ho:
―Jeha de ixin tti jianha que jehe xí yá joinchehe xa ni jeha de ixin tti jianha que joinchehe nindoha xa. Jañá jí xí yá para que de ngain xa rroẍago tti nchao nchehe Dios. Jai que nchanho janha chonda que sinttaha ẍé tti rroanha na nttihi ixin otsí ttie que ni ná chojni c̈hoha sinchehe ẍa. Jai que janha ẍa rrihi nttihi ngataha nontte jihi, janha inchin tti joadingasán de ngoixin ngataha nontte jihi.
Are joexin ndac̈ho Jesús cain jihi, jehe cointtji nttatté ngataha nontte co joinchechjian nchion nchetjaho conixin nttatté, co coinga nche nganito con tti xí que vaguiconha. Cottimeja ndac̈ho Jesús ngain tti xí mé:
―Janché, ttji dicontti jinda ngain estanque de Siloé.
Co Siloé rroc̈ho Tti Joí.
Tti vaguiconha mé cjoi co joicontti jinda, co are jehe cjan, onchao vicon. Cottimeja cain nivecinoe, co cain tti nivicon are saho ixin jehe vaguiconha, vinttendac̈ho na:
―¿Ajeha xí jihi xí que vaganchiagaha?
Canxion na ndac̈ho na:
―Ján, jehe xa.
Icanxin na ndac̈ho na:
―Nahi, jeha xa, pero inchin jitsjehe xí mé jitsjehe xí jihi.
Pero jehe xí que vaguiconha mé ndac̈ho xa:
―Ján, janha.
10 Cottimeja vintteganchianguihi na xí mé co vinttendac̈ho na:
―¿Queẍén conhe ixin jaha onchao dicon?
11 Jehe xa ndac̈ho xa:
―Tti xí jiha que dinhi Jesús joinchechjian xa nchetjaho, co coinga xa nche nganito con co ndachjenji na xa: “Janché, ttji ngain estanque de Siloé co tontti jinda.” Mexinxin janha cjoi, co are contti jinda, janha onchao vicon.
12 Cottimeja jehe na joanchiangui na co ndac̈ho na:
―¿Quettinó jí xí mé?
Co jehe tti vaguiconha ndac̈ho:
―Janha nonaha.
Xifariseo joanchianguihi tti xí que vaguiconha
13 Cottimeja joicao na jehe tti vaguiconha mé ngain xifariseo. 14 Co tti nchanho que Jesús joinchechjian nchetjaho co joinchexingamehe con jehe tti xí que vaguiconha, nchanho mé nchanho para nchejogaha ni. 15 Mexinxin chojni fariseo cai joanchianguihi na jehe tti xí que vaguiconha ixin queẍén jehe onchao dicon. Co jehe ndac̈ho:
―Xí mé coinga xa nchetjaho nganito con, co contti jinda; co jai onchao dicon.
16 Cottimeja canxion xifariseo vinttendac̈ho xa:
―Tti xí que joinchehe jihi jeha chojní Dios ixin chondaha xa respeto ngain nchanho que nchejogaha ni.
Pero icanxin xa vinttendac̈ho xa:
―¿Queẍén ná xí que nchehe jianha nchao sinchehe xa ná milagro?
Co mexinxin jehe xa ndachjea xa yó grupo. 17 Co cjan xa iná joanchianguihi xa jehe tti vaguiconha mé, co ndac̈ho xa:
―¿Co jaha quehe ndac̈ho de ixin tti xí que chjá con?
Co jehe ndac̈ho:
―Janha ndac̈hjan que xí mé ná profeté Dios.
18 Pero chojni judío que vinttechonda joachaxin joinaoha na rroguitticaon na que ixin xí mé vaguiconha xa co are mé onchao vaguicon xa hasta que vayeja na ndodé xa co janné xa, 19 co joanchianguihi na na co ndac̈ho na:
―¿Ajihi tti xitsiha ra, que jaha ra ndac̈ho ra que de concjiho xa vaguiconha xa? ¿Queẍén jai onchao dicon xa?
20 Ndodé co janné xí mé ndac̈ho na:
―Nona na que jihi xitsihna na co vaguiconha xa de concjiho xa, 21 pero nonaha na queẍén jai jehe xa onchao dicon xa, ni nonaha na quensen joinchexingamehe jmacon xa. Danchianguihi ra xa, ochonda xa tsje nano, co jehe xa nchao rrochjá ra xa razón.
22 Nindoha jehe tti vaguiconha ndac̈ho na jihi ixin ẍaon na ixin chojni judío que vinttechonda joachaxin ocjoao chó na ixin quexeho chojni que rrondac̈ho ixin Jesús jehe mé tti Cristo que Dios rroanha, chojni que rrondac̈ho jihi senguixin na de ngaxinhi ningoe na. 23 Mexinxin nindoha jehe tti vaguiconha ndac̈ho na: “Danchianguihi ra xa, otsje nano chonda xa.”
24 Cottimeja cain chojni judío cjan na vayé na jehe tti xí que vaguiconha, co ndac̈ho na ngain:
―Ndachjenji ni ra tti ndoa ngattoxon con Dios queẍén conha ixin janha na nona na que xí yá nchehe xa jianha.
25 Cottimeja jehe tti xí que vaguiconha ndac̈ho ngain na:
―Janha nonaha si jianha xa ani nahi. Janha jeho nona que janha vaguiconha co jai odicon.
26 Co jehe na cjan na joanchianguihi na iná co ndac̈ho na:
―¿Quehe joinchehe xa nganji? ¿Queẍén joinchehe xa para joinchechjian xa jmacon?
27 Jehe tti vaguiconha ndac̈ho:
―Ondattjo ra, co ncheha ni ra caso, mexinxin ¿quedonda rinao ra que janha rrocjan na rrondattjo ra iná? ¿Asoixin ra cai rinao ra sitticaon ra xí mé?
28 Cottimeja jehe na nichja na feo ngain jehe tti vaguiconha mé, co ndac̈ho na ngain:
―Jaha ditticaon xí mé, pero janha na ditticanho na Moisés. 29 Janha na nona na que Dios nichja ngain Moisés; pero xí yá ni nonaha na ttinó joixin xa.
30 Tti xí que vaguiconha ndac̈ho ngain na:
―Janha ttianxinha queẍén ẍaxaon ra de ixin xí yá. Soixin ra noaha ra quettinó joixin xa, pero janha nona que ngain Dios joixin xa ixin joinchechjian xa jmacon na. 31 Ján na noa na jian que Dios ttinha tti ndac̈ho chojni que nchehe jianha, jeho ttinhi ngain chojni que nchesayehe jehe co nchehe na tti rinao jehe. 32 ẍonhi tiempo coinhi ni que ná chojni joinchechjian jmacon ná chojni que desde concjiho diconha. 33 Si xí jihi jeha ngain Dios rroquixin xa, jehe xa c̈hoha rrojinchehe xa jihi.
34 Cottimeja chojni judío ndac̈ho na:
―Jaha anto jianha desde concjiha ¿co jai arinao sinchecoanna ni ra de ixin Dios?
Co venguixin na de ngaxinhi nihngo.
Tti chojni que ditticaonha Cristo te na inchin tti chojni que diconha
35 Jesús conohe ixin vengui na jehe tti vaguiconha mé, co are vetan Jesús, Jesús ndac̈ho ngain:
―¿Aditticaon jaha ngain Xenhe Dios?
36 Co jehe tti vaguiconha mé ndac̈ho:
―Ndachjenji na soixin, quensen mé, para que janha sitticanho ngain.
37 Jesús ndac̈ho:
―Jaha ovicon; mé janha tti jaha rritjao jaxon.
38 Cottimeja jehe tti vaguiconha mé vettoxin nttajochjihi ngain Jesús, co ndac̈ho:
―Ján, ditticanho, soixin.
39 Cottimeja ndac̈ho Jesús:
―Janha joihi ngataha nontte jihi para que janha sinttajuzgá chojni para que tti chojni que te inchin tti diconha, rroc̈ho ixin jehe na chonxinha na de ixin Dios, para que jai chojni mé nchao sintte na inchin tti dicon ixin sitticaon na nganji na janha. Co para que tti chojni que te inchin tti dicon, rroc̈ho ixin jehe na ndac̈ho na que anto chonxin na de ixin Dios, chojni mé sintte na inchin tti diconha ixin sitticaonha na nganji na janha.
40 Cottimeja canxion xifariseo que te ngain Jesús nttiha vinttequinhi xa jihi, co vintteganchianguihi xa Jesús co ndac̈ho xa:
―¿Apoco janha na cai diconha na?
41 Jesús ndac̈ho ngain xa:
―Si jaha ra rroguintte ra inchin tti diconha, ẍonhi rroguintteca ra de ixin tti jianha que nchehe ra. Pero ixin jaha ra ndac̈ho ra que dicon ra, mexinxin tecaxin ra tti jianha que nchehe ra.