20
Tti mil nano
1 Después janha vicon ná ángel que jixincanjinxin de ngajni conixin llavé tti tsaga anto nihnga co jiyá ná cadena anto jie.
2 Jehe ángel jihi tse jehe tti conché mé, tti conché que ovehe desde sé co jehe mé tti inchínji co dinhi Satanás. Co ángel coiaxin va conixin cadena mé para mil nano.
3 Co joancá va ngain tti tsaga anto nihnga, co nttiha coiaxinhi va. Co cointtohe ná sello ngain puerté tsaga mé para que isincheyeha va chojni de cainxin nación hasta que sattoja mil nano. Co después de tti mil nano mé, chonda que rroxindanguehe va nchion tiempo.
4 Cottimeja vicon tti tsje nttaxintaon importante, co nttiha tatetaha chojni que vayé joachaxin para sinchejuzgá. Cai janha vicon almé cain tti chojni que c̈hinji já ixin ndache na chojni tti joajné Dios que cjoago Jesús. Cain chojni mé joinchecoanxinha na tti coxigo jianha ni retratoe va ni vittoexinha na coá na marqué va nganito nttattjen na o nganito rá na. Janha vicon xechon cain chojni jihi co jehe na conixin Jesucristo coetonha na para mil nano.
5 Chojni mé tti saho chojni que rroxechon. Pero tti ni icha que vintteguenhe ixechonha na hasta después de tti mil nano mé.
6 ¡Anto c̈hjoin co jian tequininxin para ngain Dios cain tti chojni que rroxechon ngain jehe tti saho tiempo que rroxechon chojni! Tti yoxin nttiha que ndadenhe ni ichondaha ni ná joachaxin ngain na, sino que jehe na sintte na dána para ngain Dios co ngain Jesucristo, co jehe na conixin Jesucristo tsetonha na para mil nano.
7 Co are satto jehe tti mil nano mé, Satanás rroxindanguehe co sac̈hjexin de ngain tti siaxinhi,
8 co sac̈hje para sincheyehe Gog co Magog, rroc̈ho sincheyehe chojni de cainxin nación de ngoixin mundo, co satse cain xisoldadoe de ngain chojni que jehe sincheyehe para ngain guerra, co cain xisoldado jihi anto tsje xa inchin nchise ngain ndachaon.
9 Co coani xa hasta tti jicaxin nontte, co vixindanji xa tti sín chojní Dios co tti ciudad que Dios anto rinao. Pero Dios rroanha ẍohi de ngajni, que cjoaga cainxin xa.
10 Co Dios rroanha inchínji, tti joincheyehe cain xisoldado mé, para ngatte ndachaoen ẍohi que jichexin azufre, tti orroanha coxigo jianha conixin tti jeha ndoa ixin vayé joajné Dios. Nttiha rroche na de nchanho co ttie para cainxin tiempo.
Tti chojni que goenhe juzgado ngain tti nttaxintaon roa
11 Cottimeja janha vicon ná nttaxintaon anto jie co roa, co cai vicon tti jitaha nttiha. Ngattoxon con mé, ndavitján nontte co ngajni, co iẍonhi lugar vehe para rroguehe cayoi cosa jihi.
12 Co janha vicon cain chojni que ndavenhe, tti yeye co tti nchinnchin, tatengattjen na ngattoxon con Dios. Co xiré cainxin libro, conixin iná libro cai, que mé tti libro que jitaxin nombré cain tti chojni que chonda iná vida naroaxin. Cain chojni que ndadiguenhe, mé goenhe na juzgado inchin jehe na joinchehe na are vinttechon na, inchin tetaxin ngain cain libro mé.
13 Ndachaon joanjo nda cain chojni que ndavenxin ngain nda co tti ndadenhe ni, co tti lugar que ttji cain chojni que ndadenhe, cayoi mé joanjo cain chojni que ndavenhe co te nttiha. Co cain chojni mé goenhe na juzgado; cada na inchin jehe na joinchehe na are vinttechon na.
14 Cottimeja tti ndadenhe ni, co tti lugar que ttji cain chojni que ndadenhe, cayoi mé savinttjiatte ndachaoen ẍohi. Jehe ẍohi jihi rroc̈ho tti yoxin tiempo que ndadenhe ni,
15 co nttiha vinttjiatte cain tti chojni que tetaxinha nombré ngain tti libro que tetaxin nombré cain tti chojni que chonda iná vida naroaxin.