Menungang Abar pasal si Jesus Kristo Sinurat i
MATEO
Kepurisnan et itueng Surat i Mateo
Ating Menungang Abar sigun ki Mateo, atin megpesebanar na si Jesus ating ipinengtangeꞌ na Mememawiꞌ dut mengeꞌ taaw na gaay dye mengandel Empuꞌ. Sabab lang dut ki Jesus, tinuman et Empuꞌ kenyeng mengeꞌ tinangeꞌ et ating nekeuna neng pinegmeupakatan dut piniliꞌ Ye na bangsa na Israel, atin mengeꞌ tawʼt Judio.
Ating Menungang Abar na itue, diki lang dut binangsa Judio lang, baꞌ diki apang dut ginsaʼt taaw atuʼt sengkedunyaan. Seukat selus si Jesus in neng Yegang et Empuꞌ banar dut langit negmendyaring taaw bekeꞌ liminegdeng dut mengeꞌ tawʼt Judio atueʼt dunyaꞌ supaya tulduen kedye pasal et bagung dalan kesurung dut Empuꞌ.
Netedtad et menunga ating mengeꞌ neinabu na nesurat dut buuk i Mateo pasal et biyag i Jesus ganang Ya atueʼt dunya. Maya ating mengeꞌ tuturan pasal pegyegang ki Jesus, ating pegbewtismu bekeꞌ pegtuksuꞌ Kenye, Kenyeng pegpitua, pegtutulduꞌ bekeꞌ pegpepenunga dut probinsiya et Galilea. Tinuturan gasi atue pasal et seringkuar i Jesus tihad Galilea dut lungsud et Jerusalem, bekeꞌ mengeꞌ neinabu dut emuring linggu et Kenyeng biyag.
Simingked itue dut pegkeransang ki Jesus dut krus seked natey, bekeꞌ pasal Kenyeng pegbiyag peuliꞌ. Atuʼt tuturan na itue, si Jesus ipinekilala bilang metaas na menunulduꞌ na maya kependyarian megperetiꞌ et Keseraan et Empuꞌ, bekeꞌ pasal et Kemilikan et Empuꞌ. Sabab et pengandel tyu ki Jesus, mekedyari tyu megbiyag peuliꞌ gasi abit Empuꞌ banar dut langit, eset Kemilikan Ye, naꞌ atin ne Menungang Abar kityu.
Ketulduan et itueng Surat
Listaan et mengeꞌ Keupuꞌupuan i Jesus neng Kristo 1:1-17
Kepenggenakan i Jesus neng Kristo 1:18—2:23
Ating Pegsukuan i Juan neng Mememewtismu 3:1-12
Ating Pegbewtismu i Jesus bekeꞌ Pegtuksuꞌ i Seytan 3:13—4:11
Ating Pegsukuan i Jesus dut Probinsiya et Galilea 4:12—18:35
Pitua dut Bukid 5:1—7:29
Ketulduan is Jesus Kristo eset menge taaw 8:1—12:50
Mengeꞌ Beleybey pasal dut Kemilikan et Empuꞌ dut Langit 13:1—18:35
Keradya i Jesus tihad dut Galilea seked dut Jerusalem 19:1—20:34
Ating Emuring Linggu et biyag i Jesus bekeꞌ Kepeteyan ye 21:1—27:66
Pegbiyag Peuliꞌ i Jesus bekeꞌ mengeꞌ Pegpepebiriꞌ Ya 28:1-20
1
Kesuratan et Pengkatan i Jesus Kristo
(Lukas 3:23-38)
1 Itue kesuratan et pengkatan i Jesus Kristo. Ya in mawaꞌ dut pengkatan i Surutan Dabid tagnaꞌ. Itueng Surutan Dabid mawaꞌ gasiʼt pengkatan et upuꞌupuan i Abraham tagnaꞌ tiꞌ.
2 Si Abraham in amaꞌ i Isaak, si Isaak gasi tuꞌ, amaꞌ i Jakob. Si Juda bekeꞌ ketipusdan ye in, amaꞌ dye si Jakob.
3 Mengeꞌ yegang i Juda dut ki Tamar de Peres bekeꞌ si Sera. Si Peres tuꞌ, amaꞌ i Esrom na amaꞌ i Aram.
4 Si Aram in, amaꞌ i Aminadab. Si Aminadab gasi in, amaꞌ i Naason na amaꞌ i Salmon.
5 Yegang i Salmon dut ki Rahab in, si Boas. Yegang gasi i Boas dut ki Rut, si Obed. Si Obed in, amaꞌ i Jesse.
6 Si Jesse in, amaꞌ i surutan Dabid tagnaꞌ tiꞌ. Yegang i surutan Dabid dut esawa i Urias nekeuna tiꞌ, si Solomon.
7 Si surutan Solomon gasi in, amaꞌ i Roboam na amaꞌ i Abias. Si Abias tuꞌ, amaꞌ i Asa.
8 Si Asa in, amaꞌ i Josapat na amaꞌ i Joram. Si Joram tuꞌ, amaꞌ i Osias.
9 Itueng si Osias, amaꞌ i Jotam na amaꞌ i Akas. Si Akas tuꞌ, amaꞌ i Esekias.
10 Si Esekias in, amaꞌ i Manases na amaꞌ i Amon. Na si Amon tuꞌ, amaꞌ i Josias.
11 Si Jekonias bekeꞌ ketipusdan ye in, amaꞌ dye si Josias. Atin masa lineges dye negpeubuꞌ mengeꞌ tawʼt Judio dut bangsa et Babilonia.
12 Pegketbes pegpeubuꞌ dut bangsa et Babilonia, si Jekonias in, amaꞌ i Salatiel na amaꞌ i Sorobabel.
13 Si Sorobabel tuꞌ, amaꞌ i Abiud na amaꞌ i Eliakim. Si Eliakim gasi in, amaꞌ i Asor.
14 Si Asor in, amaꞌ i Sadok na amaꞌ i Akim. Si Akim gasi tuꞌ, amaꞌ i Eliyud.
15 Si Eliud tuꞌ, amaꞌ i Eleasar. Si Eleasar gasi in, amaꞌ i Matan na amaꞌ i Jakob.
16 Itueng si Jakob, amaꞌ i Jose na esawa i Maria. Si Maria tuꞌ, induꞌ i Jesus na pegbetengan si Kristo, ingin bersen, ya in piniling surutan et Empuꞌ.
17 Angkansa, ginsan in sempuluꞌ epat neglatun-latun pengkatan mewanan ki Abraham seked ki Surutan Dabid. Sempuluꞌ epat neglatun gasi mawaꞌ ki Dabid seked dut leges neng pegpeubuꞌ et Babilonia. Indyari, sempuluꞌ epat latun gasi mewanan eset pegpeubuꞌ dut Babilonia seked ki Kristo.
Pegkeganak ki Jesus Kristo
(Lukas 2:1-7)
18 Kwantin neinabu pegkeganak ki Jesus Kristo. Na si Maria in, kenyeng induꞌ bekeꞌ si Jose tuꞌ, megtutunang ne, segwaꞌ, mura dye nebulun, si Maria in megebteng ne sabab et kewasa et Empung Nakem.
19 Si Jose tuꞌ, tunang i Maria, metignaꞌ. Angkansa, pikir ye na taguꞌ yeng butasan ya, sabab mendiꞌ ye ipeleew si Maria.
20 Sasat pegpipikiren i Jose itue, maya dereakan et Empuꞌ neperenta kenye set seled teginep, kwan, “Jose, keupuꞌupuan i Surutan Dabid, kas takut peburuiꞌ na pebulun ki Maria sabab ya pegmengirem sabab et Nakem et Empuꞌ.
21 Indyari, megyegang ya et sembatung lelaki bekeꞌ itue pengeranan muʼt si Jesus, sabab ya in mememawiꞌ et kedusaan et mengeꞌ taaw na nemegkesalaꞌ.”
22 Ginsan itue neinabu apang metuman pegsugiran et Empuꞌ tagnaꞌ tiꞌ pebiyaꞌ et tarus ye neng si Isaias, kwan,
23 “Megmengirem itueng sembatung budyang, pegketbes megyegang et sembatung lelaki. Indyari, ngeranaʼt Imanuel, gay bersen eset sinalin, ‘Iba tyu Empuꞌ.’ ”
24 Pegkaꞌ neketiyag ne si Jose, inandel ye tahag et dereakan et Empuꞌ. Indyari, megbulun dye ne de Maria.
25 Temed kaya inulid i Jose si Maria seked nengganak itue et sembatung memulek na lelaki, pinengeranan yeʼt Jesus.