Selusien koa helamu ten
Kolose
?Isei mutis selusien koanik?
Pol, koa vi eiloheh tai onen Iesu Kristo mutis leta koanik en sua 60 AD (sua keil koa katau en avong Iesu avasi), navong mul en eim tai en out Rom ka meatin tavaeen keil amul alei kokoe eni.
?Isei vuli selusien koanik mulamu?
Pol mutis selusien koanek va min Kristin keil koa amul en taon ten out Kolose. Navong Pol mul mum en taon ten out Efeses, meatin tai mai kur demkatien, isen Epafras. Evus, kei kur more longlongien va min koakeil en out Kolose. Katau suk, kei va ka ro en eim takeih ral min Pol. Pol mutis leta koanek va min keil veni tiser taluvosien keil amul asan hihiseien tateisav keil min keil koa arvitei anatin. Sakini, Pol en vati vatalimal en rendemien one.
?Pol mutis selusien koanik vensa?
Pol en vati vatalimal en rendemien one usil anien sa tahos taanianien ka avong sa en wik koa mal avaha netan min Ahi eni – Tiser taluvosien keil amul aviteni min keil keke Kristin keil anatin anaantei tei en anien koa, ka usil kat revi avong votut keil koa. Ka Pol viteni min keil keke tounah keil enek vi heisav enges, ka mal imok iling desien one en Iesu Kristo.
Pol en vati vatalimal en rendemien one usil sakien ten vekahoi – Tiser taluvosien keil amul aviteni keke Ahi en vat Kristin vasi keil avaha en vekahoi. Ka Pol viteni min keil keke Ahi rolestei koakeil uva en vekahoi ateisav en koakeil arvatei en vekahoi.
Pol en vati vatalimal en rendemien one usil sakien koa uva netan min angelo keil eni – Tiser taluvosien keil amul aviteni keke mal Kristin keil avaha netan min angelo keil. Ka Pol viteni min keil keke Ahi en vati avaha netan min Kristo.
Pol en vati vatalimal en rendemien one usil Iesu Kristo – Tiser taluvosien keil amul avati lat sakien savsav keil keke Kristin keil avamai avamal en meten Ahi eni, ka arselustei vahi houlu usil Iesu Kristo. Ka Pol vati lat isen Iesu Kristo vit keil iapil vituai hetal mini keke avamal en meten Ahi.
Pol en vati vatalimal en rendemien one usil sakien koa akilea avakur rendemien suai onen Ahi eni – Tiser taluvosien keil amul aviteni keke akur rendemien suai tai onen Ahi koa akilea avahit luvati min koakeil amusil keil. Ka Pol viteni min keil keke Iesu Kristo varei vi rendemien suai onen Ahi.
Mari rendemien tai ten selusien koanik mul en Kolose 2:9-10
Minamaentei keil analuvos kami veni vi anatin keke tounah vasi koa mul en Ahi, kei mul tuai en Iesu Kristo koa aven mul. Ka veni mimul mikapil ral mini, mul sakin demkatien onami vilelau. Kei varei vi avat onen avat keil ka hetetamen savsav vasi keil.
?Asa mul en selusien koanik?
1. Iesu Kristo vi hetetamen imok en tounah vasi. (1:1-23)
2. Koakeil akapil vituai ral min Iesu Kristo amal en meten Ahi, rovitei ven mengkatien keil koa amul amusili. (1:24–2:23)
3. Koakeil akapil vituai ral min Iesu Kristo, moulien one hehilelau en sakien ten envatien, masmasien, ka tomat. (3:1–4:18)
1
Hitkileaen onen Pol usil leta koanik
Inau Pol koa navi eiloheh tai onen Iesu Kristo musil envatien onen Ahi namutis leta ekek ral min Timoti koa vi tuer en demkatien.
Namutis leta koanik min kami, meatin keil onen Ahi koa mimul en taon ten out Kolose. Kami mivi tuak ka ahinkuli keil en demkatien veni rokapil ral min Iesu Kristo.
Melvisi keke more envatien ka tomat onen Ahi Tamer hel ven kami.
Pol masmas Ahi ven demkatien onen me-Kolose keil
Navong komal melvis ven kami, lisenges melmasmas Ahi, tata onen Iesu Kristo, Asuv orer. Veni mellong usil demkatien onami en Iesu Kristo, ka envatien onami en meatin vasi keil onen Ahi. Kami mimumoni mukonek veni miling desien onami en Ahi keke tounah koa ling revi ven kami en out nesa vi anatin. Ka miling desien onami en hatkatien koanek navong milong selusien ten anatinien koa ka en more longlongien usil Iesu Kristo. Navong more longlongien mai rohtoh ven kami ka mikilea revi more envatien onen Ahi, son heite en moulien onami. Anatin, son heite en kami suval koa mul son heite en moulien onen meatin keil houlu en out netan. Kami mikur more longlongien enek ka ven Epafras, more meatin toumien onen Iesu Kristo koa mul mum vituai ral min komai. Kei mul mum en usite onami, ka run min komal usil envatien koa Ninin Votut mul sani min kami.
Ven koanik, navong mellong usil sakien onami rokol kosa, komal melromusehtei en hisien onomal ven kami. Melmul melvis Ahi keke hesakin kami miheilea revi asa koa kei en vat kami mivoumoni, ka mihehilelau en meteisauen ka ileilien koa ka ven Ninin Votut onen. 10 Hemukonek, ualien onami hevinvin en koakeil amusil kat Ahi Asuv ka hesan sien mini. Anatin, Ahi hesi kei ven kami navong moulien onami hel heson more heite keil koa vi umen tetahos keil, ka navong ileilien onami en kei hemai hemariso mok. 11 Komal melvis Ahi keke houmon demkatien onami hekeih imok hetal min marmari keihoen vasi keil koa mul en hen. Melvisi keke hesak mesein kami keke mikilea mivalomal vakeih en tounah vasi vatal min sien ka rendemien koa taveah. 12 Melvisi keke hesakin kami mikilea mivamasmas Ahi Tamer koa mul sakin kami mivinvin keke mivakur hatte ten asa koa ling kati tuai vahi onen meatin keil onen koa amual en meneai. 13 Kei mutut ir ran keihoen ten mankoli, ka ling revi ir en keihoen onen Natnali koa envatien onen mul ien keke kei helosil kat revi ir suval asuv houlu orer. 14 Veni, ka en asa koa Iesu mumoni, Ahi mumon sise keke rovamaluv ran keihoen ten tisaen ka mumon methos ral min ir keke hermundemtei mun tisaen keil orer.
Iesu Kristo vi houlu mok en tounah vasi
15 Meatin sakras vales Ahi.
Ka navong ales Iesu Kristo, ales Ahi.
Veni Iesu vi Ahi en usite vasi keil,
ka kei vi houlu* en tounah vasi koa Ahi mumoni.
16 Veni, ka en kei,
Ahi mumon tounah vasi en out nesa ka en out netan,
tounah koa rokilea rovalesi ka tounah keil emun koa rosakras rovalesi.
Ka en Natnali,
Ahi mumon asuv houlu keil ka kavmen keil koa akur keihoen en out netan,
ka angelo keil ka temat keil emun koa akur keihoen en out nesa.
Anatin, ka en Natnali,
Ahi mumon tounah vasi keke avahouhou mini.
17 Iesu Kristo mul mulamu en tounah vasi keil
ka sakin tounah vasi keil enek amul amusil asa koa Ahi ling kati.
18 Kei vi avat ten Sios koa vi aven,
veni kei vi vatte ten moulien teni.
Kei, Ahi sakini moul eris ran matien mulamu en meatin sav keil suval koa kei vi moeite en keil.
Sakini, kei kur out koa mulamu lohlin tounah sav vasi keil.
19 Ka en Kristo, ir rolei vasin Ahi,
veni tounah vasi koa mul en Ahi, Ahi si kei vasien Natnali eni.
20 Ka en kei, Ahi si kei keke kilea valing tomat vatal min kei ka tounah sav vasi keil;
tounah keil koa amul en out netan ka en out nesa emun.
Anatin, ka en matien onen Natnali en aiveave,
Ahi sakin tounah keil koa kei mumoni amul en tomat ral mini.
 
21 Mulamu, kami mimul soutin ran Ahi ka mivi vativieh keil onen, veni tounah keil koa mimumoni ka mimundemi atisa. 22 Ka kosa, ka en matien ten aven, Iesu Kristo sak revi kami keke kilea valing kami en meten Ahi ka mivahi votut, mivatolas, ka helesi keke tounah tovuol emun vatisa vaha kat usite onami. 23 Koanek vi anatin munak kami miheles mihelomal hekeih en demkatien onami ka minahilestei rani. Minamaentei kami minalokovein desien onami en Iesu Kristo koa mikuri navong milong more longlongien usili. Vati more longlongien enek, avitehiteni min meatin vasi en out netan, ka inau, Pol, numai navi meatin toumien tai teni.
Pol selus usil umen onen suval meatin toumien tai ten Sios
24 Kosa, namul nasi inau keke makur mahien keil ekek ven kami. Veni, en avek namul nakur vasin mahien keil koa Kristo ling kati tuai keke makuri vakataun Sios onen, koa vi aven. 25 Ahi varei ling inau navi meatin toumien tai ten Sios. Ka kei san umen enek minau keke maha mahit luvat selusien onen vakataun kami koa mirvitei Siu. 26 En avong mulamu rokol kosa, aneite ten lingkatien suai enek mul suai ran meatin keil. Ka kosa, Ahi mul vothot eni min meatin keil onen. 27 Anatin, Ahi rie lat keil keke vahothot en more lingkatien suai onen min keil koa mukok: Kristo mul moul en kami koa mirvitei Siu keil keke, kami mun, mihendesini keke mivakur hatte ten hetetamenien onen. 28 Sakini, komai meva mevitehiten Iesu Kristo min meatin vasi. Ral min meteisauen ka ileilien, memul mesel kat meatin keil ka mevisein revi keil. Memumoni mukonek keke mevalah meatin keil vasi koa akapil vituai ral min Kristo avalomal en meten Ahi vasuval meatin keil koa demkatien one men tuai. 29 Ka ven koanek varei, namul namum keih ka nalehkao houlu ral min mari keihoen koa Iesu Kristo mul sienau eni.
: Kol 1:1 : Kol 1:24; 4:10,18; Umen 28:30-31 : Umen 19:1-41 : Kol 1:7-8 : Kol 4:12; Flm 1:23 : Kol 2:8 : Kol 2:7 : Kol 2:16 : Kol 2:17 : Kol 2:11 : Kol 3:11 : Kol 2:18 : Kol 2:19; 3:1-4 : Kol 2:18-19 : Kol 2:15-20 : Kol 1:2; 2:6,10 : Kol 2:8,18 : Kol 2:2-3 1:1 1Kor 1:1; Efes 1:1 1:3 Efes 1:16; 1Tes 1:2 1:4 Efes 1:15 1:5 1Pit 1:4; Efes 1:13 1:6 1Tim 3:16; Rom 1:13 1:7 Kol 4:12 1:9 Efes 1:15-17; Plp 1:9; Efes 1:9; 5:17 1:10 Efes 4:1; Plp 1:27; Efes 2:10 1:11 Efes 1:19; 3:16 1:12 Efes 1:18 1:13 Luk 22:53; Efes 1:6; 2:2; 6:12; Mat 3:17 1:14 Efes 1:7 1:15 2Kor 4:4; Hib 1:3; Sion 1:18; 1Tim 6:16 * 1:15 vuo moeite 1:16 Sion 1:3,10 1:17 Sion 1:1; 8:58 1:18 Efes 1:22-23; 4:15; 5:23; Umen 4:2; 26:23; Rev 1:5 1:19 Sion 1:16; Efes 1:23; Kol 2:9 1:20 Efes 1:7; 2:16; 1Sion 2:2; Rom 5:1; Efes 2:13; 1:10 1:21 Rom 5:10; Efes 2:12; 4:18 1:22 Efes 2:14,16; 5:27 1:23 Hib 3:14; Efes 3:17; Mak 16:15; 1Tim 3:16 1:24 Efes 3:13 1:25 Efes 3:2,7-8 1:26 Rom 16:25-26; Efes 3:3,5,9-10 1:27 Rom 16:25; Efes 3:9; 1:18; 1Tim 1:1 1:28 Efes 4:13 1:29 Efes 3:7,20; Plp 4:13