6
Tunien usil Noah
Senesis 6:5-22; 7:1-5,16-17,23; 8:15-22; 9:1-15
5 Navong meatin keil umai avi houlu en out netan, Iahova les sakien keil one rotahostei. Rendemien one vilelau en tisaen lisenges.
6 Sakini, Iahova tin mah ven sakien one, ka longe tisa ven meatin keil koa kei mumoni.
7 Sakini, viteni min kei sasen vit, “Koakeil namumoni ekek, nu rasilin keil ran out netan. Keil ral min tirendan keil, aman keil, ka tounah keil emun koa amoul, veni nalonge tisa houlu vis houlu mok ven keil. Tahos imok vahit marmumontei keil.”
8 Ka meatin tanges, Iahova si veni, isen Noah.
9 Koanik tunien usil Noah. En avong onen, kei enges vi more meatin koa musil kat Ahi en moulien onen ka sakien keil onen mutolas.
10 Kei, natnali etel: Sem, Ham ka Sevet.
11 Ka meatin sav vasi keil en out netan artahostei en meten Ahi. Keil asakin out netan vilelau en huhuen keil.
12 Ahi lele mita netan, ka lesi keke tounah tisa revi mok, veni tounah vasi koa amoul amusil sakien tatisa keil enges.
13 Sakini, en avong tai, Ahi viteni min Noah vit, “Namundemi navit nu rasilin tounah vasi koa amoul, veni asakin out netan vilelau en huhuen keil. Anatin, keil vasi en out netan nu rasilini varei.
14 Sakini, kumon mari sip tai koa kilea voulal. Kumoni en ai tetahos, kiti kokoteh out neim eni, ka kiting koe en koltar neim ka hae keke oai sakras vaha neim.
15 Kumoni hemukok: mita ten taveah teni hehi handred tai ka hanumau elu ka halualim emun (150 m), mita ten aven hehi hanumau tai ka elim (25 m), ka mita hehina nesa hehi teindan elim (15 m).
16 Hoite teni helin uriov en hap mita (½ m). Ka en out neim, kumon out toualien hetel: tai hel nesa, tai hel luhu, ka tai hel netan. Ka en valite, kumon voiteh hetas.
17 Kumoni hemukonek ven inau, numon oai hemai hemarite ka hemai hetaluh koe out vasi. Ka houe, hou vasin tounah keil koa amoul en out netan. Keil vasi imatmat varei.
18 Ka keik, inau numon hatkatien takeih hetal minuk keke nikur koe keik ka onom keil. Miheha en mari sip enek: keik, ahin onom, ka titam keil hetal min ahin one keil.
19 “En mari sip enek, kikur tirendan vasi keil ka aman vasi keil helualu, tai koa meahos ka tai koa ahin.
20 En tounah vasi koa moul en out netan kumoni vatinetinek: elu en koakeil amuka, elu en koakeil amual, ka elu en koakeil akekelau. Kisakin keil imoul hetal min kami.
21 Evus, kikur anien tateisav vasi keil koa hehi ami ka ae, ka kiling revi en mari sip enek.”
22 Ka Noah mum vasin tounah koa Ahi meng kati mini voumoni.