3
Pegsunud dut Keseraan i Moises etawa Pegandel ki Jesus
1 Uy, kemyung mengeꞌ tawʼt Galasia, merupang kew landuꞌ! Sinu nekepugay dimyu? Manu takuꞌ megkingeg kew dut Keseraan na sinurat i Moises? Kaya be metlang ketulduan ku dimyu na si Jesus Kristo sinimayaꞌ dut krus supaya keselaan myu mepuwas?
2 Isugiraꞌ myu daken. Enukwan myu tinerima itueng Nakem et Empuꞌ? Tinerima myu takuꞌ Empung Nakem sabab eset pegsunud myu et Keseraan na sinurat i Moises? Diki lang! Segwaꞌ Empuꞌ lang kegbey et Kenyeng Nakem dimyu sabab nekingeg bekeꞌ pegandel myu eset Menungang Abar pasal ki Jesus Kristo.
3 Merupang kew landuꞌ! Tinegnaan myu mengandel ki Kristo pebiyaʼt Empung Nakem, atin ne penabang eset dimyu. Temed tiban masi nega tantu pegandel myu eset Keseraan i Moises supaya lang iantang na metignaꞌ kew dut Empuꞌ.
4 Kaya ne be kegunaan eset dimyu itueng mengeꞌ nelebayan myu sabab eset pegandel ki Jesus? Tantu lang maya kegunaan.
5 Na Empuꞌ, Ya nenggey dimyu et Kenyeng Nakem, bekeꞌ megpemuwat et mengeꞌ keliluꞌliluꞌ dut dimyu. Na atin sabab lein lang eset pegkingeg bekeꞌ pegandel et Keseraan i Moises, temed eset pegkingeg bekeꞌ pegandel eset Menungang Abar pasal ki Kristo.
6 Rendemaꞌ myu baꞌ enu neinabu ki Abraham tagnaꞌ tiꞌ. Samat nesurat dut Kesuratan, kwan, “Nengandel si Abraham eset Empuꞌ, angkansa ya in inantang na metignaꞌ dut Empuꞌ sabab et pengandel ye”.
7 Angkansa metlang na itueng pemengandel et Empuꞌ, na antangan dye in tantung inupuꞌ i Abraham.
8 Sene tiꞌ ipinesurat et Empuꞌ dut Kesuratan na misan ne lein lang tawʼt Judio meugaran et salaꞌ dut Empuꞌ pebiyaꞌ dut pegandel eset Kenye. Indyari tagnaꞌ nega tiꞌ nepebunayag ne ki Abraham itueng Menungang Abar, kwan atin, “Pebiyaꞌ eset dimu peruntungan et Empuꞌ itueng ginsan neng bangsa”.
9 Nengandel si Abraham eset netangeꞌ et Empuꞌ, indyari sabab eset atin ya binggeyan et peruntung et Empuꞌ. Kwantin gasi ginsan na mengandel et Empuꞌ, dye in gasi begeyan et peruntung.
10 Na tiban ginsan neng pemengarap pebiyaꞌ et pegsunud eset Keseraan suknaen et Empuꞌ. Sabab nesurat eset Kesuratan, kwan, “Suknaen sebarang kaya lang meglahyun pegsunud et ginsang mengeꞌ indeginis na nesurat eset Buuk et Keseraan.”
11 Na tiban metlang ne baꞌ kwantin, na kaya ne ipetignaꞌ eset pemiriꞌ et Empuꞌ pebiyaꞌ eset pegsunud et Keseraan, sabab nesurat eset Kesuratan, kwan, “Sebarang metitignaꞌ dut Empuꞌ pebiyaꞌ eset pegandel na atin megbiyag kaya seskeran.”
12 Segwaꞌ pegsunud et Keseraan diki lang saliꞌ pengandel dut Empuꞌ. Sabab pegsugiren dut Kesuratan, kwan, “Itueng megtuman ginsan neng pegengaten eset Keseraan megbiyag kaya seskeran.”
Kaya ne Taaw Mekesunud Ginsaʼt Pegengaten et Keseraan
13 Segwaꞌ kaya ne taaw mekesunud ginsaʼt pegengaten et Keseraan, angkansa subaliꞌ dusaen kityu. Temed nelkat tyu i Jesus Kristo eset kedusaan et Keseraan ganang Ya netiksaꞌ dut krus sabab kityu na samat sembatung sinuknaan et Empuꞌ. Sabab nesurat dut Kesuratan, kwan et Empuꞌ, “Suknaen et Empuꞌ sebarang neransang eset usuk et kayu.”
14 Indyari lelkat tyu i Jesus Kristo supaya itueng peruntung na tinangeꞌ et Empuꞌ ki Abraham meterima et mengeꞌ lein lang tawʼt Judio pebiyaꞌ ki Jesus Kristo, bekeꞌ pebiyaꞌ eset pegandel tyu Kenye, meseʼt kityu itueng Empung Nakem neng tinangeꞌ et Empuꞌ.
Ating Keseraan Diki Mepindaꞌ mengeꞌ Tangeꞌ et Empuꞌ
15 Mengeꞌ mengengandel, atue maya sembatung supama et taaw. Na baꞌ maya duwang taaw memuwat et mepangger neng kesulutan, itue diki ne meugaraʼt kepulusan et misan sinu. Diki ne itue mekedyari mekurangan etawa medugangan.
16 Segwaꞌ timinangeꞌ Empuꞌ ki Abraham “bekeꞌ eset kenyeng tungtung-inupuꞌ”. Kaya nesugid dut Kesuratan, “bekeꞌ eset kenyeng mengeꞌ tungtung-inupuꞌ”. Na lein lang gaay bersen mekansang, imbes “bekeꞌ eset dimung tungtung-inupuꞌ”, na gaay bersen sembebatu lang retian, itue si Jesus Kristo.
17 Na itue gaay ku bersen, pinesebenaran et Empuꞌ na itueng tinangeꞌ ki Abraham bekeꞌ kesulutan tumanen ye. Itueng kesulutan diki meugaraʼt tugu et Keseraan binggey et Empuꞌ ki Moises na dumateng peglabay et 430 teun, angkansa ating kepulusan et itueng tinangeꞌ et Empuꞌ tagnaꞌ tiꞌ diki ne itue neugaran.
18 Na baꞌ itueng pusakaꞌ tinugut sabab eset keendelen et Keseraan, lein lang itue sabab eset tinangeꞌ Ye. Temed tinugut itue et Empuꞌ ki Abraham bilang pegasip eset Kenyeng tinangeꞌ.
Kepurisnan et Keseraan Binggey ki Moises
19 Indyari manu takuꞌ binggey et Empuꞌ ki Moises ating Keseraan? Itue dinugang lang dut Lelaging Pinegsulutan supaya mepebiriꞌ baꞌ enu itueng pegsungsang et mengeꞌ taaw. Dumaran itue seked dumateng itueng tungtung-inupuꞌ i Abraham na tinengean, ating na si Jesus neng Mesias. Ibinigey itueng Keseraan pebiyaꞌ eset mengeꞌ dereakanʼt Empuꞌ dut ki Moises, sembatung megeelet et Empuꞌ bekeꞌ mengeꞌ taaw.
20 Temed lang subaliꞌ kaya ne megeelet baꞌ sembebatu ga, bekeꞌ sembebatu ga, si Empuꞌ ganang tinangeꞌ ye ki Abraham.
21 Indyari gaay bersen be takuꞌ et itue, sagkaꞌ eset tangeꞌ et Empuꞌ itueng Keseraan? Diki, diki mekedyari! Kwantin key gaay bersen, baꞌ mekegbey et bagung biyag dut taaw neng keendelen itueng Keseraan, subaliꞌ mengeꞌ taaw pegasip dut Keseraan apang megmendyaring metignaꞌ eset pemiriꞌ et Empuꞌ.
22 Temed diki dye mekedyari, sabab pegsugiren eset Kesuratan na ginsaʼt taaw uripen et kebesagan et keselaan. Indyari pebiyaꞌ eset pengandel lang ki Jesus Kristo, itueng mengeꞌ mengengandel keterimaꞌ et mengeꞌ tinangeꞌ et Empuꞌ.
23 Segwaꞌ mura dumateng itueng timpu et ating pengandel, kityu uripen negaʼt Keseraan seked mebunayag itueng pengandel.
24 Angkansa itueng Keseraan negmendyaring menunulduꞌ kay seked dumateng si Jesus Kristo. Indyari kami mepebayaꞌ na metignaꞌ dut pemiriꞌ et Empuꞌ pebiyaꞌ eset pegandel ki Jesus Kristo.
25 Na tiban pengandel kityu ne eset Kenye, ki Jesus. Kaya ne kami eset kepegewlaan et Keseraan.
26 Sabab et pekikisembatu kew ki Jesus Kristo pebiyaꞌ et dimyung pegandel Kenye, ginsan kew negmendyaring yegang ne et Empuꞌ.
27 Indyari itueng ginsan neng nebewtismuan eset pekikisembatu ki Kristo, supaya megmendyaring kemyu samat Kenye eset menungang arat Ye.
28 Angkansa dut pemiriꞌ et Empuꞌ, kaya ne pegbidaan et Judio eset lein Judio, uripen etawa lein lang uripen, pelelaki etawa pelibun. Sabab ginsan myu sembebatu ga, pekikisembatu ki Jesus Kristo.
29 Angkansa na baꞌ kemyu tuꞌ ki Kristo ne, kebayaꞌ kew neʼt tungtung-inupuꞌ i Abraham indyari mekepusakaꞌ eset mengeꞌ netangeꞌ et Empuꞌ.