22
16 Munak atouli tai mul koa reingeingen meatin veah ka meatin tovuol vating koe vahi onen, ka munak meatin tai run luvosi ka matil ral mini, kei hehul tata onen veni ka hekuri hehi onen ka hetetalihe suk hetali.
17 Ka munak tata onen heseseini keke meatin enek vakuri, meatin enek hehul tata enek en mani koa hevinvin en mani koa avahul atouli koa reingeingen meatin veah eni.
18 Isan matien min ahin koa hel houmon eimas.
19 Isan matien min meatin koa hesak tisa en buluk ka sipsip hesuval meatin koa sak tisa en ahin.
20 Isan matien min meatin koa hesan sanien votut heha min ahi sav tai. Keil isan sanien votut minau nges, Iahova.
21 Minapuruntei vuo minakarentei meatin koa rovitei horetan. Mihendem kati keke mulamu, kami mun mirvitei horetan en out Isip.
22 Minapuruntei vatina vuo timaru keil.
23 Ka munak misak purun keil, inau, Iahova, nilong tangien keil one ka nimai nikataun keil.
24 Nivuroh kat kami ka nuas kami mihematmat en rea keil. Nisakin ahin onami keil ihi vatina ka titiali onami keil ihi timaru.
25 Munak mimaen livere tai hekur hati mani ranuk, minoumontei nasuval meatin keil ten bangk, minahistei nasa kesi min kami natal titan.
26 Munak meatin kur tounah tai ran kami ka mihuli kat eisin omon hetokol avong koa hemai ris hehul lati; minahuli kattei eisin omon natokol meteiai nanu.
27 Mihesa kekerati mini veni mireingeingeni keke eisin koa netinek keke kei kav koe aven eni valikat anni. ?Asa suk keke kei hematil eni? Ka navong tangien onen hemai hetokol inau, nilonge ka nikatauni veni inau, nakur enmahisien en vati meatin keil koa mukonek.