10
Mebawiꞌ Itueng mengeꞌ Tawʼt Israelita
1 Mengeꞌ ketipusdan neng mengengandel, keberbenaran kegeayan ku bekeꞌ pegpenelang ku dut Empuꞌ na mebawiꞌ itueng mengeꞌ Israelita.
2 Asal aku ne mekepebnar na mepituk dye pasal ki Empuꞌ, segwaꞌ kepuunan dye, diki teyeg et sugat neng kesesewran.
3 Gaay dye nepetiyeg et diriꞌ dyeng arat. Binwat dye itue sabab ingga peꞌ neretian dye ating paru pasal et ketignaan mawaꞌ dut Empuꞌ. Angkansa, mendiꞌ dye pesakup dut paru et ketignaan et Empuꞌ.
4 Si Kristo ating kesusungduan et Keseraan et Empuꞌ tagnaꞌ tiꞌ, angkan supaya mantang ne et metignaꞌ sebarang mengengandel kenye.
5 Pasal et megmendyaring metignaꞌ kuyun dut keendelen et Keseraan et Empuꞌ, kwantin pengatur i Moises, kwan ye, “Ating taaw metbes et itueng ginis, biyag ye banar dut Empuꞌ.”
6 Kwantin gasi ketignaan et pasal dut pengandel, kwan,
“Kasiꞌ pegsugiraꞌ eset dimyung diriꞌ, ‘Sinu keribuwat dut Langit?’ ”
Ingin bersen supaya ipeineug si Kristo apang mebawiꞌ kityu.
7 “Etawa, ‘Sinu keineug dut kerereman?’ ” Ingin bersen supaya biyagen si Jesus Kristo teyeg et kepeteyan apang mebawiꞌ kityu.
8 Segwaꞌ enu pegsugiren i Moises? Kwan ye,
“Ating beres et Empuꞌ mekabiꞌ ne set dimu, daran esen neʼt munung mu bekeꞌ eset atey mu.”
Itue atiʼt bebresen pasal pengandel neng pepebunayag kay.
9 Baꞌ ipesebanar mu ne, kwan, “Si Jesus, atin Begerar ku” bekeꞌ mengandel ke dut atey mu na ya binyag et Empuꞌ teyeg et kepeteyan, mebawiꞌ ke.
10 Sabab pengandel ke pebiyaꞌ dut pusuꞌ angkan pinepantun ke et metignaꞌ dut pemiriꞌ et Empuꞌ, bekeꞌ pepebnar ke gasi na si Jesus atin Begerar mu pebiyaꞌ dut babaꞌ mu angkan nebawiꞌ ke.
11 Kwantin pegsugiren dut Kesuratan et Empuꞌ, kwan,
“Sebarang mengandel kenye diki lang meglelew.”
12 Kaya pinegbidaan ating tawʼt Judio bekeꞌ ating tawʼt lein Judio. Sembebatu ga Begerar et ginsan neng megebgey et neglebi-lebi naꞌ ingasiꞌ dut ginsaʼt megtingkag kenye.
13 Samat nesurat, kwan,
“Sebarang megtingkag dut ngaran et Begerar, atin mebawiꞌ.”
14 Enukwan dye tingkagan ating diki dye pegendelan? Enukwan dye endelen baꞌ diki dye mekekingeg? Bekeꞌ enukwan dye kumingeg baꞌ kaya menunulduꞌ megpeabar kedye?
15 Bekeꞌ enukwan dye kepepeabar baꞌ diki dye dinaak? Samat nesurat, “Enung pegkenunga-nunga siyekan ating megderateng et mengeꞌ dinaak neng pemibit et Menungang Abar!”
16 Segwaꞌ diki ginsaʼt tawʼt Israel tumerima et Menungang Abar. Kwan i Isaias, “Begerar, sinu takuꞌ mengandel et damen neng pegabar?”
17 Angkan pesi ating pengandel mawaꞌ dut pekikingeg et pegabar bekeꞌ ating pegabar neng pekekingeg pasal et bebresen i Kristo.
18 Segwaꞌ ingkut ku, diki ne mengeꞌ tawʼt Israel takuꞌ nekekingeg? Nekekingeg dye pesi! Samat nesurat ne dut Kesuratan et Empuꞌ, kwan,
“Pasal luluwaan de Isaias neng mengeꞌ tarus, napet ginsaʼt pidyuruꞌ et dunyaꞌ, bekeꞌ ating mengeꞌ bebresen dye limingkep eset sengkelingkepaʼt dunyaꞌ.”
19 Ingkut ku gasi peuliꞌ, diki takuꞌ nekeretiꞌ ating mengeꞌ tawʼt Israel? Una-una nega sinugid et Empuꞌ ne pebiyaꞌ i Moises, kwan,
“Ipeimbeng ku kemyu sabab dut mengeꞌ taaw neng diki gasi binangsa.
Peisegen ku kemyu sabab dut sembatung bangsa neng kaya pengretiꞌ.”
20 Negberes gasi Empuꞌ pebiyaꞌ i Isaias et kaya lang takut-takut, kwan,
“Nebiyanan aku et sebarang kaya pengebiyaꞌ daken, negpesewd ku dut sebarang kaya pengingkut supaya mengretiꞌ pasal daken.”
21 Pasal et bangsa et Israel, kwantin gasi sinugid et Empuꞌ pebiyaꞌ i Isaias tagnaꞌ tiꞌ, kwan,
“Negsingapun kintang ku daken neng keremut supaya menabang dut sembatung mektul ulu bekeꞌ mesmal neng bangsa.”